Ⲡⲁⲡⲁ Ⲡⲉⲧⲣⲟⲥ

Ⲡⲁⲡⲁ Ⲡⲉⲧⲣⲟⲥ

   Ϧⲉⲛ ⲛⲓⲉϩⲟⲟⲩ ⲇⲉ ⲉⲧⲉⲙⲙⲁⲩ ⲛⲉ ⲁϥⲧⲱⲛϥ ⲛ̀ϫⲉ ⲟⲩⲡⲁⲣⲁⲃⲁⲧⲏⲥ ⲉⲡⲉϥⲣⲁⲛ ⲡⲉ Ⲥⲁⲃⲉⲗⲗⲓⲟⲥ ⲉⲁϥⲛⲉϩⲥⲓ ⲛ̀ⲟⲩϩⲉⲣⲉⲥⲓⲥ ⲛ̀ⲁⲑⲛⲟⲩϯ ⲉϥⲱⲣϥ ⲛ̀ϯⲙⲉⲑⲛⲟⲩϯ ⲉϧⲟⲩⲛ ϧⲉⲛ ⲟⲩϩⲩⲡⲟⲥⲧⲁⲥⲓⲥ ⲛ̀ⲟⲩⲱⲧ ⲛⲉⲙ ⲟⲩⲡⲣⲟⲥⲱⲡⲟⲛ ⲛ̀ⲟⲩⲱⲧ ⲉϥϫⲱ ⲙ̀ⲙⲟⲥ ϧⲉⲛ ⲡⲉϥⲣⲱϥ ⲛ̀ϣⲟⲩⲑⲟⲙϥ ϫⲉ ⲫⲓⲱⲧ ⲛ̀ⲑⲟϥ ⲟⲛ ⲡⲉ ⲡϣⲏⲣⲓ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲟⲩϩⲩⲡⲟⲥⲧⲁⲥⲓⲥ ⲛ̀ⲟⲩⲱⲧ ⲧⲉ ⲉⲑⲃⲉ ⲫⲁⲓ ⲣⲱ ⲁϥϩⲟⲛϩⲉⲛ ϧⲉⲛ ⲧⲉϥⲙⲉⲧⲁⲥⲉⲃⲏⲥ ⲉϣⲧⲉⲙϫⲟⲥ ϫⲉ ⲛⲉⲙ ϧⲉⲛ ϯⲧⲣⲓⲁⲥ ⲁⲗⲗⲁ ⲉϫⲟⲥ ⲡⲉϫⲁϥ ϫⲉ ⲫⲓⲱⲧ ⲡϣⲏⲣⲓ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ϩⲱⲥ ϫⲉ ⲟⲩⲁⲓ ⲙ̀ⲡⲟⲥⲱⲡⲟⲛ ⲙ̀ⲙⲁⲩⲁⲧϥ ⲡⲉ.

   Ⲁⲧⲉϥⲡⲗⲁⲛⲏ ⲇⲉ ⲧⲁϩⲉ ϩⲁⲛⲙⲏϣ ϧⲉⲛ ⲧⲁⲓⲡⲟⲗⲓⲥ ⲛⲁⲓ ⲁⲩⲓ̀ ⲛⲉⲙ ⲟⲩⲛⲓϣϯ ⲙ̀ⲙⲉⲧϭⲁⲥⲓϩⲏⲧ ⲉⲫⲣⲟ ⲛ̀ϯⲉⲕⲕⲗⲏⲥⲓⲁ ⲉⲩⲟⲩⲱϣ ⲉϩⲓⲟⲓ ⲟⲩⲟϩ ⲟⲩⲟϩ ⲁⲡⲓⲁⲣⲭⲏⲉⲡⲓⲥⲕⲟⲡⲟⲥ ⲟⲩⲱⲣⲡ ⲙ̀Ⲡⲉⲧⲣⲟⲥ ⲉⲃⲟⲗ ϩⲁⲣⲱⲟⲩ ⲉⲉⲣⲁⲡⲟⲗⲟⲅⲓⲥⲑⲉ ⲛⲱⲟⲩ ⲉⲧⲁϥⲓ̀ ⲇⲉ ⲉⲃⲟⲗ ⲛⲁⲩⲥⲱⲃⲓ ⲙ̀ⲙⲟϥ ⲡⲉ ⲛ̀ϫⲉ ⲡⲓⲁⲥⲉⲃⲏⲥ ⲉⲩϫⲱ ⲙ̀ⲙⲟⲥ ϫⲉ ⲁⲛⲁⲩ ⲙ̀ⲡⲓⲣⲏϯ ⲉⲧⲉⲣⲉ ⲫⲁⲓ ⲓⲣⲓ ⲙ̀ⲙⲟϥ ⲛⲁⲛ ⲟⲩⲙⲟⲛⲟⲛ ϫⲉ ⲙ̀ⲡⲉⲓ̀ ⲉⲃⲟⲗ ⲉⲥⲁϫⲓ ⲛⲉⲙⲁⲛ ⲁⲗⲗⲁ ⲁϥⲉⲣⲡⲕⲟⲩⲱⲣⲡ ⲉⲃⲟⲗ ⲙ̀ⲡⲓⲕⲟⲩϫⲓ ⲉⲧϣⲟϣϥ ⲛ̀ϧⲏⲧⲟⲩ ⲁϥⲉⲣⲟⲩⲱ ⲛ̀ϫⲉ ⲡⲓⲁⲅⲓⲟⲥ Ⲡⲉⲧⲣⲟⲥ ϧⲉⲛ ⲟⲩⲥⲙⲏ ⲙ̀ⲡⲣⲟⲫⲏⲧⲓⲕⲟⲛ ⲡⲉϫⲁϥ ϫⲉ ⲓⲥϫⲉ ⲟⲩⲟⲛ ⲟⲩⲥⲁϫⲓ ϧⲉⲛ ⲣⲱⲧⲉⲛ ⲁϫⲟϥ ⲓⲥϫⲉ ⲇⲉ ⲙ̀ⲙⲟⲛ ⲓⲉ ⲑⲱⲙ ⲛ̀ⲣⲱⲧⲉⲛ ⲉϣⲧⲉⲙϫⲉⲟⲩⲁ.

   Ϧⲉⲛ ϯⲟⲩⲛⲟⲩ ϩⲱⲥ ⲉⲧⲁ ⲟⲩⲕⲉⲣⲁⲩⲛⲟⲥ ⲓⲉϫⲱⲟⲩ ⲁⲣⲱⲟⲩ ⲧⲏⲣⲟⲩ ⲑⲱⲙ ⲁⲡⲟⲩϩⲟ ⲥⲱⲧⲉⲣ ϩⲓⲫⲁϩⲟⲩ ⲙ̀ⲙⲱⲟⲩ ⲁⲩϣⲱⲡⲓ ⲛ̀ϩⲟϯ ⲛ̀ⲟⲩⲟⲛ ⲛⲓⲃⲉⲛ ⲉⲑⲛⲁⲩ ⲉⲣⲱⲟⲩ ⲛⲓⲙⲏϣ ⲇⲉ ⲙ̀ⲡⲓⲥⲧⲟⲥ ⲉⲧⲁⲩⲛⲁⲩ ⲉⲫⲏⲉⲧⲁϥϣⲱⲡⲓ ⲁⲩϩⲓⲧⲟⲩ ⲉⲃⲟⲗϧⲉⲛ ⲧⲡⲟⲗⲓⲥ ⲉⲩϫⲱ ⲙ̀ⲙⲟⲥ ϫⲉ ϩⲓⲟⲩⲓ ⲛ̀ⲛⲁⲓ ⲉⲧϭⲁϧⲉⲙ ⲉⲃⲟⲗ ⲛ̀ϧⲏⲧⲉⲛ ⲛⲟⲩϣⲡ ⲛ̀ⲛⲁⲓⲟⲩⲱⲛϣ ⲉⲃⲟⲗ ϩⲁⲣⲟⲛ ⲧⲟⲧⲉ ⲁⲡⲓⲁⲣⲭⲏⲉⲡⲓⲥⲕⲟⲡⲟⲥ ⲟⲩⲱⲣⲡ ⲛ̀ⲟⲩϩⲟⲣⲟⲥ ⲉⲃⲟⲗ ϧⲉⲛ ⲭⲏⲙⲓ ⲧⲏⲣϥ ϫⲉ ⲫⲏⲉⲑⲛⲁϫⲟⲥ ϫⲉ ⲫⲓⲱⲧ ⲡϣⲏⲣⲓ ⲡⲓⲡⲛⲉⲩⲙⲁ ⲉⲑⲟⲩⲁⲃ ϩⲱⲥ ⲟⲩⲡⲣⲟⲥⲱⲡⲟⲛ ⲛ̀ⲟⲩⲱⲧ ϯⲧⲣⲓⲁⲥ ⲉⲑⲟⲩⲁⲃ ϫⲉ ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡⲉⲛⲩⲙⲁ ⲉⲑⲟⲩⲁⲃ ϥⲟⲓ ⲛ̀ⲁⲛⲁⲑⲉⲙⲁ ⲁⲛⲟⲛ ⲇⲉ ⲧⲉⲛϫⲟⲥ ϫⲉ ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡⲉⲛⲩⲙⲁ ⲉⲑⲟⲩⲁⲃ ⲅ̅ϯ ⲛ̀ⲩⲡⲟⲥⲧⲁⲧⲓⲥ ⲓⲉ ⲙ̀ⲡⲟⲥⲱⲡⲟⲛ ⲟⲩⲙⲉⲑⲛⲟⲩϯ ⲇⲉ ⲛ̀ⲟⲩⲱⲧ ⲟⲩⲟⲩⲥⲓⲁ ⲛ̀ⲟⲩⲱⲧ ⲟⲩⲙⲉⲧϭⲟⲓⲥ ⲛ̀ⲟⲩⲱⲧ ⲟⲩⲧⲣⲓⲁⲥ ⲉⲥϧⲉⲛ ⲟⲩⲙⲉⲧⲟⲩⲁⲓ.Ϧⲉⲛ ⲡϫⲓⲛⲑⲣⲉ ⲡⲓϩⲙⲟⲧ ⲇⲉ ⲛ̀ⲧⲉ Ⲫϯ ϫⲉⲙⲙⲁⲛ̀ⲟⲩⲟϩ ϧⲉⲛ ⲫⲏⲉ̅ⲑ̅ⲩ̅ Ⲡⲉⲧⲣⲟⲥ ⲁϥⲑⲁϩⲙⲉϥ ⲉϩⲣⲏⲓ ϧⲉⲛ ⲛⲓⲃⲁⲑⲙⲟⲥ ϣⲁ ϯⲙⲉⲧⲡⲣⲉⲥⲃⲩⲧⲉⲣⲟⲥ ϩⲓⲧⲉⲛ ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲕⲁⲧⲁ ⲥⲏⲟⲩ ϣⲁ ⲡⲓⲁⲅⲓⲟⲥ Ⲑⲉⲱⲛⲁ ⲫⲏⲉⲧⲁϥϭⲓ ⲛ̀ϯⲙⲉⲧⲁⲣⲭⲏⲉⲡⲓⲥⲕⲟⲡⲟⲥ ⲙⲉⲛⲉⲛⲥⲱϥ ⲱ ⲟⲩⲏⲣ ⲛⲉ ⲛⲓϩⲙⲟⲧ ⲛ̀ⲧⲁⲗϭⲟ ⲉⲧⲁ Ⲫϯ ⲉⲣⲭⲁⲣⲓⲍⲉⲥⲑⲉ ⲙ̀ⲙⲱⲟⲩ ⲛⲁϥ ⲉⲑⲃⲉ ⲡⲧⲟⲩⲃⲟ ⲙ̀ⲡⲉϥⲥⲱⲙⲁ ⲛⲉⲙ ⲧⲉϥⲯⲩⲭⲏ ⲛⲉⲙ ⲡⲉϥⲡ̅ⲛ̅ⲁ̅ ϩⲱⲥⲧⲉ ⲛ̀ⲧⲉϥⲙ̀ⲡϣⲁ ⲛ̀ⲟⲩⲙⲏϣ ⲛ̀ⲥⲟⲡ ⲉⲛⲁⲩ ⲉⲡϣⲏⲣⲓ ⲙ̀Ⲫϯ ⲉⲧⲟⲛϧ ϩⲓϫⲉⲛ ⲡⲓⲙⲁⲛ̀ⲉⲣϣⲱⲟⲩϣⲓ ⲉ̅ⲑ̅ⲩ̅ ⲉϥϯ ⲛ̀ⲛⲏⲉⲧⲉⲙⲡϣⲁ ϧⲉⲛ ⲧϫⲓϫ ⲙ̀ⲡⲓⲁⲣⲭⲏⲉⲡⲓⲥⲕⲟⲡⲟⲥ.

   Ⲁⲥϣⲱⲡⲓ ⲇⲉ ⲛ̀ⲟⲩⲉϩⲟⲟⲩ ⲁϥⲓ̀ ⲛ̀ϫⲉ ⲟⲩⲣⲱⲙⲓ ⲉϭⲓ ⲉⲃⲟⲗϧⲉⲛ ⲛⲓⲙⲩⲥⲧⲏⲣⲓⲟⲛ ⲉ̅ⲑ̅ⲩ̅ ⲛ̀ⲧⲉ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲟⲩⲟϩ ⲉⲧⲁ ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲥⲟⲩⲧⲉⲛ ⲧⲉϥϫⲓϫ ⲉⲃⲟⲗ ⲉϥⲁϯ ⲛⲁϥ ⲥⲁⲧⲟⲧϥ ⲁϥⲛⲁⲩ ⲉⲧϫⲓϫ ⲙ̀ⲡϣⲏⲣⲓ ⲙ̀Ⲫϯ ⲉⲥⲧⲁϩⲛⲟ ⲛ̀ⲧⲉϫⲓϫ ⲉϣⲧⲉⲙϯ ⲛⲁϥ ⲉϥϫⲱ ⲙ̀ⲙⲟⲥ ϫⲉ ⲁⲣⲭⲏⲉⲡⲓⲥⲕⲟⲡⲟⲥ ⲙ̀ⲡⲉⲣϯ ⲛⲁϥ ϥⲉⲙⲡϣⲁ ⲅⲁⲣ ⲁⲛ ⲉϭⲓ ⲉⲃⲟⲗϧⲉⲛ ⲡⲁⲥⲱⲙⲁ ⲉ̅ⲑ̅ⲩ̅ ⲧⲟⲧⲉ ⲡⲉϫⲉ ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲙ̀ⲡⲓⲣⲱⲙⲓ ϫⲉ ⲡⲁϣⲏⲣⲓ ⲙ̀ⲙⲟⲛ ϣϫⲟⲙ ⲙ̀ⲙⲟⲕ ⲉϭⲓ ⲉⲃⲟⲗϧⲉⲛ ⲛⲁⲓⲙⲩⲥⲧⲏⲣⲓⲟⲛ ⲉⲑⲙⲉϩ ⲛ̀ⲉⲛϩⲟⲩⲣ ⲁⲕϣⲧⲉⲙⲧⲟⲩⲃⲟⲕ ⲛ̀ϣⲟⲣⲡ ⲉⲃⲟⲗϧⲉⲛ ⲁϣ ⲛ̀ⲛⲟⲃⲓ ⲛⲉⲙ ⲁϣ ϩⲟⲥⲟⲛ ⲟⲩⲛ ⲁⲪϯ ⲡⲓⲁⲅⲁⲑⲟⲥ ϩⲓⲧⲉⲛ ⲧⲉϥⲙⲉⲧⲙⲁⲓⲣⲱⲙⲓ ⲭⲱ ⲛⲱⲧⲉⲛ ⲛ̀ϯⲙⲉⲧⲁⲛⲟⲓⲁ ⲁⲣⲓⲕⲁⲑⲁⲣⲍⲓⲛ ⲙ̀ⲙⲱⲧⲉⲛ ⲛ̀ϣⲟⲣⲡ ⲙ̀ⲡⲁⲧⲉⲧⲉⲛϯ ⲙ̀ⲡⲉⲧⲉⲛⲟⲩⲟⲓ ⲉⲡⲁⲓⲙⲁ ⲙⲏⲡⲱⲥ ⲛ̀ⲧⲉⲧⲉⲛϭⲓ ⲛ̀ⲟⲩⲛⲓϣϯ ⲛ̀ⲕⲟⲗⲁⲥⲓⲥ ⲉⲫⲙⲁ ⲛ̀ⲟⲩⲭⲱ ⲉⲃⲟⲗ ⲛⲉ ⲙ̀ⲙⲟⲛ ϩⲗⲓ ⲇⲉ ⲡⲉ ⲛⲁⲩ ⲉⲡⲁⲓϭⲱⲣⲡ ⲉⲃⲟⲗ ⲛ̀ϣⲫⲏⲣⲓ ⲉⲃⲏⲗ ⲙ̀ⲡⲁⲓⲁⲣⲭⲏⲉⲡⲓⲥⲕⲟⲡⲟⲥ ⲛⲉⲙ ⲡⲓⲁⲅⲓⲟⲥ Ⲡⲉⲧⲣⲟⲥ ⲙ̀ⲡⲥⲛⲁⲩ.

   Ⲙⲉⲛⲉⲛⲥⲁ ⲛⲁⲓ ⲇⲉ ⲁϥⲉⲣϩⲏⲧⲥ ⲛ̀ϣⲱⲛⲓ ⲛ̀ϫⲉ ⲡⲓⲁⲣⲭⲏⲉⲡⲓⲥⲕⲟⲡⲟⲥ Ⲑⲉⲱⲛⲁ ⲉⲧⲁϥⲛⲟⲩⲓ ⲇⲉ ⲛ̀ⲉⲙⲧⲟⲛ ⲙ̀ⲙⲟϥ ⲙ̀ⲫⲣⲏϯ ⲛ̀ⲣⲱⲙⲓ ⲛⲓⲃⲉⲛ ⲁⲡⲓⲕⲗⲏⲣⲟⲥ ⲧⲏⲣϥ ⲑⲱⲟⲩϯ ⲉⲣⲟϥ ⲛⲉⲙ ϯⲡⲟⲗⲓⲥ ⲧⲏⲣⲥ ⲥⲭⲉⲇⲟⲛ ⲉⲩⲣⲓⲙⲓ ⲉⲩϫⲱ ⲙ̀ⲙⲟⲥ ϫⲉ ⲁⲕϣⲉⲛⲁⲕ ⲉⲑⲱⲛ ⲡⲉⲛⲓⲱⲧ ⲛ̀ⲧⲉⲕⲭⲁⲛ ϧⲉⲛ ⲡⲁⲓⲥⲏⲟⲩ ⲛ̀ⲧⲁⲣⲁⲭⲏ ⲁⲭⲛⲁⲧⲏⲓⲧⲉⲛ ⲉⲧⲟⲧϥ ⲛ̀ⲛⲓⲙ ⲡⲉϫⲁϥ ⲛⲱⲟⲩ ϫⲉ ϫⲉⲙⲛⲟⲙϯ ⲛⲁϣⲏⲣⲓ ⲁⲪϯ ⲅⲁⲣ ⲕⲏⲛ ⲉⲣϣⲟⲣⲡ ⲛ̀ⲥⲱⲧⲡ ⲙ̀ⲫⲏⲉⲑⲛⲁⲁⲙⲟⲛⲓ ⲙ̀ⲙⲱⲧⲉⲛ ⲛ̀ⲕⲁⲗⲱⲥ ⲟⲩⲙⲉⲧⲁⲧϩⲏⲧ ⲙⲉⲛ ⲡⲉ ⲫⲏⲉϯⲛⲁϫⲟϥ ⲟⲙⲱⲥ ⲇⲉ ⲙ̀ⲙⲟⲛ ϣϫⲟⲙ ⲙ̀ⲙⲟⲓ ⲉϩⲟⲡϥ ⲁⲥϣⲱⲡⲓ ⲇⲉ ⲙ̀ⲙⲟⲓ ϧⲉⲛ ⲡⲁⲓⲉϫⲱⲣϩ ⲉⲓⲟⲓ ⲛ̀ϣⲣⲱⲓⲥ ⲉⲑⲃⲉ ⲡⲓϣⲱⲛⲓ ⲟⲩⲟϩ ⲉⲓϣⲧⲏⲟⲩⲧ ⲁⲓⲓⲣⲓ ⲛ̀ϩⲁⲛⲕⲟⲩϫⲓ ⲙ̀ⲯⲁⲗⲙⲟⲥ ⲉⲧⲁⲓϫⲱⲕ ⲇⲉ ⲉⲃⲟⲗ ⲛ̀ϯⲕⲟⲩϫⲓ ⲛ̀ⲥⲩⲛⲁⲝⲓⲥ ⲕⲁⲧⲁ ⲧⲁϫⲟⲙ ⲉⲓⲉⲛⲕⲟⲧ ⲉⲓⲣⲟϫⲡ ϩⲓϫⲉⲛ ⲡⲓϭⲗⲟϫ ⲉⲓⲧⲱⲃϩ ⲙ̀ⲡⲟ̅ⲥ̅ ⲉϩⲣⲏⲓ ⲉϫⲉⲛ ⲡⲉϥⲟϩⲓ ⲉⲑⲣⲉϥⲁⲙⲟⲛⲓ ⲙ̀ⲙⲟϥ ⲥⲁⲧⲟⲧϥ ⲁϥⲟⲩⲟⲛϩϥ ⲉⲣⲟⲓ ⲛ̀ϫⲉ ⲡⲟⲩⲣⲟ ⲡⲟ̅ⲥ̅ ⲛ̀ⲧⲉ ⲡⲱⲟⲩ ⲟⲩⲟϩ ⲡⲉϫⲁϥ ⲛⲏⲓ ϫⲉ ⲭⲉⲣⲉ ⲡⲓⲣⲉϥⲧⲥⲟ ⲛ̀ⲕⲁⲗⲱⲥ ⲛ̀ⲧⲉ ⲛⲓⲕⲏⲡⲟⲥ ⲛ̀ⲗⲟⲅⲓⲕⲟⲛ ⲙⲟⲓ ⲙ̀ⲡⲓⲕⲏⲡⲟⲥ ⲉⲧⲟⲧϥ ⲙ̀Ⲡⲉⲧⲣⲟⲥ ⲡⲓⲡⲣⲉⲥⲃⲩⲧⲉⲣⲟⲥ ⲉⲑⲣⲉϥⲧⲥⲟϥ ⲟⲩⲟϩ ⲁⲙⲟⲩ ⲙ̀ⲧⲟⲛ ⲙ̀ⲙⲟⲕ ϫⲉ ⲛⲉⲙ ⲛⲉⲕⲓⲟϯ. ⲟⲩⲟϩ ⲭⲱ ⲛⲏⲓ ⲉⲃⲟⲗ ⲱ ⲛⲁϣⲏⲣⲓ ⲙ̀ⲙⲉⲛⲣⲓⲧ ϫⲉ ⲁⲓⲉⲣⲁⲧϩⲏⲧ ⲁⲗⲗⲁ ⲙ̀ⲙⲟⲛ ϣϫⲟⲙ ⲙ̀ⲙⲟⲓ ⲉϩⲱⲡ ⲛ̀ⲛⲓⲙⲉⲑⲙⲏⲓ ⲛ̀ⲧⲉ Ⲫϯ ϧⲉⲛ ⲡⲁϩⲏⲧ ⲉⲃⲟⲗϩⲁ ⲧⲉϥⲛⲓϣϯ ⲛ̀ⲥⲩⲛⲁⲅⲱⲅⲏ ⲉⲧⲉ ⲛ̀ⲑⲱⲧⲉⲛ ⲛⲉ ϩⲏⲡⲡⲉ ⲟⲩⲛ ⲙ̀ⲡⲓⲧⲁϩⲟⲛⲟ ⲛ̀ⲛⲁⲥⲫⲟⲧⲟⲩ ⲁⲓϩⲓϣⲉⲛⲛⲟⲩϥⲓ ⲛⲱⲧⲉⲛ ⲛ̀ϯⲙⲉⲑⲙⲏⲓ ⲛ̀ⲧⲉ ⲡⲟ̅ⲥ̅.

