ხეშ თხუალა
ნოტე ჩილო გინომშქვასჷ
თე ზესნახე - ელ დო ვალი,
მუმა, სი მუს ოღვიზინა
ხეშ თხუალა ქჷმაცალი...
ნინას ვოუტაბაჩუა,
ქიდმეკვირი აშო, მა სი,
დიაშ შურმე, თეშ გინგოშქვა
დუდი სქანი რჯოგუნდასი...
გიწინქ ასე, მუ მილამუ,
ართი რთხულე, ქუდმაჸუნე,
თიცალ სინჯა გაჭარუქჷ
ნარცა კუჩხშა ვაგაჯუნე...
მათ ვამიღ დო სქანით ვამკო
ორქო-ვარჩხილ, კიჩილ ფარა,
ოზეს კოკუჩ იფოფრჷნ
მექაც დუდი, ვედიზარა...
ღვინ გეხერკი ლაგვანიშე,
მირჯი ჟინოსქუალურო,
ეჩდოჟირსჷ თეშ გეიშვუ
მუთუნ ვაგმოხედას შურო...
სქან ცირაში ხეშ მათხუალქ
ეგბა გემკორჩქინდას თაქი,
გიჩქუდანი, თი სარალოს
შქაბანს გიბღა, გივაშქვანქინ!
ატარ ქვინჯშა გეშამიშვი,
აშო ვამოძირა მერკე,
სინჯათ ვაგაწონებექჷ
შქაშიმალო ოკო მერგე...
...მუმაქ ცირა თაქ ქიმლეტუ,
ჸოფე კუჩხის ვაჯუნენი...
ლაგვან ეშამსქირუას დო
მიკუკირდას მარულენი...
მუ სანწალე იჸუნუნი,
დუს დიჸვილუნს, ქუჩქუდასი,
მალას თისით ქობძირუნთი
ყვაშა იტოხუანდასი...