ᠮᠠᠨᠵᡠ ᡳ ᠶᠠᡵᡤᡳᠶᠠᠨ ᡴᠣᠣᠯᡳ/ᡩᡠᡳᠴᡳ ᡩᡝᠪᡨᡝᠯᡳᠨ
This page contains Manchu script. If it is not displayed, click here.
ᡝᡵᡝ
ᠠᡶᠠᡥᠠ
ᠮᠠᠨᠵᡠ
ᡥᡝᡵᡤᡝᠨ ᠪᡝ
ᠪᠠᡴᡨᠠᠮᠪᡠᠮᠪᡳ᠉
ᠠᡳᡴᠠᠪᠠᡩᡝ
ᡨᡠᠸᠠᠮᡝ
ᠮᡠᡨᡝᡵᠠᡴᡡᠴᡳ
ᡠᠪᠠᡩᡝ
ᡩᠣᠰᡳᡵᡝᠣ᠉
Ere afaha Manju Hergen be baktambumbi. Aikabade tuwame muterakūci ubade dosireo.
| ← ᡳᠯᠠᠴᡳ ᡩᡝᠪᡨᡝᠯᡳᠨ᠈ | ᠮᠠᠨᠵᡠ ᡳ ᠶᠠᡵᡤᡳᠶᠠᠨ ᡴᠣᠣᠯᡳ ᡩᡠᡳᠴᡳ ᡩᡝᠪᡨᡝᠯᡳᠨ ᠮᠠᠨᠵᡠᠰᠠ |
→ ᠰᡠᠨᠵᠠᠴᡳ ᡩᡝᠪᡨᡝᠯᡳᠨ᠈ |
ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡤᡝᡵᡝᠨ ᠪᡝᡳᠰᡝ᠈ ᠠᠮᠪᠠᠰᠠ ᡳ ᠪᠠᡵᡠ ᡥᡝᠨᡩᡠᠮᡝ᠈ ᡤᡠᡵᡠᠨ ᡳ ᠪᠠᠨᠵᡳᡵᡝ ᡩᠣᠣᡵ ᡩᡝ ᠮᡠᠵᡳᠯᡝᠨ ᡨᠣᠨᡩᠣ᠈ ᡥᡝᠪᡝ ᠠᡴᡩᡠᠨ᠈ ᡧᠠᠵᡳᠨ ᡶᠠᡶᡠᠨ᠈ ᠴᡳᡵᠠ ᠰᠠᡳᠨ᠈ ᠠᡴᡩᡠᠨ ᡥᡝᠪᡝ ᠪᡝ ᡝᡶᡠᠯᡝᡵᡝ᠈ ᡧᠠᠵᡳᠨ ᡶᠠᡶᡠᠨ ᠪᡝ ᡥᡝᠣᠯᡝᡩᡝᡵᡝ᠈ ᡨᡝᠨᡨᡝᡴᡝ ᠨᡳᠶᠠᠯᠮᠠ ᡩᠣᡵᠣ ᡩᡝ ᠪᠠᡳᡨᠠᡴᡡ᠈ ᡤᡠᡵᡠᠨ ᡩᡝ ᡥᡠᡨᡥᡠ ᡴᠠᡳ᠈ ᠮᡳᠨᡳ ᡤᡳᠰᡠᡵᡝᡥᡝ ᡤᡳᠰᡠᠨ ᡤᡝᠮᡠ ᡠᡵᡠ ᠣᠮᠪᡳᠣ᠈ ᠠᡳᡴᠠ ᠪᠠᡩᡝ ᡶᡠᡩᠠᠰᡳᡥᡡᠨ ᡤᡳᠰᡠᠨ ᠣᠴᡳ᠈ ᠪᡝᡳᠰᡝ᠈ ᠠᠮᠪᠠᠰᠠ ᠰᡠᠸᡝ ᡩᡝᡵᡝ ᡠᠮᡝ ᠪᠠᠨᠵᡳᡵᡝ᠈ ᡝᠮᡠ ᠨᡳᠶᠠᠯᠮᠠᡳ ᡤᡡᠨᡳᡥᠠ ᠠᠩᡤᠠᠯᠠ᠈ ᠰᡠᠸᡝᠨᡳ ᡤᡝᡵᡝᠨ ᡳ ᡤᡳᠰᡠᠨ ᡠᡵᡠ ᠠᡴᡡ ᡩᠣᡵᠣ ᠪᡳᠣ᠈ ᠪᠠᡥᠠᠨᠠᡥᠠ ᠪᠠᠪᡝ ᠪᡝᡳᠰᡝ ᠠᠮᠪᠠᠰᠠ ᠰᡠᠸᡝ ᡥᠠᡶᡠᠯᠠᠮᡝ ᡥᡝᠨᡩᡠ ᠰᡝᡥᡝ᠉ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠶᡝᡥᡝᡳ ᡤᡠᡵᡠᠨ ᡩᡝ ᡝᠯᠴᡳᠨ ᡨᠠᡴᡡᡵᠠᠮᡝ ᡩᠠᡳᠨ ᡩᡝ ᠵᠠᡶᠠᡶᡳ ᠸᠠᡵᠠ ᠪᡝᠶᡝ ᠪᡝ ᡠᠵᡳᡶᡳ᠈ ᠮᡳᠨᡳ ᡳᠠᠯᠨ ᠵᡠᡳ ᠪᡝ ᠪᡠᡥᡝ ᡥᠣᠵᡳᡥᠣᠨ ᠪᡠᠵᠠᠨᡨᠠᡳ ᠮᡳᠨᡩᡝ ᡝᡥᡝ ᡩᠠᡳᠨ ᠣᠴᡳ᠈ ᠪᡳ ᡴᠣᡵᠰᠣᠮᡝ ᡩᠠᡳᠯᡝᡶᡳ ᡠᠯᠠᡳ ᡤᡠᡵᡠᠨ ᠪᡝ ᡝᡶᡠᠯᡝᡥᡝ᠈ ᠰᡠᠸᡝᠨᡩᡝ ᡤᡝᠨᡝᡥᡝ ᠪᡠᠵᠠᠨᡨᠠᡳ ᠪᡝ᠈ ᠮᡳᠨᡩᡝ ᡤᠠᠵᡳ ᠰᡝᠮᡝ ᡳᠯᠠᠨ ᠵᡝᡵᡤᡳ ᡨᠠᡴᡡᡵᠠᠴᡳ᠈ ᠶᡝᡥᡝᡳ ᡤᡳᠨᡨᠠᡳᠰᡳ ᠪᡝᡳᠯᡝ᠈ ᠪᡠᠶᠠᠩᡤᡡ ᠪᡝᡳᠯᡝ᠈ ᠪᡠᠵᠠᠨᡨᠠᡳ ᠪᡝ ᠪᡠᡥᡝᡴᡡ ᠣᡥᠣ ᠮᠠᠩᡤᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡠᠶᡠᠨ ᠪᡳᠶᠠᡳ ᡳᠴᡝ ᠨᡳᠩᡤᡠᠨ ᡩᡝ᠈ ᡩᡠᡳᠨ ᡨᡠᠮᡝᠨ ᠴᠣᠣᡥᠠ ᠪᡝ ᡤᠠᡳᡶᡳ᠈ ᠶᡝᡥᡝᡳ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᠵᡠᡵᠠᡴᠠ᠈ ᡨᡝᡵᡝ ᠴᠣᠣᡥᠠ ᠵᡠᡵᠠᠨᡩᡝᡵᡝ ᠮᡝᡩᡝᡤᡝ ᠪᡝ ᡠᡴᠠᠨᠵᡠ ᠨᡝᠨᡝᠮᡝ ᡤᡝᠨᡝᡶᡳ᠈ ᠶᡝᡥᡝ ᡩᡝ ᠠᠯᠠᠨᠠᡶᡳ ᠵᠠᠩ ᡤᡳᡩᠠᠩᡤᠠ ᡳ ᡤᠣᠯᠣᡳ ᠨᡳᠶᠠᠯᠮᠠ ᠪᡝ ᡤᡝᠮᡠ ᠪᠠᡵᡤᡳᠶᠠᡶᡳ ᡤᠠᠮᠠᡥᠠᠪᡳ᠉ ᡠᠰᡠᡳ ᡥᠣᡨᠣᠨ ᡳ ᠨᡳᠶᠠᠯᠮᠠ ᠪᡝ ᠮᠠᠮᠠ ᡨᡠᠴᡳᠮᠪᡳ ᠰᡝᠮᡝ ᠪᠠᡵᡤᡳᠶᠠᡶᡳ ᡤᠠᠮᠠᡥᠠᡴᡡ ᠪᡳ᠈ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠴᠣᠣᡥᠠ ᡳᠰᡳᠨᠠᡶᡳ ᡠᠰᡠᡳ ᡥᠣᡨᠣᠨ ᠪᡝ ᡴᠠᡶᡳ ᡥᡡᠯᠠᠮᡝ ᡥᡝᠨᡩᡠᠮᡝ᠈ ᡥᠣᡨᠣᠨ ᡳ ᠨᡳᠶᠠᠯᠮᠠ ᠰᡠᠸᡝ ᡩᠠᡥᠠᠮᠪᡳ ᠰᡝᠴᡳ ᡩᠠᡥᠠ᠈ ᡩᠠᡥᠠᡵᠠᡴᡡ ᠣᠴᡳ ᠠᡶᠠᠮᡝ ᡤᠠᡳᠮᠪᡳ ᠰᡝᡥᡝ ᠮᠠᠩᡤᡳ᠈ ᡥᠣᡨᠣᠨ ᡳ ᠨᡳᠶᠠᠯᠮᠠ ᡥᡝᠨᡩᡠᠮᡝ᠈ ᡠᠵᡳᠮᠪᡳ ᠰᡝᠴᡳ ᡩᠠᡥᠠᡴᡳ᠈ ᠰᡠᠸᡝᠨᡳ ᡝᡵᡝ ᠸᡝᠵᡳ ᠮᠣᠣ᠈ ᡝᠶᡝᡵᡝ ᠮᡠᡴᡝᡳ ᡤᡝᠰᡝ ᡤᡝᡵᡝᠨ ᠴᠣᠣᡥᠠ ᠵᠣᡵᡥᠣᠨ ᠪᡳᠶᠠ ᡩᡝ ᠰᠠᠪᡠᡵᡝ ᠨᡳᠮᠠᠩᡤᡳ ᠵᡠᡥᡝᡳ ᡤᡝᠰᡝ ᡠᡴᠰᡳᠨ ᠰᠠᠴᠠ ᡩᡝ ᠮᡝᠨᡳ ᡥᠣᡨᠣᠨ ᡳ ᠨᡳᠶᠠᠯᠮᠠ ᠠᡩᠠᡵᠠᠮᡝ ᡝᠯᠵᡝᠮᠪᡳ ᠰᡝᠮᡝ ᡥᡝᠨᡩᡠᠮᡝ᠈ ᡨᡝᡵᡝ ᡥᠣᡨᠣᠨ ᡳ ᠰᠠᠨᡨᠠᠨ᠈ ᡥᡡᠰᡳᠮᡠ ᡤᡝᠪᡠᠩᡤᡝ ᠵᡠᠸᡝ ᠮᠠᠪᠠᠨ ᡥᠣᡨᠣᠨ ᡳ ᡩᡠᡴᠠ ᠪᡝ ᠨᡝᡳᡶᡳ ᡩᠠᡥᠠᠮᡝ ᠵᡳᡶᡳ᠈ ᡥᠠᠨ ᡩᡝ ᡥᡝᠩᡴᡳᠯᡝᠮᡝ ᠠᠴᠠᡥᠠ ᠮᠠᠩᡤᡳ᠈ ᠠᡳᠰᡳᠨ ᡳ ᡥᡡᠨᡨᠠᡥᠠᠨ ᡩᡝ ᠠᡵᡴᡳ ᡨᡝᠪᡠᡶᡳ ᠣᠮᡳᠪᡠᡶᡳ᠈ ᡥᠠᠨ ᡳ ᡝᡨᡝᡥᡝ ᡳᠯᠠᠨ ᡨᠠᠨᠠ ᠰᡳᠨᡩᠠᠮᡝ ᡧᡝᡵᡳᠨ ᡥᠠᡩᠠᡥᠠ ᠮᠠᡥᠠᠯᠠ᠈ ᡝᡨᡠᡴᡠ ᠪᡠᡶᡳ ᡝᡨᡠᠪᡠᡥᡝ᠈ ᡨᡝᡵᡝᠴᡳ ᠵᠠᠩ ᠨᡳ ᡥᠣᡨᠣᠨ᠈ ᡤᡳᡩᠠᠩᡤᠠᡳ ᡥᠣᡨᠣᠨ᠈ ᡠᠰᡠᡳ ᡥᠣᡨᠣᠨ᠈ ᠶᠠᡥᠠᡳ ᡥᠣᡨᠣᠨ᠈ ᡥᡝᡵᠰᡠᡳ ᡥᠣᡨᠣᠨ᠈ ᡥᠣᡩᡠᠨ ᡳ ᡥᠣᡨᠣᠨ᠈ ᡴᠠᠪᠴᡳᠯᠠᡳ ᡥᠣᡨᠣᠨ᠈ ᡠᡤᡳᡩᠠᡳ ᡥᠣᡨᠣᠨ ᡠᡥᡝᡵᡝᠮᡝ ᠠᠮᠪᠠᠨ ᠠᠵᡳᡤᡝᠨ ᠵᡠᠸᠠᠨ ᡠᠶᡠᠨ ᡤᠠᡧᠠᠨ ᡳ ᠪᠣᠣ ᠵᡝᡴᡠ ᠪᡝ ᡤᡝᠮᡠ ᡨᡠᠸᠠ ᠰᡳᠨᡩᠠᡶᡳ᠈ ᡠᠰᡠᡳ ᡥᠣᡨᠣᠨ ᡳ ᡩᠠᡥᠠᡥᠠ ᡳᠯᠠᠨ ᡨᠠᠩᡤᡡ ᠪᠣᡳᡤᠣᠨ ᠪᡝ ᡤᠠᠵᡳᠮᡝ ᠴᠣᠣᡥᠠ ᠪᡝᡩᡝᡵᡝᡥᡝ᠈ ᡨᡝᡵᡝᠴᡳ ᠶᡝᡥᡝᡳ ᡤᡠᡵᡠᠨ ᡳ ᡤᡳᠨᡨᠠᡳᠰᡳ ᠪᡝᡳᠯᡝ᠈ ᠪᡠᠶᠠᠩᡤᡡ ᠪᡝᡳᠯᡝ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠪᡝ ᡝᡥᡝᠴᡠᠮᡝ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨ ᠯᡳᡳ ᡥᠠᠨ ᡩᡝ ᠠᠮᠪᠠᠰᠠ ᠪᡝ ᡠᠩᡤᡳᡶᡳ ᡥᠠᠪᡧᠠᠮᡝ᠈ ᠮᠠᠨᠵᡠ ᡤᡠᡵᡠᠨ ᡥᠠᡩᠠ᠈ ᡥᠣᡳᡶᠠ᠈ ᡠᠯᠠ ᡳᠯᠠᠨ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᡝᡶᡠᠯᡝᡶᡳ ᡤᡝᠮᡠ ᡤᠠᡳᡥᠠ᠈ ᡨᡝ ᠮᡝᠨᡳ ᠶᡝᡥᡝ ᠪᡝ ᡩᠠᡳᠯᠠᠮᡝ ᠸᠠᠴᡳᡥᡳᠶᠠᡶᡳ᠈ ᠪᠠᠪᠠ ᡳ ᡤᡠᡵᡠᠨ ᠪᡝ ᠪᠠᡥᠠ ᠮᠠᠩᡤᡳ᠈ ᠰᡠᠸᡝᠨᡳ ᡩᠠᡳᠮᡳᠩ ᡤᡠᡵᡠᠨ ᡩᡝ ᡩᠠᡳᠯᠠᡶᡳ ᠯᡳᠣᡩᡠᠩ ᠨᡳ ᡥᡝᠴᡝᠨ ᠪᡝ ᡤᠠᡳᡶᡳ ᡳᠨᡳ ᠪᡝᠶᡝ ᡨᡝᠮᠪᡳ᠈ ᡴ’ᠠᡳᠶᡠᠸᠠᠨ᠈ ᡩᠠᡳᠮᡳᠩ ᠨᡳ ᠪᠠᠪᡝ ᡤᠠᡳᡶᡳ ᠮᠣᡵᡳᠨ ᡳ ᠠᡩᡠᠨ ᡠᠯᡝᠪᡠᠮᠪᡳ ᠰᡝᠮᠪᡳ ᠰᡝᠮᡝ ᠠᠯᠠᡵᠠ ᠵᠠᡴᠠᡩᡝ᠈ ᠸᠠᠨ ᠯᡳᡳ ᡥᠠᠨ ᠠᡴᡩᠠᡶᡳ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠪᡝ ᠶᡝᡥᡝᡳ ᡤᡠᡵᡠᠨ ᠪᡝ ᡠᠯᠠ ᡩᠠᡳᠯᠠᡵᠠ᠈ ᠮᡳᠨᡳ ᡨᠠᡶᡠᠯᠠᡵᠠ ᡤᡳᠰᡠᠨ ᠪᡝ ᡤᠠᡳᡶᡳ ᠶᡝᡥᡝ ᠪᡝ ᡩᠠᡳᠯᠠᡵᠠᡴᡡ ᠣᠴᡳ᠈ ᠮᡳᠮᠪᡝ ᡩᡝᡵᡝ ᠪᠠᠨᡳᠮᡝ ᠨᠠᡴᠠᡥᠠ ᠰᡝᠮᡝ ᡤᡡᠨᡳᡵᡝ᠈ ᠮᡳᠨᡳ ᡤᡳᠰᡠᠨ ᠪᡝ ᡤᠠᡳᠵᠠᡵᠠᡴᡡ ᠶᡝᡥᡝ ᠪᡝ ᡩᠠᡳᠯᠠᡥᠠ ᡩᡝ᠈ ᠪᡳ ᡳᠨᡠ ᠠᡨᠠᠩᡤᡳ ᠪᡳᡥᡝᠪᡝ ᠮᡳᠮᠪᡝ ᡩᠠᡳᠯᠠᠮᠪᡳ ᠰᡝᠮᡝ ᡥᡝᠨᡩᡠᠮᡝ᠈ ᡳᠣᡤᡳ ᠮᠠᠰᡝ ᠨᠠᠨ᠈ ᠵᡝᠣᡩᠠᡳᠴᡳ ᡦᠣᠣ ᠮᡳᠣᠴᡳᠶᠠᠩ ᠰᡳᠨᡩᠠᡵᠠ ᡝᠮᡠ ᠮᡳᠩᡤᠠᠨ ᠴᠣᠣᡥᠠ ᠪᡝ ᡠᠩᡤᡳᡶᡳ᠈ ᠶᡝᡥᡝ ᡳ ᡤᡠᡵᡠᠨ ᡳ ᠵᡠᠸᡝ ᡥᠣᡨᠣᠨ ᡩᡝ ᡨᡠᠸᠠᡴᡳᠶᠠᠮᡝ ᡨᡝᠪᡠᡥᡝ᠈ ᡨᡝᡵᡝ ᠪᡝ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡩᠣᠨᠵᡳᡶᡳ᠈ ᡳᠨᡳ ᠪᡝᠶᡝ ᡩᠠᡳᠮᡳᠩ ᡤᡠᡵᡠᠨ ᡳ ᡶᡠᡧᡠᠨ ᡯᠣᠣ ᡥᡝᠴᡝᠨ ᡩᡝ ᠪᡳᡨᡥᡝ ᠪᡝᠨᡝᡥᡝ᠈ ᡨᡝᡵᡝ ᠪᡳᡨᡥᡝ ᡳ ᡤᡳᠰᡠᠨ᠈ ᠮᡝᠨᡳ ᠮᠠᠨᠵᡠ ᡤᡠᡵᡠᠨ ᡳ ᡩᠠᡳᠨ᠈ ᡩᠠᡩᡝ ᠶᡝᡥᡝ᠈ ᡥᠠᡩᠠ᠈ ᡠᠯᠠ᠈ ᡥᠣᡳᡶᠠ᠈ ᠮᠣᠩᡤᠣ᠈ ᠰᡳᠪᡝ᠈ ᡤᡡᠸᠠᠯᠴᠠ᠈ ᡠᠶᡠᠨ ᡥᠠᠯᠠᡳ ᡤᡠᡵᡠᠨ ᠠᠴᠠᡶᡳ᠈ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨ ᠯᡳᡳ ᡥᠠᠨ ᡳ ᠣᡵᡳᠨ ᠨᡝᠮᡠᠴᡳ ᠰᠠᡥᠠᡥᡡᠨ ᠮᡝᡳᡥᡝ ᠠᠨᡳᠶᠠ ᠴᠣᠣᡥᠠ ᠵᡳᡥᡝ ᠪᡳᡥᡝ᠈ ᡨᡝᡵᡝ ᠵᡳᡥᡝ ᠴᠣᠣᡥᠠ ᠪᡝ ᠠᠪᡴᠠ ᠸᠠᡴᠠᠯᠠᡶᡳ ᠪᡳ ᡝᡨᡝᡥᡝ᠈ ᠶᡝᡥᡝᡳ ᡩᡝᡵᡤᡳ ᡥᠣᡨᠣᠨ ᡳ ᠪᡠᠵᠠᡳ ᠪᡝᡳᠯᡝ ᠸᠠᠪᡠᡥᠠ᠈ ᡠᠯᠠ ᡳ ᠪᡠᠵᠠᠨᡨᠠᡳ ᠪᡝᡳᠯᡝ ᠸᡝᡳᡥᡠ ᠵᠠᡶᠠᠪᡠᡥᠠ᠈ ᡨᡝᡵᡝᡳ ᠠᠮᠠᠯᠠ ᡧᠠᠩᡤᡳᠶᠠᠨ ᠮᠣᡵᡳᠨ ᠪᡝ ᠸᠠᡶᡳ ᠮᠠᠩᡤᡳ ᠪᡝ ᠰᠣᠣᠮᡝ᠈ ᠵᡠᡳ ᠪᡠᠮᡝ ᡠᡵᡠᠨ ᡤᠠᡳᠮᡝ ᠰᠠᡳᠨ ᠪᠠᠨᠵᡳᡴᡳ ᠰᡝᠮᡝ᠈ ᠸᠠᠨ ᠯᡳᡳ ᡥᠠᠨ ᡳ ᠣᡵᡳᠨ ᠰᡠᠨᠵᠠ ᠴᡳ ᡶᡠᠯᠠᡥᡡᠨ ᠴᠣᡴᠣ ᠠᠨᡳᠶᠠ ᡩᠠᠰᠠᠮᡝ ᡤᠠᠰᡥᡡᠮᡝ ᠠᠴᠠᡥᠠ᠉ ᡨᡝᡵᡝ ᡤᡳᠰᡠᠨ ᠪᡝ ᠶᡝᡥᡝ ᡤᡡᠸᠠᠯᡳᠶᠠᡶᡳ᠈᠈ ᠪᡠᠮᠪᡳ ᠶᡝᡥᡝ ᠰᠠᡵᡤᠠᠨ ᠵᡠᡳ ᠪᡝ ᠪᡠᡵᡝᡴᡡ ᠪᡳ᠈ ᠵᠠᡳ ᠮᡳᠨᡳ ᡠᠵᡳᡥᡝ ᡠᠯᠠᡳ ᡤᡠᡵᡠᠨ ᡳ ᠪᡠᠵᠠᠨᡨᡳᠠ ᠮᡳᠨᡩᡝ ᡝᡥᡝ ᠣᡶᡳ᠈ ᠪᡳ ᡩᠠᡳᠯᠠᡶᡳ ᠴᠣᠣᡥᠠ ᠪᡝ ᠸᠠᡥᠠ᠈ ᡤᡠᡵᡠᠨ ᠪᡝ ᡤᠮᡝᡠ ᠪᡳ ᠪᠠᡥᠠ᠈ ᠪᡠᡵᠯᠠᠮᡝ ᡝᠮᡥᡠᠨ ᡨᡠᠴᡳᡶᡳ ᡤᡝᠨᡝᡥᡝ ᠪᡠᠵᠠᠨᡨᠠᡳ ᠪᡝᠶᡝ ᠪᡝ ᠪᡠᡵᡝᡴᡡ ᠣᡶᡳ᠈ ᠪᡳ ᠶᡝᡥᡝ ᠪᡝ ᡩᠠᡳᠯᠠᠮᠪᡳ ᡴᠠᡳ᠈ ᠠᠮᠪᠠ ᡩᠠᡳᠮᡳᠩ ᡤᡠᡵᡠᠨ ᠪᡝ᠈ ᠪᡳ ᠠᡳ ᠸᡝᡳᠯᡝ ᡩᡝ ᡩᠠᡳᠯᠠᠮᠪᡳ ᠰᡝᠮᡝ ᠪᡳᡨᡥᡝ ᠠᡵᠠᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳᠨᡳ ᠪᡝᠶᡝ ᡩᠠᡳᠮᡳᠩ ᡤᡠᡵᡠᠨ ᡳ ᡶᡠᡧᡠᠨ ᡯᠣᠣ ᡥᠣᡨᠣᠨ ᡩᡝ ᠪᡳᡨᡥᡝ ᠪᡝᠨᡝᠮᡝ ᡤᠠᠨᠠᠮᡝ ᠣᡵᡳᠨ ᠰᡠᠨᠵᠠᡳ ᡳᠨᡝᠩᡤᡳ ᡤᡠᡵᡝ ᡤᡝᠪᡠᠩᡤᡝ ᠪᡳᡥᠠᠨ ᡩᡝ ᡳᠰᡳᠨᠠᡥᠠ ᠮᠠᠩᡤᡳ᠈ ᠴᡳᠮᠠᡵᡳ ᡝᡵᡩᡝ ᡧᡠᠨ ᡨᡠᠴᡳᠮᡝ ᡤᡡᠯᠮᠠᡥᡡᠨ ᡝᡵᡳᠨ ᡩᡝ ᡧᡠᠨ ᡳ ᠵᡠᠸᡝ ᡩᠠᠯᠪᠠᠴᡳ ᡩᡠᡴᠠ ᠠᡵᠠᠮᡝ ᡶᡠᠯᡤᡳᠶᠠᠨ ᠨᡳᠣᠸᠠᠩᡤᡳᠶᠠᠨ ᠰᡳᡵᡝᠨ ᠰᡠᠴᡠᡶᡳ ᡥᠠᠨᠴᡳ ᡩᠠᡥᠠᠯᠠᠮᡝ ᠶᠠᠪᡠᠮᠪᡳ᠈ ᡨᡝᡵᡝ ᠰᡳᡵᡝᠨ ᠪᡝ ᠰᠠᡶᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡤᡝᡵᡝᠨ ᠪᡝ ᡤᠠᡳᡶᡳ ᠠᠪᡴᠠᡳ ᡨᡝᡵᡝ ᠰᡳᡵᡝᠨ ᡩᡝ ᡥᡝᠩᡴᡳᠯᡝᡥᡝ ᠮᠠᠩᡤᡳ᠈ ᡩᠠᡥᠠᡵᠠ ᠰᡳᡵᡝᠨ ᡳᠯᡳᡶᡳ ᡨᡠᡨᠠᡥᠠ᠈ ᡨᡝᡵᡝᠴᡳ ᡤᡝᠨᡝᡶᡳ ᡶᡠᡧᡠᠨ ᡯᠣᠣ ᠣᡥᠣᡨᠣᠨ ᡩᡝ ᠣᡵᡳᠨ ᠨᡳᠩᡤᡠᠨ ᡳ ᠴᡳᠮᠠᡵᡳ ᠮᡠᡩᡠᡵᡳ ᡝᡵᡳᠨ ᡩᡝ ᡳᠰᡳᠨᠠᡥᠠ ᠮᠠᠩᡤᡳ᠈ ᡶᡠᡧᡠᠨ ᡯᠣᠣ ᡥᠣᡨᠣᠨ ᡳ ᡳᠣᡤᡳ ᡥᠠᡶᠠᠨ ᠯᡳᡳ ᠶᡠᠩ ᡶᠠᠩ ᡤᠠᠯᠠ ᡨᡠᡴᡳᠶᡝᠴᡝᠮᡝ ᠠᠴᠠᡶᡳ ᡤᡳᠣᠵᠠᠨ ᡩᡝ ᡝᠪᡠᡶᡳ ᠪᡳᡨᡥᡝ ᠪᡠᡶᡳ ᡤᠣᡳᡩᠠᡥᠠᡴᡡ᠈ ᡨᡝᡵᡝ ᡝᡵᡳᠨ ᡩᡝ ᡠᡨᡥᠠᡳ ᠪᡝᡩᡝᡵᡝᠮᡝ ᠵᡳᡥᡝ᠈ ᠨᡳᠣᠸᠠᠩᡤᡳᠶᠠᠨ ᡨᠠᠰᡥᠠ ᠠᠨᡳᠶᠠ ᡩᡠᡳᠨ ᠪᡳᠶᠠ ᡩᡝ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᡳᠨᡳ ᠪᡝᡳᡤᡠᠸᠠᠨ ᠰᡳᠣ ᠪᡝ ᠰᡝ ᠪᡝ ᡥᠣᠯᡨᠣᠮᡝ ᠠᠮᠪᠠ ᡥᠠᡶᠠᠨ ᠠᡵᠠᡶᡳ᠈ ᡴᡳᠣ ᡩᡝ ᡨᡝᡶᡳ ᠵᠠᡴᡡᠨ ᠨᡳᠶᠠᠯᠮᠠ ᠪᡝ ᡨᡠᡴᡳᠶᡝᠪᡠᡶᡳ ᡥᠠᠨ ᡳ ᠪᡳᡨᡥᡝ ᡩᡝ ᡥᡝᠩᡴᡳᠯᡝ ᠰᡝᠮᡝ ᡥᠣᡵᠣᠨ ᠰᡳᠨᡩᠠᠮᡝ ᡤᡝᠯᡝᠪᡠᠮᡝ᠈ ᡥᠠᠴᡳᠨ ᡥᠠᠴᡳᠨ ᡳ ᡝᡥᡝ ᡤᡳᠰᡠᠨ ᡳ ᠵᡠᠯᡤᡝᡳ ᡠᡶᠠᡵᠠᡥᠠ᠈ ᠵᠠᠪᡧᠠᡥᠠ ᡴᠣᠣᠯᡳ ᠪᡝ ᠪᡳᡨᡥᡝᡳ ᠠᡵᠠᡶᡳ ᡤᡳᠰᡠᡵᡝᡵᡝ ᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡥᡝᠨᡩᡠᠮᡝ᠈ ᠰᡳᠨᡳ ᡤᡝᠯᡝᠪᡠᡵᡝ ᠪᡳᡨᡥᡝ ᡩᡝ ᠪᡳ ᠠᡳᡠᠨ ᡥᡝᠩᡴᡳᠯᡝᠮᠪᡳ ᠰᡝᠮᡝ᠈ ᡝᡥᡝ ᡤᡳᠰᡠᠨ ᡩᡝ ᡝᡥᡝ ᡤᡳᠰᡠᠨ᠈ ᠰᠠᡳᠨ ᡤᡳᠰᡠᠨ ᡩᡝ ᠰᠠᡳᠨ ᡤᡳᠰᡠᠨ ᡴᠠᡵᡠᠯᠠᠮᡝ ᡤᡳᠰᡠᡵᡝᡶᡳ ᡨᡠᠸᠠᡥᠠᡴᡡ ᡠᠩᡤᡳᡥᡝ᠈ ᡠᡩᡳᠨ ᠪᡳᠶᠠᡳ ᡨᠣᡶᠣᡥᠣᠨ ᡩᡝ ᠈ ᠮᠣᠩᡤᠣ ᡤᡠᡵᡠᠨ ᡳ ᠵᠠᡵᡠᡨ ᡨᠠᡨᠠᠨ ᡳ ᠵᠣᠩᠨᠣᠨ ᠪᡝᡳᠯᡝ ᡳᠨᡳ ᠰᠠᡵᡤᠠᠨ ᠵᡠᡳ ᠪᡝ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠵᠠᠴᡳᠨ ᠵᡠᡳ ᡤᡠᠶᡝᠩ ᠪᠠᡨᡠᡵᡠ ᠪᡝᡳᠯᡝ ᡩᡝ ᠰᠠᡵᡤᠠᠨ ᠪᡝᠨᠵᡳᡵᡝ ᡩᡝ᠈ ᡤᡠᠶᡝᠩ ᠪᠠᡨᡠᡵᡠ ᠪᡝᡳᠯᡝ ᠣᡴᡩᠣᠮᡝ ᡤᡝᠨᡝᡶᡳ ᡩᠣᡵᠣᠯᠣᠮᡝ ᠠᠮᠪᠠ ᠰᠠᡵᡳᠨ ᠰᠠᡵᡳᠮᡝ ᡤᠠᡳᡥᠠ᠈ ᠣᡵᡳᠨ ᡩᡝ ᠮᠣᠩᡤᠣ ᡤᡠᡵᡠᠨ ᡳ ᠵᠠᡵᡠᡨ ᡨᠠᡨᠠᠨ ᡳ ᠨᡝᡳᠴᡳ ᡥᠠᠨ ᡳ ᠨᠣᠨ ᠪᡝ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᡳᠯᠠᠴᡳ ᠵᡠᡳ ᠮᠠᠩᡤᡡᠯᡨᠠᡳ ᠪᡝᡳᠯᡝ ᡩᡝ ᠰᠠᡵᡤᠠᠨ ᠪᠠᠨᠵᡳᡵᡝ ᡩᡝ᠈ ᠮᠠᠩᡤᡡᠯᡨᠠᡳ ᠪᡝᡳᠯᡝ ᠣᡴᡩᠣᠮᡝ ᡤᡝᠨᡝᡶᡳ ᡩᠣᡵᠣᠯᠯᠣᠮᡝ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡤᠠᡳᡥᠠ᠈ ᠮᠣᠩᡤᠣ ᡤᡠᡵᡠᠨ ᡳ ᡴᠣᡵᠴᡳᠨ ᡳ ᠮᠠᠩᡤᡠᠨ ᠪᡝᡳᠯᡝᡳ ᠰᠠᡵᡤᠠᠨ ᠵᡠᡳ ᠪᡝ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᡩᡠᡳᠴᡳ ᠵᡠᡳ ᡥᡠᠩ ᡨᠠᡳᠵᡳ ᠪᡝᡳᠯᡝ ᡩᡝ ᠰᠠᡵᡤᠠᠨ ᠪᡝᠨᠵᡳᡵᡝ ᡩᡝ᠈ ᡥᡠᠩ ᡨᠠᡳᠵᡳ ᠪᡝᡳᠯᡝ ᠣᡴᡩᠣᠮᡝ ᡤᡝᠨᡝᡶᡳ ᡥᠣᡳᡶᠠᡳ ᡤᡠᡵᡠᠨ ᡳ ᡨᡝᡥᡝ ᡥᡡᡵᡴᡳ ᡥᠠᡩᠠᡳ ᡥᠣᡨᠣᠨ ᡳ ᠪᠠᡩᡝ ᠠᠴᠠᡶᡳ ᡩᠣᡵᠣᠯᠣᠮᡝ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡤᠠᡳᡥᠠ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠣᠮᡧᠣᠨ ᠪᡳᠶᠠ ᡩᡝ᠈ ᠰᡠᠨᠵᠠ ᡨᠠᠩᡤᡡ ᠴᠣᠣᡥᠠ ᠪᡝ ᡠᠩᡤᡳᡶᡳ ᡩᡝᡵᡤᡳ ᠮᡝᡩᡝᡵᡳ ᠵᡠᠯᡝᡵᡤᡳ ᠸᡝᠵᡝ ᡳ ᠠᡳᠮᠠᠨ ᡳ ᠶᠠᡵᠠᠨ᠈ ᠰᡳᡵᡳᠨ ᠵᡠᠸᡝ ᡤᠣᠯᠣ ᠪᡝ ᠰᡠᠴᡠᡶᡳ᠈ ᡩᠠᡥᠠᡥᠠ ᠵᡠᠸᡝ ᡨᠠᠩᡤᡡ ᠪᠣᡳᡤᠣᠨ᠈ ᡝᠮᡠ ᠮᡳᠩᡤᠠᠨ ᠣᠯᠵᡳ ᡤᠠᠵᡳᡥᠠ᠈ ᠵᠣᡵᡥᠣᠨ ᠪᡳᠶᠠ ᡩᡝ᠈ ᠮᠣᠩᠣᡤ ᡤᡠᡵᡠᠨ ᡳ ᠵᠠᡵᡠᡨ ᡨᠠᡨᠠᠨ ᡳ ᡝᠯᠵᡳᡤᡝ ᠪᡝᡳᠯᡝᡳ ᠰᠠᡵᡤᠠᠨ ᠵᡠᡳ ᠪᡝ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠵᡠᡳ ᡩᡝᡤᡝᠯᡝᡳ ᡨᠠᡳᠵᡳ ᡩᡝ ᠰᠠᡵᡤᠠᠨ ᠪᡝᠨᠵᡳᡵᡝ ᡩᡝ᠈ ᡩᡝᡤᡝᠯᡝᡳ ᡨᠠᡳᠵᡳ ᠣᡴᡩᠣᠮᡝ ᡤᡝᠨᡝᡶᡳ ᡩᠣᡵᠣᠯᠣᠮᡝ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡤᠠᡳᡥᠠ᠈ ᠨᡳᠣᡥᠣᠨ ᡤᡡᠯᠮᠠᡥᡡᠨ ᠠᠨᡳᠶᠠ ᠠᠨᡳᠶᠠ ᠪᡳᠶᠠ ᡩᡝ᠈ ᠮᠣᠩᡤᠣ ᡤᡠᡵᡠᠨ ᡳ ᡴᠣᡵᠴᡳᠨ ᡳ ᡴᠣᠩᡤᠣᡵᠣ ᠪᡝᡳᠯᡝᡳ ᠰᠠᡵᡤᠠᠨ ᠵᡠᡳ ᠪᡝ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠪᡝᠶᡝ ᡩᡝ ᠰᠠᡵᡤᠠᠨ ᠪᡝᠨᠵᡳᡵᡝ ᡩᡝ ᡩᠣᡵᠣᠯᠣᠮᡝ ᠣᡴᡩᠣᡶᡳ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡤᠠᡳᡥᠠ᠈ ᡳᠯᠠᠨ ᠪᡳᠶᠠᡳ ᠣᡵᡳᠨ ᠵᠠᡴᡡᠨ ᡳ ᠴᡳᠮᠠᡵᡳ ᠠᠪᡴᠠ ᡤᡝᡵᡝᠩᡤᡝᠯᡝ ᡨᠠᠰᡥᠠ ᡝᡵᡳᠨ ᡩᡝ᠈ ᠠᠪᡴᠠᡳ ᠪᠣᠴᠣ ᠰᠣᡥᠣᠨ ᠰᠣᡵᠣᡶᡳ᠈ ᠨᡳᠶᠠᠯᠮᠠ ᡳ ᠴᡳᡵᠠ ᡤᡝᠮᡠ ᠰᠣᡵᠣᡴᠣ ᠪᡳᡥᡝ᠈ ᡥᠠᠨ ᠶᠠᠮᡠᠨ ᡩᡝ ᡨᡠᠴᡳᡳᡶᡳ ᡨᡝᡥᡝ ᠮᠠᠩᡤᡳ᠈ ᠮᡠᡩᡠᡵᡳ ᡝᡵᡳᠨ ᡩᡝ ᡤᡝᠩᡤᡳᠶᡝᠨ ᠣᡥᠣ᠈ ᡩᡠᡳ ᠪᡳᠶᠠ ᡩᡝ ᡥᡝᠴᡝᠨ ᡳ ᡧᡠᠨ ᡩᡝᡴᡩᡝᡵᡝ ᡝᡵᡶᡳ ᠠᠯᠠ ᡩᡝ ᡶᡠᠴᡳᡥᡳ ᠰᠶ᠈ ᡳᠣᡳ ᡥᡡᠸᠠᠩ ᠨᡳ ᠮᡳᠣᠣ᠈ ᠵᡠᠸᠠᠨ ᡳᠯᠠᠮᡠᠨ ᡥᠠᠨ ᡳ ᠮᡳᠣᠣ ᡠᡥᡝᡵᡳ ᠨᠠᡩᠠᠨ ᠠᠮᠪᠠ ᠮᡳᠣᠣ ᠠᡵᠠᠮᡝ ᡩᡝᡵᡳᠪᡠᡶᡳ ᡳᠯᠠᠴᡳ ᠨᡳᠶᠠᠯᠮᠠ ᡧᠠᠩᡤᠠᡥᠠ᠈ ᡨᡝᡵᡝ ᡶᠣᠨᡩᡝ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᡤᡠᠠᠩᠨᡳᠩ ᡥᡝᠴᡝᠨ ᡳ ᠰᡠᠩᠪᡳᠩᡤᡠᠸᠠᠨ ᡥᡝᡵᡤᡝᠨ ᡳ ᠵᠠᠩ ᠴᡝᠩ ᠶᡝᠨ ᠪᡝ ᠵᠠᠰᡝ ᠪᡳᡨᡠᠮᡝ ᡨᡠᠸᠠ ᠰᡝᠮᡝ ᡠᠩᡤᡳᡶᡳ᠈ ᠵᠠᠩ ᠴᡝᠩ ᠶᡝᠨ ᠵᠠᠰᡝ ᠪᡳᡨᡠᠮᡝᠨ ᠵᡠᠸᠠᡶᡳ᠈ ᠠᠮᠠᠰᡳ ᠪᡝᡩᡝᡵᡝᡥᡝ ᠮᠠᠩᡤᡳ᠈ ᠮᠠᠨᠵᡠ ᡤᡠᡵᡠᠨ ᡩᡝ ᡨᡠᠩᠰᡝ ᡩᡠᠩᡤᡠᠸᡝ ᠶᡠᠨ ᠪᡝ ᡨᠠᡴᡡᡵᠠᡶᡳ ᡥᡝᠨᡩᡠᠮᡝ᠈ ᠮᡳᠨᡳ ᠵᠠᠰᡝᡳ ᡨᡠᠯᡝᡵᡤᡳ ᠰᡠᠸᡝᠨᡳ ᡨᡝᡥᡝ ᠪᠠᠪᡝ ᠮᡝᠨᡳ ᠪᠠ ᠣᠪᡠᠮᠪᡳ᠈ ᡨᡝ ᡳᠴᡝ ᠸᡝᡥᡝᡳ ᠪᡳᡨᡥᡝ ᡳᠯᡳᠪᡠᠮᠪᡳ᠈ ᠰᡠᠸᡝᠨᡳ ᠴᠠᡳᡥᠠ᠈ ᡶᠠᠨᠠᡥᠠ᠈ ᠰᠠᠨᠴᠠᡵᠠ ᡝᡵᡝ ᡳᠯᠠᠨ ᡤᠣᠯᠣᡳ ᡨᠠᡵᡳᡥᠠ ᠵᡝᡴᡠ ᠪᡝ ᡠᠮᡝ ᡤᠠᡳᠵᠠᡵᠠ᠈ ᠰᡠᠸᡝᠨᡳ ᠵᡝᠴᡝᠨ ᡳ ᠪᠠᡳ ᡳᡝᡤᡝᠨ ᠪᡝ ᠪᠠᡵᡤᡳᠶᠠᡶᡳ ᡤᡠᡵᡠᠨ ᡳ ᡨᡝᡥᡝ ᠪᠠᠪᡝ ᠠᠮᠠᠰᡳ ᠪᡝᡩᡝᡵᡝᠮᡝ ᡨᡝ ᠰᡝᠮᡝ ᡨᠠᡴᡡᡵᠠᡥᠠ ᠮᠠᠩᡤᡳ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡥᡝᠨᡩᡠᠮᡝ᠈ ᠮᡝᠨᡳ ᡠᡩᡠᡩᡠ ᠵᠠᠯᠠᠨ ᡥᠠᠯᠠᠮᡝ ᡨᡝᡥᡝ ᠪᠣᠣ᠈ ᡨᠠᡵᡳᡥᠠ ᡠᠰᡳᠨ ᠪᡝ ᠸᠠᠯᡳᠶᠠ ᠰᡝᠮᡝ ᡤᡳᠰᡠᡵᡝᡵᡝᠩᡤᡝ᠈ ᠰᡠᠸᡝᠨᡳ ᠮᡠᠵᡳᠯᡝᠨ ᡤᡡᠸᠠᠯᡳᠶᠠᡶᡳ ᡤᡳᠰᡠᡵᡝᠮᠪᡳ ᡩᡝᡵᡝ᠈ ᠪᡳ ᡩᠣᠨᠵᡳᠴᡳ᠈ ᠵᡠᠯᡤᡝᡳ ᠮᡝᡵᡤᡝᠰᡝᡳ ᡥᡝᠨᡩᡠᡥᡝᠩᡤᡝ᠈ ᠮᡝᡩᡝᡵᡳ ᠮᡠᡴᡝ ᡩᡝᠪᡝᠨᡩᡝᡵᡝᡴᡡ᠈ ᡥᠠᠨ ᡳ ᠮᡠᠵᡳᠯᡝᠨ ᡤᡡᠸᠠᠯᡳᠶᠠᠨᡩᠠᡵᠠᡴᡡ ᠰᡝᡥᡝᠪᡳ᠈ ᡥᠠᠨ ᡳ ᠮᡠᠵᡳᠯᡝᠨ ᡤᡡᠸᠠᠯᡳᠶᠠᡶᡳ᠈ ᠵᠠᠰᡝᡳ ᡨᡠᠯᡝᡵᡤᡳ ᠶᡝᡥᡝ ᡩᡝ ᡩᠠᡶᡳ᠈ ᠮᡳᠨᡳ ᠵᠠᠰᡝᡳ ᠵᠠᡴᠠᡩᡝ ᡨᡝᡥᡝ ᡳᡵᡤᡝᠨ ᡳ ᡨᠠᡵᡳᡥᠠ ᠵᡝᡴᡠ ᠪᡝ ᡤᠠᡳᠪᡠᡵᠠᡴᡡ ᠪᡝᡩᡝᡵᡝ ᠰᡝᠴᡳ᠈ ᡥᠠᠨ ᡳ ᡤᡳᠰᡠᠨ ᠪᡝ ᠮᠠᡝᠠᠴᡳ ᠣᠮᠪᡳᠣ᠈ ᡨᠠᡳᡶᡳᠨ ᡩᠣᡵᠣ ᠪᡝ ᠪᡠᠶᡝᡵᠠᡴᡡ ᠈ ᡝᡥᡝᠪᡝ ᡤᡡᠨᡳᠴᡳ ᠮᡳᠨᡳ ᠠᠵᡳᡤᡝ ᡤᡠᡵᡠᠨ ᠮᠠᠵᡳᡤᡝ ᠵᠣᠪᠣᠴᡳ᠈ ᠰᡳᠨᡳ ᠠᠮᠪᠠ ᡤᡠᡠᡵᠨ ᡳᠨᡠ ᠠᠮᠪᡠᠯᠠ ᠵᠣᠪᠣᠮᠪᡳᡩᡝᡵᡝ᠈ ᠮᡳᠨᡳ ᠠᡳ ᠠᠮᠪᡠᠯᠠ ᡤᡠᡵᡠᠨ᠈ ᠪᡳ ᠪᡝᡩᡝᡵᡝᠪᡠᡵᡝ᠈ ᠰᡳᠨᡳ ᠠᠮᠪᠠ ᡤᡠᡵᡠᠨ ᠪᡝ ᠰᡳ ᠠᡩᠠᡵᠠᠮᡝ ᠪᠠᡵᡤᡳᠶᠠᠮᡝ ᠮᡠᡨᡝᠪᡠᠮᠪᡳ᠈ ᡩᠠᡳᠨ ᠣᠴᡳ ᠪᡳ ᡝᠮᡥᡠᠨ ᠵᠣᠪᠣᡵᠠᡴᡡ ᡴᠠᡳ᠈ ᠰᡳᠨᡳ ᡤᡠᡵᡠᠨ ᠪᡝ ᠠᠮᠪᠠ᠈ ᠴᠣᠣᡥᠠ ᠪᡝ ᡤᡝᡵᡝᠨ ᠰᡝᠮᡝ᠈ ᠮᡳᠮᠪᡝ ᡤᡳᡩᠠᡧᠠᠮᠪᡳ ᡴᠠᡳ᠈ ᠠᠮᠪᠠ ᡤᡠᡵᡠᠨ ᠪᡝ ᠠᠵᡳᡤᡝᠨ ᠣᠪᡠᠴᡳ᠈ ᠠᠵᡳᡤᡝ ᡤᡠᡵᡠᠨ ᠪᡝ ᠠᠮᠪᠠ ᠣᠪᡠᠴᡳ ᡤᡝᠮᡠ ᠠᠪᡴᠠᡳ ᠴᡳᡥᠠ ᡴᠠᡳ᠈ ᠰᡳᠨᡳ ᡝᠮᡠ ᡥᡝᠴᡝᠨ ᡩᡝ ᡨᡠᠮᡝᠨ ᠴᠣᠣᡥᠠ ᡨᡝᠴᡳ᠈ ᠰᡳᠨᡳ ᡤᡠᡵᡠᠨ ᡩᠣᠣᠰᡠᡵᠠᡴᡡ᠈ ᠮᡳᠩᡤᠠᠨ ᠴᠣᠣᡥᠠ ᡨᡝᠴᡳ ᡥᡝᠴᡝᠨ ᡳ ᠨᡳᠶᠠᠯᠮᠠ᠈ ᠴᠣᠣᡥᠠ ᡤᡝᠮᡠ ᠮᡳᠨᡩᡝ ᠣᠯᠵᡳ ᠣᠮᠪᡳᡴᠠᡳ ᠰᡝᠮᡝ ᡥᡝᠨᡩᡠᡵᡝ ᠵᠠᡴᠠᡩᡝ᠈ ᡨᡠᠩᠰᡝ ᡩᡠᠩ ᡤᡠᡵᡠᠨ ᠶᡠᠨ ᡝᡵᡝ ᡤᡳᠰᡠᠨ ᠵᠠᠴᡳ ᠠᠮᠪᠠᠨ ᡴᠠᡳ ᠰᡝᠮᡝ ᡥᡝᠨᡩᡠᡶᡳ ᡤᡝᠨᡝᡥᡝ᠈ ᡨᡝᡵᡝᡡᠴᡳ ᠸᠠᠨ ᠯᡳᡳ ᡥᠠᠨ ᠪᠠᠪᡝ ᡩᡠᡵᡳᠮᡝ ᠵᠠᠰᡝᡳ ᡨᡠᠯᡝ ᡠᡩᡠᡩᡠ ᠪᠠᡩᡝ ᠸᡝᡥᡝᡳ ᠪᡳᡨᡥᡝ ᡳᠯᡳᠪᡠᠨᠵᡳᡥᠠ᠈ ᠨᡳᠩᡤᡠᠨᠨ ᠪᡳᠶᠠ ᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᡳ ᠪᡝᠶᡝ ᡩᡝ ᠪᡠᠮᠪᡳ ᠰᡝᠮᡝ ᠵᠠᡶᠠᠨ ᡤᠠᡳᡥᠠ᠈ ᠶᡝᡥᡝᡳ ᠪᡠᠶᠠᠩᡤᡡ ᠪᡝᡳᠯᡝᡳ ᠨᠣᠨ ᠪᡝ ᠮᠣᠩᡤᠣᡳ ᡴᠠᠯᡴᠠᡳ ᠪᠠᡤᠠᡩᠠᡵᡥᠠᠨ ᠪᡝᡳᠯᡝᡳ ᠵᡠᡳ ᠮᠠᠩᡤᡡᠯᡨᠠᡳ ᡨᠠᡳᠵᡳ ᡩᡝ ᠪᡠᠮᠪᡳ ᠰᡝᠮᡝ ᡩᠣᠨᠵᡳᡶᡳ᠈ ᡤᡝᡵᡝᠨ ᠪᡝᡳᠰᡝ ᠠᠮᠪᠠᠰᠠ ᡥᡝᠨᡩᡠᠮᡝ᠈ ᠮᡠᠰᡝᡳ ᠵᠠᡶᠠᠨ ᠪᡠᡶᡳ ᠶᠠᠪᡠᡥᠠ ᠰᠰᠠᡵᡤᠠᠨ ᠵᡠᡳ ᠪᡝ ᠶᡝᡥᡝ᠈ ᡨᡝ ᠮᠣᠩᡤᠣ ᡩᡝ ᠪᡠᠴᡳ᠈ ᡨᡝᡵᡝᠴᡳ ᡴᠣᡵᠣ ᠠᡳ ᠪᡳ᠈ ᡨᡝᡵᡝ ᠰᠠᡵᡤᠠᠨ ᠵᡠᡳ ᠪᡝ ᠮᠣᠩᡤᠣ ᡩᡝ ᠪᡠᠮᡝ ᠵᠠᠪᡩᡠᠩᡤᠠᠯᠠ᠈ ᠮᡠᠰᡝ ᠴᠣᠣᡥᠠ ᡤᡝᠨᡝᡴᡳ᠈ ᠪᡠᠮᡝ ᠵᠠᠪᡩᡠᠴᡳ ᠪᡝᠨᡝᡵᡝ ᠣᠩᡤᠣᠯᠣ ᡥᠣᡨᠣᠨ ᠪᡝ ᡴᠠᡶᡳ ᠠᡶᠠᠮᡝ ᡤᠠᡳᡶᡳ ᡤᠠᠵᡳᡴᡳ᠈ ᡤᡡᠸᠠ ᠪᡠᠶᡝ ᠪᡝᡳᠰᡝ ᡩᡝ ᠶᠠᠪᡠᡥᠠ ᠰᠠᡵᡤᠠᠨ ᠵᡠᡳ ᡤᡝᠯᡳ ᠸᠠᡴᠠ ᡴᠠᡳ᠈ ᡥᠠᠨ ᡳ ᠪᡝᠶᡝ ᡩᡝ ᠶᠠᠪᡠᡥᠠ ᠰᠠᡵᡤᠠᠨ ᠵᡠᡳ ᠪᡝ ᠮᠣᠩᡤᠣ ᡩᡝ ᠪᡠᡵᡝ ᠪᡝ ᡩᠣᠨᠵᡳᡶᡳ᠈ ᠮᡠᠰᡝ ᠪᠠᠪᡳ ᡨᡝᡥᡝᡳ ᡤᡡᠸᠠ ᡩᡝ ᠠᡩᠠᡵᠠᠮᡝ ᡤᠠᡳᠪᡠᡶᡳ ᡠᠩᡤᡳᠮᠪᡳ᠈ ᠮᡠᠰᡝ ᠴᠣᠣᡥᠠ ᡤᡝᠨᡝᡴᡳ ᡩᡝᡵᡝ ᠰᡝᠮᡝ ᠮᠠᡩᠠᠨᡩᡠᠮᡝ ᡤᡳᠰᡠᡵᡝᠴᡳ᠈ ᡥᠠᠨ ᡥᡝᠨᡩᡠᠮᡝ᠈ ᡤᡡᠸᠠ ᠠᡳᡴᠠ ᠠᠮᠪᠠ ᠸᡝᡳᠯᡝᡳ ᡨᡠᡵᡤᡠᠨ ᡩᡝ᠈ ᡩᠠᡳᠨ ᠴᠣᠣᡥᠠ ᡤᡝᠨᡝᠴᡳ ᠠᠴᠠᠮᠪᡳᡩᡝᡵᡝ᠈ ᠰᠠᡵᡤᠠᠨ ᠵᡠᡳ ᠪᡝ ᡤᡡᠸᠠᡩᡝ ᠪᡠᡵᡝ ᡨᡠᡵᡤᡠᠨ ᡩᡝ᠈ ᠴᠣᠣᡥᠠ ᡤᡝᠨᡝᠴᡳ ᠠᠴᠠᡵᠠᡴᡡ᠈ ᡨᡝᡵᡝ ᠪᠠᠪᡳ ᠪᠠᠨᠵᡳᡥᠠ ᠰᠠᡵᡤᠠᠨ ᠵᡠᡳ ᠸᠠᡴᠠ᠈ ᡨᡝᡵᡝ ᠰᠠᡵᡤᠠᠨ ᠵᡠᡳ ᡨᡠᡵᡤᡠᠨ ᡩᡝ᠈ ᡥᠠᡩᠠ᠈ ᡥᠣᡳᡶᠠ᠈ ᡠᠯᠠ ᡳᠯᠠᠨ ᡤᡠᡵᡠᠨ ᡝᡶᡠᠵᡝᡥᡝ᠈ ᡨᡝᡵᡝ ᠰᠠᡵᡤᠠᠨ ᠵᡠᡳ ᠪᠠᠪᠠᡳ ᡤᡠᡵᡠᠨ ᠪᡝ ᡝᡶᡠᠯᡝᠮᡝ ᠣᡶᠣᡵᠣ ᠠᠵᠠᠪᡠᠮᡝ ᡩᠠᡳᠨ ᡩᡝᡴᡩᡝᠪᡠᠮᡝ ᠸᠠᠵᡳᡶᡳ᠈ ᡨᡝ ᠶᡝᡥᡝ ᡩᡝ᠈ ᠨᡳᡴᠠᠨ ᡩᠠᡶᡳ ᠶᡝᡥᡝᡳ ᠰᠠᡵᡤᠠᠨ ᠵᡠᡳ ᠪᡝ ᠮᡠᠰᡝ ᡩᡝ ᠪᡠᠪᡠᡵᠠᡴᡡ᠈ ᠮᠣᠩᡤᠣ ᡩᡝ ᠪᡠᠪᡠᠮᡝ ᠶᡝᡥᡝ ᠪᡝ ᡝᡶᡠᠵᡝᡴᡳᠨᡳ ᠰᡝᠮᡝ ᠠᠮᠪᠠ ᡩᠠᡳᠨ ᠠᡵᠠᠮᡝ ᡝᡵᡝ ᠸᡝᡳᠯᡝ ᠪᡝ ᡠᡨᡨᡠ ᡴᠣᡵᠰᠣᠪᡠᠮᡝ ᠮᠣᠩᡤᠣ ᡩᡝ ᠪᡠᡵᡝᠩᡤᡝ ᡴᠠᡳ᠈ ᠮᡠᠰᡝ ᡥᡡᠰᡠᠨ ᡨᡠᠴᡳᠮᡝ ᡩᠠᡳᠯᠠᡶᡳ ᡨᡝᡵᡝ ᠰᠠᡵᡤᠠᠨ ᠵᡠᡳ ᠪᡝ ᠪᠠᡥᠠᡶᡳ ᡤᠠᠵᡳᡥᠠ ᠰᡝᠮᡝ ᠠᠨᡳᠶᠠ ᡤᠣᡳᡩᠠᠮᡝ ᠪᡳᠰᡳᡵᡝᡴᡡ ᠪᡠᠴᡝᠮᠪᡳ᠈ ᡝᠯᡝᠮᠠᠩᠠ ᠵᠣᠪᠣᠯᠣᠨ ᡤᠠᠰᠠᠴᡠᠨ ᠣᠮᠪᡳ᠈ ᠶᠠᠶᠠ ᡩᡝ ᠪᡠᡥᡝ ᠰᡝᠮᡝ ᡨᡝᡵᡝ ᠰᠠᡵᡤᠠᠨ ᠵᡠᡳ ᡳᠨᡠ ᠠᠨᡳᠶᠠ ᠠᠮᠪᡠᠯᠠ ᠪᠠᠨᠵᡳᡵᠠᡴᡡ᠈ ᡤᡠᡵᡠᠨ ᠪᡝ ᠵᡠᡳ ᡝᡶᡠᠯᡝᠮᡝ ᡩᠠᡳᠨ ᠠᡵᠠᠮᡝ ᠠᡴᡡᠮᠪᡠᡥᠠ᠈ ᡨᡝ ᠪᡠᠴᡝᡵᡝ ᡝᡵᡳᠨ ᡳᠰᡳᡴᠠ ᠰᡝᠮᡝ ᡥᡝᠨᡩᡠᠴᡳ᠈ ᠪᡝᡳᠰᡝ ᠠᠮᠪᠠᠰᠠ ᡩᠠᡥᡡᠨ ᡩᠠᡥᡡᠨ ᡳ ᠮᠠᡵᠠᠮᡝ ᠴᠣᠣᡥᠠ ᡤᡝᠨᡝᡴᡳ ᠰᡝᡥᡝ ᠮᠠᠩᡤᡳ᠈ ᡥᠠᠨ ᡥᡝᠨᡩᡠᠮᡝ᠈ ᠪᡳ ᠴᠣᠣᡥᠠ ᡤᡝᠨᡝᡴᡳ ᠰᡝᠮᡝ ᠵᡳᠯᡳ ᠪᠠᠨᠵᡳᠴᡳ᠈ ᠰᡠᠸᡝ ᡨᠠᡶᡠᠯᠠᠴᡳ ᠠᠴᠠᠮᠪᡳ ᡴᠠᡳ᠈ ᠮᡳᠨᡳ ᠶᠠᠪᡠᡥᠠ ᠰᠠᡵᡤᠠᠨ ᠵᡠᡳ ᠪᡝ ᡤᡡᠸᠠ ᡩᡝ ᡤᠠᡳᠪᡠᠴᡳ ᠪᡳ ᡴᠣᡵᠰᠣᡵᠠᡴᡡ ᡩᠣᡵᠣ ᠪᡳᠣ᠈ ᠪᡳ ᡴᠣᡵᠰᠣᡵᠣ ᠪᠠᠪᡝ ᠰᡳᠨᡩᠠᡶᡳ ᡤᡡᠸᠠᡳ ᠪᡝᠶᡝ ᠰᡳᡩᡝᠨ ᡳ ᠨᡳᠶᠠᠯᠮᠠ ᠣᡶᡳ ᠴᠣᠣᡥᠠ ᠨᠠᡴᠠᡴᡳ ᠰᡝᠮᡝ ᡨᠠᡶᡠᠯᠠᠴᡳ᠈ ᠰᡠᠸᡝ ᠠᡳᠨᡠ ᡠᡨᡨᡠ ᠸᠸᡝᡳᠯᡝᡳ ᡝᠵᡝᠨ ᠪᠠᡨᠠ ᠣᡶᡳ ᠮᡳᠮᠪᡝ ᡤᠠᠰᠠᠪᡠᠮᡝ ᠮᠠᡵᠠᠮᠪᡳ᠈ ᠰᠠᡵᡤᠠᠨ ᠵᡠᡳ ᠪᡝ ᡤᠠᡳᠵᠠᡵᠠ ᡝᠵᡝᠨ ᠪᡳ ᡴᠣᡵᠰᠣᡵᠠᡴᡡ ᠪᠠᡩᡝ᠈ ᠰᡠᠸᡝ ᠮᡠᠵᠠᡴᡡ ᡴᠣᡵᠰᠣᡶᡳ ᠠᡳᠨᠠᠮᠪᡳ᠈ ᡴᠣᡵᠰᠣᠮᠪᡳ ᠰᡝᠮᡝ ᠰᡠᠸᡝᠨᡳ ᡤᡳᠰᡠᠨ ᠪᡝ ᡤᠠᡳᡶᡳ ᠴᠣᠣᡥᠠ ᡤᡝᠨᡝᠴᡳ ᠣᠵᠣᡵᠠᡴᡡ᠈ ᠰᡠᠸᡝᠮᠪᡝ ᡨᠠᡶᡠᠯᠠᡵᠠ ᠰᡝᠮᡝ ᡥᡝᠨᡩᡠᡶᡳ᠈ ᠴᠣᠣᡥᠠ ᠵᡠᠯᡝᡵᡤᡳ ᠰᡝᠮᡝ ᡳᠰᡳᠪᡠᡥᠠ ᠮᠣᡨᡳᠨ ᠪᡝ ᡤᡝᠮᡠ ᠠᠮᠠᠰᡳ ᠪᡝᡩᡝᡵᡝᠪᡠᡶᡳ ᠨᠠᡴᠠᡥᠠ᠈ ᡨᡝᡵᡝ ᠰᠠᡵᡤᠠᠨ ᠵᡠᡳ ᠪᡝ ᠮᠣᠩᡤᠣ ᡩᡝ ᠪᡠᡶᡳ ᡝᠮᡠ ᠠᠨᡳᠶᠠ ᡳ ᠣᠩᡤᠣᠯᠣ ᠶᠠᠯᠠ ᡤᠣᡳᡩᠠᡥᠠᡴᡡ ᠪᡠᠴᡝᡥᡝ᠈ ᡤᡝᠯᡳ ᠪᡝᡳᠰᡝ ᠠᠮᠪᠠᠰᠠ ᡥᠠᠨ ᡳ ᠪᠠᡵᡠ ᡥᡝᠨᡩᡠᠮᡝ᠈ ᡨᡝᡵᡝ ᠰᠠᡵᡤᠠᠨ ᠵᡠᡳ ᠪᡝ ᡥᠠᠨ ᡳ ᠪᡝᠶᡝ ᠪᡠᠮᠪᡳ ᡝᠮᡝ ᡤᡳᠰᡠᡵᡝᡶᡳ ᡤᡡᠰᡳᠨ ᡳᠯᠠᠨ ᠰᡝ ᠪᠠᡥᠠᡨᠠᠯᠠ᠈ ᠣᡵᡳᠨ ᠠᠨᡳᠶᠠ ᠣᡨᠣᠯᠣ ᡳᠰᠠᡵᠠᡥᠠ ᠰᠠᡵᡤᠠᠨ ᠵᡠᡳ ᠪᡝ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨᠯᡳ ᡥᠠᠨ ᠴᠣᠣᡥᠠ ᡠᠩᡤᡳᡶᡳ ᠶᡝᡥᡝ ᡩᡝ ᡨᡠᠸᠠᡴᡳᠶᠠᠮᡝ ᡨᡝᡶᡳ᠈ ᠶᡝᡥᡝᡳ ᡤᡳᠨᡨᠠᡳᠰᡳ᠈ ᠪᡠᠶᠠᠩᡤᡡ᠈ ᠸᠠᠨ ᠯᡳᡳ ᡥᠠᠨ ᡩᡝ ᡝᡵᡨᡠᡶᡳ ᠮᠣᠩᡤᠣ ᡩᡝ ᠪᡠᡥᡝ᠈ ᡨᡝ ᠮᡠᠰᡝ ᠨᡳᡴᠠᠨ ᠪᡝ ᡩᠠᡳᠯᠠᡴᡳ ᠰᡝᠮᡝ ᡤᡳᠰᡠᡵᡝᠴᡳ᠈ ᡥᠠᠨ ᡤᡝᠯᡳ ᠣᠵᠣᡵᠠᡴᡡ ᡥᡝᠨᡩᡠᠮᡝ᠈ ᠨᡳᡴᠠᠨ ᠴᠣᠣᡥᠠ ᡳᠨᡳ ᠵᠠᠰᡝ ᠪᡝ ᡨᡠᠴᡳᡶᡳ ᠶᡝᡥᡝ ᡩᡝ ᡩᠠᡶᡳ ᡨᡠᠸᠠᡴᡳᠶᠠᠯᠠ ᡨᡝᡥᡝ ᠪᡝ ᠠᠮᠪᠠ ᡨᠣᡴᡨᠣᠮᡝ ᡨᡠᠸᠠᡴᡳᠨᡳ᠈ ᠠᠨᡳᠶᠠ ᠠᠮᠪᡠᠯᠠ ᡤᠣᡳᡩᠠᡴᡳᠨᡳ᠈ ᠶᡝᡥᡝ ᠮᡠᠰᡝ ᡝᠨᠴᡠ ᠮᠠᠨᠵᡠ ᡤᡠᡵᡠᠨ ᡴᠠᡳ᠈ ᠨᡳᡴᠠᠨ ᠠᠪᡴᠠᡳ ᡶᡝᠵᡝᡵᡤᡳ ᡤᡠᡵᡠᠨ ᡩᡝ ᡳ ᡝᠵᡝᠨ ᠰᡝᠮᠪᡳ᠈ ᡝᠵᡝᠨ ᠣᠴᡳ ᡤᡠᠪᠴᡳ ᡤᡠᡵᡠᠨ ᡩᡝ ᡤᡝᠮᡠ ᡠᡥᡝᡵᡝᠮᡝ ᡝᠵᡝᠨ ᡩᡝᡵᡝ᠈ ᠮᡳᠨᡳ ᠴᠠᠩᡤᡳ ᡩᡝ ᠠᡳᠨᡠ ᡝᠮᡥᡠᠨ ᡝᠵᡝᠨ᠈ ᠸᠠᡴᠠ ᡠᡵᡠ ᠪᡝ ᡩᡠᡳᠯᡝᡶᡳ ᠪᡝᡳᡩᡝᡵᠠᡴᡡ᠈ ᠪᠣᡩᠣᡶᡳ ᡩᠠᡵᠠᡴᡡ᠈ ᠪᠠᠯᠠᡳ ᡠᡨᡨᡠ ᡥᡡᠰᡠᠨ ᡩᡠᡵᡳᠮᡝ ᠠᠪᡴᠠ ᡩᡝ ᡝᠵᡝᡵᡝ ᡤᡝᠰᡝ᠈ ᠠᠪᡴᠠᡳ ᠸᠠᡴᠠᠯᠠᡥᠠ ᠶᡝᡥᡝ ᡩᡝ ᡩᠠᡶᡳ ᠴᠣᠣᡥᠠ ᡨᡠᠸᠠᡴᡳᠶᠠᠮᡝ ᡨᡝᠴᡳ ᡨᡝᡴᡳᠨᡳ᠈ ᠰᡠᠸᡝ ᡠᠮᡝ ᡝᠪᡧᡝᡵᡝ᠈ ᠮᡠᠰᡝ ᡨᡝ ᠨᡳᡴᠠᠨ ᠪᡝ ᡩᠠᡳᠯᠠᠴᡳ ᠮᡠᠰᡝᡳ ᡠᡵᡠ ᡩᡝ ᠠᠪᡴᠠ ᠮᡠᠰᡝ ᡩᡝ ᡤᠣᠰᡳᠮᠪᡳ ᡴᠠᡳ᠈ ᠠᠪᡴᠠ ᡤᠣᠰᡳᠴᡳ ᠮᡠᠰᡝ ᠠᡳᠨᠴᡳ ᠪᠠᡥᠠᠮᠪᡳ ᡴᠠᡳ᠈ ᠪᠠᡥᠠ ᠰᡝᠮᡝ ᡨᡝᡵᡝ ᠣᠯᠵᡳ ᠨᡳᠶᠠᠯᠮᠠ ᡠᠯᡤᠠ ᡩᡝ ᠠᡳ ᡠᠯᡝᠪᡠᠮᠪᡳ᠈ ᠮᡠᠰᡝ ᡩᡝ ᠵᡝᡴᡠᡳ ᡴᡠ ᠠᡴᡡ ᡴᠠᡳ᠈ ᡩᠠᡳᠯᠠᡶᡳ ᠪᠠᡥᠠ ᠰᡝᠮᡝ ᠪᠠᡥᠠ ᠨᡳᠶᠠᠯᠠᠮᠠ ᡥᠣᠨᠣ ᠪᡠᠴᡝᠮᠪᡳ ᡴᠠᡳ᠈ ᡝᡵᡝ ᠰᡳᡩᡝᠨ ᡩᡝ ᠮᡠᠰᡝᡳ ᡤᡠᡵᡠᠨ ᠪᡝ ᠨᡝᠨᡝᠮᡝ ᠪᠠᡵᡤᡳᠶᠠᡴᡳ᠈ ᠪᠠᠪᡝ ᠪᡝᡴᡳᠯᡝᠮᡝ ᠵᠠᠰᡝ ᡶᡠᡵᡩᠠᠨ ᠵᠠᡶᠠᡴᡳ᠈ ᡠᠰᡳᠨ ᠸᡝᡳᠯᡝᡶᡳ ᠵᡝᡴᡠᡳ ᡴᡠ ᡤᡳᡩᠠᠮᡝ ᡤᠠᡳᡴᡳ ᠰᡝᠮᡝ ᡥᡝᠨᡩᡠᡶᡳ ᡩᠠᡳᠨ ᡩᡝᡵᡳᠪᡠᡥᡝᡴᡡ᠈ ᡨᡝᡵᡝᠴᡳ ᠮᡝᡠ ᠨᡳᡵᡠᡳ ᠵᡠᠸᠠᠨ ᡨᠠ ᡥᠠᡥᠠ᠈ ᡩᡠᡳᡨᠠ ᡳᡥᠠᠨ ᠪᡝ ᡨᡠᠴᡳᠪᡠᡶᡳ ᠰᡠᠯᠠ ᠪᠠᡩᡝ ᠠᠮᠪᠠᠨ ᡳ ᡠᠰᡳᠨ ᡨᠠᡵᡳᠮᡝ ᠵᡝᡴᡠᡳ ᡴᡠ ᡤᡳᡩᠠᡥᠠ᠈ ᡨᡝᡵᡝ ᠵᡝᡴᡠ ᠪᡝ ᡝᠵᡝᠮᡝ ᡤᠠᡳᠵᠠᡵᠠ᠈ ᠰᠠᠯᠠᠮᡝ ᠪᡠᡵᡝᡩᡝ ᠵᡠᠸᠠᠨ ᠨᡳᠩᡠᠨ ᠠᠮᠪᠠᠨ᠈ ᠵᠠᡴᡡᠨ ᠪᡳᡨᡥᡝᠰᡳ ᠪᡝ ᠰᡳᠨᡩᠠᡥᠠ᠈ ᠵᡠᠸᠠᠨ ᠪᡳᠶᠠᡳ ᡳᠴᡝ ᡩᡠᡳᠨ ᡳ ᡳᠨᡝᠩᡤᡳ ᠠᠪᠠ ᡤᡝᠨᡝᡶᡳ ᠮᡠᡴᡳ ᡤᡝᠪᡠᠩᡤᡝ ᠪᠠᡩᡝ ᡩᡝᡩᡠᡶᡳ᠈ ᠵᠠᡳ ᠴᡳᠮᠠᡵᡳ ᡤᡝᠨᡝᡵᡝ ᡩᡝ᠈ ᡳᠴᡝ ᠰᡠᠨᠵᠠ ᡳ ᡳᠨᡝᠩᡤᡳ ᡤᡡᠯᠮᠠᡥᡡᠨ ᡝᡵᡳᠨ ᡩᡝ᠈ ᠠᠮᠪᠠ ᡩᡝ ᡧᡠᠨ ᡳ ᠵᡠᠸᡝ ᡩᠠᠯᠪᠠᠴᡳ ᡶᡠᠯᡤᡳᠶᠠᠨ ᠨᡳᠣᠸᠠᠩᡤᡳᠶᠠᠨ ᠰᡳᡵᡝᠨ ᡧᡠᠨ ᡳ ᡨᡝᡳᠰᡠ ᡧᠠᠩᡤᡳᠶᠠᠨ ᠯᠠᠮᡠᠨ ᠰᡳᡵᡝᠨ ᡳᠯᠠᠨ ᠵᡠᡵᡤᠠᠨ ᡳ ᡤᡠᠴᡳᡶᡳ ᡤᡠᡴᠠ ᠠᡵᠠᡶᡳ ᡥᠠᠨ ᠪᡝ ᡥᠠᠨᠴᡳ ᡩᠠᡥᠠᠯᠠᠮᡝ ᠪᡳᡥᡝ ᠮᠠᠩᡤᡳ᠈ ᡥᠠᠨ ᡤᡝᡵᡝᠨ ᠪᡝ ᡤᠠᡳᡶᡳ ᡨᡝᡵᡝ ᠰᡳᡵᡝᠨ ᡩᡝ ᡥᡝᠩᡴᡳᠯᡝᡥᡝ ᠮᠠᠩᡤᡳ᠈ ᡨᡝᡵᡝᠴᡳ ᡩᠠᡥᠠᠯᠠᡵᠠ ᠰᡳᡵᡝᠨ ᠨᠠᡴᠠᡥᠠ᠈ ᠣᠮᡧᠣᠨ ᠪᡳᠶᠠ ᡩᡝ᠈ ᡨᠠᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠵᡠᠸᡝ ᠮᡳᠩᡤᠠᠨ ᠴᠣᠣᡥᠠ ᡠᠩᡤᡳᡶᡳ ᡩᡝᡵᡤᡳ ᠮᡝᡩᡝᡵᡳ ᠸᡝᠵᡝᡳ ᠠᡳᠮᠠᠨ ᠴᡳ ᠸᡝᠰᡳᡥᡠᠨ᠈ ᡝᡥᡝ ᡴᡠᡵᡝᠨ ᠪᡝ ᡩᠠᡳᠯᠠᠮᡝ ᡤᡝᠨᡝᡶᡳ᠈ ᡤᡡᠨᠠᡴᠠ ᡴᡠᡵᡝᠨ ᡳ ᠨᡳᠶᠠᠯᠮᠠ ᠪᡝ ᡩᠠᡥᠠ ᠰᡝᠴᡳ ᡩᠠᡥᠠᡵᠠᡴᡡ ᠣᡶᡳ᠈ ᠴᠣᠣᡥᠠ ᡶᠠᡳᡩᠠᡶᡳ ᠪᡠᡵᡝᠨ ᠪᡠᡵᡩᡝᠮᡝ ᡳᠯᠠᡵᠰᡠ ᡠᠯᠠᠨ ᠪᡝ ᡶᡝᡴᡠᠮᡝ ᡩᠠᠪᠠᡶᡳ ᠵᠠᠰᡝ ᠪᡝ ᡨᠠᡨᠠᠮᡝ ᡝᡶᡠᠯᡝᡶᡳ ᡥᠣᡨᠣᠨ ᠪᡝ ᠠᡶᠠᠮᡝ ᡤᠠᡳᡶᡳ᠈ ᠵᠠᡴᡡᠨ ᡨᠠᠩᡤᡡ ᠨᡳᠶᠠᠯᠮᠠ ᠪᡝ ᠸᠠᡥᠠ᠈ ᡨᡠᠮᡝᠨ ᠣᠯᠵᡳ ᠪᠠᡥᠠ᠈ ᡩᠠᡥᠠᡥᠠ ᠨᡳᠶᠠᠯᠮᠠ ᠪᡝ ᠰᡠᠨᠵᠠ ᡨᠠᠩᡤᡡ ᠪᠣᡳᡤᠣᠨ ᠠᡵᠠᡶᡳ ᡤᠠᠵᡳᠮᡝ ᠴᠣᠣᡥᠠ ᠪᡝᡩᡝᡵᡝᡥᡝ᠈ ᡥᠠᠨ ᠠᠮᠪᠠᠰᠠ ᠪᠠᡵᡠ ᡥᡝᠨᡩᡠᠮᡝ᠈ ᠵᡠᠯᡤᡝᡳ ᡴᠣᠣᠯᡳ ᠪᡝ ᡩᠣᠨᠵᡳᠴᡳ ᠮᡠᠵᡳᠯᡝᠨ ᡨᠣᠨᡩᠣ ᠣᠨᠴᠣ ᠪᡝ ᡩᡝᠯᡝ ᠰᡝᡥᡝᠪᡳ᠈ ᠪᡳ ᡤᡡᠨᡳᠴᡳ ᠣᠨᠴᠣ ᡨᠣᠨᡩᠣ ᠮᡠᠵᡳᠯᡝᠨ ᠴᡳ ᡩᡝᠯᡝ ᠠᡴᡡ᠈ ᠠᠮᠪᠠᠰᠠ ᠰᡠᠸᡝᠨᡳ ᠨᡳᠶᠠᠮᠠᠨ ᡥᡡᠨᠴᡳᡥᡳᠨ ᠪᡝ ᡩᡠᠯᡝᠮᡝ ᡤᡡᠸᠠ ᠮᡠᠵᠠᡴᡡ ᠨᡳᠶᠠᠯᠮᠠ ᠪᡝ ᠠᡩᠠᡵᠠᠮᡝ ᡨᡠᡴᡳᠶᡝᡵᡝ ᠰᡝᠮᡝ ᡠᠮᡝ ᡤᡡᠨᡳᡵᡝ᠈ ᡠᡶᠯᡝᡥᡝ ᠪᡝ ᡠᠮᡝ ᡨᡠᠸᠠᡵᠠ᠈ ᠮᡠᠵᡳᠯᡝᠨ ᠣᠨᠴᠣ ᡨᠣᠨᡩᠣ ᠰᠠᡳᠨ ᠪᡝ ᡨᡠᠸᠠᠮᡝ ᡨᡠᡴᡳᠶᡝᡴᡳᡩᡝᡵᡝ᠈ ᡤᡝᡵᡝᠨ ᠪᡝ ᡠᠮᡝ ᡨᡠᠸᠠᡵᠠ᠈ ᡝᡵᡩᡝᠮᡠ ᠪᡝ ᡨᡠᠸᠠᠮᡝ ᠠᠮᠪᠠᠨ ᠣᠪᡠᡴᡳ ᡩᡝᡵᡝ᠈ ᡩᠣᡵᠣ ᡩᠠᠰᠠᡵᠠ ᡩᠠ ᡝᠮᡠ ᠪᠠᡩᡝ ᠪᠠᡳᡨᠠᠯᠠᠴᡳ ᠣᠵᠣᡵᠣ ᠨᡳᠶᠠᠯᠮᠠ ᠠᠪᡳᡩᡝ ᠪᡳ᠈ ᡩᠣᡵᠣ ᡩᡝ ᡳᠰᡳᠯᠠᠴᡳ ᠣᠵᠣᡵᠣ ᠨᡳᠶᠠᠯᠮᠠ ᠪᡳᠴᡳ ᡨᡝᡵᡝ ᠪᡝ ᡠᡨᡥᠠᡳ ᡨᡠᡴᡳᠶᡝᡴᡳ ᡩᡝᡵᡝ ᠰᡝᠮᡝ ᡥᡝᠨᡩᡠᡥᡝ᠉ ᡥᠠᠨ ᠠᠮᠪᠠᠰᠠᡳ ᠪᠠᡵᡠ ᡥᡝᠨᡩᡠᠮᡝ, ᠵᡠᠯᡤᡝᡳ ᡴᠣᠣᠯᡳ ᠪᡝ ᡩᠣᠨᠵᡳᠴᡳ, ᠮᡠᠵᡳᠯᡝᠨ ᡨᠣᠨᡩᠣ ᠣᠨᠴᠣ ᠪᡝ ᡩᡝᠯᡝ ᠰᡝᡥᡝᠪᡳ, ᠪᡳ ᡤᡡᠨᡳᠴᡳ ᠣᠨᠴ ᡨᠣᠨᡩᠣ ᠮᡠᠵᡳᠯᡝᠨ ᠴᡳ ᡩᡝᠯᡝ ᠠᡴᡡ. ᠠᠮᠪᠠᠰᠠ ᠰᡠᠸᡝᠨᡳ ᠨᡳᠶᠠᠮᠠᠨ ᡥᡡᠨᠴᡳᡥᡳᠨ ᠪᡝ ᡩᡠᠯᡝᠮᡝ ᡤᡡᠸᠠ ᠮᡠᠵᠠᡴᡡ ᠨᡳᠶᠠᠯᠮᠠ ᠪᡝ ᠠᡩᠠᡵᠠᠮᡝ ᡨᡠᡴᡳᠶᡝᡵᡝ ᠰᡝᠮᡝ ᡠᠮᡝ ᡤᡡᠨᡳᡵᡝ, ᡶᡠᠯᡝᡥᡝ ᠪᡝ ᡠᠮᡝ ᡨᡠᠸᠠᡵᠠ, ᠮᡠᠵᡳᠯᡝᠨ ᠣᠨᠴᠣ ᡨᠣᠨᡩᠣ ᠰᠠᡳᠨ ᠪᡝ ᡨᡠᠸᠠᠮᡝ ᡨᡠᡴᡳᠶᡝᡴᡳ ᡩᡝᡵᡝ, ᡤᡳᡵᠠᠨᠪᡝ ᡠᠮᡝ ᡨᡠᠸᠠᡵᠠ, ᡝᡵᡩᡝᠮᡠ ᠪᡝ ᡨᡠᠸᠠᠮᡝ ᠠᠮᠪᠠᠨ ᠣᠪᡠᡴᡳ ᡩᡝᡵᡝ. ᡩᠣᡵᠣ ᡩᠠᠰᠠᡵᠠ ᡩᡝ ᡝᠮᡠ ᠪᠠᡩᡝ ᠪᠠᡳᡨᠠᠯᠠᠴᡳ ᠣᠵᠣᡵᠣ ᠨᡳᠶᠠᠯᠮᠠ ᠠᡳᠪᡳᡩᡝ ᠪᡳ, ᡩᠣᡵᠣ ᡩᡝ ᠠᡳᠰᡳᠯᠠᠴᡳ ᠣᠵᠣᡵᠣ ᠨᡳᠶᠠᠯᠮᠠ ᠪᡳᠴᡳ, ᡨᡝᡵᡝ ᠪᡝ ᡠᡨᡥᠠᡳ ᡨᡠᡴᡳᠶᡝᡴᡳ ᡩᡝᡵᡝ ᠰᡝᠮᡝ ᡥᡝᠨᡩᡠᡥᡝ. ᡥᠠᠨ ᠠᠪᠠᠯᠠᠮᡝ ᡤᡝᠨᡝᡶᡳ, ᠠᠪᡴᠠ ᠨᡳᠮᠠᡵᠠᡶᡳ ᡤᠠᠯᠠᡴᠠ ᠮᠠᠩᡤᡳ, ᠣᡵᡥᠣ ᠮᠣᠣ ᡳ ᠣᠩᡴᠠ ᡳ ᠨᡳᠮᠠᠩᡤᡳ ᡩᡝ ᡝᡨᡠᡴᡳ ᡠᠰᡳᡥᡳᠮᠪᡳ ᠰᡝᠮᡝ ᡝᡨᡠᡴᡠ ᠪᡝ ᡥᡝᡨᡝᡵᡝ ᠵᠠᡴᠠᡩᡝ, ᡥᠠᠨ ᠪᡝ ᡩᠠᡥᠠᠮᡝ ᠶᠠᠪᡠᡵᡝ ᠪᡠᠶᠠᠩᡤᡡ ᡤᡝᠪᡠᠩᡤᡝ ᠪᡳᠶᠠ, ᠶᠠᠠᠮᡴᡠ ᡤᡝᠪᡠᠩᡤᡝ ᠨᡳᠶᠠᠯᠮᠠ ᠰᠠᡶᡳ ᠠᡳ ᠠᡴᡡ ᠪᠠᠨᠵᡳᠮᠪᡳ ᠰᡝᠮ ᡝᡨᡠᡴᡠ ᠪᡝ ᡥᠠᡳᡵᠠᠮᡝ ᡥᡝᡨᡝᠮᠪᡳ. ᠠᠪᠠᠯᠠᡴᡳ ᠶᠠᠪᡠᠴᡳᠨᠠ ᠰᡝᠮᡝ ᠵᡠᠸᡝ ᠨᠣᡶᡳ ᠵᡝᠨᡩᡠ ᡤᡳᠰᡠᡵᡝᡵᡝ ᠪᡝ, ᡥᠠᠨ ᡩᠣᠨᠵᡳᡶᡳ ᡳᠨᠵᡝᠮᡝ ᡥᡝᠨᡩᡠᠮᡝ, ᠮᡳᠨᡩᡝ ᡝᡨᡠᡴᡠ ᠠᡴᡡ ᠰᡝᠮᡝ ᡥᡝᡨᡝᡵᡝᠩᡤᡝ ᠸᠠᡴᠠ, ᠨᡳᠮᠠᠩᡤᡳ ᡩᡝ ᡠᠰᡳᡥᡳᠪᡠᡶᡳ ᠠᡳ ᠪᠠᡥᠠᠮᠪᡳ. ᡝᡵᡝ ᡝᡨᡠᡴᡠ ᠪᡝ ᠨᡳᠮᠠᠩᡤᡳ ᡩᡝ ᡠᠰᡳᡥᡳᠪᡠᡵᡝ ᠠᠩᡤᠠᠯᠠ, ᠰᡠᠸᡝᠨᡩᡝ ᡳᠴᡝ ᡠᡨᡥᠠᡳ ᠪᡠᠴᡳ ᡝᡥᡝᠣ, ᡠᠰᡳᡥᡳᠪᡠᡶᡳ ᡝᡥᡝ ᠣᠪᡠᡶᡳ ᠪᡠᡥᡝᡩᡝ ᠰᠠᡳᠶᡡᠨ, ᠮᡳᠨ ᡥᠠᡳᡵᠠᠨᡩᠠᡵᠠᠩᡤᡝᡤ ᠰᡠᠸᡝᠨᡳ ᡤᡝᡵᡝᠨ ᡳ ᠵᠠᠯᡳᠨᡩᡝ ᡴᠠᡳ ᠰᡝᠮᡝ ᡥᡝᠨᡩᡠᡥᡝ. ᡥᠠᠨ ᠠᠮᠪᠠᠰᠠᡳ ᠪᠠᡵᡠ ᡥᡝᠨᡩᡠᠮᡝ, ᠠᠪᡴᠠ ᠰᡳᠨᡩᠠᠴᡳ ᡥᠠᠨ, ᡥᠠᠨ ᠰᡳᠨᡩᠠᠴᡳ ᠠᠮᠪᠠᠰᠠ ᡴᠠᡳ, ᠠᠮᠪᠠᠰᠠ ᠰᡠᠸᡝ ᠠᡶᠠᠪᡠᡥᠠ ᡤᡝᠪᡠ ᠪᡝ ᡤᡡᠨᡳᠮᡝ ᡤᡠᡵᡠᠨ ᡳ ᡩᠣᡵᠣ ᡩᡝ ᠪᠠᡳᡨᠠᠯᠠᠴᡳ ᠠᠴᠠᡵᠠ ᠰᠠᡳᠨ ᡳᠨᠶᠠᠯᠮᠠ ᠪᡝ ᠰᠠᠴᡳ ᡠᠮᡝ ᡤᡳᡩᠠᡵᠠ, ᡤᡠᡵᡠᠨ ᡩᡝ ᠠᡳ ᡥᠠᠴᡳᠨ ᡳ ᠪᠠᡳᡨᠠ ᠠᡴᡡ, ᠰᠠᡳᠨ ᠨᡳᠶᠠᠣᠯᠮᠠ ᠠᠮᠪᡠᠯᠠ ᠣᠴᡳ ᡨᡝᡳᠰᡠ ᡨᡝᡳᠰᡠ ᠪᠠᡳᡨᠠ ᡩᡝ ᠠᡶᠠᠪᡠᡴᡳ ᡩᡝᡵᡝ. ᡤᡠᡵᡠᠨ ᡳ ᡩᠣᡵᠣ ᡩᠠᠰᠠᡵᠠ, ᡤᡝᡵᡝᠨ ᠴᠣᠣᡥᠠ ᠪᡝ ᡴᠠᡩᠠᠯᠠᡵᠠ ᡩᡝ ᠠᠮᠪᠠᠨ ᡴᠣᠮᠰᠣ ᠣᠴᡳ ᠠᡳᠪᡳᡩᡝ ᡳᠰᡳᠨᠠᠮᠪᡳ, ᡩᠠᡳᠨ ᡩᡝ ᠪᠠᡨᡠᡵᡠ ᠨᡳᠶᠠᠯᠮᠠ ᠣᠴᡳ ᡤᡠᠩ ᡧᠠᠩ ᠪᡠᡴᡳ, ᡤᡠᡵᡠᠨ ᡳ ᡩᠣᡵᠣ ᡩᠠᠰᠠᡵᠠ ᡩᡝ ᡨᡠᠰᠠ ᠠᡵᠠᡵᠠ ᡨᠣᠨᡩᠣ ᠰᠠᡳᠨ ᠨᡳᠶᠠᠯᠮᠠ ᠣᠴᡳ, ᡨᠣᠨ ᡩᡝ ᡩᠣᠰᡳᠮᠪᡠᡶᡳ ᡩᠣᡵᠣ ᡩᡝ ᠠᡳᠰᡳᠯᠠᠪᡠᡴᡳ, ᠵᡠᠯᡤᡝᡳ ᠪᠠᠨᠵᡳᡥᠠ ᠵᠠᠪᡧᠠᡥᠠ ᡠᡶᠠᡵᠠᡥᠠ ᠰᠠᡳᠨ ᡴᠣᠣᠯᡳ ᠪᡝᠰᠠᡵᠠ ᠨᡳᠶᠠᠯᠮᠠ ᠣᠴᡳ, ᠰᠠᡵᠠ ᠰᠠᡳᠨ ᡴᠣᠣᠯᡳ ᠪᡝ ᠠᠯᠠᠪᡠᠮᡝ ᠪᠠᡳᡨᠠᠯᠠᡴᡳ, ᠰᠠᡵᡳᠨ ᡩᡝ ᠪᠠᡳᡨᠠᠩᡤᠠ ᠨᡳᠶᠠᠯᠮᠠ ᠣᠴᡳ ᠰᠠᡵᡳᠨ ᡩᡝ ᠪᠠᡳᡨᠠᠯᠠᡴᡳ,. ᡤᠣᠯᠣ ᡤᠣᠯᠣᡳ ᠪᡠᠶᠠ ᡤᠠᡧᠠ ᠴᡳ ᠠᠨᠠᠮᡝ ᠪᠠᡳᠴᠠᠴᡳᠨᠠ ᠰᡝᠮᡝ ᡥᡝᠨᡩᡠᡥᡝ. ᡥᠠᠨ ᡳᠨᡳ ᠵᡠᠰᡝ ᡤᡝᡵᡝᠨ ᠪᡝᡳᠰᡝᡳ ᠠᡵᡠ ᡨᠠᠴᡳᠪᡠᠮᡝ ᡥᡝᠨᡩᡠᠮᡝ, ᠰᠠᡳᠨ ᡨᠣᠨᡩᠣ ᠨᡳᠶᠠᠯᠮᠠ ᠪᡝ ᡨᡠᡴᡳᠶᡝᡵᠠᡴᡡ ᠸᡝᠰᡳᠮᠪᡠᡵᠠᡴᡡ ᠣᠴᡳ, ᠰᠠᡳᠨ ᡨᠣᠨᡩᠣ ᠨᡳᠶᠠᠯᠮᠠ ᠠᡳ ᡩᡝ ᠶᡝᠨᡩᡝᠮᠪᡳ, ᡝᡥᡝ ᠨᡳᠶᠠᠯᠮᠠ ᡝ ᠸᠠᠰᡳᠮᠪᡠᡵᠠᡴᡡ ᠸᠠᡵᠠᡴᡡ ᠣᠴᡳ, ᡝᡥᡝ ᠨᡳᠶᠠᠯᠮᠠ ᠠᡳ ᡩᡝ ᡳᠰᡝᠮᠪᡳ, ᠪᠠᡥᠠᡵᠠ ᠪᡝ ᡠᠮᡝ ᠨᡝᠮᡧᡝᡵᡝ, ᡨᠣᠨᡩᠣ ᠪᡝ ᠨᡝᠮᡧᡝ, ᡠᠯᡳᠨ ᠪᡝ ᡠᠮᡝ ᡤᡡᠨᡳᡵᡝ ᡝᡵᡩᡝᠮᡠ ᠪᡝ ᡤᡡᠨᡳ, ᠠᠪᡴᠠᡳ ᡶᡝᠵᡳᠯᡝ ᠪᠠᠨᠵᡳᡵᡝ ᠠᠮᠪᠠ ᡤᡠᡵᡠᠨ ᡳ ᡩᠣᡵᠣ ᡩᡝ, ᡨᠣᠨᡩᠣ ᡝᡵᡶᡝᠮᡠ ᠴᡳ ᡩᡝᠯᡝ ᠠᡳ ᠪᡳ. ᠮᡳᠨᡳ ᡩᠣᠯᠣ ᡩᠠᠴᡳ ᡨᠣᠨᡩᠣ ᠪᡝ ᡝᠯᡝᡵᠠᡴᡡ ᠪᠠᠨᠵᡳᡥᠠ, ᠵᡠᠰᡝ ᡠᠰᡠᠸᡝᠮᠪᡝ ᡝᠵᡴᡳᠨᡳ ᠰᡝᠮᡝ ᡨᠠᠴᡳᠪᡠᡵᡝᠩᡤᡝ ᡝᡵᡝ ᡳᠨᡠ ᠰᡝᠮᡝ ᡥᡝᠨᡩᡠᡥᡝ. ᡥᠠᠨ ᡥᡝᠨᡩᡠᠮᡝ, ᠶᠣᠣᠨᡳ ᠰᠠᡳᠨ ᡝᡵᡩᡝᠮᡠᠩᡤᡝ ᠨᡳᠶᠠᠯᠮᠠ ᡠᡩᡠ ᠪᡳ, ᡝᠮᡠ ᠨᡳᠶᠠᠯᠮᠠᡳ ᠪᡝᠶᡝ ᡝᠮᡠ ᠵᠠᡴᠠ ᠪᡝ ᠠᡥᠠᠨᠠᠴᡳ, ᡝᠮᡠ ᠵᠠᡴᠠ ᠪᡝ ᠪᠠᡥᠠᠨᠠᡵᠠᡴᡡ, ᡝᠮᡠ ᠪᠠᡩᡝ ᠰᠠᡳ ᠣᠴᡳ, ᡝᠮᡠ ᠪᠠᡩᡝ ᡝᡥᡝ.ᡩᠠᡳᠨ ᡩᡝ ᠪᠠᡨᡠᡵᡠ ᠨᡳᠶᠠᠯᠮᠠ, ᡶᠠᡧᠠᠨ ᡩᡝ ᠪᠠᠨᠵᡳᡵᡝ ᡩᡝ ᠪᠠᡳᡨᠠᡴᡡ ᠮᠣᠴᠣ, ᡤᠠᡧᠠᠨ ᡩᡝ ᠪᠠᠨᠵᡳᡵᡝ ᡩᡝ ᠪᠠᡳᡨᠠᠩᡤᠠ ᠨᡳᠶᠠᠯᠮᠠ ᡩᠠᡳ ᡩᡝ ᠪᠠᡳᡨᠠᡴᡡᠩᡤᡝ ᡤᡝᠯᡳ ᠪᡳ ᡴᠠᡳ ᠰᡝᠮᡝ ᠨᡳᠶᠠᠯᠮᠠᡳ ᡨᡝᡳᠰᡠ ᠠᠴᠠᡵᠠ ᠪᡝ ᡨᡠᠸᠠᠮᡝ ᠸᡝᡳᠯᡝ ᡩᡝ ᠠᡶᠠᠪᡠᡥᠠ. ᡨᡝᡳᡯᡠ ᡴᡠᠨᡩᡠᠯᡝᠨ ᡥᠠᠨ ᠪᠠᠪᠠ ᠪᡝ ᡨᠣᡴᡨᠣᠪᡠᡶᡳ ᡳᠯᠠᠨ ᡨᠠᠩᡤᡡ ᡥᠠᡥᠠ ᡩᡝ ᡝᠮᡠ ᠨᡳᡵᡠᡳ ᡝᠵᡝᠨ, ᠰᡠᠨᠰᠵᠠ ᠨᡳᡵᡠ ᡩᡝ ᡝᠮᡠ ᠵᠠᠯᠠᠨ ᡳ ᡝᠵᡝᠨ, ᠰᡠᠨᠵᠠ ᠵᠠᠯᠠᠨ ᡩᡝ ᡝᠮᡠ ᡤᡡᠰᠠᡳᠨ ᡝᠵᡝᠨ, ᡤᡡᠰᠠᡳ ᡝᠵᡝᠨ ᡳ ᡥᠠᠰᡥᡡ ᡳᠴᡳ ᠵᡠᠸᡝ ᠠᠰᡥᠠᠨ ᡩᡝ ᡝᠮᡨᡝ ᠮᡝᡳᡵᡝᠨ ᡳ ᡝᠵᡝᠨ ᠰᡳᠨᡩᠠᡥᠠ. ᡩᠠᡩᡝ ᠰᡠᠸᠠᠶᠠᠨ, ᡶᡠᠯᡤᡳᠶᠠᠨ, ᠯᠠᠮᡠᠨ. ᡧᠠᠩᡤᡳᠶᠠᠨ ᡩᡠᡳᠨ ᠪᠣᠴᠣ ᡨᡠ ᠪᡳᡥᡝ, ᡠᡩᡳᠨ ᠪᠣᠴᠣ ᡨᡠ ᠪᡝ ᡴᡠᡠᠪᡠᠮᡝ ᠵᠠᡴᡡᠨ ᠪᠣᠴᠣ ᡨᡠ ᠣᠪᡠᡶᡳ, ᡠᡥᡝᡵᡳ ᠵᠠᡴᡡᠨ ᡤᡡᠰᠠ ᠣᠪᡠᡥᠠ. ᡩᠠᡳᠨ ᠴᠣᠣᡥᠠ ᡨᡠᠴᡳᡴᡝ ᡩᡝ, ᠪᠠ ᠣᠨᠴᠣ ᠣᠴᡳ ᠵᠠᡴᡡᠨ ᡤᡡᠰᠠ ᡨᡝᡴᠰᡳᠯᡝᠮᡝ ᠠᡩᠠᡶᡳ ᠵᠠᡴᡡᠨ ᠵᡠᡵᡤᠠᠨ ᡳ ᠵᠠᠯᠠᠨ ᠰᡳ ᠰᡳᠨᡩᠠᡶᡳ ᠶᠠᠪᡠᠮᠪᡳ. ᠪᠠ ᡥᠠᡶᡳᡵᠠᡥᡡᠨ ᠣᠴᡳ ᠵᠠᡴᡡᠨ ᡤᡡᠰᠠ ᡝᠮᡠ ᠵᡠᡵᡤᠠᠨ ᡳ ᠰᡳ ᠰᡳᠨᡩᠠᡶᡳ ᠶᠠᠪᡠᠮᠪᡳ. ᠴᠣᠣᡥᠠᡳ ᠨᡳᠶᠠᠯᠮᠠ ᠪᡝ ᠵᡳᠯᡤᠠᠨ ᠵᠠᠮᠠᡵᠠᠪᡠᡵᠠᡴᡡ, ᡝᠮᡠ ᠵᠠᠯᠠᠨ, ᡝᠨᠴᡠ ᡤᡡᠰᠠ ᡩᡝ ᡶᠠᠴᡠᡥᡡᠨ ᠶᠠᠪᡠᠪᡠᡵᠠᡴᡡ. ᡩᠠᡳᠨ ᠴᠣᠣᡥᠠ ᠪᡝ ᠠᠴᠠᡶᡳ ᠠᡶᠠᡵᠠ ᡨᡝ ᡤᠣᠯᠮᡳᠨ ᠵᡳᡵᠠᠮᡳᠨ ᡠᡴᠰᡳᠨ ᡝᡨᡠᡥᡝ ᡤᠠᠪᡨᠠᡵᠠ ᠮᠠᠩᡤᠠ ᠨᡳᠶᠠᠯᠮᠮᠠ ᠪᡝ ᠠᠮᠠᡵᡤᡳᠴᡳ ᡤᠠᠪᡨᠠᠮᡝ ᡩᠣᠰᡳᠮᠪᡠᠮᡝ ᠰᡳᠯᡳᡥᠠ ᠰᠠᡳᠨ ᠴᠣᠣᡥᠠ ᠪᡝ ᠮᠣᡵᡳᠨ ᠴᡳ ᡝᠪᡠᠪᡠᡵᠠᡴᡡ,. ᡝᠨᠴ ᡳᠯᡳᠪᡠᡶᡳ ᡥᡡᠰᡠᠨ ᠠᠮᡳᡵᠠᡴᡡ ᠵᠣᠪᠣᡧᠣᡵᠣ ᠪᠠᡩᡝ ᡩᠠᠮᡝ ᠠᡶᠠᠪᡠᠮᡝ, ᡝᡨᡝᡵᡝ ᠠᠨᠠᠪᡠᡵᡝ, ᠠᡵᡤᠠ ᠪᠣᡩᠣᡤᠣᠨ ᠪᡝ ᡩᠣᡳᡤᠣᠨ ᡩᡝ ᡨᡠᠯᠪᡳᠮᡝ, ᠠᡶᠠᡥᠠ ᡩᠠᡵᡳ ᡠᡵᡠᠨᠠᡴᡡ ᡝᡨᡝᠮᡝ, ᡥᡝᠴᡝᠨ ᡥᠣᡨᠣᠨ ᠪᡝ ᡤᠠᡳᡥᠠ, ᡨᠠᠯᠠᡳ ᠴᠣᠣᡥᠠ ᠪᡝ ᡤᡳᡩᠠᡥᠠ ᠮᠠᠩᡤᡳ, ᠠᠮᠪᠠᠨ ᠴᠣᠣᡥᠠᡳ ᡤᡠᠩ ᡤᡝᠪᡠ ᠪᡝ ᠶᠠᡵᡤᡳᠶᠠᠯᠠᠮᡝ ᡳᠯᡤᠠᠮᡝ ᠸᡝᡳᠯᡝᠩᡤᡝ ᠨᡳᠶᠠᠯᠮᠠ ᠪᡝ ᡳᠶᠠᠮᠠᠨ ᡥᡡᠨᠴᡳᠴᡥᡳᠨ ᠰᡝᠮᡝ ᡩᡝᡵᡝ ᠪᠠᠨᡳᡵᠠᡴᡡ, ᡵᡠᠨᠠᡴᡡ ᡧᠠᠵᡳᠨ ᡳ ᡤᠠᠮᠠᠮᡝ, ᡤᡠᠩᡤᡝ ᠨᡳᠶᠠᠯᠮᠠ ᠪᡝ ᠪᠠᡨᠠ ᡴᡳᠮᡠᠨ ᠰᡝᠮᡝ ᡤᡡᡳᠨᡵᠠᡴᡡ, ᡠᡵᡠᠨᠠᡴᡡ ᡧᠠᠩᡤᠠ,ᡝ ᠮᡝᠨᡳ ᡤᡠᠩ ᡤᡝᠪᡠ ᠪᡝ ᡨᡠᠴᡳᠪᡠᡴᡳ ᠰᡝᠮᡝ ᡩᠠᡳᠯᠠᠮᠪᡳ ᠴᠣᠣᡥᠠᠯᠠᠮᠪᡳ ᠰᡝᡥᡝ ᡩᡝ ᡠᡵᡤᡠᠨᠵᡝᠮᡝ, ᡥᡝᠴᡝᠨ ᡥᠣᡨᠣᠨ ᠪᡝ ᡤᠠᡳᠵᠠᡵᠠ ᡩᡝ ᠨᡝᠨᡝᠮᡝ ᡨᠠᡶᠠᡵᠠ ᠪᡝ ᡨᡝᠮᡧᡝᠮᡝ, ᡨᠠᠯᠠᡳ ᠴᠣᠣᡥᠠ ᠪᡝ ᠠᡶᠠᡵᠠ ᡩᡝ ᠵᡠᠯᡝᡵᡳ ᡩᠣᠰᡳᡴᡳ ᠰᡝᠮᡝ ᡶᠠᡶᡠᡵᡧᠠᠮᡝ, ᡥᠣᡵᠣᠨ ᡥᡡᠰᡠᠨ ᠠᠮᠪᠠᠨ, ᠠᠵᠠᠨ ᡨᠠᠯᡴᡳᠶᠠᠨ ᡳ ᠠᡩᠠᠯᡳ, ᡝᡩᡠᠨ ᠰᡠ ᡳ ᡤᡝᠰᡝ ᡩᠠᡵᡨᠠᡳ ᠠᠨᡩᠠᠨ ᡩᡝ ᡝᡨᡝᠮᠪᡳ. ᡤᡠᡵᡠᠨ ᡳ ᡩᠣᡵᠣ ᡩᠠᠰᠠᡵᠠ ᠸᡝᡳᠯᡝ ᠪᡝᡳᡩᡝᡵᡝ ᡩᡝ ᠰᡠᠨᠵᠠ ᠠᠮᠪᠠᠨ, ᠵᡠᠸᠠᠨ ᠵᠠᡵᡤᡡᠴᡳ ᠪᡝ ᠰᡳᠨᡩᠠᡶᡳ, ᡥᠠᠨ ᡳᠨᡳ ᠪᡝᠶᡝ ᠰᡠᠨᠵᠠ ᡳᡝᠨᠩᡤᡳ ᡩᡠᠪᡝᡩᡝ ᡠᡵᡠᠨᠠᡴᡡ ᠶᠠᠮᠨ ᡩᡝ ᡨᡠᠴᡳᡶᡳ ᠠᠪᡴᠠ ᡩᡝ ᡥᡳᠶᠠᠨ ᡩᠠᠪᡠᡶᡳ ᡤᡠᡵᡠᠨ ᠪᡝ ᡨᠠᠴᡳᠪᡠᡵᡝ ᠰᠠᡳᠨ ᡤᡳᠰᡠᠨ ᡳ ᠵᠠᠪᡧᠠᡥᠠ ᡠᡶᠠᡵᠠᡥᠠ ᡴᠣᠣᠯᡳ ᠪᡳᡨᡥᡝ ᡥᡡᠯᠠᠪᡠᡶᡳ, ᠶᠠᠶᠠ ᠸᡝᡳᠯᡝ ᠪᡝ ᠨᡝᠨᡝᠮᡝ ᡠᠸᠠᠨ ᠵᠠᡵᡤᡡᠴᡳ ᡩᡠᡳᠯᡝᡶᡳ, ᠰᡠᠨᠵᠠ ᠠᠮᠪᠠᠨ ᡩᡝ ᠠᠯᠠᠮᠪᡳ, ᠰᡠᠨᠵᠠ ᠠᠮᠪᠠᠨ ᠪᡝᡳᡩᡝᡶᡳ ᠪᡝᡳᠰᡝ ᡩᡝ ᠠᠯᠠᠮᠪᡳ, ᡨᡠᡨᡨᡠ ᡤᡝᡵᡝᠨ ᡳ ᡨᠣᡴᡨᠣᠪᡠᡶᡳ ᡥᠠᠪᡧᠠᡵᠠ ᠨᡳᠶᠠᠯᠮᠠ ᠪᡝ ᡥᠠᠨ ᡳᠨᡳ ᠵᡠᠯᡝᡵᡳ ᠨᡳᠶᠠᡴᡡᡵᠠᠪᡠᡶᡳ, ᠨᡝᠨᡝᠨᠮᡝ ᡳᠯᠠᠨ ᠵᠠᠯᠠᠨ ᡳ ᠪᡝᡳᡩᡝᡥᡝ ᡶᡳᠰᡠᠨ ᠪᡝ ᠠᠯᠠᠪᡠᡶᡳ, ᡤᡝᠯᡳ ᡤᡳᠰᡠᠨᠰ ᡩᠠᠯᡳᠪᡠᡥᠠᠪᡳ ᠠᠶᠣᠣ ᠰᡝᠮᡝ ᡥᠠᠪᡧᠠᡵᠠ ᠨᡳᠶᠠᠯᠮᠠ ᡩᡝ ᡩᠠᠴᡳᠯᠠᠮᡝ ᡴᡳᠮᠴᡳᠮᡝ ᡶᠣᠨᠵᡳᡶᡳ ᠸᡝᡳᠯᡝᡳ ᠸᠠᡴᠠ ᡠᡵᡠ ᡡᡝ ᠶᠠᡵᡤᡳᠶᠠᠯᠠᡶᡳ ᡨᡠᡨᡨᡠ ᠪᡝᡳᡩᡝᠮᡝ ᠣᡶᡳ ᡩᡝᡵᡤᡳ ᠠᠮᠪᠠᠰᠠ ᡩᠠᠯᡳᠮᡝ ᠪᠠᡥᠠᡵᠠᡴᡡ, ᡶᡝᠵᡝᡵᡤᡳ ᠪᡠᠶᠠ ᠨᡳᠶᠠᠯᠮᠠᡳ ᡤᡳᠰᡠᠨ ᡠᡵᡠᠨᠠᡴᡡ ᡥᠠᡶᡠᠨᠠᠮᡝ, ᡝᡵᡩᡝᠮᡠ ᡤᡝᠩᡤᡳᠶᡝᠨ ᡧᠠᠵᡳᠨ ᡶᠠᡶᡠᠨ ᡨᠣᠪ ᠰᡝᠮᡝ, ᠰᠠᡴᡩᠠᠰᠠ ᠪᡝ ᡩᠣᡵᠣᠯᠣᠮᡝ, ᡨᠣᠨᡩᠣ ᠰᡳᠵᡳᡵᡥᡡᠨ ᠪᡝ ᡨᡠᡴᡳᠶᡝᠮᡝ, ᠠᠴᡠᡥᡳᠶᠠᠨ ᡴᠣᡳᠮᠠᠯᡳ ᠪᡝ ᠪᡝᡩᡝᡵᡝᠪᠨᡝ, ᠠᡴᡡ ᠶᠠᡩᠠᡥᡡᠨ ᡩᡝ ᠪᡠᠮᡝ ᡠᠵᡳᡝᠮ, ᡩᠣᠪᠣᡵᡳᡳᠨᡝᠩᡤᡳ ᠠᡴᡡ ᡩᠣᡵᠣᡳ ᠵᠠᠯᡳᠨ ᡩᡝ ᡴᡳᠴᡝᠮᡝ ᠵᠣᠪᠣᠮᡝ ᠣᡶᡳ, ᠠᠪᡴᠠᡳ ᡤᡡᠨᡳᠨ ᡩᡝ ᠠᠴᠠᡶᡳ, ᠨᡳᠶᠠᠯᠮᠠᡳ ᠮᡠᠵᡳᠯᡝᠨ ᡤᡝᠮᡠ ᡠᡵᡤᡠᠨ ᠣᡶᡳ ᠮᠠᠨᠵᡠ ᡤᡠᡵᡠᠨ ᠠᠮᠪᡠᠯᠠ ᡩᠠᠰᠠᡶᡳ, ᡥᡡᠯᡥᠠ ᡥᠣᠯᠣ ᠪᡝ ᡩᡝᡵᡳᠪᡠᡵᠠᡴᠴ, ᠵᡠᡤᡡᠨ ᡩᡝ ᡨᡠᡥᡝᡴᡝ ᠵᠠᡴᠠ ᡩᡝ ᡤᡳᡩᠠᡵᠠᡴᡡ, ᡝᠵᡝᠨ ᡩᡝ ᡥᡡᠯᠠᠮᡝ ᠪᡠᠮᠪᡳ, ᡝᠵᡝᠨᠨ ᡨᡠᠴᡳᡵᠠᡴᠴ ᠣᠴᡳ ᠶᠠᠮᡠᠨ ᡩᡝ ᠯᠠᡴᡳᠶᠠᡶᡳ ᡨᠠᡴᠠᠪᡠᠮᠪᡳ, ᠠᡩᡠᠨ ᡠᠯᡥᠠ ᠪᡝ ᡠᠰᡳᠨ ᡳ ᠵᡝᡴᡠ ᠪᡝ ᠪᠠᡵᡤᡳᠶᠠᡥᠠ ᠮᠠᠩᡤᡳ, ᠠᠯᡳᠨ ᠪᡳᡤᠠᠨ ᡩᡝ ᠴᡳᡥᠠᡳ ᠰᡳᠨᡩᠠᡶᡳ ᠨᡳᠶᠠᠯᠮᠮᠠ ᠨᡝᠴᡳᡵᠠᡴᡡ. ᡨᡠᡨᡨᡠ ᡤᡠᡵᡠᠨ ᡳ ᡩᠣᡵᠣ ᡨᠣᡴᡨᠣᠣ ᠵᠠᡴᠠᡩᡝ, ᡤᡝᡵᡝᠨ ᠪᡝᡳᠰᡝ ᡥᡝᡝᠪᡝᡧᡝᡶᡳ ᠠᠮᠪᠠ ᡤᡝᠪᡠ ᠪᡝ ᡥᡡᠯᠠᠮᡝ ᡥᠠᠨ ᡳ ᡩᠣᡵᠣ ᠪᡝ ᡨᠣᡴᡨᠣᠪᡠᡴᡳ ᠰᡝᠮᡝ ᠪᡳᡨᡥᡝ ᠠᡵᠠᡶᡳ, ᡥᠠᠨ ᡳ ᠰᡠᠰᠠᡳ ᠵᠠᡴᡡᠨ ᠰᡝ ᡩᡝ ᡶᡠᠯᡤᡳᠶᠠᠨ ᠮᡠᡩᡠᡵᡳ ᠠᠨᡳᠶᠠ ᠠᠨᡳᠶᠠ ᠪᡳᠶᠠᡳ ᡳᠴᡝ ᡩᡝ ᠨᡳᠣᠸᠠᠩᡤᡳᠶᠠᠨ ᠪᠣᠨᡳᠣ ᡳᡝᠨᠩᡤᡳ ᠵᠠᡴᡡᠨ ᡤᡡᠰᠠᡳ ᠪᡝᡳᠰᡝ ᠠᠮᠪᠠᠰᠠ ᡤᡝᡵᡝᠨ ᠪᡝ ᡤᠠᡳᡶᡳ ᠠᠮᠪᠠ ᠶᠠᠮᡠᠨ ᡩᡝ ᡳᠰᠠᡶᡳ ᠵᠠᡴᡡᠨ ᡩᡝᡵᡝ ᠠᡵᠠᠮᡝ ᡶᠠᡳᡩᠠᡶᡳ, ᡥᠠᠨ ᠶᠠᠮᡠᠨ ᡩᡝ ᡨᡠᠴᡳᡶᡳ ᠰᠣᠣᡵᡳᠨ ᡩᡝ ᡨᡝᡥᡝ ᠮᠠᠩᡤᡳ, ᠵᠠᡴᡡᠨ ᡤᡡᠰᠠᡳ ᠪᡝᡳᠰᡝ ᠠᠮᠪᠠᠰᠠ ᡤᡝᡵᡝᡝᠨ ᠪᡝ ᡤᠠᡳᡶᡳ ᠨᡳᠶᠠᡴᡡᡵᠠᡥᠠ, ᠵᠠᡴᡡᠨ ᠠᠮᠪᠠᠨ ᡶᠠᡳᡩᠠᠨ ᠴᡳ ᡨᡠᠴᡳᡶᡳ ᠵᡠᠯᡝᠰᡳ ᡳᠪᡝᡶᡳ ᠨᡳᠶᠠᡴᡡᡵᠠᡶᡳ ᠪᡳᡨᡥᡝ ᠪᡝ ᡨᡠᡴᡳᠶᡝᠮᡝ ᠵᠠᡶᠠᡶᡳ ᠠᠯᡳᠪᡠᡥᠠ ᠮᠠᠩᡤᡳ, ᡥᠠᠨ ᡳ ᠵᡠᠸᡝ ᡝᡵᡤᡳ ᠠᠰᡥᠠᠨ ᡩᡝ ᡳᠯᡳᡥᠠ ᠠᡩᡠᠨ ᡥᡳᠶᠠ ᡝᡵᡩᡝᠨᡳ ᠪᠠᡴᠰᡳ ᠣᡴᡩᠣᠮᡝ ᡤᡝᠨᡝᡶᡳ ᠪᡳᡨᡥᡝ ᠪᡝ ᠠᠯᡳᠮᡝ ᡤᠠᡳᡶᡳ, ᡝᡵᡩᡝᠨᡳ ᠪᠠᡴᠰᡳ ᡥᠠᠨ ᡳ ᡥᠠᠰᡥᡡ ᡝᡵᡤᡳ ᠰᡝᡶᡳ, ᠠᠨᡳᠶᠠᡳ ᡤᡝᠪᡠ ᠪᡝ ᠠᠪᡴᠠᡳ ᡶᡠᠯᡳᠩᡤᠠ ᠰᡝᡥᡝ. ᡨᡝᡵᡝᠴᡳ ᡤᡝᠩᡤᡳᠶᡝᠨ ᡥᠠᠨ ᠰᠣᠣᡵᡳᠨ ᠴᡳ ᡳᠯᡳᡶᡳ ᠠᠪᡴᠠ ᡩᡝ ᡥᡳᠶᠠᠨ ᡩᠠᠪᡠᡶᡳ ᠪᡝᡳᠰᡝ ᠠᠮᠪᠠᠰᠠ ᠪᡝ ᡤᠠᡳᡩᡳ ᡳᠯᠠᠨ ᠵᡝᡵᡤᡳ ᠨᡳᠶᠠᡴᡡᡵᠠᡶᡳ ᡠᠶᡠᠨ ᠵᡝᡵᡤᡳ ᡥᡝᠩᡴᡳᠯᡝᡶᡳ ᡥᠠᠨ ᠠᠮᠠᠰᡳ ᠪᡝᡩᡝᡵᡝᡶᡳ ᠰᠣᠣᡵᡳᠨ ᡩᡝ ᡨᡝᡥᡝ ᠮᠠᠩᡤᡳ, ᡤᡝᡵᡝᠨ ᠪᡝᡳᠰᡝ ᠠᠮᠪᠠᠰᠠ ᠮᡝᠨᡳ ᠮᡝᠨᡳ ᡤᡡᠰᠠ ᠪᡝ ᡤᠠᡳᡶᡳ ᠰᡝ ᠪᠠᡥᠠ ᠰᡝᠮᡝ ᡥᡝᠩᡴᡳᠯᡝᡥᡝ. ᡩᠠᡳᠮᡳᠩ ᡤᡠᡵᡠᠨ ᡳ ᠵᠠᠰᡳᡝ ᠵᠠᡴᠠᡳ ᡳᡵᡤᡝᠨ ᡩᠠᡵᡳ ᠵᠠᠰᡝ ᡨᡠᠴᡳᡶᡳ ᠮᠠᠨᠵᡠ ᡤᡠᡵᡠᠨ ᡳ ᠪᠠᡩᡝ ᠮᡝᠩᡤᡠᠨ ᡶᡝᡨᡝᠮᡝ, ᠣᡵᡥᠣᡩᡩᠠ ᡩᡠᡵᡠᠮᡝ, ᡥᡡᡵᡳ, ᠮᡝᡤᡠ, ᠰᠠᠨᠴᠠ ᠪᠠᡳᠮᡝ, ᠮᠣᠣ ᠰᠠᠴᡳᠮᡝ ᠵᡳᠩ ᠨᡠᠩᠨᡝᡵᡝ ᠪᡝ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡩᠣᠨᠵᡳᡶᡳ ᡥᡝᠨᡩᡠᠮᡝ, ᡝᠨᡨᡝᡴᡝ ᡶᠠᠴᡠᡥᡡᠨ ᠪᡝ ᠨᠠᡴᠠᡴᡳᠨᡳ ᠰᡝᠮᡝ ᡩᠠᡳᠮᡳᠩ ᡤᡠᡵᡠᠨ ᡳ ᠪᠠᡵᡠ ᠸᡝᡥᡝᡳ ᠪᡳᡨᡥᡝ ᡳᠯᡳᠪᡠᠮᡝ ᠠᠪᡴᠠ ᡩᡝ ᡧᠠᠩᡤᡳᠶᠠᠨ ᠮᠣᡵᡳᠨ ᠸᠠᠮᡝ ᡤᠠᠰᡥᡡᡥᠠ ᠪᡳᡥᡝ, ᡨᡝ ᡩᠠᡳᠮᡳᠩ ᡤᡠᡵᡠᠨ ᡳ ᠵᡝᠴᡝᠨ ᡳ ᡳᡵᡤᡝᠨ ᠮᡠᠰᡝᡳ ᠪᠠᠪᡝ ᠨᡠᠩᠨᡝᡥᡝ ᠣᡥᠣ, ᡥᠠᠨ ᡳ ᠵᠠᠰᡝ ᠪᡝ ᡥᡡᠯᡥᠠᠮᡝ ᡨᡠᠴᡳᡶᡳ ᠮᡠᠰᡝ ᠸᠠᡥᠠ ᠰᡝᠮᡝ ᠸᡝᡳᠯᡝ ᠠᡴᡡ ᡴᠠᡳ ᠰᡝᠮᡝ ᡥᡝᠨᡩᡠᡶᡳ, ᠨᡳᠩᡤᡠᠨ ᠪᡳᠶᠠ ᡩᡝ ᡩᠠᡵᡥᠠᠨ ᡥᡳᠶᠠ ᠪᡝ ᡠᠩᡤᡳᡶᡳ ᠵᠠᠰᡝ ᡨᡠᠴᡳᡶᡳ ᠪᡠᡨᠠᠮᡝ ᠵᡳᡥᡝ ᠨᡳᠶᠠᠯᠮᠠ ᠪᡝ ᡠᠴᠠᡵᠠᡥᠠ ᡠᠴᠠᡵᠠᡥᠠ ᠪᠠᡩᡝ ᠰᡠᠰᠠᡳ ᡶᡠᠨᠴᡝᠮᡝ ᠸᠠᡥᠠ. ᡨᡝᡵᡝ ᡶᠣᠨᡩᡝ ᡤᠠᠩᡤᡠᡵᡳ, ᡶᠠᠩᡤᡳᠨᠠ ᡤᡝᠪᡠᠩᡤᡝ ᠵᡠᠸᡝ ᠨᡳᠶᠠᠯᠮᠠ ᠪᡝ ᡩᠠᡳᠮᡳᠩ ᡤᡠᡵᡠᠨ ᡳ ᡤᡠᠸᠠᠩᠨᡳᠩ ᡥᡝᠴᡝ ᡩᡝ ᡳᠴᡝ ᡩᡠᡨᠠᠨ ᠵᡳᡥᡝᠪᡳ ᠰᡝᡵᡝ, ᠠᠴᠠᠨᠠ ᠰᡝᠮᡝ ᡠᠩᡤᡳᡥᡝ, ᡤᡠᠸᠠᠩᠨᡳᠩ ᠨᡳ ᡩᡠᡨᠠᠨ ᠯᡳᡳ ᡠᡳ ᡥᠠᠨ, ᡤᠠᠩᡤᡠᡵᡳ, ᡶᠠᠩᡤᡳᠨᠠ ᡩᠠᡥᠠᠮᡝ ᡤᡝᠨᡝᡥᡝ ᡠᠶᡠᠨ ᠨᡳᠶᠠᠣᠯᠮᠠ ᠪᡝ ᠵᠠᡶᠠᡶᡳ ᠰᡝᠯᡝ ᡶᡠᡶᡨᠠ ᡥᡡᠸᠠᡳᡨᠠᡶᡳ ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡩᡝ ᠨᡳᠶᠠᠯᠮᠠ ᡨᠠᡴᡡᡵᠠᡶᡳ ᡥᡝᠨᡩᡠᠮᡝ, ᠮᡝᠨᡳ ᠨᡳᠶᠠᠯᠮᠠ ᠵᠠᠰᡝ ᡨᡠᠴᡳᠴᡳ ᠰᡠᠸᠠᠮᡝ ᠵᠠᡶᠠᡶᡳ ᠪᡝᠨᠵᡳᠴᡳᠨᠠ, ᠠᡳᠨᡠ ᠸᠠᡥᠠ? ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡥᡝᠨᡩᡠᠮᡝ, ᠸᡝᡥᡝᡳ ᠪᡳᡥᡝ ᡳᠯᡳᠪᡠᠮᡝ ᡤᠠᠰᡥᡡᡵᡝ ᡩᡝ, ᡥᠠᠨ ᡳ ᠵᠠᠰᡝ ᠪᡝ ᡩᠠᠪᠠᠮᡝ ᡨᡠᠴᡳᡴᡝ ᠨᡳᠶᠠᠯᠮᠠ ᡝᠪ ᠰᠠᡶᡳ ᠸᠠᡵᠠᡴᡡᠴᡳ, ᠸᠠᡵᠠᡴᡡ ᠨᡳᠨᠶᠠᠯᠮᠠ ᡩᡝ ᠰᡠᡳ ᡳᠰᡳᡴᡳᠨᡳ ᠰᠮᡝ ᡝᡤᠠᠰᡥᡡᡥᠠ ᠪᡳᡥᡝ ᡴᠠᡳ, ᡨᡝᡵᡝ ᡤᡳᠰᡠᠨ ᠪᡝ ᠠᡳᠨᡠ ᡩᠠᠪᡠᡵᠠᡴᡡ, ᡠᡨᡨᡠ ᡶᡠᡵᡳᠮᡝ ᠨᡳᠶᠠᠯᠮᠠ ᠪᡝ ᠸᠠᡥᠠ ᡩᠠᡵᡥᠠᠨ ᡥᡳᠶᠠ ᠪᡝ ᡤᠠᠵᡳ ᠪᡳ ᠸᠠᠪᡳ, ᡨᡠᡨᡨᡠ ᠠᡴᡡ ᠣᠴᡳ ᠸᡝᡳᠯᡝ ᠪᠠᡩᠠᡵᠠᠮᠪᡳ ᠰᡝᠮᡝ ᠵᡳᠩ ᡧᡝᡵᡳᠮᡝ ᡤᡳᠰᡠᡵᡝᡵᡝᡩᡝ, ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᠮᠠᡵᠠᠮᡝ ᡤᡳᠰᡠᡵᡝᠴᡳ, ᡩᠠᡳᠮᡳᠩ ᡤᡠᡵᡠᠨ ᡳ ᠨᡳᠶᠠᠯᠮᠠ ᡥᡝᠨᡩᡠᠮᡝ, ᡝᡵᡝ ᠸᡝᡳᠯᡝ ᠪᡝ ᡩᡝᠯ ᡩᠣᠨᠵᡳᡶᡳ ᡤᡳᡩᠠᠴᡳ ᠣᠵᠣᡵᠠᡴᡡ ᡴᠠᡳ, ᠰᡠᠸᡝᠨᡩᡝ ᠠᡳ ᠸᡝᡳᠯᡝᠩᡤ ᠨᡳᠶᠠᠯᠮᠠ ᠠᡴᡡ, ᡨᡝᡵᡝ ᠪᡝ ᠮᡝᠨᡳ ᠵᠠᠰᡝᡳ ᠵᠠᡴᠠᡩᡝ ᡤᠠᠵᡳᡶᡳ ᠨᡳᠶᠠᠯᠮᠠ ᡩᡝ ᡨᡠᠸᠠᠪᡠᠮᡝ ᠸᠠ, ᡝᡵᡝ ᠸᡝᡳᠯᡝ ᠸᠠᠵᡳᡴᡳ ᠰᡥᡝᡝ ᠮᠠᠩᡤᡳ, ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡩᠠᡳᠮᡳᠩ ᡩᡝ ᠵᠠᡶᠠᠪᡠᡥᠠ ᠵᡠᠸᠠᠨ ᡝᠮᡠ ᠨᡳᠶᠠᠯᠮᠮᠠ ᠪᡝ ᠪᠠᡥᠠᡥᡴᡳ ᠰᡝᠮᡝ, ᠶᡝᡥᡝᡳ ᡤᡠᡵᡠᠨ ᡳᠴ ᠵᠠᡶᠠᡶᡳ ᡤᠠᠵᡳᡶᡳ ᠯᠣᠣ ᡩᡝ ᡥᠣᡵᡳᡥᠠ ᠵᡠᠸᠠᠨ ᠨᡳᠶᠠᠯᠮᠠ ᠪᡝ ᡩᠠᡳᠮᡳᠩ ᠨᡳ ᡶᡠᡶᡧᡠᠨ ᡤᡠᠸᠠᠨ ᡤᡠᡵᡩᠠᠨ ᡳ ᠵᠠᠰᡝ ᡩᡝ ᡤᠠᠮᠠᡶᡳ ᠸᠠᡥᠠ ᠮᠠᠩᡤᡳ, ᡩᠠᡳᠮᡳᠩ ᡤᡠᡵᡠᠨ ᡳ ᠵᠠᡶᠠᡥᠠ ᡤᠠᠩᡤᡠᡵᡳ, ᡶᠠᠩᡤᡳᠨᠠ ᠰᡝᠪᡝ ᠰᡳᠨᡩᠠᡶᡳ ᡠᠩᡤᡳᡥᡝ. ᠮᠠᠨᠵᡠ ᡤᡠᡵᡠᠨ ᡳ ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ, ᡩᠠᡵᡥᠠᠨ ᡥᡳᠶᠠ, ᡧᠣᠩᡴᠣᡵᠣ ᠪᠠᡨᡠᡵᡠ ᠵᡠᠸᡝ ᠠᠮᠪᠠᠨ ᡩᡝ ᠵᡠᠸᡝ ᠮᡳᠩᡤᠠᠨ ᠴᠣᠣᡥᠠ ᠪᡝ ᠠᡶᠠᠪᡠᡶᡳ, ᡩᡝᡵᡤᡳ ᠮᡝᡩᡝᡵᡳ ᠰᠠᡥᠠᠯᡳᠶᠠᠨ --ᡳ ᠠᡳᠮᠠᠨ ᠪᡝ ᡩᠠᡳᠯᠠᠮᡝ ᡠᠩᡤᡳᡥᡝ, ᡩᠠᡵᡥᠠᠨ ᡥᡳᠶᠠ, ᡧᠣᠩᡴᠣᡵᠣ ᠪᠠᡨᡠᡵᡠ ᡥᠠᠨ ᡳ ᡥᡝᠰᡝ ᠪᡝ ᠠᠯᡳᠮᡝ ᡤᠠᡳᡶᡳ, ᠨᠠᡩᠠᠨ ᠪᡳᠶᠠ ᡳ ᠵᡠᠸᠠᠨ ᡠᠶᡠᠨ ᡩᡝ ᠴᠣᠣᡥᠠ ᠵᡠᡵᠠᠮᡝ ᡤᡝᠨᡝᡶᡳ, ᡠᠯᡤᡳᠶᠠᠨ ᡤᡝᠪᡠᠩᡤᡝ ᠪᡳᡵᠠ ᡩᡝ ᡳᠰᡳᠨᠠᡶᡳ, ᠵᡠᠸᡝ ᡨᠠᠩᡤᡡ ᠸᡝᡳᡥᡠ ᠰᠠᠴᡳᡶᡳ, ᠮᡠᡴᡝ ᠣᠯᡥᠣᠨ ᠵᡠᠸᡝ ᠵᡠᡤᡡ ᡳ ᡩᠣᠰᡳᡶᡳ, ᠪᡳᡵᠠᡳ ᠠᠮᠠᡵᡤᡳ ᠪᡳᡵᠠᡳ ᠵᡠᠯᡝᡵᡤᡳ ᡠᡥᡠᡵᡝᠮᡝ ᡤᡡᠰᡳᠨ ᠨᡳᠩᡤᡠᠨ ᡤᠠᡧᠠᠨ ᠪᡝ ᡤᠠᡳᡶᡳ, ᠰᠠᡥᠠᠯᡳᠶᠠᠨ ᡠᠯᠠ ᡳ ᠪᡳᡵᠠ ᡳ ᠵᡠᠯᡝᡵᡤᡳ ᡩᠠᠯᡳᠨ žᡳ ᡶᠣᡩᠣᡵᠣᡤᠣᡤᠨ ᡳ ᡤᡝᠪᡠᠩᡤᡝ ᡤᠠᡧᠠᠨ ᡩᡝ ᡳᠩ ᡳᠯᡳᡥᠠ. ᡨᡝᡵᡝ ᠰᠠᡥᠠᠯᡳᠶᠠᠨ ᡠᠯᠠ ᠶᠠᠶᠠ ᠠᠨᡳᠶᠠ ᠣᠮᡧᠣᠨ ᠪᡳᠶᠠ ᡳ ᡨᠣᡶᠣᡥᠣᠨ, ᠣᡵᡳᠨ ᡩᡝ ᠵᡠᡥᡝ ᠵᠠᡶᠠᠮᠪᡠᡥᡝ, ᠰᡠᠩᡤᠠᡵᡳ ᡠᠯᠠ ᠣᠮᡧᠣᠨ ᠪᡳᠶᠠ ᡳ ᠵᡠᠸᠠᠨ, ᡨᠣᡶᠣᡥᠣᠨ ᡩᡝ ᠵᡠᡥᡝ ᠵᠠᡶᠠᠮᠪᡳᡥᡝ. ᡨᡝᡵᡝ ᠠᠨᡳᠶᠠ ᠵᡠᠸᠠᠨ ᠪᡳᠶᠠ ᡳ ᡳᠴᡝ ᡩᡝ, ᠴᠣᠣᡥᠠ ᡤᡝᠨᡝᡥᡝ ᡩᠠᡵᡥᠠᠨ ᡥᡳᠶᠠ, ᡧᠣᠩᠣᡵᠣ ᠪᠠᡨᡠᡵᡠ ᡨᡠᠸᠠᠴᡳ, ᠰᠠᡥᠠᠯᡳᠶᠠᠨ ᡠᠯᠠ ᠸᠠ ᠪᠠ ᠵᡠᡥᡝ ᠵᠠᡶᠠᡥᠠᡴᡡᠪᡳ, ᡨᡝᡥᡝ ᡤᠠᡧᠠᠨ ᡳ ᡨᡝᡳᠰᡠ ᠪᡳᡵᠠ ᠣᠨᠴᠣ ᠵᡠᠸᡝ ᠪᠠ ᠪᡳ, ᡥᡝᡨᡠ ᠯᠠᠰᡥᠠ ᡴᡳᠶᠣ ᠴᠠᡥᠠ ᡤᡝᠰᡝ, ᠣᠨᠴᠣ ᠨᡳᠵᡠ ᠣᡴᠰᠣᠨ ᠵᡠᡥᡝ ᠵᠠᡶᠠᡥᠠᠪᡳ, ᠴᠣᠣᡥᠠ ᡳ ᠠᠮᠪᠠᠰᠠ ᡤᡝᡵᡝᠨ ᠴᠣᠣᡥᠠ ᡤᡝᠮᡠ ᡶᡝᡵᡤᡠᠸᡝᠮᡝ ᡥᡝᠨᡩᡠᠮᡝ, ᠶᠠᡵᡤᡳᠶᠠᠨ ᡳ ᠠᠪᡴᠠ ᠠᡳᠰᡳᠯᠠᡶᡳ ᡴᡳᠶᠣᠣ ᠴᠠᡥᠠᠪᡳᡴᠠᡳ ᠰᡝᠮᡝ ᡠᡵᡤᡠᠨᠵᡝᠮᡝ ᡨᡝᡵᡝ ᠪᠠ ᠪᡝ ᠴᠣᠣᡥᠠ ᡩᠣᠣᡶᡳ, ᠰᠠᡥᠠᠯᡳᠶᠠᠨ ᡳ ᠠᡳᠮᠠᠨ ᡳ ᠵᡠᠸᠠᠨ ᡝᠮᡠ ᡤᠠᡧᠠᠨ ᠪᡝ ᡤᠠᡳᡶᡳ, ᠠᠮᠠᠰᡳ ᠴᠣᠣᡥᠠ ᠪᡝᡩᡝᡵᡝᠮᡝ ᡳᠨᡝᡴᡠ ᠪᠠᠪᡝ ᡩᠣᠣᠮᡝ ᠵᡳᠴᡳ ᠵᡠᡥᡝ ᡤᡝᠮᡠ ᡝᡶᡠᠵᡝᡥᡝᠪᡳ, ᡨᡝᡵᡝᡳ ᠸᠠᡵᡤᡳ ᠵᠠᡴᠠ ᡤᡝᠯᡳ ᠨᡝᠨᡩᡝᡥᡝ ᠠᡩᠠᠯᡳ ᠵᡠᡥᡝ ᠠᡶᠠᡥᠪᡳ, ᡨᡝᡵᡝ ᠠᠪᠪᡩᡝ ᠴᠣᠣᡥᠠ ᡩᠣᠣᠮᡝ ᠪᡝᡩᡝᡵᡝᠮᡝ ᠵᡳᡥᡝ ᠮᠠᠩᡤᡳ ᠵᡠᡥᡝ ᡤᠮᡝᡠ ᠰᡳᠨᡩᠠᡶᡳ ᠠᠨ ᡳ ᠵᠠᡶᠠᡵᠠ ᠣᠮᡧᠣᠨ ᠪᡳᠶᠠ ᡩᡝ ᠵᠠᡳ ᡩᠠᠰᠠᠮᡝ ᠵᡠᡥᡝ ᠵᠠᡶᠠᡥᠠᠮ ᡨᡝᡵᡝᠴᡳ ᡳᠨᡩᠠᡥᡡᠨ ᡨᠠᡴᡡᡵᠠᡵᠠ ᡤᠣᠯᠣ, ᠨᠣᡵᠣᡳ ᡤᠣᠯᠣ, ᠰᡳᡵᠠᡥᡳᠨ ᡳ ᡤᠣᠯᠣ ᡝᡵᡝ ᡳᠯᠠᠨ ᡤᠣᠯᠣ ᡳ ᡩᡝᡥᡳ ᠠᠮᠪᠠᠨ ᡩᡝ ᡩᠠᡥᠠᠪᡠᡶᡳ, ᠴᠣᠣᡥᠠ ᠪᡝᡩᡝᡵᡝᡶᡳ ᠣᠮᡧᠣᠨ ᠪᡳᠶᠠᡳ ᡳᠴᡝ ᠨᠠᡩᠠᠨ ᡩᡝ ᡥᠠᠨ ᡳ ᡥᡝᠴᡝᠨ ᡩᡝ ᡳᠰᡳᠨᠵᡳᡥᠠ. ᠠᠪᡴᠠᡳ ᡶᡠᠯᡳᠩᡤᠠᡳ ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡳ ᠵᠠᡳ ᠠᠨᡳᠶᠠ ᡶᡠᠯᠠᡥᡡᠨ ᠮᡝᡳᡥᡝ ᠠᠨᡳᠶᠠ ᠪᡳᠶᠠ ᡩᡝ ᠮᠣᡤᠩᠣ ᡤᡠᡵᡠᠨ ᡳ ᡴᠣᡵᠴᡳᠨ ᡳ ᠮᡳᠩᡤᠠᠨ ᠪᡝᡳᠯᡝ ᡳᠨᡳ ᠰᠠᡵᡤᠨᠠ ᠵᡳᡠ ᠪᡝ ᠪᡝᠵᡳᡥᡝ, ᠨᡳᡤᠩᡠᠴᡳ ᠠᠨᡳᠶᠠ ᠠᠴᠠᠮᡝ ᠵᡳᠮᠪᡳ ᠰᡝᠮᡝ ᡩᠣᠨᠵᡳᡶᡳ, ᠠᠨᡳᠶᠠ ᠪᡳᠶᠠ ᡳ ᡳᠴᡝ ᠵᠠᡴᡡᠨ ᡩᡝ, ᡥᠠᠨ ᡳᠨᡳ ᠪᡝᠶᡝ, ᡶᡠᠵᡳᠰᠠ, ᡤᡝᡵᡝᠨ ᠪᡝᡳᠰᡝ ᠠᠮᠪᠠᠰᠠ ᠪᡝ ᡤᠠᡳᡶᡳ, ᡝᠮᡠ ᡨᠠᠩᡤᡡ ᠪᠠᡳ ᡩᡠᠪᡝᡩᡝ ᡶᡠᠯᡤᡳᠶᠠᠨ ᡤᡝᠪᡠᠩᡤᡝ ᠠᠯᠠ ᡩᡝ ᠣᡴᡩᠣᠮᡝ ᡤᡝᠨᡝᡶᡳ, ᠮᠣᡵᡳᠨ ᡩᡝᠯᡝ ᠮᡳᠩᡤᠠᠨ ᠪᡝᡳᠯᡝ ᠪᡝ ᡨᡝᠪᡝᠯᡳᠶᡝᠮᡝ ᠠᠴᠠᡥᠠ, ᡨᡝᡵᡝ ᠠᠯᠠ ᡩᡝ ᠠᠴᠠᡥᠠ ᡩᠣᡵᠣᡳ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᠸᠠᠵᡳᡥᠠ ᠮᠠᠩᡤᡳ, ᠮᡳᠩᡤᠠᠨ ᠪᡝᡳᠯᡝ ᡳᠨᡳ ᡤᠠᠵᡳᡥᠠ ᡨᡝᠮᡝᠨ ᠵᡠᠸᠠᠨ, ᠮᠣᡵᡳᠨ ᡝᠮᡠ ᡨᠠᠩᡤᡡ, ᡳᡥᠠᠨ ᡝᠮᡠ ᡨᠠᠩᡤᡡ ᠪᡝ ᡥᠠᠨ ᡩᡝ ᠵᠠᡶᠠᡥᠠ ᠵᡠᠸᠠᠨ ᡝᠮᡠ ᡩᡝ ᠮᡳᠩᡤᠠᠨ ᠪᡝᡳᠯᡝ ᠪᡝ ᡤᠠᠵᡳᠮᡝ ᡥᠠᠨ ᡥᡝᠴᡝᠨ ᡩᡝ ᡩᠣᠰᡳᡴᠠ, ᡥᠠᠨ ᠮᡳᠩᡤᠠᠨ ᡡᡝᡳᠯᡝ ᠪᡝ ᡴᡠᠨᡩᡠᠯᡝᠮᡝ ᡳᠨᡝᠩᡤᡳ ᡩᠠᡵᡳ ᠠᠵᡳᡤᡝ ᠰᠠᡵᡳᠨ, ᡝᠮᡠ ᡳᠨᡩᡝᠮᡝ ᠠᠮᠪᠠ ᠰᠠᡵᡳᠨ ᠰᠠᡵᡳᠯᠠᠮᡝ ᡝᠮᡠ ᠪᡳᠶᠠ ᡨᡝᠪᡠᡶᡳ, ᡩᡝᡥᡳ ᠪᠣᡳᡶᠣᠨ ᡳ ᠨᡳᠶᠠᠯᠮᠠ, ᡠᡴᠰᡳᠨ ᡩᡝᡥᡳ, ᠰᡠᠵᡝ ᡠᠯᡳᠨ ᠠᡳ ᠵᠠᡴᠠ ᠪᡝ ᡝᠯᡝᡨᡝᠯᡝ ᠪᡠᡶᡳ ᡤᡡᠰᡳᠨ ᠪᠠᡳ ᡩᡠᠪᡝᡩᡝ ᡝᠮᡠ ᡩᡝᡩᡠᠮᡝ ᡶᡠᡩᡝᡶᡳ ᡠᠩᡤᡳᡥᡝ. ᠵᡠᠸᡝ ᠪᡳᠶᠠ ᡩᡝ ᠮᠣᡤᠩᠣ ᡤᡠᡵᡠᠨ ᡳ ᡴᠠᠯᡴᠠᡳ ᠪᠠᠶᠣᡨ ᡨᠠᡨᠠᠨ ᡳ ᡝᠩᡤᡝᡩᡝᡵ ᡨᠠᡳᠵᡳ ᡩᡝ ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡳ ᡝᡩᡝᠣ ᡩᠠᡵᡥᠠᠨ ᠪᠠᡨᡠᡵᡠ ᠪᡝᡳᠯᡝᡳ ᠰᠠᡵᡤᠠᠨ ᠵᡠᡳ ᠰᡠᠨᡩᠠᡳ ᡤᡝᡤᡝ ᠪᡝ ᠪᡠᡶᡳ ᡥᠣᠵᡳᡥᠣᠨ ᠣᠪᡠᡥᠠ. ᡨᡝᡵᡝ ᠠᠨᡳᠶᠠ, ᡩᡠᡳᠨ ᡨᠠᠩᡤᡡ ᠴᠣᠣᡥᠠ ᠪᡝ ᡩᡝᡵᡤᡳ ᠮᡝᡩᡝᡵᡳ ᠵᠠᡴᠠᡵᠠᠮᡝ ᡨᡝᡶᡳ ᡩᠠᡥᠠᡵᠠᡴᡡ ᠰᠠᠰᡳᡶᡳ ᠪᡳᠰᡳᡵᡝ ᡤᡠᡠᡵ ᠪᡝ ᡤᠠᡳᠰᡠ ᠰᡝᠮᡝ ᡠᠩᡤᡳᡶᡳ, ᡩᡝᡵᡤᡳ ᠮᡝᡩᡝᡵᡳ ᡩᠠᠯᡳᠨ ᡳ ᠰᠠᠮᠰᡳᡶᡳ ᡨᡝᡥᡝ ᡳᡵᡤᡝᠨ ᠪᡝ ᡤᡝᠮᡠ ᡤᠠᡳᡶᡳ, ᠮᡝᡩᡝᡵᡳ ᡨᡠᠨ ᡩᡝ ᠠᡴᡩᠠᡶᡳ ᡩᠠᡥᠠᡵᠠᡴᡡ ᠪᡳᡥᡝ ᡳᡵᡤᡝᠨ ᠪᡝ ᠵᠠᡥᠠᡳ ᡩᠣᠣᡶᡳ ᡤᡝᠮᡠ ᡤᠠᡳᡶᡳ ᠴᠣᠣᡥᠠ ᠪᡝᡩᡝᡵᡝᠮᡝ ᠵᡳᡥᡝ.