   Ⲛ̀ⲑⲱⲟⲩ ⲇⲉ ⲧⲏⲣⲟⲩ ⲁⲩⲱϣ ⲉⲃⲟⲗ ⲉⲩⲥⲟⲡ ⲉⲩϫⲱ ⲙ̀ⲙⲟⲥ ϫⲉ ⲁⲝⲓⲟⲥ ⲁⲝⲓⲟⲥ ⲁⲝⲓⲟⲥ ϫⲉ ϥⲉⲙⲡϣⲁ ϧⲉⲛ ⲟⲩⲙⲉⲑⲙⲏⲓ ⲛ̀ⲧⲁⲝⲓⲥ ⲛ̀ϯⲙⲉⲧⲡⲁⲧⲣⲓⲁⲣⲭⲏⲥ ⲧⲟⲧⲉ ⲡⲉϫⲉ ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲙ̀Ⲡⲉⲧⲣⲟⲥ ϫⲉ ϭⲣⲟ ⲙ̀ⲙⲟⲕ ⲡⲁϣⲏⲣⲓ ⲛ̀ⲧⲉⲕϫⲉⲙⲛⲟⲙϯ ⲛ̀ⲧⲉⲕⲉⲣϩⲱⲃ ⲉⲡⲓⲕⲏⲡⲟⲥ ⲛ̀ⲧⲉ ⲡⲉⲕⲟ̅ⲥ̅ ⲛ̀ⲕⲁⲗⲱⲥ ⲛ̀ⲑⲟϥ ⲇⲉ ⲉⲧⲁϥϩⲓⲧϥ ⲉϫⲉⲛ ⲡⲉϥϩⲟ ⲁϥⲣⲓⲙⲓ ⲉϥϫⲱ ⲙ̀ⲙⲟⲥ ϫⲉ ϯⲙ̀ⲡϣⲁ ⲁⲛ ⲟⲩⲇⲉ ϯⲛⲁϣ̀ⲓ̀ⲣⲓ ⲁⲛ ⲙ̀ⲡⲁⲓⲛⲓϣϯ ⲛ̀ϩⲱⲃ ⲡⲉϫⲉ ⲡⲓⲁⲣⲭⲏⲉⲡⲓⲥⲕⲟⲡⲟⲥ ϫⲉ ⲡⲭ̅ⲥ̅ ⲡⲉ ⲉⲑⲟⲩⲁϩⲥⲁϩⲛⲓ ⲛⲁⲕ ⲙ̀ⲡⲉⲛⲑⲣⲉ ϩⲗⲓ ⲉⲣⲁⲛⲧⲓⲗⲉⲅⲓⲛ ⲫⲏⲉⲧⲁϥⲥⲱⲧⲡ ⲙ̀ⲙⲟⲕ ⲛ̀ⲑⲟϥ ⲉⲑⲛⲁϯϫⲟⲙ ⲛⲁⲕ ⲟⲩⲟϩ ⲛⲁⲓ ⲉⲧⲁϥϫⲟⲧⲧⲟⲩ ⲛ̀ϫⲉ ⲁⲃⲃⲁ Ⲑⲉⲱⲛⲁ ⲡⲉϫⲁϥ ⲛⲱⲟⲩ ϫⲉ ⲧϩⲓⲣⲏⲛⲏ ⲛⲱⲧⲉⲛ ⲧⲏⲣⲟⲩ ⲟⲩⲟϩ ⲉⲧⲁϥⲥⲟⲙⲥ ⲉⲡϣⲱⲓ ⲉⲧⲫⲉ ⲙ̀ⲡⲁⲓⲣⲏϯ ϩⲏⲡⲡⲉ ⲓⲥ ⲡⲟⲩⲣⲟ ⲛ̀ⲧⲉ ⲡⲱⲟⲩ ⲁϥϣⲉⲛⲁϥ ⲛⲉⲙ ⲛⲉϥⲁⲅⲅⲉⲗⲟⲥ ⲉ̅ⲑ̅ⲩ̅ ⲟⲩⲟϩ ⲡⲁⲓⲣⲏϯ ⲁϥϣⲉⲛⲁϥ ϩⲁ ⲫⲏⲉⲧⲁϥⲙⲉⲛⲣⲓⲧϥ ⲡⲉⲛⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲛ̀ⲥⲟⲩⲃ̅ ⲛ̀Ⲧⲱⲃⲓ ϧⲉⲛ ⲟⲩϩⲓⲣⲏⲛⲏ ⲛ̀ⲧⲉ Ⲫϯ ⲁⲙⲏⲛ.

