ჸოროფას
ჸოროფა, დღას ვაგეთუო,
თე სასქანო ოჭარალენქ:
სქანი ცქვაფა ვენტირენი,
ვეშჷრუო თე კალამენქ?!
ვაბაღჷნო, რუსთაველც
მუთი სქანდა ქუცქვაფუნი
დო შხვა დო შხვა პოეტენც
თეთ წიგნეფი ქუფშაფუნი.
თქვა ფირქენთო, თე მა ხოლო
თქვანდა მიცქვაფუაფუნი
დო ჩქიმ სუფთა კალამც ხოლო
თქვანდა აჩილუაფუნი.
ვარ, მა ჩქიმი კალამით
ვამოკო ფალო გოცქუე;
მა შხვასჷ ვაუბანუა,
მა გვალო შხვა მოკო ვთქუე.
თქვანდა ბრელი უცქვაფუნა
მოკო ითამ გიბაღანი
დო ბოლოს ვემკჷგანჭათ,
მუდგა კეხიქ ელგართანი.
მარა ჭეს ქიბკვირებუქ,
მათი ტანი მახუაფუ,
შურო ვამოკონი თეში
თქვანდა მაცქუმალუაფუ.
მა ხოლო მორთინუანთი,
ფერი ძალა მუ გიღუნა,
ვარა მა თქვა დოფობრათი,
უჯგუში მუ მოგიღუნა.
ხვალე თქვა ჸოფეთ ქიანას
ჭკუაში მანჩურაფალი,
საქიანო მოხანდეში
შარას ამართუაფალი.
ვარა თინა ქჷმორჩქინას,
ქიანაშა მუ მოგიღუ;
ტერიშა ვაგანირძინე,
ირო შხვაში მენდი გიღუ.
ტყურათ კათას ონჯარუა,
ჯგირი მუთა შეგალებე;
რეთჷ ამართუაფალი,
თქვანდა ლჷმა ვეშილებე.
სათქვანოთ ჸოფე საჭირო,
გალია უმუგორაფუ
თინერი ჯადო ნორღვენა,
თქვანდა მითინც ვაგორაფუ.
მუჟანც დერსხენც თე ქიანა
თქვანი ხეშე ჯგირობუას,
ვარა მი მუთ ეღირსებუ
თქვანდე ბედინერობუას.
ვარა ნჷტე მუჟანც იჸი
კოჩი თისხი გაგებული,
ჸოროფაში გურიშენი
რჩევა ორდას დანდებული.
მი მუს ოსქუ იჸოროფეთ,
ადრე ორდას ჩინებული,
ჭკუათ ორდას კოჩიშ რინა
ხეუშულას ჰამებული.