ჭუკიშ არიკი
ართ ჭუკიქ ართ დღას მუ თქუნ, გიჩქუნანო? თე ქიანას უდიდაშ მით ორენ თის სინჯა ვაჸიქია. თელ ჭუკეფქ გეციის დო ირიშ უდიდაშ ბჟა რე, სი თიშა იდიია ვადო ქაწურეს.
ჭუკიქ ბჟაშა მიდართუ
ანწ ჭუკიქ მიდართუ ბჟაშა. მოთ მორთი ჩქიმ ჭუკია ვადო კითხუ ბჟაქ. ჭუკიქ, ირიშ უდიდაშ მით რენ თიშ ძღაბი ვიჸონე ოკო მაქ დო დიფრცქინი. გოვიკითხინ, ირიშ უდიდაშ ბჟა რეია მიწუეს, მათ ქომოფრთი სქანდა, სქან ძღაბი ქომუჩე ოკოვა უწუ ბჟას. ვო ჩქიმ ჭუკია, თუთა სერით ხოლო თოლს ორწყე, მა სერით ვა ვორწყექ. უდიდაშ თუთა რეია უწუ ბჟაქ დო შარას ქოგიორინუ ჭუკი.
ჭუკიქ თუთაშა მიდართუ
ჭუკიქ გიოდირთუ შარას დო გუდაშ დინომბარუა დინომბარუათ, შქა სერს თუთაშა მიდართუ. თუთაქ, ვო ჩქიმ ჭუკია, შქას სერს თაქ მორთინ ფერქ მუქ გაღოლუა დო უღაჭალუ. ჭუკიქ ხოლო, ბჟაქ მუმოშქუ, თე ქიანას უდიდაშ სი ყ’ოფექ დო სქან ძღაბიშ ოყ’ონაფუშა მოფრთია უწუ თუთას. ბჟაქ ტყურა გიწუა, სერით ქოვორწყექ მარა მუნაფა მოურს დო ქაწმაფორუ, თიწკუმა მუთუნ ვა მაძირეია, მა მუჭოთ მიჩქუ ირიშ უდიდაშ მუნაფა რე, სი თიშა იდიია უწუ თუთაქ.
ჭუკიქ მუნაფაშა მიდართუ
ჭუკიქ ბირა სხაპუათ მუნაფაშა მიდართუ. უწუ მუნაფას: გოვიკითხი დო თე ქიანას ირიშ უდიდაშ სი ჸოფექ. სქან ძღაბი ქომიპჸუნე ოკო, თაშნე ვორექია რცქინაფილი. მუნაფაქ, სი მიქ გიწუ? ვადო კითხუ. თუთა სერით გიოთანუანსინ თეშ მოურქ დო ქოწაფორუქ. თუთა თოლს ვა ორწყეია. მუნაფაქ, ვარ ჭუკი, ვარია, ირიშ უდიდაშ მა ვა ვორექ, უდიდაშ ბორია რეია. ბორია დუმბარანსინ, მელე ქუდმორაგუანს დო შკვით გოლას გეგნმორაგუანს. თეშენ, უდიდაშ თინა რეია უწუ მუნაფაქ. ჭუქიქით ებორჯუ თე ამბეს. ოდო, თაშნე გურგწყანწილქ, ჭიი-ჭიეთ მიდართუ ბორიაშა.
ჭუკიქ ბორიაშა მიდართუ
ვა ბორია ჩქიმია. სი შხვა მითინშა ვა მოშქვა, ირიშ უდიდაშ მა ვორექშო მიწი დო სქან ძღაბის მიდეპჸონანქია უწუ. თიწკუმა ბორიაქ, ვო ჩქიმ ჭუკია, სი მუნაფაწკუმა რაგადანდინ თეშ მა თაჸურეშე მიკმიიფში, მუთ იჩიითინ ირფელ ქიგებგია, თაშნე, უდიდაშ მა ხოლო ვა ვორექ, ტყურა ვა მარაგადენია. მი რე იწკუმა უდიდაშ? ია უწუ ჭუკიქ. მუნაფაქ მართალ გიწუ, თუთას მევუმბარანქ დო მელე გინვოჸოთანქ. მარა მელენ გოლას გილადგუნ თი ჭყონს ქარწყექია ვაო, სუმოშ წანა რე თის მევუმბარანქინ, თესხი ქოდოვუქანცალე და ვა ეკმართინუ, უდიდაშ თინა რეია უწუ ბორიაქ.