   Ⲙⲉⲛⲉⲛⲥⲁ ⲛⲁⲩ ⲁⲩⲧϩⲉⲙⲥⲟ ⲙ̀ⲡⲓⲁⲅⲓⲟⲥ Ⲡⲉⲧⲣⲟⲥ ϩⲓϫⲉⲛ ⲛ̀ϯⲁⲣⲭⲏⲉⲣⲟⲥⲩⲛⲏ ϩⲓⲧⲉⲛ ϯⲯⲩⲫⲟⲥ ⲛ̀ⲧⲉ Ⲫϯ ⲡⲓⲡⲁⲛⲧⲟⲕⲣⲁⲧⲱⲣ ⲉⲧⲁϥⲁⲙⲟⲛⲓ ⲇⲉ ⲛ̀ⲛⲓϩⲏⲟⲩ ⲛ̀ⲧⲉ ⲡⲓϫⲟⲓ ⲙ̀ⲡ̅ⲛ̅ⲁ̅ⲧⲓⲕⲟⲛ ⲛⲁϥⲑⲣⲉ ⲛ̀ⲛⲏⲉⲣⲣⲁⲗⲏⲟⲩⲧ ⲉⲣⲟϥ ⲉⲣϩⲩⲥⲟⲥ ϧⲉⲛ ⲧⲉϥⲙⲉⲧⲣⲁⲙⲁⲟ ⲛ̀ⲧⲉ Ⲫϯ ⲡⲓⲁⲅⲁⲑⲟⲥ ϧⲉⲛ ⲡϫⲓⲛⲑⲣⲉϥⲥⲱⲕ ⲙ̀ⲙⲱⲟⲩ ⲉϫⲉⲛ ⲛⲓⲗⲩⲙⲏⲛ ⲉⲑⲛⲁⲛⲉⲩ ⲉⲓⲥⲁϫⲓ ⲉⲛⲓⲉⲩⲁⲅⲅⲉⲗⲓⲟⲛ ⲉ̅ⲑ̅ⲩ̅ ⲟⲩⲟϩ ⲛ̀ⲧⲉϥⲑⲣⲟⲩⲉⲣⲓⲉⲃϣⲱⲧ ϧⲉⲛ ⲛⲉϥⲉⲛⲧⲟⲗⲏ ⲉ̅ⲑ̅ⲩ̅ ⲉⲁϥⲑⲣⲉ ⲛⲓϩⲏⲕⲓ ⲉⲣϩⲩⲥⲟⲥ ⲛⲓⲣⲁⲙⲁⲟⲓ ϩⲓⲧⲉⲛ ⲛⲟⲩⲙⲉⲑⲛⲁⲏⲧ ⲟⲩⲟϩ ⲛⲓⲣⲁⲙⲁⲟⲓ ⲁϥⲑⲣⲉⲩϣⲱⲡⲓ ⲉⲩϣⲉⲃⲏⲓⲟⲩⲧ ⲁⲛ ⲉⲛⲓϩⲏⲕⲓ ⲛ̀ϩⲗⲓ ϧⲉⲛ ϩⲱⲃ ⲛⲓⲃⲉⲛ ⲛ̀ⲁⲅⲁⲑⲟⲛ ⲉⲑⲣⲁⲛⲁϥ ⲕⲁⲧⲁ ⲫⲣⲏϯ ⲉⲧⲥϧⲏⲟⲩⲧ.

   Ⲁⲩⲓⲥ ⲟⲩⲛ ⲛ̀ⲧⲉⲛⲧⲁⲙⲱⲧⲉⲛ ⲉⲑⲃⲉ ⲡⲁⲓⲕⲉⲙⲏⲓⲛⲓ ⲛ̀ϣⲏⲫⲓ ⲉⲁϥϣⲱⲡⲓ ⲉⲃⲟⲗ ϩⲓⲧⲟⲧϥ ⲉⲩⲱⲟⲩ ⲙ̀Ⲫϯ. ⲛⲉ ⲟⲩⲟⲛ ⲟⲩⲣⲱⲙⲓ ϧⲉⲛ ϯⲡⲟⲗⲓⲥ ⲉⲣⲉ ⲛⲉϥϫⲓϫ ⲟⲗⲕ ⲙ̀ⲙⲟⲛ ϣϫⲟⲙ ⲙ̀ⲙⲟϥ ⲉⲥⲟⲩⲧⲱⲟⲩⲛⲟⲩ ⲉⲃⲟⲗ ⲉⲡⲧⲏⲣϥ ⲉⲧⲁ ⲟⲩⲥⲩⲛⲁⲝⲓⲥ ⲇⲉ ϣⲱⲡⲓ ⲁϥⲓ̀ ⲉϯⲉⲕⲕⲗⲏⲥⲓⲁ ⲟⲩⲟϩ ⲛⲁϥⲉⲣⲡⲓⲑⲩⲙⲓⲛ ⲡⲉ ⲉϭⲓ ⲉⲃⲟⲗϧⲉⲛ ⲛⲓⲙⲩⲥⲧⲏⲣⲓⲟⲛ ⲉ̅ⲑ̅ⲩ̅ ϧⲉⲛ ⲛⲉⲛϫⲓϫ ⲙ̀ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲟⲩⲟϩ ⲉⲑⲃⲉ ϫⲉ ⲛⲉϥϫⲓϫ ⲟⲗⲕ ⲁϥⲥⲟⲩⲧⲱⲛ ⲛ̀ⲣⲱϥ ⲉϧⲟⲩⲛ ⲉϭⲓ ⲡⲉϫⲉ ⲡⲓⲁⲣⲭⲏⲉⲡⲓⲥⲕⲟⲡⲟⲥ ⲛⲁϥ ϫⲉ ⲡⲁϣⲏⲣⲓ ⲥⲟⲩⲧⲱⲛ ⲛ̀ⲛⲉⲕϫⲓϫ ⲉⲃⲟⲗ ϣⲓ ⲛⲁⲕ ⲥⲁⲧⲟⲧϥ ⲁⲛⲉϥϫⲓϫ ⲥⲱⲟⲩⲧⲉⲛ ⲟⲩⲟϩ ⲉⲧⲁϥⲥⲟⲩⲧⲱⲟⲩⲛⲟⲩ ⲉⲃⲟⲗ ⲁϥϭⲓ ⲉⲃⲟⲗϧⲉⲛ ⲛⲓⲙⲩⲥⲧⲏⲣⲓⲟⲛ ⲉ̅ⲑ̅ⲩ̅ ⲁϥϯⲱⲟⲩ ⲙ̀Ⲫϯ ⲟⲩⲟϩ ⲡⲓⲗⲁⲟⲥ ⲧⲏⲣϥ ⲉⲧⲁϥⲛⲁⲩ ⲁⲩⲉⲣϣⲫⲏⲣⲓ ⲟⲩⲟϩ ⲛⲁⲩϯⲱⲟⲩ ⲙ̀Ⲫϯ.