ᠰᡠᠸᠠᠶᠠᠨ ᠮᠣᡵᡳᠨ ᠠᠪᡴᠠᡳ ᡶᡠᠯᡳᠩᡤᠠᡳ ᡨᠠᡳᡯᡠ ᡤᡝᠩᡤᡳᠶᡝᠨ ᡥᠠᠨ ᡳ ᡳᠯᠠᠴᡳ ᠠᠨᡳᠶᠠ, ᠠᠨᡳᠶᠠ ᠪᡳᠶᠠᡳ ᠵᡠᠸᠠᠨ ᠨᡳᠩᡤᡠᠨ ᡳ ᠴᡳᠮᠠᡵᡳ, ᡨᡠᡥᡝᡵᡝ ᠪᡳᠶᠠ ᡳ ᡩᡠᠯᡳᠨ ᠪᠠ ᠪᡝ ᡥᠠᡶᡠ ᠰᡠᠸᠠᠶᠠᠨ ᡤᡝᠩᡤᡳᠶᡝᠨ ᠰᡳᡵᡝᠨ ᡤᠣᠴᡳᡴᠠ ᠪᡳᡥᡝ, ᡨᡝᡵᡝ ᠰᡳᡵᡝᠨ ᠣᠨᠴᠣ ᠵᡠᠸᡝ ᡱᡳ, ᡤᠣᠯᠮᡳᠨ ᠪᡳᠶᠠ ᠴᡳ ᠸᡝᠰᡳᡥᡠᠨ ᠨᡳᠩᡤᡠᠨ ᡩᠠ, ᡶᡠᠰᡳᡥᡡᠨ ᠵᡠᠸᡝ ᡩᠠ ᡶᡠᠨᠴᡝᠮᡝ ᠪᡳᡥᡝ, ᡨᡝᡵᡝ ᠰᡳᡵᡝᠨ ᠪᡝ ᠰᠠᡶᡳ, ᡥᠠᠨ ᠪᡝᡳᠰᡝ ᠠᠮᠪᠠᠰᠠᡳ ᠪᠠᡵᡠ ᡥᡝᠨᡩᡠᠮᡝ, ᠰᡠᠸᡝ ᡨᡝ ᡠᠮᡝ ᡴᡝᠨᡝᡥᡠᠨᠵᡝᡵᡝ, ᠮᡳᠨᡳ ᡩᠣᠯᠣ ᡤᡡᠨᡳᠮᡝ ᠸᠠᠵᡳᡥᠠ, ᡝᡵᡝ ᠠᠨᡳᠶᠠ ᠪᡳ ᠠᡳᠨᠠᡥᠠ ᠰᡝᠮᡝ ᠨᠠᡴᠠᡵᠠᡴᡡ ᡩᠠᡳᠮᡳᠩ ᡤᡠᡵᡠᠨ ᠪᡝ ᡠᡵᡠᠨᠠᡴᡡ ᡩᠠᡳᠯᠠᠮᠪᡳ ᠰᡝᠮᡝ ᡥᡝᠨᡩᡠᡥᡝ. ᡨᡝᡵᡝ ᡶᠣᡶᠨᡩᡝ ᠨᡝᠨᡝᠮᡝ ᡩᠠᡥᠠᠪᡠᡥᠠ ᡳᠨᡩᠠᡥᡡᠨ ᡨᠠᡴᡡᡵᠠᡵᠠ ᡤᠣᠯᠣ, ᠨᠣᡵᠣᡳ ᡤᠣᠯᠣ, ᠰᡳᡵᠠᡥᡳᠨ ᡳ ᡤᠣᠯᠣ ᡝᡵᡝ ᡳᠯᠠᠨ ᡤᠣᠯᠣ ᡳ ᡩᡝᡥᡳ ᠠᠮᠪᠠᠨ ᠮᡝᠨᡳ ᠮᡝᠨᡳ ᠵᡠᠰᡝ ᠰᠠᡵᡤᠠᠨ ᠪᡝ ᡤᠠᡳᡶᡳ ᡨᠠᠩᡤᡡ ᠪᠣᡳᡤᠣᠨ ᠪᡝ ᡤᠠᡳᠵᡳᠮᡝ ᠵᡳᠮᠪᡳ ᠰᡝᠮᡝ ᡩᠣᠨᠵᡳᡶᡳ, ᡥᠠᠨ ᠵᡳᡩᡝᡵᡝ ᠠᠮᠪᠠᠰᠠ ᠪᡝ ᠶᠠᠯᡠᡴᡳᠨᡳ ᠰᡝᠮᡝ ᡝᠮᡠ ᡨᠠᠩᡤᡡ ᠮᠣᡵᡳᠨ, ᠵᡝᡨᡝᡵᡝ ᠵᠠᡴᠠ ᠪᡝᠨᡝᠮᡝ ᠣᡴᡩᠣᠪᡠᡶᡳ, ᠵᡠᠸᡝ ᠪᡳᠶᠠ ᡩᡝ ᡳᠰᡳᠨᠵᡳᡥᠠ. ᡨᡝᡵᡝ ᡩᠠᡥᠠᠮᡝ ᠵᡳᡥᡝ ᠠᠮᠪᠠᠰᠠ ᡩᡝ ᠵᡝᡵᡤᡳ ᠪᠣᡩᠣᠮᡝ ᡥᠠᡶᠠᠨ ᠣᠪᡠᡶᡳ, ᠪᡠᠶᠠ ᠨᡳᠶᠠᠯᠮᠠ ᠴᡳ ᠸᡝᡳᠰᡥᡠᠨ ᡤᡝᠮᡠ ᠰᠠᡵᡤᠠᠨ , ᠠᡥᠠ, ᠮᠣᡵᡳᠨ ᡳᡥᠠᠨ, ᡨᡝᡵᡝ ᠪᠣᠣ, ᡠᠰᡳᠨ ᡝᡨᡠᡴᡠ ᡨᡝᡨᡠᠨ ᠠᡤᡡᡵᠠ ᠠᡳ ᠠᡳ ᠵᠠᡴᠠ ᠪᡝ ᠵᠠᠯᡠᡴᡳᠯᠠᠮᡝ ᠪᡠᡥᡝ. ᡥᠠᠨ ᡥᡝᠨᡩᡠᠮᡝ, ᡩᠠᡳᠮᡳᠩ ᡤᡠᡵᡠᠨ ᡩᡝ ᠮᡳᠨᡳ ᡴᠣᡵᠰᠣᡥᠣᠩᡤᡝ ᠨᠠᡩᠠᠨ ᠠᠮᠪᠠ ᡴᠣᡵᠣ ᠪᡳ, ᡨᡝᡵᡝᠴᡳ ᡶᡠᠨᠴᡝᡥᡝ ᠪᡠᠶᠠ ᡴᠣᡵᠣ ᠪᡝ ᠶᠠ ᠪᡝ ᡥᡝᠨᡩᡠᡵᡝ, ᡩᠠᡳᠮᡳᠩ ᡤᡠᡵᡠᠨ ᠪᡝ ᡩᠠᡳᠯᠠᡴᡳ ᠰᡝᠮ ᠪᡝᡳᠰᡝ ᠠᠮᠪᠠᠰᠠ ᡳ ᡝᠮᡤᡳ ᡥᡝᠪᡩᡝᠮᡝ ᡨᠣᡴᡨᠣᡶᡳ, ᡥᡝᠴᡝᠨ ᠪᡝ ᠠᡶᠠᡵᠠ ᠸᠠᠨ ᠠᡵᠠᡵᠠ ᠮᠣᠣ ᠰᠠᠴᡳᡵᡝ ᠪᡝ ᡤᡝᡵᡝᠨ ᠪᡝ ᡠᠯᡥᡳᡵᠠᡴᡡ ᠰᡝᠮᡝ ᠪᡝᡳᠰᡝᡳ ᠮᠣᡵᡳᠨ ᡥᠣᡵᡳᡵᡝ ᡤᡠᠸᠠᠨ ᠠᡵᠠᡵᠠ ᠮᠣ ᠰᠠᠴᡳ ᠰᡝᠮᡝ ᡥᡡᠯᠠᡶᡳ, ᠨᠠᡩᠠᠨ ᡨᠠᠩᡤᡡ ᠨᡳᠶᠠᠯᠮᠠ ᠪᡝ ᡠᠩᡤᡳᡶᡳ, ᠸᠠᠨ ᠠᡵᠠᡵᠠ ᠮᠣᠣ ᠰᠠᠴᡳᠪᡠᡥᠠ. ᡳᠯᠠᠨ ᠪᡳᠶᠠ ᡩᡝ, ᡠᡴᠰᡳᠨ ᠰᠠᠴᠠ ᠴᠣᠣᡥᠠᡳ ᠠᡤᡡᡵᠠ ᠪᡝ ᡩᠠᠰᠠ, ᠮᠣᡵᡳᠨ ᡨᠠᡵᡥᡡᠪᡠ ᠰᡝᠮᡝ ᡥᡡᠯᠠᡥᠠ, ᠸᠠᠨ ᠠᡵᠠᡵᠠ ᠮᠣᠣ ᠪᡝ ᡩᠠᡳᠮᡳᠩ ᠨᡳ ᡨᡠᠩᠰᡝ ᠠᡳᡴᠠ ᠪᠠᡳᡨᠠ ᡩᡝ ᠵᡳᠮᡝ ᠰᠠᡥᠠᡩᡝ ᠰᡝᡵᡝᡵᠠᡥᡡ ᠰᡝᠮᡝ ᠮᠣᡵᡳᠨ ᡥᠣᡵᡳᡵᡝ ᡥᡝᡵᡝᠨ ᠠᡵᠠᠪᡠᡥᠠ. ᡩᡠᡳᠨ ᠪᡳᠶᠠ ᡩᡝ ᡥᠠᠨ ᠴᠣᠣᡥᠠ ᡤᠠᡳᡶᡳ ᠶᠠᠪᡠᡵᡝ ᠪᡝᡳᠰᡝ ᠠᠮᠪᠠᠰᠠ ᡩᡝ ᠴᠣᠣᡥᠠᡳ ᠠᡵᡤᠠ ᠪᡝ ᡨᠠᠴᡳᠪᡠᡵᡝ ᠪᡳᡨᡥᡝ ᠸᠠᠰᡳᠮᠪᡠᡥᠠ, ᡨᡝᡵᡝ ᠪᡳᡨᡥᡝ ᡩᡝ ᡥᡝᠨᡩᡠᡥᡝ ᡤᡳᠰᡠᠨ, ᡨᠠᡳᡶᡳᠨ ᡩᠣᡵᠣ ᡩᡝ ᡨᠣᠨᡩᠣ ᡩᡝᠯᡝ, ᡩᠠᡳᠨ ᠴᠣᠣᡥᠠ ᡩ ᡝᠪᡝᠶᡝ ᡩᡝ ᠰᡠᡳᠯᠠᠪᡠᡵᠠᡴᡡ, ᠴᠣᠣᡥᠠ ᠪᡝ ᠵᠣᠪᠣᠪᠣᡵᠠᡴᡡ, ᠮᡝᡵᡤᡝᠨ ᡶᠠᡴᠰᡳ ᠠᡵᡤᠠ ᠪᠣᡩᠣᡤᠣᠨ ᡩᡝᠯᡝ, ᡩᠠᡳᠨ ᡳ ᠴᠣᠣᡥᠠ ᡴᠣᠮᠰᠣ, ᠮᡠᠰᡳᡝ ᠴᠣᠣᡥᠠ ᡤᡝᡵᡝᠨ ᠣᠴᡳ, ᠴᠣᠣᡥᠠ ᠪᡝ ᠰᠠᠪᡠᠪᡠᡵᠠᡴᡡ ᠨᡠᡥᠠᠯᡳᠶᠠᠨ ᡩᠠᠯᡩᠠ ᠪᠠᡩᡝ ᠰᠣᠮᡳᠮᡝ ᠪᡠᡴᠰᡳᡶᡳ ᡴᠣᠮᠰᠣ ᡨᡠᠴᡳᡶᡳ ᠶᠠᡵᡴᡳᠶᠠᠮᡝ ᡤᠠᠨᠠ. ᠶᠠᡵᡴᡳᠶᠠᠮᡝ ᡤᠠᠨᠠᡥᠠ ᡩᡝ ᠵᡳᠴᡳ, ᠮᡠᠰᡝᡳ ᠠᡵᡤᠠ ᡩᡝ ᡨᡠᡥᡝᠮᠪᡳ ᠰᡝᡵᡝᠩᡤᡝ ᡨᡝᡵᡝ ᡴᠠᡳ, ᠶᠠᡵᡴᡳᠶᠠᠮᡝ ᡤᠠᠠᡵᠠ ᡩᡝ ᠵᡳᡩᡝᡵᠠᡴᡡᠴᡳ, ᡥᡝᠴᡝᠨ ᡦᡠ ᡳ ᡤᠣᡵᠣ ᡥᠠᠨᠴᡳ ᠪᡝ ᡩᠠᠴᡳᠴᠯᠠᠮᡝ ᡨᡠᠸᠠ, ᡥᡝᠴᡝᠨ ᡦᡠ ᡤᠣᡵᠣ ᠣᠴᡳ, ᡨᡝᡩᡝ ᡳᠰᡳᡨᠠᠯᠠ ᠪᠣᡧᠣᠮᡝ ᠰᠠᠴᡳ, ᡥᠠᠨᠴᡳ ᠣᠴᡳ, ᡨᡝᡵᡝ ᡥᡝᠴᡝᠨ ᡩᡝ ᡩᠣᠰᡳᡨᠠᠯᠠ ᡩᡠᡴᠠ ᡩᡝ ᡶᡳᡥᡝᠪᡠᠮᡝ ᠰᠠᠴᡳ, ᡩᠠᡳᠨ ᡳ ᠴᠣᠣᡥᠠ ᡤᡝᡵᡝᠨ ᠮᡠᠰᡝᡳ ᡝᠮᡠᡤᡡᠰᠠ, ᠵᡠᠸᡝᡳ ᡤᡡᠰᠠᡳ ᡤᡝᡵᡝᠨ ᠴᠣᠣᡥᠠ ᠪᡝ ᠪᠠᡳᠮᡝ ᠠᠴᠠᠨᠵᡠ, ᡤᡝᡵᡝᠨ ᠴᠣᠣᡥᠠ ᠪᠠᡨᠠᡳ ᠴᠣᠣᡥᠠᡳ ᠪᡳᠰᡳᡵᡝ ᠪᠠᡵᡠ ᠠᠪᡳᠮᡝ ᠠᠴᠠᠨᠠ, ᠵᡠᠸᡝ ᡳᠯᠠᠨ ᠪᠠᡳ ᠴᠣᠣᡥᠠ ᠠᠴᠠᡶᡳ ᠰᡝᠣᠯᡝ, ᠪᡳᡤᠠᠨ ᡩᡝ ᠠᠴᠠᡥᠠ ᠣᠴᠣᡥᠠ ᡩᡝ ᠠᡶᠠᡵᠠ ᡧᠠᠵᡳᠨ ᡝᡵᡝ ᡳᠨᡠ. ᡥᡝᠴᡝᠨ ᡥᠣᡨᠣᠨ ᠣᠴᡳ, ᠪᠠᡥᠠᡵᠠ ᠪᠠᡩᡝ ᠣᠴᠣᡥᠠ ᠪᡝ ᠯᠠᡨᡠᠪᡠ ᠠᡶᠠᠪᡠ, ᠪᠠᡥᠠᡵᠠᡴᡡ ᠪᠠ ᠴᠣᡳ, ᡩᠠᠴᡳ ᡠᠮᡝ ᠯᠠᡨᠪᡠᡵᡝ, ᠠᡶᠠᡶᡳ ᠪᠠᡥᠠᡵᠠᡴᡡ ᠪᡝᡩᡝᡵᡝᠴᡳ ᡤᡝᠪᡠ ᡝᡥᡝ, ᠮᡠᠰᡝᡳ ᠴᠣᠣᡥᠠ ᠪᡝ ᠰᡠᡳᠯᠠᠪᡠᡵᠠᡴᡡ ᡩᠠᡳᠨ ᠪᡝ ᡝᡨᡝᠴᡳ, ᠮᡝᡵᡤᡝᠨ ᡶᠠᡴᠰᡳ ᠠᡵᡤᠠ ᠪᠣᡩᠣᡤᠣᠨ ᡠᠨᡝᠩᡤᡳ ᠴᠣᠣᠠᡥᡳ ᡝᠵᡝᠨ ᠰᡝᡵᡝᠩᡤᡝ ᡨᡝᡵᡝ ᡴᠠᡳ, ᠴᠣᠣᡥᠠ ᠪᡝ ᠵᠣᠪᠣᠪᡠᠮᡝ ᠰᡠᡳᠯᠠᠪᡠᠮᡝ ᡩᠠᡳᠨ ᠪᡝ ᡝᡨᡝᡥᡝ ᠪᠠᡥᠠ ᠰᡝᠮ ᡨᡝᡵᡝ ᠠᡳ ᡨᡠᠰᠠ, ᡩᠠᡳᠨ ᡩᠠᡳᠯᠠᡵᠠ ᠴᠣᠣᡥᠠ ᠴᠣᠣᡥᠠᠯᠠᡵᠠ ᡩᡝ ᠮᡠᠰᡝᡳᠩᡤᡝ ᠪᡝ ᡤᡡᠸᠠ ᡩᡝ ᡤᡳᠠᠪᡠᡵᠠᡴᡡ ᡩᠠᡳᠨ ᡝᡨᡝᠴᡳ, ᡨᡝᡵᡝ ᠶᠠᠶᠠ ᠴᡳ ᡩᡝᠯᡝ. ᡝᠮᡠ ᠨᡳᡵᡠ ᡩᡝ ᠵᡠᠸᡝᡨᡝ ᠸᠠᠨ ᠠᡵᠠᠪᡠᡶᡳ ᠣᡵᡳᡨᠠ ᡠᡴᠰᡳᠨ ᡳ ᠴᠣᠣᡥᠠ ᠪᡝ ᡨᡠᠴᡳᠪᡠᡶᡳ ᡥᡝᠴᡝᠨ ᡩᡝ ᠠᡶᠠᠪᡠ,ᠮ ᠪᠣᠣ ᠴᡳ ᡨᡠᠴᡳᡴᡝ ᡳᠨᡝᠩᡤᡳ ᡧᡳ, ᠪᠣᠣ ᡩᡝ ᡳᠰᡳᠨᠵᡳᡨᠠᠯᠠ ᠴᠣᠣᡥᠠ ᡳ ᠨᡳᠶᠠᠣᠯᠠ ᠮᡝᠨᡳ ᠮᡝᠨᡳ ᠨᡳᡵᡠ ᡳ ᡨᡠ ᠴᡳ ᡠᠮᡝ ᡶᠠᡴᠴᠠᡵᠠ, ᡨᡠ ᠴᡳ ᡶᠠᡴᡧᠠᡵᠠ ᠨᡳᠶᠠᠯᠮᠠ ᠪᡝ ᠵᠠᡶᠠᡶᡳ ᡩᠠᠴᡳᠴᠯᠠᠮᡝ ᡶᠣᠨᠵᡳ, ᠰᡠᠨᠵᠠ ᠨᡳᡵᡠᠨ ᡳ ᡝᠵᡝᠨ, ᡥᠠᠨ ᡳ ᡨᠠᠴᡳᠪᡠᡥᠠ ᡧᠠᠵᡳᠨ ᡶᠠᡶᡠᠨ ᡳ ᡤᡳᠰᡠᠨ ᠪᡝ ᡤᡝᡵᡝᠨ ᡩᡝ ᡨᠠᠴᡳᠪᡠᡝᠮ ᠠᠯᠠᡵᠠᡴᡡ ᠴᡳ, ᠰᡠᠨᠵᠠ ᠨᡳᡵᡠᠨ ᡳ ᡝᠵᡝᠨ ᡩᡝ ᡝᠮᡠ ᠮᠣᡵᡳᠨ, ᠨᡳᡵᡠ ᡳ ᡝᠵᡝᠨ ᡩᡝ ᡝᠮᡠ ᠮᠣᡵᡳᠨ ᡤᠠᡳᠮᠪᡳ, ᠰᡠᠨᠵᠠ ᠨᡳᡨᡠ ᡳ ᡝᠵᡝᠨ, ᠨᡳᡵᡠᠨ ᡳ ᡝᠵᡝᠨ ᡥᡝᠨᡩᡠᠴᡳ ᡩᠣᠨᠵᡳᠠᡴᡡ ᡶᠠᡴᠴᠠᡶᡳ ᠶᠠᠪᡠᠴᡳ, ᠶᠠᠪᡠᡥᠠ ᠨᡳᠶᠠᠯᠮᠠ ᠪᡝ ᠸᠠᠮᠪᡳ, ᠰᡠᠨᠵᠠ ᠨᡳᡵᡠ ᡳ ᡝᠵᡝᠨ, ᠨᡳᡵᡠᡳ ᡝᠵᡝᠨ ᠶᠠᠶᠠ ᠨᡳᠶᠠᠯᠠᠮ ᠠᡳ ᠠᡳ ᠸᡝᡳᠯᡝ ᠪᡝ ᠠᡶᠠᠪᡠᡵᡝ ᡩᡝ, ᠪᡝᠶᡝ ᠮᡠᡨᡝᠴᡳ ᠠᡶᠠᠪᡠᡵᡝ ᠸᡝᡳᠯᡝ ᠪᡝ ᠠᠯᡳᠮᡝ ᡤᠠᡳᠰᡠ, ᠮᡠᡨᡝᡵᠠᡴᡡ ᠴᡳ ᠠᡶᠠᠪᡠᡵᡝ ᠸᡝᡳᠯᡝ ᠪᡝ ᡠᠮᡝ ᠠᠯᡳᠮᡝ ᡤᠠᡳᠵᠠᡵᠠ, ᠰᡳ ᠮᡠᡨᡝᡵᠠᡴᡡ ᠪᡳᠮᡝ ᠠᠯᡳᠮᡝ ᡤᠠᡳᠴᡳ, ᠰᡳᠨᡳ ᡝᠮᡠ ᠪᡝᠶᡝᡳ ᠵᠠᠯᡳᠨ ᡩᡝ ᠸᠠᡴᠠ ᡴᠠᡳ, ᡨᠠᠩᡤᡡ ᠨᡳᠠᠶᠯᠠᠮ ᠪᡝ ᡴᠠᡩᠠᠯᠠᡵᠠ ᠨᡳᠶᠠᠯᠮᠠ ᠣᠴᡳ, ᡨᠠᠩᡤᡡ ᠨᡳᠶᠠᠯᠮᠠ ᡳ ᠪᠠᡳᡨᠠ ᡨᠣᠣᡴᠠᠮᠪᡳ, ᠮᡳᠩᡤᠠᠨ ᠴᠣᠣᡥᠠ ᠪᡝ ᡴᠠᡩᠠᠯᠠᡵᠠ ᠨᡳᠶᠠᠯᠮᠠ ᠣᠴᡳ, ᠮᡳᠩᡤᠠᠨ ᠨᡳᠶᠠᠯᠮᠠᡳ ᠪᠠᡳᡨᠠ ᡨᠣᠣᡴᠠᠮᠪᡳᡴᠠᡳ, ᡨᡝᡵᡝ ᠪᠠᡳᡨᠠ ᠰᡝᡵᡝᠩᡤᡝ, ᡤᡠᡵᡠᠨ ᡳ ᠠᠮᠪᠠ ᠪᠠᡳᡨᠠ ᡴᠠᡳ. ᡥᡝᠴᡝᠨ ᡥᠣᡨᠣᠨ ᡩᡝ ᠠᡶᠠᡵᠠ ᡩᡝ, ᠨᡝᠨᡝᠮᡝ ᡝᠮᡴᡝᠨ ᠵᡠᠸᡝᡳ ᡩᠣᠰᡳᡴᠠ ᡩᡝ ᡩᠠᠪᡠᡵᠠᡴᡡ, ᠨᡝᠨᡝᠮᡝ ᡝᠮᡴᡝᠨ ᠵᡠᠸᡝ ᡩᠣᠰᡳᠴᡳ ᡴᠣᡵᠣ ᠪᠠᡥᠠᠮᠪᡳᡴᠠᡳ, ᠨᡝᠨᡝᠮᡝ ᡩᠣᠰᡳᡶᡳ ᡶᡝᠶᡝ ᠪᠠᡥᠠ ᠰᡝᠮᡝ ᡧᠠᠩᠨᠠᡵᠠᡴᡡ, ᠪᡠᠴᡝᡥᡝ ᠰᡝᠮᡝ ᡤᡠᠩ ᠪᡠᡵᠠᡴᡡ, ᡥᡝᠴᡝᠨ ᡩᡝ ᡝᡶᡠᠯᡝᠮᡝ ᠨᡝᠨᡝᡥᡝ ᠨᡳᠶᠠᠯᠮᠠ ᠪᡝ ᠨᡝᠮᠨᡝᠮᡝ ᡩᠣᠰᡳᡴᠠ ᡩᡝ ᠠᡵᠠᠮᠪᡳ, ᠨᡝᠨᡝᠮᡝ ᡝᡶᡠᠯᡝᠮᡝ ᠸᠠᠵᡳᡥᠠ ᠨᡳᠶᠠᠯᠮᠠ ᡤᠰᠠᡳ ᡝᠵᡝᠨ ᡩᡝ ᠠᠯᠠᠨᠵᡠ, ᡨᡝᡥᡝᡵᡝᠮᡝ ᠠᡶᠠᡵᠠ ᠨᡳᠶᠠᠯᠮᠠ ᡤᡝᠮᡠ ᡝᡶᡠᠯᡝᠮᡝ ᠸᠠᠵᡳᡥᠠ ᠮᠠᠩᡤᡳ, ᡤᡡᠰᠠᡳ ᡝᠵᡝᠨ ᠪᡠᡵᡝᠨ ᠪᡠᡵᡩᡝ, ᠪᡠᡵᡝᠨ ᡳ ᠵᡳᠯᡤᠠᠨ ᠪᡝ ᡩᠣᠨᠵᡳᡥᠠ ᡩᡝ, ᠪᠠ ᠪᠠ ᡩᡝ ᠠᡶᠠᡵᠠ ᠨᡳᠶᠠᠯᠮᠠ ᡤᡝᠮᡠ ᠰᠠᠰᠠ ᡩᠣᠰᡳ ᠰᡝᠮᡝ ᠪᡳᡨᡥᡝ ᠸᠠᠰᡳᠮᠪᡠᡥᠠ. ᠮᠠᠨᠵᡠ ᡤᡠᡵᡠᠨ ᡳ ᡤᡝᠨᠩᡤᡳᠶᡝᠨ ᡥᠠᠨ ᡩᠠᡳᠮᡳᡤᠩ ᡤᡠᡵᡠᠨ ᠪᡝ ᡩᠠᡳᠯᠠᠮᡝ ᠶᠠᡶᠠᡥᠠᠨ ᠮᠣᡵᡳᠨ ᡳ ᠵᡠᠸᡝ ᡨᡠᠮᡝᠨ ᠴᠣᠣᡥᠠ ᠪᡝ ᡤᠠᡳᡶᡳ ᡩᡠᡳᠨ ᠪᡳᠶᠠᡳ ᠵᡠᠸᠠᠨ ᡳᠯᠠᠨ ᡩᡝ ᡨᠠᠰᡥᠠ ᡳᠨᡝᠩᡤᡳ ᠮᡝᡳᡥᡝ ᡝᡵᡳᠨ ᡩᡝ ᠵᡠᡵᠠᡴᠠ. ᡨᡝᡵᡝ ᠵᡠᡵᠠᠨᡩᠠᡵᠠ ᡩᡝ, ᠠᠪᡴᠠ ᡩᡝ ᡥᠠᠪᡧᠠᠮᡝ ᠠᡵᠠᡥᠠ ᠪᡳᡨᡝᡥ ᡳ ᡤᡳᠰᡠᠨ, ᠮᡳᠨ ᠠᠮᠠ ᠮᠠᡶᠠ ᡩᠠᡳᠮᡳᠩ ᡥᠠᠨ ᡳ ᠵᠠᠰᡝᡳ ᠣᡵᡥᠣ ᠪᡝ ᠪᡳᠯᠠᡥᠠᡴᡡ, ᠪᠣᡳᡥᠣᠨ ᠰᡳᡥᠠᠪᡠᡥᠠᡴᡡ, ᠪᠠᡳᠪᡳ ᠵᠠᠰᡝᡳ ᡨᡠᠯᡝᡵᡤᡳ ᠸᡝᡳᠯᡝ ᡩᡝ ᡩᠠᡶᡳ, ᠮᡳᠨᡳ ᠠᠮᠠ ᠮᠠᡶᠠ ᠪᡝ ᡩᠠᡳᠮᡳᠩ ᡤᡠᡵᡠᠨ ᠸᠠᡥᠠ, ᡨᡝᡵᡝ ᡝᠮᡠ. ᡨᡠᡨᡨᡠ ᠸᠠᠴᡳᠪᡝ, ᠪᡳ ᡤᡝᠯᡳ ᠰᠠᡳᠨ ᠪᠠᠨᠵᡳᡵᡝ ᠪᡝ ᠪᡠᠶᡝᠮᡝ ᠸᡝᡥᡝᡳ ᠪᡳᡨᡥᡝ ᡳᠯᡳᠪᡠᠮᡝ, ᡩᠠᡳᠮᡳᠩ, ᠮᠠᠨᠵᡠ ᠶᠠᠶᠠ ᡥᠠᠨ ᡳ ᠵᠠᠰᡝ ᠪᡝ ᡩᠠᠪᠠᡳᠴ. ᡩᠠᠪᠠᡥᠠ ᠨᡳᠶᠠᠯᠮᠠ ᠪᡝ ᠰᠠᡥᠠ ᠨᡳᠶᠠᠯᠮᠠ ᠸᠠᡴᡳ, ᠸᠠᡶᡳ ᠸᠠᡵᠠᡴᡡ ᠣᠴᡳᠮ, ᠸᠠᡵᠠᡴᡡ ᠨᡳᠶᠠᠯᠮᠠ ᡩᡝ ᠰᡠᡳ ᡳᠰᡳᡴᡳᠨᡳ ᠰᡝᠮᡝ ᡤᠠᠰᡥᡡᡥᠠ ᠪᡳᡥᡝ, ᡨᡠᡨᡨᡠ ᡤᠠᠰᡥᡡᡥᠠ ᡤᡳᠰᡠᠨ ᠪᡝ ᡤᡠᠸᠠᠯᡳᠶᠠᡶᡳ, ᡩᠠᡳᠮᡳᠩ ᠨᡳ ᠴᠣᠣᡥᠠ ᠵᠠᠰᡝ ᡨᡠᠴᡳᡶᡳ ᠶᡝᡥᡝ ᡩᡝ ᡩᠠᡶᡳ ᡨᡠᠸᠠᡴᡳᠶᠠᠮᡝ ᡨᡝᡥᡝᠪᡳ, ᡨᡝᡵᡝ ᠵᡠᠸᡝ ᡴᠣᡵᠣ. ᠵᠠᡳ ᠴᡳᠩ ᡥᠣ ᠴᡳ ᠵᡠᠯᡝᠰᡳ ᡤᡳᠶᠠᠩ ᡩᠠᠯᡳᠨ ᠴᡳ ᠠᠮᠰᡳ ᠠᠨᡳᠶᠠ ᡩᠠᡵᡳ ᡩᠠᡳᠮᡳᡤᠨ ᡤᡠᡵᡠᠨ ᡳ ᠨᡳᠶᠠᠯᠮᠮᠠ ᡥᡡᠯᡥᠠᠮᡝ ᠵᠠᠰᡝ ᡨᡠᠴᡳᡶᡳ, ᠮᠠᠨᠵᡠ ᡳ ᠪᠠ ᠪᡝ ᡩᡠᡵᡳᠮᡝ ᠴᡠᠸᠠᠩᠨᡝᠮᡝ ᠨᡠᠩᠨᡝᡵᡝ ᠵᠠᡴᠠᡩᡝ, ᡩᠠ ᡤᠠᠰᡥᡡᡥᠠ ᡤᡳᠰᡠᠨ ᠪᡳᡥᡝ ᠰᡝᠮᡝ ᠵᠠᠰᡝ ᡨᡠᠴᡳᡴᡝ ᠨᡳᠨᠶᠠᠯᠮᠠ ᠪᡝ ᠸᠠᡥᠠ ᠮᡠᠵᠠᠩᡤᡤᠠ, ᡨᡠᡨᡨᡠ ᠸᠠᡥᠠ ᠮᠠᠩᡤᡳ, ᡩᠠ ᡤᠠᠰᡥᡡᡥᠠ ᡤᡳᠰᡠᠨ ᠪᡝ ᡩᠠᠪᡠᡵᠠᡴᡡ, ᠠᡳᠨᡠ ᠸᠠᡥᠠ ᠰᡝᠮᡝ ᡤᡠᠸᠠᠩᠨᡳᠩ ᡩᡝ ᡨᠠᡴᡡᡵᠠᠮᡝ ᡤᡝᠨᡝᡥᡝ ᠮᡳᠨ ᡤᠠᠩᡤᡠᡵᡳ, ᡶᠠᠩᡤᡳᠨᠠ ᠪᡝ ᠵᠠᡶᠠᡶᡳ ᠰᡝᠯᡝ ᡶᡠᡨᠠ ᡥᡡᠸᠠᡳᡨᠠᡶᡳ ᠮᡳᠮᠪᡝ ᠠᠯᠪᠠᠯᠠᠮᡝ ᠮᡳᠨᡳ ᠵᡠᠸᠠᠨ ᠨᡳᠶᠠᠯᠮᠠ ᠪᡝ ᡤᠠᠮᠠᡶᡳ ᠵᠠᠰᡝ ᡩᡝ ᠸᠠ ᠰᡝᠮᡝ ᠸᠠᠪᡠᡥᠠ, ᡨᡝᡵᡝ ᡳᠯᠠᠨ ᡴᠣᡵᠣ. ᠵᠠᠰᠠ ᡨᠴᡳᡶᡳ ᠣᠴᠣᡥᠠ ᡨᡠᠸᠠᡴᡳᠶᠠᠮᡝ ᡨᡝᡶᡳ, ᠮᡳᠨ ᠵᠠᡶᠠᠨ ᠪᡠᡥᡝ ᠰᠠᡵᡤᠠᠨ ᠵᡠᡳ ᠪᡝ ᠮᠣᠩᡤᠣ ᡩᡝ ᠪᡠᡥᡝ, ᡝᡵᡝ ᡩᡠᡳᠨ ᡴᠣᡵᠣ. ᡠᡩᡠ ᡠᡩᡠ ᠵᠠᠯᠨᠠ ᡥᠠᠯᠠᠮᡝ ᡥᠠᠨ ᡳ ᠵᠠᠰᡝ ᡨᡠᠸᠠᡴᡳᠶᠠᠮᡝ ᡨᡝᡥᡝ ᠴᠠᡳᡥᠠ, ᡶᠠᠨᠠᡥᠠ, ᠰᠠᠨᠴᠠᡵᠠ ᡝᡵᡝ ᡳᠯᠠᠨ ᡤᠣᠯᠣ ᡳ ᠮᠠᠨᠵᡠ ᡳ ᡨᠠᡵᡳᡶᡳ ᠶᠠᠩᠰᠠᡥᠠ ᠵᡝᡴᡠ ᠪᡝ ᡤᠠᡳᠪᡠᡵᠠᡴᡡ, ᡩᠠᡳᠮᡳᠩ ᡤᡠᡵᡠᠨ ᡳ ᠴᠣᠣᡥᠠ ᡨᡠᠴᡳᡶᡳ ᠪᠣᡧᠣᡥᠣ, ᡨᡝᡵᡝ ᠰᡠᠨᠵᠠ ᡴᠣᡵᠣ. ᠵᠠᠰᡝᡳ ᡨᡠᠯᡝᡵᡤᡳ ᠠᠪᡴᠠᡳ ᠸᠠᡴᠠᠯᠠᡥᠠ ᠶᡝᡥᡝᡳ ᡳ ᡤᡳᠰᡠᠨ ᠪᡝ ᡤᠠᡳᡶᡳ ᡝᡥᡝ ᡤᡳᠰᡠᠨ ᡥᡝᠨᡩᡠᠮᡝ ᠪᡳᡨᡥᡝ ᠠᡵᠠᡶᡳ ᠨᡳᠶᠠᠯᠮᠠ ᡨᠠᡴᡡᡵᠠᡶᡳ ᠮᡳᠮᠪᡝ ᡥᠠᠴᡳᠨ ᡳ ᡴᠣᡵᠣ ᠠᡵᠠᠮᡝ ᡤᡳᡵᡠᠪᡠᡥᠠ, ᡝᡵᡝ ᠨᡳᠩᡤᡠᠨ ᡴᠣᡵᠣ. ᡥᠠᡩᠠ ᡳ ᠨᡳᠶᠠᠯᠮᠠ ᠶᡝᡥᡝ ᡩᡝ ᡩᠠᡶᡳ ᠮᡳᠨᡩᡝ ᠵᡠᠸᡝ ᠵᡝᡵᡤᡳ ᠴᠣᠣᡥᠠ ᠵᡳᡥᡝ ᠪᡳᡥᡝ, ᠪᡳ ᡴᠠᡵᡠ ᡩᠠᡳᠯᠠᡵᠠ ᠵᠠᡴᠠᡩᡝ, ᠠᠪᡴᠠ ᡥᠠᡩᠠ ᠪᡝ ᠮᡳᠨᡩᡝ ᠪᡠᡥᡝ, ᠠᠪᡴᠠᡳ ᠪᡠᡥᡝ ᡥᠠᡩᠠ ᠪᡝ ᡩᠠᡳᠮᡳᠩ ᡥᠠᠨ ᡤᡝᠯᡳ ᡥᠠᡩᠠ ᡩᡝ ᡩᠠᡶᡳ ᠮᡳᠮᠪᡝ ᡝᡵᡤᡝᠯᡝᠮᡝ ᡳᡳ ᠪᠠᡩᡝ ᡠᠩᡤᡳ ᠰᡝᠮᡝ ᡠᠩᡤᡳᡥᡝ, ᠮᡳᠨᡳ ᡠᠩᡤᡳᡥᡝ ᡥᠠᡩᠠ ᡳ ᠨᡳᠶᠠᠯᠮᠠ ᠪᡝ ᠶᡝᡥᡝ ᡳ ᠴᠣᠣᡥᠠ ᡠᡩᡠᡩᡠ ᠵᡝᡵᡤᡳ ᠰᡠᠴᡠᡶᡳ, ᠠᠪᡴᠠᡳ ᡶᡝᠵᡳᠯᡝ ᠶᠠᠶᠠ ᡤᡠᡵᡠᠨ ᡳ ᠨᡳᠶᠠᠯᠮᠠ ᡳᠰᡥᡠᠨᡩᡝ ᡩᠠᡳᠯᠠᠮᠪᡳᡴᠠᡳ, ᠠᠪᡴᠠᡳ ᠸᠠᡴᠠᠯᠠᡥᠠ ᠨᡳᠶᠠᠯᠮᠠ ᠠᠨᠠᠪᡠᠮᠪᡳ ᠪᡠᠴᡝᠮᠪᡳ, ᠠᠪᡴᠠᡳᠠ ᡠᡵᡠᠯᡝᡥᡝ ᠨᡳᠶᠠᠯᠮᠠ ᡝᡨᡝᠮᠪᡳ ᠪᠠᠨᠵᡳᠮᠪᡳ ᡴᠠᡳ, ᡩᠠᡳᠨ ᡩᡝ ᠠᡥᠠ ᠨᡳᠶᠠᠯᠮᠠ ᠪᡝ ᠸᡝᡳᠵᡠᠪᡠᡵᡝ, ᠪᠠᡥᠠ ᠣᠯᠵᡳ ᠪᡝ ᠪᡝᡝᡩᡵᡝᠪᡠᡵᡝ ᡴᠣᠣᠯᡳ ᠪᡳᠣ, ᠠᠪᡴᠠᡳ ᠰᡳᠨᡩᠠᡥᠠ ᠠᠮᠪᠠ ᡤᡠᡨᡠᠨ ᡳ ᡥᠠᠨ ᠰᡝᠴᡳ, ᡤᡠᠪᠴᡳ ᡤᡠᡵᡠᠨ ᡩᡝ ᡤᡝᠮᡠ ᡠᡥᡝᡵᡝᠮᡝ ᡝᠵᡝᠨ ᡩᡝᡵᡝ, ᠮᡳᠨᡳ ᠴᠠᠩᡤᡳ ᡩᡝ ᠠᡳᠨᡠ ᡝᠮᡥᡠᠨ ᡝᠵᡝᠨ, ᠨᡝᠨᡝᠮᡝ ᡥᡠᠯᡠᠨ ᡤᡝᠮᡠ ᡝᠮᡠ ᡳᠴᡳ ᠣᡶᡳ, ᠮᡳ,ᠪᡝ ᡩᠠᡳᠯᠠᡥᠠ, ᡨᡠᡨᡨᡠ ᡩᠠᡳᠨ ᡩᡝᡵᡳᠪᡠᡥᡝ, ᡥᡡᠯᡠᠨ ᠪᡝ ᠠᠪᡴᠠ ᠸᠠᡴᠠᠯᠠᡥᠠ, ᠮᡳᠮᠪᡝ ᠠᠪᡴᠠ ᡠᡵᡠᠯᡝᡥᡝ, ᡝᡵᡝ ᡩᠠᡳᠮᡳᠩ ᠠᡥᠨ ᠠᠪᡴᠠ ᡩᡝ ᡝᠯᠵᡝᡵᡝ ᡤᡝᠰᡝ ᠠᠪᡴᠠ ᡳ ᠸᠠᡴᠠᠯᠠᡥᠠ ᠶᡝᡥᡝ ᡩᡝ ᡩᠠᡶᡳ, ᠸᠠᡴᠠ ᠪᡝ ᡠᡵᡠ, ᡠᡵᡠ ᠪᡝ ᠸᠠᡴᠠ ᠰᡝᠮᡝ ᠠᡳᠨᡠ ᠪᡝᡳᡩᡝᠮᠪᡳ, ᡨᡝᡵᡝ ᠨᠠᡩᠠᠨ ᡴᠣᡵᠣ, ᡝᡵᡝ ᡩᠠᡳᠮᡳᠩ ᡤᡠᡵᡠᠨ ᠮᡳᠮᠪᡝ ᡤᡳᡩᠠᡧᠠᡥᠠ ᡤᡳᡵᡠᠪᡠᡥᠠ ᠠᠮᠪᡠᠯᠠ ᡶᡳ ᠪᡳ ᡩᠣᠰᠣᡵᠠᡴᡡ, ᡝᡵᡝ ᠨᠠᡩᠠᠨ ᠠᠮᠪᠠ ᠣᡵᠣ ᡩᡝ ᡩᠠᡳᠨ ᡩᡝᡵᡳᠪᡠᠮᠪᡳ ᠰᡝᠮᡝ ᠪᡳᡨᡥᡝ ᠠᡵᠠᡶᡳ ᠠᠪᡴᠠ ᡩᡝ ᡥᡝᠩᡴᡳᠯᡝᠮᡝ ᠪᡳᡨᡥᡝ ᡩᡝᡳᠵᡳᡥᡝ. ᡤᡝᠩᡤᡳᠶᡝᠨ ᡥᠠᠨ ᡤᡝᡵᡝᠨ ᠴᠣᠣᡥᠠᡳ ᠪᡝᡳᠰᡝ ᠠᠮᠪᠠᠰᠠᡳ ᠪᠠᡵᡠ ᡥᡝᠨᡩᡠᠮᡝ, ᠪᡳ ᡝᡵᡝ ᡩᠠᡳᠮ ᠪᡝ ᠪᡠᠶᡝᠮᡝ ᡩᡝᡵᡳᠪᡠᡥᡝᠩᡤᡝ ᠸᠠᡴᠠ, ᠮᡳᠮᠪᡝ ᡠᠵᠠᠩᡤᠠ ᠨᠠᡩᠠᠨ ᠣᡴᡵᠣ ᡩᡝᡵᡝ, ᠪᡠᠶᠠ ᡴᠣᡵᠣ ᡝ ᠶᠠ ᠪᡝ ᡥᡝᠨᡩᡠᡵᡝ, ᡴᠣᡵᠣ ᠠᠮᠪᡠᠯᠠ ᠣᡶᡳ ᡩᠠᡳᠨ ᡩᡝᡵᡳᠪᡠᡥᡝ, ᡩᠠᡳᠨ ᡩᡝ ᠠᡥᠠ ᠣᠯᠵᡳ ᠨᡳᠶᠠᠯᠮᠠᡳ ᡝᡨᡠᡥᡝ ᡝᡨᡠᡴᡠ ᠪᡝ ᡠᠮᡝ ᠰᡠᡵᡝ, ᡥᡝᡥᡝ ᠪᡝ ᡠᠮᡝ ᡠᡧᠠᡨᠠᡵᠠ ᡝᡳᡤᡝᠨ ᠰᠠᡵᡤᠠᠨ ᠪᡝ ᡠᠮᡝ ᡶᠠᡴᠰᠠᠯᠠᡵᠠ, ᡳᠰᡝᠯᡝᡵᡝ ᡩᡝ ᠪᡠᠴᡝᠴᡳ ᠪᡠᠴᡝᡴᡳᠨᡳ, ᡳᠰᡝᠯᡝᡵᠠᡴᡡ ᠨᡳᠶᠠᠯᠮᠠ ᠪᡝ ᡠᠮᡝ ᠸᠠᡵᠠ ᠰᡝᠮᡝ ᡤᡝᡵᡝᠨ ᡩᡝ ᡧᠠᠵᡳᠯᠠᠮᡝ ᡝᠵᡝᠪᡠᠮᡝ ᡥᡝᠨᡩᡠᡶᡳ, ᠴᠣᠣᡥᠠ ᠵᡠᡵᠠᡩᠠᡵᠠ ᡩᡝ, ᡥᠠᠨ ᠪᡝᡳᠰᡝ ᡤᡝᡵᡝᠨ ᠴᠣᠣᡥᠠᡳ ᡝᠵᡝᡨᡨᡝ ᠪᡝ ᡤᠠᡳᡶᡳ, ᡨᡠᠩᡴᡝᠨ ᡨᡡᠮᡝ ᠪᡠᡵᡝᠨ ᠪᡠᡵᡩᡝᠮᡝ ᠯᠠᠪᠠ ᠪᡳᠯᡝᡵᡳ ᡶᡠᠯᡤᡳᠶᡝᠮᡝ ᡨᠠᠩᠰᡝ ᡩᡝ ᡥᡝᠩᡴᡳᠯᡝᡶᡳ, ᠠᠮᠪᠠ ᠴᠣᠣᡥᠠ ᠵᡠᡵᠠᡶᡳ, ᡤᡠᡵᡝ ᡤᡝᠪᡠᠩᡤᡝ ᠪᠠᡩᡝ ᡳᠰᡳᠨᠠᡶᡳ ᡳᠩ ᡳᠯᡳᡶᡳ ᡩᡝᡩᡠᡥᡝ.
