ჰომეროსი. ილიადა
მუზაში ღორონთი გასქვამი პელეიანი აქილი
გოჭყორინელი, აქელეფი მიქ გუტუ გური ხარცქილი
გოჭყვიდ მიარე მალმორი; შური გეშუხინტკორ თინემც
ქინარღუ აიდი წკვარამც; ქაწურღუ ჯოღორეფ ყორანემც.
შინელეფიში ნძორეფი, ზევსიში ზოჯუაქ შისრულუ.
ეთი დღაშე, მუთი ერის, თინემც აფუდ ჸვანგინი შხაფა,
აქილი ჟინოსქუაში სქუა, ატრიდი ხარხიში ჭყიში მაფა,
ნამუ ღორონც უქიმინ თე ჟირ ჯიმაში გაკორთაფა,
ლეტი დო გურგინი ტყვაციში სქუა ფები მაფა თე კონწარი
ხარხის უჩქვანც უჩა ჭირც: ჭყორდ უკოროცხ ჯარი.
თეთ ასაჯენც ატრიდის რახანც თიქ ჸუ ოკნანწალა,
ქრიზი, ქურუმი მუნაველი ფსუამი ხვამარდელფი წკალა.
ოკოდ თის ეშერსხკონი არგოსელეფიში ტყვე ცირა,
ორქო-ვარჩხილი უკოროცხ, უზიმ - უწონ მუღუდ ქირა,
ფებიში ჯიღა გიორთუდუ, ორქოში ბიგა უკებუდუ,
ჩილამურიში ხვარჩალითჷ აქელემც თაშო ოხვეწდჷ;
გორტიბაფუდან ღორონთეფი, ოლიმპიში გვალას რინელეფი,
დოგიტახდან პრიამიში ჯიხა დო სამანცარო რჯგინელეფი,
ჸუდეშა დორთედათ; ცირა ჩქიმი თქვა ქომუჩით მა,
მიოჯინით თქვა ღორონც, ქირათი მირთვით თიში გამა.
აქეელემქ ართი კოჩქჷნი თეში დიჭყეს ოჸიაში კიჟინი;
მივოჯინათია ქურუმცუ, იჸი ღორონთიში ტიბინი.
ხვათახვალე ატრიდ მაფას გურცუ ვემკარდ თე ხონარი,
ქურუმი ქარაჸ გური მულირქ, კონწარ ეჩიუ საჩიარი:
"ბადიდი ანწი მა ვარძირა ჩქიმდა მულირი მათხუალო,
თაქ მუს გერექ? მეუ, დიქოს! მითქუალჷ გაშინალო,
ვარა მუთუნცუ ვაგოხვარ სკიპტრა, პორფირი ფებოში,
შურც ქჷდიტალე, დოღურუქ, მოჯგირე ღორონთეფიში.
ძღაბის მა ვაგვადუდშულე, ინა ტყვენი თეში დოჟღირ,
არგოსიში ჩქიმი დოხორეს, დო სი სქანი ხოლოს ვაძირჷ,
ორქოში შიბილჷ სქვამც ქჷდიდგნც, ქალამჷდოხოდ ტახტის ხუცუ,
თელო დორთა ქგოკონდა, მეუ, ნამ გჷმოსოფა გურცუ".
ქოუწუ დო შიშის ღურელი პაპა ზოჯუაში მარჩქილე...
- არც ბერძნული ენა იცოდე და ელინური სულის ეს დიდი ნაწარმოები არც გქონდეს ხეირიანად სესწავლილი, ისე თარგმნა ხომ შეუძლებელია და მეც მივატოვე.