   Ⲉⲧⲓ ⲇⲉ ⲉⲛϣⲟⲡ ϧⲉⲛ ⲟⲩϩⲓⲣⲏⲛⲏ ⲟⲩⲟϩ ⲉⲣⲉ ⲛⲓ ⲉⲣⲡⲁⲣⲏⲥⲓⲁⲥⲑⲉ ⲛ̀ⲟⲩⲕⲟⲩϫⲓ ⲙ̀ⲡⲓⲇⲓⲁⲃⲟⲗⲟⲥ ϣϥⲁⲓ ⲉⲣⲟϥ ⲁϥⲧⲟⲩⲛⲟⲥ ⲟⲩⲇⲓⲱⲅⲙⲟⲥ ⲉϥϩⲟⲣϣ ⲉϫⲱⲛ ϩⲓⲧⲉⲛ ⲡⲓⲟⲩⲣⲟ ⲛ̀ⲁⲥⲉⲃⲏⲥ Ⲇⲓⲟⲕⲗⲏⲧⲓⲁⲛⲟⲥ ⲉⲁϥⲫⲱⲛ ⲛ̀ⲟⲩⲙⲏϣ ⲛ̀ⲥⲛⲟϥ ⲉⲃⲟⲗ ⲉⲑⲃⲉ ⲫⲣⲁⲛ ⲙ̀ⲡⲭ̅ⲥ̅ ϧⲉⲛ ϯⲀⲫⲓⲕⲏ ⲛⲉⲙ ϯⲘⲁⲩⲣⲓⲧⲟⲛⲓⲁ ⲛⲉⲙ ⲭⲏⲙⲓ ⲛⲉⲙ ϯⲀⲛⲧⲟⲗⲏ ϩⲓⲧⲉⲛ ⲧⲁⲓⲗⲱⲓϫⲓ ⲟⲩⲛ ⲁⲡⲓⲁⲅⲓⲟⲥ Ⲡⲧⲉⲣⲟⲥ ⲫⲱⲧ ⲉϯⲙⲉⲥⲟⲡⲟⲧⲁⲙⲓⲁ ⲉⲓⲛⲉⲙⲁϥ ⲛⲉⲙ ⲡⲁⲓⲱⲧ Ⲁⲭⲓⲗⲗⲁ ⲉⲧⲁⲛϣⲉ ⲇⲉ ⲉⲟⲩⲡⲟⲗⲓⲥ ϫⲉ ⲛ̀ⲧⲉⲛⲟϩⲓ ⲛ̀ϧⲏⲧⲥ ⲁϥⲉⲙⲓ ⲛ̀ϫⲉ ⲡⲓⲁⲣⲭⲱⲛ ⲉⲧⲁϥⲟⲩⲱⲣⲡ ⲇⲉ ⲛ̀ⲥⲱⲛ ⲁϥϣⲉⲛ ⲡⲓⲁⲣⲭⲏⲉⲡⲓⲥⲕⲟⲡⲟⲥ ϫⲉ ⲟⲩⲧⲉ ⲧⲉⲕⲧⲉⲭⲛⲏ ⲓⲉ ⲉⲧⲁⲕⲓ ⲉⲡⲁⲓⲙⲁ ⲉⲑⲃⲉ ⲟⲩ ⲡⲉϫⲉ ⲡⲓⲁⲅⲓⲟⲥ Ⲡⲉⲧⲣⲟⲥ ⲛⲁϥ ϫⲉ ⲁⲛⲟⲕ ⲟⲩⲥⲧⲣⲁⲧⲏⲅⲟⲥ ⲉⲓⲙⲟϣⲓ ⲕⲁⲧⲁ ⲙⲁ ⲉⲓϧⲉⲕ ⲙⲁⲧⲟⲓ ϧⲁⲣⲁⲧϥ ⲙ̀ⲡⲁⲟⲩⲣⲟ ⲡⲓⲭⲣⲓⲧⲟⲥ ⲡⲉϫⲉ ⲡⲓⲁⲣⲭⲓⲱⲛ ⲛⲉⲙ ⲛⲓϩⲟⲡⲗⲟⲛ ⲛ̀ⲧⲉ ⲧⲉⲕⲙⲉⲧⲙⲁⲧⲟⲓ ⲓⲉ ⲡⲉⲕⲟⲩⲣⲟ.

