ხვათახვალე
ჰა, ხვათახვალე ქიმკვოსქიდი ჭვემა-ჭოროფას,
ჩელა მუნაფას ქუვხუტოლე ჩქიმი ლერსეფი,
გურიშ ტომბაშა მუ უღალჷ თეზმა ჸოროფას?
ირიათონქჷ დჷმოგურუ რინაშ წესეფი.
ართო ჭუა რე, მუჭოთ ქირსეშ ჭიფე ლისმარი,
ტანცჷ წირღოლი, ჸარაიას გევორექ ხვალე,
ღურუშ შარა-კარს გჷმოშინანც არძა სისმარი
დო მათხირცალო გივოჩვიგჷქ სქან გურიშ გალე.
მოფორჩილი რე დღალეფი დო ირქენც ბორია,
გვალაშ ლაკადეფც ეკოთხოზჷ ფირქი რტებული,
ჸოროფაქ მორთჷნ, თი შვანც დუდი აკივბორკია,
ხვალე თიშოთჷ ვორექია შურგოტებული.
არძა ნარტისჷ ნოკობუე ხეში გოლუა,
მაღურუცალო დინმოჯინე ხუმლა პეული,
თაქ ხვათახვალე ვანორგებე ნგარა-თვალუა,
ოწმახ გიჩქჷ და ოღურუშა მუშენ მეული?
ეკონია რე, ომბოლო ჩქუ ასე ლანჯეფი
დო ჩქინი შკასჷ უჩურცხალი ჭუა ეშარე,
დუც გინმოჯინე თირმოლებური ქირქე-წვანჯეფი
დო არძა ლიმენც მივაკითხა, მუჭოთ მეშარე.
2014 წანა, ღურთუთა.