ჸოროფაშ ბალადა
მა ბშუ თუთარჩელა სერი
მა ბშუ ბორჯი ბედინერი
ჩქიმ შურიში ნოწკერია
პუტორუნდ ფურცელს ბორია.
ჩე ჯა გური ალაჭვილი
კუსანდ, რკიანდ, დირაკილი,
მერეკელა ცა სარკილი,
მურიცხეფიშ გორაწკილი,
ჯა ედომუშ ნოჸელამო
იკვანწადუ იფრელამო.
მინ ირთუდუ ან დო განი,
ჟი შორს ჭითა კუდელამი,
ჭუმინ, ჭუმინ, ჭუმინია,
მიკარკანტჷდჷ საგანი.
სი ინგარდი თუთაშნერი,
თუთას გინარდ სქანი ნერი
აფუდ დინაფილი ფერი
სქანდე ოჭჷდჷ ეფერი.
სქან დო ჩქიმი უგუსოფ
გინოსქუდ კისერს კისერი
მოფუნდ თოლშე ჩილამური
მეკირჷდჷ გურსჷ გური.
მა ბშუ თუთარჩელა სერი
მა ბშუ ბორჯი ბედინერი...
ასე ჩე ჯა გოფალირი
მოფრთი ვორდი დინაფილი,
დინაფილცჷ გალე-გალე
მაფ ქიანა მოგერგილი.
ქოთქვი, თუთა ქუგჷგალე
ჩქიმ ხიოლი დო სინწარე,
ჩქიმი სქვამი ცირა სორე.
სქვამი ცირა სორე,სორე,
მურც წყარმალ, მოღიანც.
რკიანც, რკიანც, ჯა რკიანც,
ცას მურიცხის მასოფანც
დო დუც დიხაშა გივჸილანც:
,,სქანი სქვამი ცირა ვარე"!
,,სქვამი ცირა ვარე, ვარე,
მუ ჸოროფას ჭარა მარე"
ელ დო ვალით ჟი ცა იხუ,
,, ბედინერი მიშე რდინი,
მეიდუნჷ დო მედინი"-
მიგურგინ ოწონდეს ეხო.
ბოლოს ართო ცა დო დიხა,
შაყარელი სტიქიაში.
ართი პელეტი დო ბორზალით
იპანჯჷ დო იმერეხუ.
,, ველურც თუთა ეთი ნერი,
ვაგასერუ ინერ სერი,
ვადგართინე, ვარე, ვარე,
ვეჸი ბორჯი ბედინერი".