ჭუკიქ ჭყონშა მიდართუ
ჭუკიქ რულაიათ გეშასხაპუ ჭყონშა დო ნოჸელას ქოგილადოხოდუ. მანგარო ქომაშქირენუ დო ჭყონიშ თასიშ ჭკომუა ქოდიჭყუ. ჭყონქ ქოძირუ ჭუკი დო ჩქიმ თასის მუშენ ჭკომუნქია დო უღაჭალუ. ართ კაკალ თასის გურშენ მოთ მიღაჭალუქია, მუ ამდღა მუ ჭუმან სინჯა გაჸიქია უწუ ჭუკიქ. ჭყონს დეინტერესუ დო კითხუ, მუნერ სინჯავა? ჭუკიქ ეხვეწუ, ვო ჩქიმ ჭყონი, მა რცქინაფილ ვორექ. თე ქიანას ირიშ უდიდაშ მით რენ თიშ ძღაბი ოკო მიპყ’ონენია. ოდო, ბორიაქ სქანდა მუმოშქუ. უდიდაშ სი ჸოფექია. ჭყონქ ართ ჯგირო გიძიცუ. ვო ჩქიმ ჭუკია, მუს მიკმარჩქინი, ვა ფჩოდუ. სი ტყურა გიწუეს. მა უდიდაშ ვა ვორექია. ჩქიმ თუდო ართ ფოქვი რე. გეგმორთი დო თექ გემთორთიდო მისით ძირუნქინ თინა რეია უდიდაშია უწუ.
ჭუკიქ ჭუკშა მიდართუ
ჭუკიქ რულია-რულაიათ გეგმორთუ დო ფოქვშა მითილუ. მითილუ დო გიჯინუნ, ჩილ დო ქომონჯ ჭუკეფს მუნეფიშ ჩხორო ბაღანაწკუმა ართო ყ’უდე გაგმუუნწყუნა დო თაქ ქოსქიდუნა. ჭუკიქ მუთუნს ვა მეხვადუ, თე ჭუკეფი ირიშ უდიდაშ მუჭო იჸუაფუნანია უწუ. ჭყონქ, ვა ორწყექო, მუზმა წანა რე თაქ გეფჩანქინ. მითინს მუთუნქ ვა აღოლინუ. თე ჭუკეფქ თუდო გემითომხოხეს. მიხვატეს, მიხვატეს დო თელ ჩხვინჩხვი ომიჭკომეს. თეშ გურშენ მუ ამდღა მუ ჭუმან ეკიფრთუქ, დღალეფი გამითუესია. ჭუკიქ იფირქუ, იფირქუ დო ქიმეხვადუ, მით დიდ რე, მუშ დუდშე დიდ ჸოფენია დო მითილუ ფოქვიშა დო ძღაბი კითხუ.
ჭუკიქ ჭუკი ქომიჸონუ
თინა ხოლო ჭუკეფიშ მაფა ვა ყ’ოფენო! გეჭოფუ დო მუშ ძღაბი თე ჭუკის ქომეჩუ. მაფაქ ბაღუშ ხიბა გონწყუ. თხირი, ნეძი, ჯანჯუხა, ჭაფურია ოპჭკომით. ართ ხოლო ჯგირო გუდას ქიგვოსხაპით დო ქომოფრთი.
მუნწი მუნწი მუნწალა, ქომოფრთი ხვალე ხვალე!