ᠵᠠᡳ ᡳᠨᡝᠩᡤᡳ ᠠᠮᠪᠠ ᠴᠣᠣᡥᠠ ᠵᡠᠸᡝ ᠵᡠᡤᡡᠨ ᡳ ᡩᠣᠰᡳᠮᡝ ᡥᠠᠰᡥᡡ ᡝᡵᡤᡳ ᡩᡠᡳᠨ ᡤᡡᠰᠠᡳ ᠴᠣᠣᡥᠠ ᠪᡝ ᡩᡠᠩ ᠵᡝᠣ, ᠮᠠᡤᡝᠨᡩᠠᠨ ᠪᡝ ᡤᠠᡳᠰᡠ ᠰᡝᠮᡝ ᡠᠩᡤᡳᡥᡝ, ᡳᠴᡳ ᡝᡵᡤᡳ ᡩᡠᡳᠨ ᡤᡡᠰᠠᡳ ᡳᠩ ᠨᡳ ᠴᠣᠣᡥᠠ ᠵᠠᡴᡡᠨ ᡤᡡᠰᠠᡳ ᠰᡳᠯᡳᡥᠠ ᠪᠠᠶᠠᡵᠠᡳ ᠴᠣᠣᡥᠠ ᠪᡝ ᡥᠠᠨ ᠪᡝᡳᠰᡝ ᡤᠠᡳᡶᡳ ᡶᡠᡧᡠᠨ ᡤᡠᠸᠠᠨ ᡶᡠᡵᡩᠠᠨ ᠪᡝ ᡩᠣᠰᡳᠮᡝ ᡤᡝᠨᡝᠮᡝ, ᠸᠠᡥᡡᠨ ᠣᠮᠣᡳ ᡤᡝᠪᡠᠩᡤᡝ ᠪᡳᡤᠠᠨ ᡩᡝ ᡩᡝᡩᡠᠮᡝ ᡳᠩ ᡳᠯᡳᡥᠠ. ᡨᡝᡵᡝ ᠶᠠᠮᠵᡳ ᡥᠠᠨ ᠮᠣᠩᡤᠣ ᡤᡠᡵᡠᠨ ᡳ ᠪᡝᡳᠯᡝ ᡝᠩᡝᡩᡝᡵ ᡝᡶᡠ ᠰᠠᡥᠠᠯᠴᠠ ᡤᡠᡵᡠᠨ ᡳ ᠠᠮᠪᠠᠨ ᠰᠠᡥᠠᠯᡳᠶᠠᠨ ᡝᡶᡠ ᠵᡠᠸᡝ ᡥᠣᠵᡳᡥᠣᠨ ᡳ ᠪᠠᡵᡠ ᠵᡠᠯᡤᡝᡳ ᠠᡳᠰᡳᠨ ᡥᠠᠨ ᡳ ᠪᠠᠨᠵᡳᡥᠠ ᡴᠣᠣᠯᡳ ᠪᡝ ᠠᠯᠠᡶᡳ ᡥᡝᠨᡩᡠᠮᡝ, ᠵᡠᠯᡤᡝᠴᡳ ᡝᠪᠰᡳ ᠪᠠᠨᠵᡳᡥᠠ ᡥᠠᠨ ᠪᡝᡳᠰᡝᡳ ᡴᠣᠣᠯᡳ ᠪᡝ ᡠᠸᠠᠴᡳ, ᠪᡝᠶᡝ ᠰᡠᡳᠯᠠᠮᡝ ᡩᠠᡳᠯᠠᠨᡩᡠᡥᠠ ᡤᠣᠵᡳᠮᡝ, ᠶᠠᠶᠠ ᡝᠨᡨᡝᡥᡝᠮᡝ ᡥᠠᠨ ᡨᡝᡥᡝᠩᡤᡝ ᡳᠨᡠ ᠠᡴᡡ, ᡨᡝ ᠪᡳ ᡝᡵᡝ ᡩᠠᡳᠨ ᠪᡝ ᡩᡝᡵᡳᠪᡠᡥᡝᠩᡤᡝ, ᡥᠠᠨ ᡳ ᠰᠣᠣᡵᡳᠨ ᠪᡝ ᠪᠠᡥᠠᡴᡳ, ᡝᠨᡨᡝᡥᡝᠮᡝ ᠪᠠᠨᠵᡳᡴᡳ ᠰᡝᠮᡝ ᡩᡝᡵᡳᠪᡠᡥᡝᠩᡤᡝ ᠸᠠᡴᠠ, ᡝᡵᡝ ᡩᠠᡳᠮᡳᠩ ᡤᡠᡵᡠᠨ ᡳ ᠸᠠᠨ ᠯᡳᡳ ᡥᠠᠨ ᠮᡳᠮᠪᡝ ᡴᠣᡵᠰᠣᠪᡠᡥᠠ ᠠᠮᠪᡠᠯᠠ ᠣᡶᡳ, ᠪᡳ ᡩᠣᠰᠣᡵᠠᡴᡡ ᡩᠠᡳᠨ ᡩᡝᡵᡳᠪᡠᡥᡝ ᠰᡝᠮᡝ ᡥᡝᠨᡩᡠᡥᡝ. ᡨᡝᡵᡝ ᡳᠨᡝᠩᡤᡳ ᡩᠣᠪᠣᡵᡳ ᠠᠪᡴᠠ ᠰᡝᡵ ᠰᡝᠮᡝ ᠠᡤᠠᡵᠠ ᡤᠠᠯᠠᠨᡩᠠᡵᠠ ᠣᡥᠣ ᠮᠠᠩᡤᡳ, ᡥᠠᠨ ᡤᡝᡵᡝᠨ ᠪᡝᡳᠰᡝ ᠠᠮᠪᠠᠰᠠ ᡳ ᠪᠠᡵᡠ ᡥᡝᠨᡩᡠᠮᡝ, ᡝᡵᡝ ᠠᡤᠠ ᡩᡝ ᠴᠣᠣᡥᠠ ᡩᠣᠰᡳᠴᡳ ᠣᠵᠣᡵᠠᡴᡡ, ᠪᡝᡩᡝᡵᡝᡴᡳᠰᡝᡥᡝ ᠮᠠᠩᡤᡳ, ᠠᠮᠪᠠ ᠪᡝᡳᠯᡝ ᡥᡝᠩᠮᡝ, ᠮᡠᠰ ᡝᡩᠠᡳᠮᡳᠩ ᡤᡠᡵᡠᠨ ᡳ ᡝᠮᡤᡳ ᡨᡠᡨᠠᠯᠠ ᠠᠨᡳᠠᠶ ᠰᠠᡳᠨ ᠪᠠᠨᠵᡳᡶᡳᡶ, ᡳᠨᡳ ᡝᡥᡝ ᡩᡝ ᡨᡝ ᡩᠠᡳᠨ ᡩᡝᡵᡳᠪᡠᡶᡳ ᠴᠣᠣᡥᠠ ᡳᠯᡳᡶᡳ ᠠᡧᡧᠠᠮᡝ ᠵᠠᠪᡩᡠᡶᡳ ᠵᠠᠰᡝᡳ ᠵᠠᠠᡴᠠᡩᡝ ᡳᠰᡳᠨᠵᡳᡶᡳ ᠴᠣᠣᡥᠠ ᡥᡝᡩᡝᡵᡝᠴᡳ, ᠮᡠᠰᡝ ᠵᠠᡳ ᡩᠠᡳᠮᡳᡤᠨ ᡤᡠᡵᡠᠨ ᡳ ᠪᠠᡵᡠ ᠰᠠᡳᠨ ᠪᠠᠨᠵᡳᠮᠪᡳᠣ? ᡩᠠᡳᠨ ᠣᠮᠪᡳᠣ? ᠴᠣᠣᡥᠠ ᡳᠯᡳᡥᠠ ᠪᡝ ᠸᡝ ᡤᡳᡩᠠᠮᠪᡳ, ᠠᠪᡴᠠ ᠠᡤᠠᠴᡳ ᠮᡠᠰᡝ ᡳ ᠴᠣᠣᡥᠠ ᡳ ᠨᡳᠶᠠᠯᠮᠠᡳ ᠪᡝᠶᡝ ᡩᡝ ᠨᡝᡵᡝᡴᡠ ᠪᡳ, ᠪᡝᡵᡳ ᠰᡳᡵᡩᠠᠨ ᡩᡝ ᡤᡝᠮᡠ ᠶᠠᡴᡳ ᡠᠴᡳᡴᠠ ᠪᡳ, ᠠᡳ ᡠᠰᡳᡥᡳᡵᠠᡴᡡ ᠰᡝᠮᡝ ᠵᠣᠪᠣᠮᠪᡳ, ᡝᡵᡝ ᠠᡤᠠᡵᠠᠩᡤᡝ ᡩᠠᡳᠮᡳᠩ ᡤᡠᡵᡠᠨ ᡳ ᠨᡳᠶᠠᠯᠮᠠ ᠪᡝ ᡩᡠᠯᠪᠠ ᠣᠪᡠᠮᡝ, ᠮᡠᠰᡝᡳ ᠴᠣᠣᡥᠠ ᡩᠣᠰᡳᡝ ᠪᡝ ᠰᡝᡵᡝᠪᡠᡵᠠᡴᡡ ᠠᡤᠠᠮᠪᡳ ᡴᠠᡳ, ᡝᡵᡝ ᠠᡤᠠ ᠮᡠᠰᡝ ᡩᡝ ᠰᠠᡳᠨ, ᡩᠠᡳᠮᡳᠩ ᡤᡠᡵᡠᠨ ᡩᡝ ᡝᡥᡝ ᡴᠠᡳ ᠰᡝᡥᡝ ᠮᠠᠩᡤᡳ, ᡥᠠᠨ ᡨᡝᡵᡝ ᡤᡳᠰᡠᠨ ᠪᡝ ᡩᠠᡳᡧᠠᡶᡳ, ᠴᠣᡥᠠ ᠶᠠᠪᡠ ᠰᠮᡝ ᡩᠣᠪᠣᡵᡳ ᡠᠯᡤᡳᠶᠠᠨ ᡝᡵᡳᠨ ᡩᡝ ᠴᠣᠣᡥᠠ ᡨᡝᠨᡳ ᠠᡧᡧᠠᡵᠠᠩᡤᡝ ᠠᠪᡴᠠ ᡠᡨᡥᠠᡳ ᡤᡝᠪᡠᠨ ᡤᠠᠯᠠᡳ ᠪᡳᠶᠠ ᡨᡠᠴᡳᡴᡝ, ᡨᡝᡵᡝᠴᡳ ᡩᠣᠪᠣᡵᡳ ᡩᡠᠯᡳᠮᡝ ᡶᡠᡧᡠᠨ ᡤᡠᠸᠠᠨ ᡶᡠᡵᡩᠠ ᡳ ᠵᠠᠰᡝ ᠪᡝ ᠴᠣᠣᡥᠠ ᡨᡝᡳᠰᡠ ᡨᡝᡳᠰᡠ ᡩᠣᠰᡳᡶᡳ, ᠣᠨᠴᠣ ᠠᠩᡤᡡ ᠪᠠᡳ ᡩᡠᠪᡝ ᠠᡩᠠᡶᡳ, ᡨᡠ ᡴᡳᡵᡠ ᡧᡠᠨ ᠪᡝ ᡩᠠᠯᡳᡶᡳ, ᡨᠣᡶᠣᡥᠣᠨ ᡳ ᠴᡳᠠᠮᡵᡳ, ᡩᠠᡳᠮᡳᠩ ᡤᡠᡵᡠᠨ ᡳ ᡶᡠᡧᡠᠨ ᡧᠣ ᡥᡝᠴᡝᠨ ᠪᡝ ᡴᠠᠮᡝ ᡤᡝᠨᡝᡵᡝᡩᡝ, ᡝᠮᡠ ᠨᡳᠶᠠᠯᠮᠠ ᠵᠠᡶᠠᡶᡳ ᠪᡳᡨᡥᡝ ᠵᠠᡶᠠᠪᡠᡶᡳ ᡶᡠᡧᡠᠨ ᡧᠣ ᡥᡝᠴᡝᠨ ᡳ ᡳᠣᡤᡳ ᡥᠠᡶᠠᠨ ᠯᡳᡳ ᠶᡠᠩ ᡶᠠᠩ ᠪᡝ ᡩᠠᡥᠠ ᠰᡝᠮᡝ ᡨᠠᡴᡡᡵᠠᡥᠠ, ᡨᡝᡵᡝ ᠪᡳᡨᡥᡝᡳ ᡤᡳᠰᡠᠨ, ᠰᡠᠸᡝᠨᡳ ᡩᠠᡳᠮᡳᠩ ᡤᡠᡵᡠᠨ ᡳ ᠴᠣᠣᡥᠠ ᠵᠠᠰᡝ ᡨᡠᠴᡳᡶᡳ, ᠶᡝᡥᡝᡳ ᡤᡠᡵᡠᠨ ᡩᡝ ᡩᠠᠮᡝ ᡨᡝᡥᡝ ᡨᡠᡵᡤᡠᠨᡩᡝ, ᠪᡳ ᡨᡝ ᡩᠠᡳᠮᡳᠩ ᡤᡠᡵᡠᠨ ᠪᡝ ᡩᠠᡳᠯᠠᠮᠪᡳ, ᡶᡠᡧᡠᠨ ᡧᠣ ᡥᡝᠴᡝᠨ ᡳ ᡝᠵᡝᠨ ᡳᠣᡤᡳ ᡥᠠᡶᠠᠨ ᠰᡳ ᠠᡶᠠᡥᠠ ᠰᡝᠮᡝ ᡝᡨᡝᡵᠠᡴᡡ ᡴᠠᡳ, ᠪᡳ ᠰᡳᠮᠪᡝ ᡩᠠᡥᠠᡥᠠ ᠮᠠᠩᡤᡳ, ᡨᡝ ᡠᡨᡥᠠᡳ ᠵᡠᠯᡝᠰᡳ ᡧᡠᠮᡳᠯᠠᠮᡝ ᡩᠣᠰᡳᡴᡳ ᠰᡝᠮᠪᡳ, ᠰᡳ ᡩᠠᡥᠠᡵᠠᡴᡡ ᠣᠴᡳ, ᠮᡳᠨᡳ ᡩᠣᠰᡳᡵᡝᠩᡤᡝ ᡨᠣᠣᡴᠠᠮᠪᡳ ᡴᠠᡳ, ᠰᡳ ᠠᡶᠠᡵᠠᡴᡡ ᡩᠠᡥᠠᡥᠠ ᡩᡝ, ᠰᡳᠨᡳ ᡴᠠᡩᠠᠯᠠᡥᠠ ᠴᠣᠣᡥᠠ ᡳᡵᡤᡝᠨ ᠪᡝ ᠠᠴᡳᠩᡤᡳᠶᠠᡵᠠᡴ, ᡴᡝᠮᡠᠨᡳ ᠰᡳᠨᡳ ᡶᡝ ᡩᠣᡵᠣᡳ ᡠᠵᡳᡵᡝ. ᠰᡳ ᠠᡳ ᠵᠠᡴᠠ ᠪᡝ ᠠᠮᠪᡠᠯᠠ ᠪᠠᡥᠠᠨᠠᡵᠠ ᠨᡳᠶᠠᠯᠮᠠ ᡴᠠᡳ, ᠰᡳᠨᡳ ᠠᠩᡤᠠᠯᠠ ᠮᡠᠵᠠᡴᡡ ᠨᡳᠶᠠᠯᠮᠠ ᠪᡝ ᡳᠨᡠ ᡨᡠᡴᡳᠶᡝᡶᡳ ᠵᡠᡳ ᠪᡠᡶᡳ ᠰᠠᡩᡠᠨ ᠵᠠᡶᠠᡶᡳ ᠪᠠᠨᠵᡳᠮᠪᡳ, ᠰᡳᠮᠪᡝ ᠰᡳᠨᡳ ᡩᠠ ᠪᠠᠨᠵᡳᡥᠠᠴᡳ ᡤᡝᠯᡳ ᠸᡝᠰᡳᠮᠪᡠᡶᡳ, ᠮᡳᠨ ᡠᠵᡠ ᠵᡝᡵᡤᡳ ᠠᠮᠪᠠᠰᠠᡳ ᡤᡝᠰᡝ ᡠᠵᡳᡵᠠᡴᡡ ᡩᠣᡵᠣ ᠪᡳᠣ, ᠰᡳ ᡠᠮᡝ ᠠᡶᠠᡵᠠ, ᠠᡶᠠᠴᡳ ᠮᡳᠨᡳ ᠴᠣᠣᡥᠠᡳ ᠨᡳᠶᠠᠯᠮᠠ ᡳ ᡤᠠᠨᡨᠠᡥᠠ ᠰᡳᡵᡩᠠᠨ ᠰᡳᠮᠪᡝ ᡨᠠᡴᠠᠮᠪᡳᠣ, ᠶᠠᠰᠠ ᠠᡴᡡ ᠰᡳᡵᡩᠠᠨ ᡩᡝ ᡤᠣᡳᠴᡳ ᠪᡠᠴᡝᠮᠪᡳ ᡴᠠᡳ, ᡥᡡᠰᡠᠨ ᡳᠰᡳᡵᠠᡴᡡ ᠪᠠᡩᡝ ᡩᠠᡥᠠᡵᠠᡴᡡ ᠠᡶᠠᠴᡳ, ᠪᡠᠴᡝᡥᡝ ᠰᡝᠮᡝ ᠠᡳ ᡨᡠᠰᠠ, ᠣᡴᡩᠣᠮᡝ ᡨᡠᠴᡳᡩᡳ ᡩᠠᡥᠠᠴᡳ, ᠮᡳᠨᡳ ᠴᠣᠣᡥᠠ ᡩᠣᠰᡳᠨᡩᠠᡵᠠᡴᡡ ᠰᡳᠨᡳ ᡴᠠᡩᠠᠯᠠᡥᠠ ᠴᠣᠣᡥᠠ ᠪᡝ ᠰᡳ ᠶᠣᠣᠨᡳ ᠪᠠᡥᠠᡶᡳ ᠪᠠᡵᡤᡳᠶᠠᠮᠪᡳ ᡴᠠᡳ, ᠮᡳᠨᡳ ᠴᠣᠣᡥᠠ ᡩᠣᠰᡳᡴᠠ ᡩᡝ, ᡥᡝᠴᡝᠨ ᡳ ᠵᡠᠰᡝ ᡥᡝᡥᡝ ᡤᠣᠯᠣᡶᡳ ᠰᠠᠮᠰᡳᠮᠪᡳᡴᠠᡳ, ᡨᡠᡨᡠ ᠣᠴᡳ, ᡩᠣᡵᠣ ᠠᠵᡳᡤᡝᠨ ᠣᠮᠪᡳᡴᠠᡳ, ᠰᡳ ᠠᡳᡴᠠᠪᠠᡩᡝ ᠮᡳᠨᡳ ᡤᡳᠰᡠᠨ ᠪᡝ ᡠᠮᡝ ᠠᡴᡩᠠᡵᠠᡴᡡ ᠣᠵᠣᡵᠣ, ᠪᡳ ᠰᡳᠨᡳ ᡝᡵᡝ ᡝᠮᡠ ᡥᡝᠴᡝᠨ ᠪᡝ ᠪᠠᡥᠠᡵᠠᡴᡡ ᠣᠴᡳ, ᡝᡵᡝ ᠴᠣᠣᡥᠠ ᡳᠯᡳᠮᠪᡳᠣ, ᡠᡶᠠᡵᠠᡥᠠ ᠮᠠᠩᡤᡳ, ᠵᠠᡳ ᠠᠯᡳᠶᠠᡥᠠ ᠰᠮᡝ ᡝᠠᡳ ᡨᡠᠰᠠ,ᠮ ᡥᡝᠴᡝᠨ ᡳ ᡩᠣᡵᡤᡳ ᠠᠮᠪᠠ ᠠᠵᡳᡤᠠᠨ ᡥᠠᡶᠠᠰᠠ ᠴᠣᠣᡥᠠ ᡳᡤᡝᠨ ᠰᡠᠸᡝ ᡥᡝᠴᡝᠨ ᠣᠨᡳᠰᡳᡥᡳᠠ ᡩᠠᡥᠠᠴᡳ ᠵᡠᠰᡝ ᠰᠠᡵᡤᠠᠨ ᠨᡳᠶᠠᠮᠠᠨ ᡥᡡᠨᠰᠴᡳᡥᡳᠨ ᡶᠠᡴᠴᠠᡵᠠᡴᡡ ᠣᡥᠣᡩᡝ, ᠰᡠᠸᡝᠨ ᡩᡝ ᡳᠨᡠ ᠠᠮᠪᠠ ᡠᡵᡤᡠᠨ ᡴᠠᡳ, ᡩᠠᡥᠠᡵᠠ ᡩᠠᡥᠠᡵᠠᡴᡡ ᠪᡝ ᠰᡠᠸᡝ ᡳᠨᡠ ᠠᠮᠪᡠᠯᠠ ᠰᠸᠣᠯᡝᡥᡝᡩᡝ ᠰᠠᡳᠨ ᡴᠠᡳ, ᡝᠮᡠ ᠮᠠᠵᡳᡤᡝ ᠠᠨᡩᠠᠨ ᡳ ᠵᡳᠯᡳ ᡩᡝ ᠮᡝᠨᡩᡝ ᠠᡴᡩᠠᡵᠠᡴᡡ, ᡝᡵᡝ ᠸᡝᡳᠯᡝ ᠪᡝ ᡠᠮᡝ ᡝᡶᡠᠯᡝᡵᡝ, ᡩᠠᡥᠠ ᠰᡝᠮᡝ ᠪᡳᡨᡥᡝ ᠪᡠᡥᡝ ᠮᠠᠩᡤᡳ, ᡥᡝᠴᡝᠨ ᡳ ᡝᡝᠨ ᡳᠣᡤᡳ ᠯᡳᡳ ᠶᡠᠩ ᡶᠠᠩ ᡩᠣᡵᡳᠣ ᡝᡨᡠᡴᡠ ᡝᡨᡠᡶᡳ ᡩᠠᡥᠠᠮᠪᡳ ᠰᡝᠮᡝ ᡥᠣᡨᠣᠨ ᡳ ᠵᡠᠯᡝᡵᡤᡳ ᡩᡠᡴᠠ ᡩᡝ ᡳᠯᡳᡶᡳ ᡤᡳᠰᡠᡵᡝᠮᠪᡳᠮᡝ, ᡳᠨᡳ ᠴᠣᠣᡥᠠᡳ ᠨᡳᠶᠠᠯᠮᠠ ᡝᠪ ᠠᡶᠠᡵᠠ ᠠᡳᡴᠠ ᠵᠠᡴᠠ ᠪᡝ ᡩᠠᡤᡳᠯᠠᡵᠠ ᠪᡝ ᠰᠠᠪᡠᡶᡳ, ᠮᠠᠨᠵᡠ ᡳ ᠴᠣᠣᡥᠠ ᡥᡝᠴᡝᠨ ᡩᡝ ᠸᠠᠨ ᠰᡳᠨᡩᠠᡶᡳ ᠠᡶᠠᠮᡝ, ᡝᠮᡠ ᡝᡵᡳᠨ ᡥᠣᠨᠣ ᠣᡥᠣ ᠠᡴᡡ ᡥᡝᠴᡝᠨ ᡩᡝ ᡠᡨᡥᠠᡳ ᡨᠠᡶᠠᡴᠠ ᠮᠠᠩᡤᡳ, ᠯᡳᡳ ᠶᡠᠩ ᡶᠠᠩ ᡨᡝᠨᡳ ᡩᠠᡥᠠᠮᡝ ᡩᠣᡵᠣᡳ ᡝᡨᡠᡴᡠ ᡝᡨᡠᡥᡝᡳ ᠮᠣᡵᡳᠨ ᠶᠠᠯᡠᡶᡳ ᡥᡝᠴᡝᠨ ᠴᡳ ᡨᡠᠴᡳᡴᡝ ᠮᠠᠩᡤᡳ, ᡤᡡᠰᠠᡳ ᡝᠵᡝᠨ ᠠᡩᡠᠨ ᡤᡝᠪᡠᠩᡤᡝ ᠠᠮᠪᠠᠨ ᡤᠠᠵᡳᠮᡝ ᠵᡳᡶᡳ ᡥᠠᠨᡩᡝ ᠠᠴᠠᠪᡠᡵᡝ ᡩᡝ, ᠯᡳᡳ ᠶᡠᠩ ᡶᠠᠩ ᠮᠣᡵᡳᠨ ᠴᡳ ᡝᠪᡠᡶᡳ ᠨᡳᠶᠠᡴᡡᡵᠠᠮᡝ ᠠᠴᠠᡵᠠᡩᡝ, ᡥᠠᠨ ᠮᠣᡵᡳᠨ ᡳ ᡩᡝᠯᡝ ᡳᠰᡥᡠᠨ ᡤᠠᠯᠠ ᡨᡠᡴᡳᠶᡝᠴᡝᠮᡝ ᡩᠣᡵᠣ ᠠᡶᠠᡥᠠ, ᡨᡝᡵᡝ ᡥᡝᠴᡝᠨ ᡳ ᡩᠣᡵᡳᡤ ᠨᡳᠶᠠᠯᠮᠠ ᠠᡶᠠᡵ ᡩᡝ ᠸᠠᠪᡠᡵᡝᠩᡤᡝ ᠸᠠᠪᡠᡥᠠ, ᡥᡝᠴᡝᠨ ᠪᡝ ᠪᠠᡥᠠ ᠮᠠᠩᡤᡳ, ᡠᠮᡝ ᠸᠠᡵᠠ ᠰᡝᠮᡝ ᡧᠠᠵᡳᠯᠠᡶᡳ ᡤᡝᠮᡠ ᡠᠵᡳᡥᡝ. ᡶᡠᡧᡠᠨ ᡧᠣ, ᡩᡠᠩ ᠵᡝᠣ, ᠮᠠᡤᡝᠨᡩᠠ ᡝᡵᡝ ᡳᠯᠠᠨ ᡥᠣᡨᠣᠨ, ᠪᡠᠶᠠ ᡦᡠ ᡨᠠᡳ ᡤᠠᡧᠠᠨ ᡠᡥᡝᡵᡝᠮᡝ ᠰᡠᠨᠵᠠ ᡨᠠᠩᡤᡡ ᡩᡶᡠᠨᠴᡝᠮᡝ ᡤᠠᡳᡶᡳ, ᠴᠣᠣᡥᠠ ᠪᠠᡵᡤᡳᠶᠠᡶᡳ ᠮᡝᠨᡳ ᠮᡝᡳ ᡩᠣᠰᡳᡴᠠ ᠪᠠᡩᡝ ᡩᡝᡩᡠᡥᡝ, ᡥᠠᠨ ᡳ ᠪᡝᠶᡝ ᡶᡠᡧᡠᠨ ᡧᠣ ᡥᡝᠴᡝᠨ ᡩᡝ ᡩᡝᡩᡠᡥᡝ, ᠵᡠᠸᠠᠨ ᠨᡳᠩᡤᡠᠨ ᡩᡝ ᡩᡠᡳᠨ ᠮᡳᠩᡤᠠᠨ ᠴᠣᠣᡥᠠ ᠪᡝ ᡶᡠᡧᡠᠨ ᡧᠣ ᡥᡝᠴᡝᠨ ᠪᡝ ᡝᡶᡠᠯᡝ ᠰᡝᠮᡝ ᠸᡝᡵᡳᡶᡳ, ᡤᡝᡵᡝᠨ ᠴᠣᠣᡥᠠ ᠪᡝᡩᡝᡵᡝᠮᡝ ᡶᡠᡧᡠᠨ ᡧᠣ ᡥᡝᠴᡝᠨ ᡳ ᡧᡠᠨ ᡩᡝᡴᡩᡝᡵᡝ ᡝᡵᡤᡳ ᠪᡳᡤᠠᠨ ᡩᡝ ᠴᠣᠣᡥᠠᡳ ᡳᠩ ᡳᠯᡳᡶᡳ, ᡤᡝᡵᡝᠨ ᠠᠮᠪᠠᠰᠠ ᠴᠣᠣᡥᠠᡳ ᠨᡳᠶᠠᠯᠮᠠ ᡩᡝ ᡤᡠᠩ ᠪᠣᡩᠣᠮᡝ ᡧᠠᠩᠨᠠᡶᡳ ᡤᡡᠰᡳᠨ ᡨᡠᠮᡝᠨ ᠣᠯᠵᡳ ᠪᡝ ᡤᡝᡵᡝᠨ ᠴᠣᠣᡥᠠ ᡩᡝ ᡩᡝᠨᡩᡝᠮᡝ ᠪᡠᡶᡳ, ᡩᠠᡥᠠᡥᠠ ᠨᡳᠶᠠᠯᠮᠠ ᠪᡝ ᡝᠮᡠ ᠮᡳᠩᡤᠠᠨ ᠪᠣᡳᡤᠣᠨ ᠠᡵᠠᡥᠠ, ᠵᠠᡳ ᡧᠠᡤᡩᡠᠩ, ᠰᠠᠨᠰᡳ, ᡥᠣᡩᡠᠩ, ᡥᠣᠰᡳ, ᠵᠣ ᠵᡝᠣ, ᡥᠠᠩ ᠵᡝᠣ, ᡳ ᠵᡝᠣ ᠵᠠᡴᡡᠨ ᡤᠣᠯᠣ ᠴᡳ ᡥᡡᡩᠠ ᠵᡳᡶᡳ ᡶᡠᡧᡠᠨ ᡧᠣ ᡥᡝᠴᡝᠨ ᡩᡝ ᠪᡳᡥᡝ ᠵᡠᠸᠠᠨ ᠨᡳᠩᡤᡠᠨ ᠨᡳᠶᠠᠯᠮᠠ ᡩᡝ ᠵᡠᡤᡡᠨ ᡩᡝ ᠵᡝᡨᡝᡵᡝ ᠮᡝᠩᡤᡠᠨ ᠠᠮᠪᡠᠯᠠ ᠪᡠᡶᡳ, ᠨᠠᡩᠠᠨ ᠠᠮᠪᠠ ᡴᠣᡵᠣ ᡤᡳᠰᡠᠨ ᡳ ᠪᡳᡨᡥᡝ ᠪᡝ ᠵᠠᡶᠠᠪᡠᡶᡳ ᠠᠮᠠᠰᡳ ᠰᡳᠨᡩᠠᡶᡳ ᡠᠩᡤᡳᡥᡝ, ᡶᡠᡧᡠᠨ ᡧᠣ ᡥᡝᠴᡝᠨ ᠪᡝ ᡝᡶᡠᠯᡝ ᠰᡝᠮᡝ ᠸᡝᡵᡳᡥᡝ ᡩᡠᡳᠨ ᠮᡳᠩᡤᠠᠨ ᠴᠣᠣᡥᠠ ᡳᠰᠨᡳᠵᡳᡥᠠ ᠮᠠᠩᡤᡳ, ᠨᡳᡤᠩᡠᠨ ᡨᡠᠮᡝᠨ ᠴᠣᠣᡥᠠ ᠪᡝ ᡩᠠᡥᠠᠪᡠᡥᠠ ᠪᠣᡳᡤᠣᠨ ᡳ ᠨᡳᠶᠠᠯᠮᠠ ᠪᠠᡥᠠ ᠣᠯᠵᡳ ᠪᡝ ᡤᠠᠮᠠᠮᡝ, ᠵᡠᠯᡝᡵᡳ ᠵᡠᡵᠠᠮᠪᡠᡶᡳ ᠪᠣᠣᡩᡝ ᡠᠩᡤᡳᡥᡝ, ᡥᠠᠨ ᡳ ᠪᡝᠶᡝ ᠪᡳᡝᠰᡝ ᠠᠮᠪᠠᠰᠠ ᡩᡠᡳᠨ ᡨᡠᠮᡝᠨ ᠴᠣᠣᡥᠠ ᠪᡝ ᡤᠠᡳᡶᡳ, ᡳᠩ ᡤᡠᡵᡳᠮᡝ ᡩᠠᡳᠮᡳᡤᠨ ᡤᡠᡵᡠᠨ ᡳ ᠪᠠᡵᡠ ᡤᡝᠨᡝᡶᡳ ᠵᠠᠰᡝᡳ ᡥᠠᠨᠴᡳ ᡳᠩ ᡳᠯᡳᡥᠠ. ᠣᡵᡳᠨ ᡝᠮᡠ ᡩᡝ ᠴᠣᠣᡥᠠ ᠪᡝᡩᡝᡵᡝᠮᡝ, ᡥᠠᠨ ᡳ ᠪᡝᠶᡝ ᠵᠠᠰᡝ ᠴᡳ ᠣᡵᡳᠨ ᠪᠠᡳ ᡩᡠᠪᡝᡩᡝ ᠰᡳᠶᡝᡵᡳ ᡤᡝᠪᡠᠩᡤᡝ ᠪᡳᡤᠠᠨ ᡩᡝ ᡳᠰᡳᠨᠵᡳᡶᡳ ᡨᡝᠨᡳ ᡳᠩ ᡳᠯᡳᡴᡳ ᠰᡝᡵᡝ ᡩᡝ, ᡩᠠᡳᠮᡳᠩ ᡤᡠᡵᡠᠨ ᡳ ᡤᡠᠸᠠᠩᠨᡳᠩ ᡥᡝᠴᡝᠨ ᠪᡝ ᡨᡠᠸᠠᡴᡳᠶᠠᡥᠠ ᡝᠵᡝᠨ ᡯᡠᠩ ᠪᡳᠩ ᡤᠸᠠᠨ ᡥᡝᡵᡤᡝᠨ ᡳ ᠵᠠᠩ ᠴᡝᠨᠩ ᠶᡝᠨ, ᠯᡳᠶᠣᠣ ᠶᠠᠩ ᡥᡝᠴᡝᠨ ᠪᡝ ᡨᡠᠠᠸᡴᡳᠶᠠᡥᠠ ᡶᡠᠵᡳᠶᠠᠩ ᡥᡝᡵᡤᡝᠨ ᡳ ᡦᠣ ᡨᡳᠩ ᠰᡳᠶᠠᠩ, ᡥᠠᡳ ᠵᡝᠣ ᡥᡝᠴᡝᠨ ᠪᡝ ᡨᡠᠸᠠᡴᡳᠶᠠᡥᠠ ᡮᠠᠨᠵᡳᠶᠠᠩ ᡥᡝᡵᡤᡝᠨ ᡳ ᡦᡠ ᡧᡳ ᡶᠠᠩ, ᠮᠠᠨᠵᡠ ᡤᡠᡵᡠᠨ ᡳ ᠮᠠᠪᠠ ᠴᠣᠣᡥᠠ ᠵᠠᠰᡝ ᠪᡝ ᡩᠣᠰᡳᡶᡳ ᡶᡠᡠᡧᠨ ᡧᠣ, ᡩᡠᠩ ᠵᡝᠣ, ᠮᠠᡤᡝᠨᡩᠠᠨ ᠪᡝ ᡤᠠᡳᡶᡳ ᡤᠣᠯᠣ ᠪᡝ ᠸᠠᠴᡳᡥᡳᠶᠠᡥᠠ ᠰᡝᠮᡝ ᡩᠣᠨᠵᡳᡶᡳ, ᡝᠮᡠ ᡨᡠᠮᡝᠨ ᠴᠣᠣᡥᠠ ᠪᡝ ᠠᡳᡶᡳ ᡝᠪᡧᡝᠮᡝ ᠵᡳᠴᡳ, ᠮᠠᠨᠵᡠ ᡤᡠᡵᡠᠨ ᡳ ᠴᠣᠴᠣᡥᠠ ᠪᡝᡩᡝᡵᡝᠮᡝ ᡤᡝᠨᡝᡶᡳ ᠵᠠᠰᡝ ᡨᡠᠴᡳᡴᡝᠪᡳ, ᡩᠠᡥᠠᠠᠯᠠᠮᡝ ᠶᠠᡵᡴᡳᠶᠠᠮᡝ ᡨᡠᠸᠠᡴᡳ ᠰᠮᡝᡝ ᡤᡝᠨᡝᡵᡝ ᡩᡝ. ᡨᡝᡵᡝ ᠴᠣᠣᡥᠠ ᠵᡳᡩᡝᡵᡝ ᡩᡝ ᠮᠠᠨᠵᡠ ᡳ ᡴᠠᡵᡠᠨ ᡳ ᠨᡳᠶᠠᠯᠮᠠ ᠰᠠᠪᡠᡶᡳ ᡩᡝᠶᡝᡵᡝᡳ ᡤᡝᠰᡝ ᡶᡝᡴᠰᡳᠮᡝ ᠵᡳᡶᡳ, ᠠᠮᠪᠠ ᠪᡝᡳᠯᡝ, □□ ᠪᡝᡳᠯᡝ ᡩᡝ ᠠᠯᠠᠨᡳᡵᡝ ᠵᠠᡴᠠᡩᡝ, ᠵᡠᠸᡝ ᠪᡝᡳᠯᡝ ᠴᠣᠣᡥᠠᡳ ᠨᡳᠶᠠᠯᠮᠠ ᠪᡝ ᡤᠮᡠ ᡠᡴᠰᡳᠯᡝᠪᡠᡶᡳ ᠣᡴᡩᠣᠮᡝ ᡤᡝᠨᡝᡶᡳ ᠵᠠᠰᡝᡳ ᠵᠠᡴᠠᡩᡝ ᡳᠯᡳᡶᡳ ᡴᠠᡵᡠᠨ ᡳ ᠨᡳᠶᠠᠯᠮᠠ ᠪᡝ ᡥᠠᠨᡩᡝ ᠠᠯᠠᠨᠠ ᠰᡝᠮᡝ ᡠᠩᡤᡳᡥᡝ, ᡴᠠᡵᡠᠨ ᡳ ᠨᡳᠶᠯᠠᠮᠠ ᡤᡝᠨᡝᡶᡳ ᡥᠠᠨ ᡩᡝ ᠠᠯᠠᡵᠠ ᠵᠠᡴᠠᡩᡝ, ᡥᠠᠨ ᡥᡝᠨᡩᡠᠮᡝ, ᡨᡝᡵᡝ ᠣᠴᠣᡥᠠ ᠮᡠᠰᡝᡩᡝ ᠠᡶᠠᠨᠵᡳᡵᠠᡴᡡ, ᠮᠠᠨᠵᡠ ᡤᡠᡵᡠᠨ ᡳ ᠵᡳᡥᡝ ᠴᠣᠣᡥᠠ ᠪᡝ ᠪᠣᡧᠣᠮᡝ ᠵᠠᠰᡝ ᡨᡠᠴᡳᠪᡠᡥᡝ ᠰᡝᠮᡝ ᡳᠨᡳ ᡥᠠᠨ ᡩᡝ ᡥᠣᠯᡨᠣᠮᡝ ᠵᠠᠪᡠᡴᡳ ᠰᡝᠮᡝ ᠵᡳᡥᡝᠪᡳ, ᠮᡠᠰᡝ ᡳ ᠴᠣᠣᡥᠠ ᠪᡝ ᠠᠯᡳᠶᠠᡵᠠᡴᡡ, ᠠᠮᠪᠠ ᠪᡝᡳᠯᡝ, □□ ᠪᡝᡳᠯᡝ ᡳ ᠴᠣᠣᡥᠠ ᠪᡝ ᡳᠯᡳ ᠰᠮᡝᡝ ᡝᡵᡩᡝᠨᡳ ᠪᠠᡴᠰᡳ ᠪᡝ ᡨᠠᡴᡡᡵᠠᡶᡳ ᡥᠠᠨ ᡳ ᡤᡳᠰᡠᠨ ᠪᡝ ᠵᠸᡠᡝ ᠪᡝᡳᠯᡝ ᡩᡝ ᠠᠯᠠᠨᠠᡵᠠ ᠵᠠᡴᠠᡩᡝ, ᠵᡠᠸᡝ ᠪᡝᡳᠯᡝ ᠴᠣᠣᡥᠠ ᡤᡳᡶᡳ ᠵᠠᠰᡝ ᠠᠵᡴᠠᡩᡝ ᡳᠯᡳᡶᡳ, ᡥᠠᠨ ᡩᡝ ᠠᠠᠰᡳ ᡨᠠᡴᡡᡵᠠᠮᡝ, ᠮᡠᠰᡝᡳ ᠴᠣᠣᡥᠠ ᠪᡝ ᠠᠯᡳᠶᠠᠴᡳ ᠠᡶᠠᡴᡳ, ᠠᠯᡳᠶᠠᡵᠠᡴᡡ ᠣᠴᡳ ᡳ ᠪᡠᡵᡠᠯᠠᡥᠠ ᡴᠠᡳ, ᡨᡠᡨᡨᡠ ᠠᠯᡳᠶᠠᡵᠠᡴᡡ ᠪᡠᡵᡠᠯᠠᡳᠴ ᠮᡠᠰᡝ ᡠᠨᠴᡝᡥᡝᠨ ᡩᡝ ᡩᠣᠰᡳᡶᡳ ᠰᠠᠴᡳᡴᡳ, ᡨᡠᡨᡠ ᠠᡴᡡ ᠮᡠᠰᡝ ᡝᡴᡳᠰᠠᡴᠠ ᠠᠮᠠᠰᡳ ᠪᡝᡩᡝᡵᡝᠴᡳ, ᠮᡠᠰᡝ ᠪᡝ ᠠᠯᡳᠶᠠᡥᠠᡴᡡ ᡤᡝᠯᡝᠮᡝ ᡤᡝᠨᡝᡥᡝ ᠰᡝᠮᠪᡳᡴᠠᡳ ᠰᡝᡥᡝ ᠮᠠᠩᡤᡳ, ᡥᠠᠨ ᡨᡝᡵᡝ ᡤᡳᠰᡠᠨ ᠪᡝ ᠮᡠᠵᠠᠩᡤᠠ ᠰᡝᠮᡝ ᡥᡝᠨᡩᡠᡶᡳ, ᡤᡝᡵᡝᠨ ᠴᠣᠣᡥᠠ ᠪᡝ ᡤᠠᡳᡶᡳ ᡤᡝᠨᡝᠴᡳ, ᡩᡳᠠᠮᡳᠩ ᡤᡠᡵᡠᠨᡳ ᠴᠣᠣᡥᠠ ᠠᠯᡳᠨ ᡳ ᠨᡳᠩᡤᡠᡩᡝ ᡳᠯᠠᠨ ᠪᠠᡩᡝ ᡳᠯᠠᠨ ᡳᠩ ᡳᠯᡳᡶᡳ ᡠᠯᠠ ᡶᡝᡨᡝᡶᡳ ᠮᡳᠶᠣᠣᠴᡳᠶᠠᠩ ᠪᡝ ᡶᠠᡳᡩᠠᡶᡳ ᡳᠯᡳᡥᠠᠪᡳ, ᡨᡝᡵᡝ ᡶᠠᡳᡩᠠᠨ ᡩᡝ ᠮᠠᠨᠵᡠ ᡤᡠᡵᡠᠨ ᡳ ᠵᠠᡴᡡᠨ ᡤᡡᠰᠠᡳ ᠴᠣᠣᡥᠠ ᡶᠠᡳᡩᠠᡶᡳ ᠪᡳᡵᡝᠮᡝ ᡩᠣᠰᡳᠨᠠᡵᠠ ᡩᡝ, ᠨᡝᠨᡝᠮᡝ ᠸᡝᠰᡳᡥᡠᠨ ᡩᠠᡥᠠ ᡝᡩᡠᠨ, ᠴᠣᠣᡥᠠᡳ ᡥᠠᠨᠴᡳ ᡳᠰᡳᠨᠠᠮᡝ ᡝᡩᡠᠨ ᡠᡨᡥᠠᡳ ᡶᠣᡵᡤᠣᡧᠣᠮᡝ ᠪᡠᡵᠠᡴᡳ ᡨᠣᡵᠣᠨ ᡨᠴᡳᠮᡝ, ᡩᠠᡳᠮᡳᠩ ᠨᡳ ᠴᠣᠣᡥᠠᡳ ᠪᠠᡵᡠ ᡤᡳᡩᠠᠮᡝ ᡩᠠᡥᠠ, ᡩᠠᡳᠮᡳᠩ ᠨᡳ ᠴᠣᠣᡥᠠ ᡦᠣᠣ ᠮᡳᠶᠣᠣᠴᡳᠶᠠᠩ ᡝᠮᡩᡠᠪᡝᡳ ᠰᡳᠨᡩᠠᠮᡝ ᠠᡶᠠᡵᠠ ᡩᡝ, ᠮᠠᠨᠵᡠ ᡳ ᠴᠣᠣᡥᠠ ᡤᠠᠪᡨᠠᠮᡝ ᠰᠠᠴᡳᠮᡝ ᠠᡶᠠᠮᡝ ᡩᠣᠰᡳᡵᡝ ᠵᠠᡴᠠᡩ, ᡩᠠᡳᠮᡳᠩ ᠨᡳ ᠴᠣᠣᡥᠠ ᠮᠠᠨᠵᡠ ᡳ ᠴᠣᠣᡥᠠᡳ ᡥᠣᡵᠣᠨ ᠪᡝ ᠠᠯᡳᠮᡝ ᡤᠠᡳᠴᡳ ᠣᠵᠣᡵᠠᡴᠴ, ᡠᡨᡥᠠᡳ ᠪᡠᡩᡵᡠᠯᠠᡥᠠ, ᠮᠠᠨᠵᡠ ᡳ ᠴᠣᠣᡥᠠ ᡩᠠᡳᠮᡳᠩ ᡤᡠᡵᡠᠨ ᡳᡳ ᡳᠯᠠᠨ ᡳᠩ ᠨᡳ ᠴᠣᠣᡥᠠ ᠪᡝ ᡠᡨᡥᠠᡳ ᡤᡳᡩᠠᡶᡳ ᡥᡝᡨᡠ ᡠᡩᡠ ᠴᡳᡵᡠᠮᡝ ᡨᡠᡥᡝᠪᡠᡶᡳ, ᡯᡠᠩ ᠪᡳᠩ ᡤᡠᠸᠠᠨ ᠵᠠᠩ ᠴᡝᠩ ᠶᡝᠨ, ᡶᡠᠵᡳᠶᠠᠩ ᡦᠣ ᡨᡳᠩ ᠰᡳᠶᠠᠩ, ᡮᠠᠨᠵᡳᠶᠠᠩ ᡦᡠ ᡧᡳ ᡶᠠᠩ, ᠰᡠᠨᠵᠠ ᡳᠣᡤᡳ, ᠴᡳᠶᠠᠨᡯᡠᠩ ᠪᠠᡯᡠᠩ ᠰᡠᠰᠠᡳ ᡶᡠᠨᠴᡝᠮᡝ ᠸᠠᡥᠠ, ᡩᡝᡥᡳ ᠪᠠᡩᡝ ᡳᠰᡳᡨᠠᠯᠠ ᠪᠣᡧᠣᠮᡝ ᡠᠨᡩᡠᡵᡳ ᡨᡠᡥᡝᠪᡠᠮᡝ ᠸᠠᡶᡳ ᠴᠣᠣᡥᠠ ᠪᡝᡩᡝᡵᡝᡥᡝ, ᡨᡝᡵᡝ ᠴᠣᠣᡥᠠ ᠵᡠᠸᠠᠨ ᡳ ᡩᠣᠯᠯᠣ ᡝᠮᡴᡝ ᠵᡠᠸᡝ ᡨᡠᠴᡳᡴᡝ, ᡠᠶᡠᠨ ᠮᡳᠩᡤᠠᠨ ᠮᠣᡵᡳᠨ, ᠨᠠᡩᠠᠨ ᠮᡳᠩᡤᠠᠨ ᡠᡴᠰᡳᠨ, ᠴᠣᠣᡥᠠᡳ ᠠᡤᡡᡵᠠ ᠠᠮᠪᡠᠯᠠ ᠪᠠᡥᠠ. ᡨᡝᡵᡝ ᠠᡶᠠᡵᠠ ᡩᡝ ᠮᠠᠨᠵᡠᡳ ᡩᡠᠪᡝᡳ ᠴᠣᠣᡥᠠᡳ ᠨᡳᠶᠠᠯᠮᠯᠠ ᠵᡠᠸᡝ ᠪᡠᠴᡝᡥᡝ, ᡨᡝᡵᡝᠴᡳ ᠪᡝᡩᡝᡵᡝᠮᡝ ᠵᡳᡶᡳ ᠵᠠᠰᡝᡳ ᠵᠠᠰᡝᡳ ᠵᠠᡴᠠᡩᡝ ᡳᠩ ᡳᠯᡳᡶᡳ, ᠴᠣᠣᡥᠠᡳ ᠪᡝᡳᠰᡝ ᠠᠮᠪᠠᠰᠠ ᠵᡠᠯᡝᡵᡳ ᡩᠣᠰᡳᡴᠠ ᡥᡡᠰᡠᠨ ᡨᡠᠴᡳᠮᡝ ᠠᡶᠠᡥᠠ ᠪᡝ ᠵᡝᡵᡤᡳ ᠪᠣᡩᠣᠮᡝ, ᡶᡝᠶᡝ ᠪᠠᡥᠠ ᠴᠣᠣᡥᠠᡳ ᠨᡳᠶᠠᠯᠮᠮᠠ ᠪᡝ ᡶᡝᠶᡝᡳ ᡠᠵᡝᠨ ᠸᡝᡳᡥᡠᡝᡴᠨ ᠪᡝ ᡨᡠᠸᠠᠮᡝ ᡧᠠᠩᠨᠠᠮᡝ ᠪᡠᡶᡳ, ᠣᡵᡳᠨ ᡳᠯᠠᠨ ᠴᠣᠣᡥᠠᡳ ᠪᡝᡩᡝᡵᡝᠮᡝ, ᠰᡳᠶᡝᡵᡳ ᡤᡝᠪᡠᠩᡤᡝ ᠪᡳᡶᠠᠨ ᡩᡝ ᡳᠰᡳᠨᠵᡳᡶᡳ ᡳᠩ ᡳᠯᡳᡶᡳ ᡩᡝᡩᡠᡥᡝ, ᡨᡝᡵᡝ ᠶᠠᠮᠵᡳ ᡧᡠᠨ ᡨᡠᡥᡝᡵᡝ ᡝᡵᡤᡳ ᠴᡳ ᡧᡠᠨ ᡩᡝᡴᡩᡝᡵᡝ ᠪᠠᡵᡠ ᡥᡝᡨᡠ ᠯᠠᠰᡥᠠ ᠰᠠᡥᠠᠯᡳᠶᠠᠨ ᠯᠠᠮᡠᠨ ᠰᡳᡵᡝᠨ ᡤᠣᠴᡳᡴᠠ ᠪᡳᡥᡝ, ᡨᡝᡵᡝᠴᡳ ᠪᡝᡩᡝᡵᡝᠮᡝ ᠵᡳᡶᡳ ᠣᡵᡳᠨ ᠨᡳᠩᡤᡠᠨᡩᡝ ᠠᠮᠪᠠ ᡥᡝᠴᡝᠨ ᡩᡝ ᡩᠣᠰᡳᡴᠠ, ᡶᡠᡧᡠᠨ ᡧᠣ ᡥᡝᠴᡝᠨ ᠴᡳ ᡩᠠᡥᠠᠪᡠᡶᡳ ᡤᠠᠵᡳᡥᠠ ᠮᡳᠩᡤᠠᠨ ᠪᠣᡳᡤᠣᠨ ᡳ ᠨᡳᠶᠠᠯᠮᠠᡳ ᠠᠮᠠ ᠵᡠᡳ ᠠᡥᡡᠨ ᡩᡝᠣ ᡝᡳᡤᡝᠨ ᠰᠠᡵᡤᠠᠨ ᠪᡝ ᡶᠠᡴᠰᠠᠯᠠᡥᠠᡴᠴ, ᡩᠠᡳᠨ ᡩᡝ ᠰᠠᠮᠰᡳᡶᡳ ᠠᠴᠠᡥᠠᡴᡡ ᠨᡳᠶᠠᠮᠠᠨ ᡥᡡᠨᠴᡳᡥᡳᠨ, ᠪᠣᠣᡳ ᠠᡥᠠ ᠪᡝ ᠪᠣᠣᡩᡝ ᠵᡳᡶᡳ ᡤᡝᠮᡠ ᠪᠠᡳᠴᠠᡶᡳ ᠠᠴᠠᠪᡠᠮᡝ ᠪᡠᡶᡳ,ᡨᡝᡵᡝ ᠪᠣᠣ ᡨᠠᡵᡳᡵᡝ ᡠᠰᡳᠨ ᡨᠠᡴᡡᡵᠠᡵᠠ ᡳᡥᠠᠨ ᠮᠣᡵᡳᠨ, ᠵᡝᡨᡝᡵᡝ ᠵᡝᡴᡠ ᡝᡨᡠᡵᡝ ᡝᡨᡠᡴᡠ, ᡠᠵᡳᡵᡝ ᡠᠵᡳᠮᠠ, ᡨᡝᡨᡠᠨ ᠠᡤᡡᡵᠠ ᠠᡳ ᠠᡳ ᠵᠠᡴᠠ ᠪᡝ ᠶᠣᠣᠨᡳ ᠵᠠᠯᡠᡴᡳᠶᠠᠮᡝ ᠪᡠᡶᡳ, ᡳᠨᡳ ᡩᠠᡳᠮᡳᠩ ᡤᡠᡵᡠᠨ ᡳ ᡴᠣᠣᠯᡳ ᠠᠮᠪᠠ ᠠᠵᡳᡤᠠᠨ ᡥᠠᡶᠠᠨ ᠰᡳᠨᡩᠠᡶᡳ, ᠯᡳᡳ ᠶᡠᠩ ᡶᠠᠩ ᡩᡝ ᠪᡠᡶᡳ ᡴᠠᡩᠠᠯᠠᠪᡠᡥᠠ, ᡥᠠᠨ ᡳᠨᡳ ᠵᡠᡳ ᠠᠪᠠᡨᠠᡳ ᡨᠠᡳᠵᡳ ᡩᡝ ᠪᠠᠨᠵᡳᡥᠠ ᠰᠠᡵᡤᠠᠨ ᠵᡠᡳ ᡤᡝᡤᡝ ᠪᡝ ᠯᡳᡳ ᠶᡠᠩ ᡶᠠᠩ ᡩᡝ ᠰᠠᡵᡤᠠᠨ ᠪᡠᡶᡳ ᠣᠮᠣᠯᠣ ᡥᠣᠵᡳᡥᠣᠨ ᠣᠪᡠᡶᡳ, ᡯᡠᠩ ᠪᡳᠩ ᡤᡠᠸᡝᠨ ᡥᡝᡵᡤᡝᠨ ᠪᡠᡥᡝ.