   Ⲡⲉϫⲉ ⲡⲓⲙⲁⲕⲁⲣⲓⲟⲥ ⲛ̀ⲁⲣⲭⲏⲉⲡⲓⲥⲕⲟⲡⲟⲥ ⲛⲁϥ ϫⲉ ⲛⲓϩⲟⲡⲗⲟⲛ ⲛ̀ⲧⲉ ⲧⲉⲛⲙⲉⲧⲙⲁⲧⲟⲓ ϯⲥⲫⲣⲁⲅⲓⲥ ⲉ̅ⲑ̅ⲩ̅ ⲧⲉ ⲛⲉⲙ ⲡⲓⲱⲙⲥ ⲛ̀ⲧⲉ ⲡⲓⲟⲩⲁϩⲙⲙⲓⲥⲓ ⲟⲩⲟϩ ⲛⲓⲁⲛⲛⲱⲛⲁ ⲉⲧⲉϥϯ ⲙ̀ⲙⲱⲟⲩ ⲛⲱⲟⲩ ϯⲛⲟⲩ ⲛⲉ ⲫⲟⲩⲱⲛϩ ⲉⲃⲟⲗ ⲛ̀ⲧⲉ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲕⲁⲧⲁ ⲡⲉⲧⲉⲣⲛⲟϥⲣⲓ ⲛ̀ⲛⲓⲣⲱⲙⲓ ⲟⲩⲁⲓ ⲙⲉⲛ ⲛ̀ⲟⲩⲥⲁϫⲓ ⲛ̀ⲥⲟⲫⲓⲁ ⲕⲉⲟⲩⲁⲓ ⲇⲉ ⲟⲩⲥⲁϫⲓ ⲛ̀ⲉⲙⲓ ⲕⲉⲟⲩⲁⲓ ⲇⲉ ⲛ̀ϩⲁⲛϩⲙⲟⲧ ⲛ̀ⲧⲁⲗϭⲟ ϩⲟⲧⲁⲛ ⲇⲉ ⲁⲩϣⲁⲛϫⲱⲕ ⲙ̀ⲡⲟⲩⲁⲅⲱⲛ ⲉⲃⲟⲗ ⲧⲟⲧⲉ ϣⲁϥϯ ⲛⲱⲟⲩ ⲛ̀ⲛⲓⲁⲅⲁⲑⲟⲛ ⲛ̀ⲧⲉ ⲧⲫⲉ ϫⲉ ⲟⲩⲏⲓ ⲅⲁⲣ ⲛ̀ⲑⲟϥ ϩⲱϥ ⲡⲁⲟⲩⲣⲟ ⲁϥϧⲉⲛ ⲧⲫⲉ ⲡⲉϫⲉ ⲡⲓⲁⲣⲭⲱⲛ ⲛⲉⲙ ⲛⲁϯⲡⲟⲗⲓⲥ ⲧⲏⲣⲟⲩ ϫⲉ ⲉⲡⲓⲇⲏ ⲁⲕϫⲟⲥ ϫⲉ ⲡⲉⲕⲟⲩⲣⲟ ϥϯ ⲛ̀ϩⲁⲛϩⲙⲟⲧ ⲛ̀ⲧⲁⲗϭⲟ ϩⲏⲡⲡⲉ ⲧⲉⲛⲛⲁⲓ̀ⲛⲓ ⲛⲁⲕ ⲛ̀ⲟⲩⲃⲉⲗⲗⲉ ⲉϣⲱⲡ ⲛ̀ⲧⲉⲕⲁⲟⲩⲱⲛ ⲛ̀ⲛⲉϥⲃⲁⲗ ⲧⲉⲛⲛⲁⲛⲁϩϯ ⲉⲡⲭ̅ⲥ̅ ⲧⲏⲣⲉⲛ ⲟⲩⲟϩ ⲁⲩⲓⲛⲓ ⲙ̀ⲡⲓⲃⲉⲗⲗⲉ ⲧⲟⲧⲉ ⲡⲓⲁⲅⲓⲟⲥ Ⲡⲧⲉⲣⲟⲥ ⲁϥϭⲓ ⲛⲉⲙ ⲛⲉϥⲃⲁⲗ ⲉϥϫⲱ ⲙ̀ⲙⲟⲥ ϫⲉ ϧⲉⲛ ⲫ̀ⲣⲁⲛ ⲙ̀ⲡⲁⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲡϣⲏⲣⲓ ⲙ̀Ⲫϯ ⲉⲧⲟⲛϧ ⲁⲛⲁⲩ ⲙ̀ⲃⲟⲗ. ⲁⲩⲟⲩⲱⲛ ⲛ̀ϫⲉ ⲛⲉϥⲃⲁⲗ ⲱ ⲟⲩⲏⲣ ⲛⲉ ⲛⲓϧⲣⲱⲟⲩ ⲉⲧⲁⲩϣⲱⲡⲓ ⲙ̀ⲡⲓⲙⲁ ⲉⲧⲉⲙⲙⲁⲩ ⲉⲩⲱϣ ⲉⲃⲟⲗ ⲧⲏⲣⲟⲩ ϫⲉ ⲟⲩⲁⲓ ⲡⲉ Ⲡⲭ̅ⲥ̅ ϧⲟⲕⲧⲉⲛ ⲙ̀ⲙⲁⲧⲟⲓ ϧⲁⲣⲁⲧϥ ⲙ̀ⲡⲁⲓⲟⲩⲣⲟ ⲛ̀ⲁⲗⲏⲑⲓⲛⲟⲥ Ⲓⲏ̅ⲥ̅ Ⲡⲭ̅ⲥ̅ ⲡⲉⲛⲟ̅ⲥ̅ ⲟⲩⲟϩ ⲉⲧⲁϥⲉⲣ ⲡⲥⲱϫⲡ ⲙ̀ⲡⲓⲉϩⲟⲟⲩ ