ჸოროფაში გაჭირება
ართი დროში ჸოროფაქჷ, ასე ქაშამიჸოთ ხეშა!
ვა გორწყექჷნ შურსჷ პკაშჷ, ქორძირუნქუნ, მივოქეშა.
უსამართლო ჸოროფაქჷ გამმათხოზჷ ძეში ძეშა,
უჲმე დედა, მუსჷ მორჩჷ, მეფთხოზჷ, მეფთხოზჷ საფულეშა!
ოსურ მუჭო ვა მიძირუ, მიძირუნ და, არძა ჯგირი,
მინი ცირა, მინ ოსური, პატიოსან კოჩიშ ჩილი.
არძას გააბრშიყუებუქ, ვორდი ეშო გამოცდილი.
ექ მუ ჭირო გინჷმართჷ, მუს რე ვორწყექ, სქანი ჭირი!
კავკასია დომილებუ, იშოთ მიკობჩილათუქჷ.
ბრელი ოსური შებხვალამუ, არძას გინობსქილადუქჷ.
ბჯოგუდუ დო მიჸორდუნი, აკას ვე გებდინაფუქჷ.
დო ათეს ქეგვოდინიკონ, ენა ფერი მუ მაფუდუ?
მუჟანს გაგიჩინებენი, ჭარილ მაფუ, ხუთი მარტი.
შურიშ გინართუაფალო სახელი ქიგგოდვი ფანტი.
ვითოსუმი წანა ქო რე, შური ცალო გემიძჷ პატი,
აწი მათი დიფშქივიდი დო გოპტახ გურიშ ანდამატი.
ვითოჟირი წანა ნწყვილს, გოხვეწუდი აკა თისჷ.
საშვალებაქ ვე ჸუდო, პატი ვა ფცი ჸოროფილსჷ.
შორშე გუგალუაფუდი, მუჭო ჩიტი ვარდიშ პირსჷ,
გოხოლუდი სრული მონა, ვა ვოჸოთანდჷ სქანი ჭირსჷ.
აკა ქოგმაშინუდასჷ, სქანი გემუანი ნინა!
უკულ ღურა ვა მონაღუ, სოიდგა მიღუდას ბინა.
შხვაში ნგარა ქოგისხუნუ, გარჩქილედას ჩქიმი ბირა.
ონჯღორე რე გიჩქუდასჷ, ეგვარს ვეშქიდანს ცირა.
აწი გურქჷ ვა გამირზჷ, კოჩი ვორექ, მათ დობღური.
ბარო კჷსერ გეჲთომკვათი, შემიწირი სქანი ბუხუ.
მიდგა გეჩიებუდასჷ არძაშა ქოგაჸი გური,
მა მუჟანს გეჩიებუქჷნ, ხათე ქომიგალე გური.
მიჸორქიე მირაგადუქ, თე სიტყვასითჷ იმარდუქ!
მუთუნ მოკო გიწუენი, ჯორი ცალო იკვარტუქ.
მუ სიკეთე მა რღოლე̄, იშენი ვა დამიმარდუქ.
ქუორწყექი ჩქიმი დღასჷ, ტყურათჷ ქეკორდინაფუქ.
მიგიდგა წკუმა ზოჯუნდე, პატიოსნება ვა დჷგოკორდუ.
დაბალ ხალხით ვა გონდურუ, ჯგირი რდიკონ, მა მოკოდუ.
ოში კოსჷ ქააკათე, სიტყვაშ კილო ვა დჷგოკორდუ,
მუდგა ცოდა მოკითხუნი, ჩქიმოთ ირფელ ქაშგოჭყორდუ.
მილიონი მუშოთ მოკო, სო ვახარჯა, მისჷ მეფჩა?
სი შაურსჷ ვაჲწომიღა, მუჭოთ ვა მიღუნი, ბეჩა.
ჩქიმ ქონება ათენა რე, ლერსის გიჭარუ დო მერჩა.
მა მოსქიდუ ართი ხამი, ჩქიმი კრავოტი დო ქეჩა.
ქაარწყექ სი უსამართლო, ქჷგარჩქილე ნარაგადი,
სქანი ართი ჯგირი სიტყვათ, წყარსჷ გეცენს ჩქიმი დარდი.
ცხოვრებასჷ ქოწორხვადჷ ჩქიმ ცოდა დო ჩქიმი მარდი.
აკა ქომომიფერე̄, სი ღორონთიშ დჷნაბადი!
ხვალე მათჷ ვა ბღოლამუ, ენა ჸოფე ირი დროსჷ.
თამარ შალვას ჸოროფებუ, ქომიჩქუნა ირი კოსჷ.
დარეჯანი ტარიელსჷ, თელი სახენწიფოშ ტოლსჷ.
სი მა მეჸოროფიკონი, ეშენ ღორონთ მოთ გიჭყორსჷ!
თეშენი რე ბოში კოჩი ჭკუას გინოსხაპუნსჷნი!
დუდ იპილე, მუს მოხვარჷ, მუჭოთ ზისხირ ვა ურსჷნი!
ენა იშენი ვეფიქრა, ზისხირი გურს ვა უსჷნი?
ჩიჩიეთი გენწარებუ, მუჟანს საქმე წაურსჷნი.
სი ფიქრენქო, ბოროტება მუთუნ რენი ართი ნერი?
ისი ჭიჭკიტია ორთუ, ტურა, ყურდღელი დო გერი.
საქმე ორე ჯგირი სიტყვა, მოსაიფი ოშინერი.
სი პილი დო სი დოფთხორი, დააჭკვერი სქანი შერი!
მა სი ის დღასჷ ვარშქიდა, ჩქიმი ცალო იბირენი.
ჩქიმი ძირაფას ლეხი რექ, ხათე ოკო დინჯირენი.
მა იბგარქჷნ, სი გიფულუნქ, ტყობშე ოკო იფხირენი.
მუჲდგა ცოდა მოკიდუნი, ნაბტან ემიკიბირენი.
მუშე ვა რშუ თი დროება, მუ აშიგოჭყოლიდუანს?
ჩქიმ ჸოროფაშ გურიშენი, ოჲშახჷ ჸოფექ წირუას.
ასე თაშ გომიჯოგენი, მუ ეშმაკი რე გილუანს!
მითინ ვა მოგიწონუანს ქირსიანეში ჸვილუას.
საწიწკარი მა ვა ვორექ, ვართი ქულა, ვართი ჸვერე!
ჩქიმი ხორცის მა ობჭკომურქ, თი ზომაშა გამაშერე.
უჭკუობას ქომიმტკიცე, ქუმაჸუნგი, ქუმაჸვერე.
გვალო აში მირდენქინი, მუქი იჸუ, მუ ამბე რე?
პატჲოსნება ქომიღუნ და, მა სი ირო მიცქვაფუქჷ.
სქან საჸვენდურს თქუანდესჷნ, ოიშახ ქემეპჭიშაფუქჷ.
მეტ ვამრაგადაფუაფჷ, ხათე გემწობძირაფუქჷ.
სი მუთუნი ქოგიწუე, გერი ცალო ირკაპუქჷ.
ჩქიმი აზრი გეკოპტყური, საიდუმლო ქაშქაბარი.
ჩქიმი ახალგაზდა ჯანი, სქან ჸოროფას მუვახვარი.
სი რდი ჩქიმოთ ელისამეთ, შურიშ გინართუაფალი.
ჯოჯოხეთო გინმართიო? ღორონთ, ღორონთ, ქომმეხვარი!
ოიშახ ქომირაგადუ̄, სქანდა ჩქიმი ხასიათი;
მით გოკონი გიჸორდასჷ, ინა ვა მივარებჷ მათი.
მათ მოკოდჷ გიჸორდიკონ, მუჭოთ გიჸორდუნი შხვანი,
თითქმის ვედმენდურიკონი, ოიშახ მერჩი სალავათი.
ესჷ შხვა ვექუნს მითინი, ახალ ეულირი ბოში,
მუში ჸოროფილს უჸორდას, ართ მითინი, გინდა ოში!
მარა მა სქან გურიშენი, დუდი დობდვი, მუჭოთ დოში.
მანგიორო მიჭყოლოფი მიშარინა უბადოში.
ხანი შქაშა გომირთიო, გოკვათილი ჸვალი ცალო?
შხვა მითინი ქომუჩასჷ, ოჸვილარი სქანი ცალო!
მა თიწკუმა დემეკვირი, ვეგვოლა და, ქარი ცალო.
თელი ვეზდას ავაყარე, დაჩხირიში ალი ცალო.
შხვა მითინი უჸორსიდა, ის ვემეფჩა სათი ვადას,
დეფაფსენქჷ კოჩანას დო, შევასრულე ნარაგადას.
სით სიცოცხლეს გაგინწარე, მათი გინვოსქიდუქ გარას.
გიწინ თენენს თეში ქიფქუნქ, ვა ვახარჯე შაურ ფარას.
სქანდა ბრელშა მითქუალუ: დუს იპილუნქ, მანჭუაფუ.
მაცხარობათ მემირჩქინი, ოძჷცეთ გინოჲრთინუაფუ.
თიზჷმა ქაწიგაგარი დო, სიტყვათ ვეკნოჲრთინუაფუ!
არიკიდუნ გიჩქუდუ დო, გვალას ქემკოჲრულუაფუ.
ოღონ ჭიჭე ქუდამჯერი, გვალო ვა გოშქურინუა.
შურ დო გურო გინიგართუქ, წყირსჷ ვამკოჲფურინუა.
მუს მიზოჯუნქ შევასრულე, გურს თანდებო გირინუა.
სოდგა იჸინ, პატიცემას იშენ ქოგიჭირინუა.
გაჸუნუქჷ ართი კოჩი, მოსხაპინე, მობირე̄.
სქანო თით ონჯღორე რე, მა თაში ქიგგოდინე̄.
მუთა მიღუ ღურაშ გარდა, აბა მუკმორთინე̄,
ქუაშ გური ალარძუნდა, იშენ ქეშემცოდილე̄.
გამოცდილი ცირა რექჷ, გუბრენიაშ მოსაწონი,
დიდი კათა გიჩინენსჷ, რუსი, აფხაზა დო შონი.
თეცალ გამოცდილი ცირაქ, კოჩი ათაშ დამამონი.
მუთუნ დოხთურ ვამოხვარჷ, ქაჩუქე̄ ტრაპიზონი.
სი ქოგიჩქუნ, მა მუ ფთქუა, მა ქიფშეი სქანოთ ჯადო
ქორღოლენი, წაგაჸონე, ინა ვარე სარაგადო.
ქოთომს ბღოლი თი წამალი, ხესჷ ქეშმოდინუ ლანდო.
ინა მა სი ვარშქიდე̄, დე̄ჯერი, ჩემო, ფანტო!
მა უჭკუე ვა ვორექჷ, ჭიჭე ქომარჩქილე ცნება!
ჟირ თუთა რე ბჭარუნქუნი, შევადგინი განჩინება;
დუდ იპილე, მუს მოხვარჷ, თაქ მოსქიდუქჷ სჷნება!
ახალ აზრის მუგოშინა, ქომუჩ რაგადიში ნება!
დიო ხოლო ართ თუთას ქოგიჯინექ მა თი დღაშა!
რთხინი, შემისრულენქჷ და, ხეს გაჯუდუქ თანაფაშა,
ვარა ირფელს მევოტალენქ, დუსჷ იბღა ტყა-დო-ტყაშა,
ფანტიასჷ მა ვაპილუნქ, თეში ურქჷ ზღვა-დო-ზღვაშა.
შვიდობითჷ, ჩქიმი შური, ჩქიმი გური, ჩქიმი ფანტი!
ჩქიმი სქვამი, ჩქიმი ჯგირი, ჩქიმ ფიორა, ჩქიმი ფანტი!
ჩქიმ დაირი, ჩქიმ ჩონგური, ჩქიმი ოლაჸაფე კარტი!
ჩქიმი ზღვა დო ჩქიმი ბარი, ჩქიმი გოლა-არარატი!
ბეჭეტი რე, გიჩქუდასჷ, ათე ჩქიმი ნარაგადა!
მუთი მუგოშინინ თეში, თუთა გიღუ ანწი ვადა!
ჩქიმი ანბეს ქიგეგონე, ქუთეშიშა ქუმორთა და.
ონჯღორექ ვა დიგაგურას, ციხეშა მიძირუანდა.
ართი წანას თექ იპიქ დო, უკულ გეგნომიჸონანა,
კაზაკეფი ჯოღორ ცალო, ზინდაფას ქჷდომიჭყანა.
პატიცემაშ მანგიორო აბუდანსჷ ქემირღვანა.
ნოშქერიში ვაგონითჷ ასტრახანსჷ ქუდობდვანა.
ანწ ჭარუა გავათე დო გური უჩი ოში ნერო.
ლერსო თიშენ გინიგართი, ვა გაიბედი სიტყვიერო.
პასუხ მალას ქომიზოჯი, მიიფიქრი ნიჭიერო.
მალას, ვა დიგეგვიანას, ჩემო ფანტო, შვენიერო.
შვიდებითჷ, ხესჷ გარზე, ქომაჯვიდი ჸოროფილსჷ!
ჯვეშებურო ვადმაღორა, ვემუკურთა ვიშო პისჷ!
ეშმაკენსჷ ვახოლუ̄ქ, ჩქიმი ჯგურა წაწყმედილსჷ,
სი გიტენქ დო ულაჸაფი სქანი-ჯგუა ჩხონაფილსჷ.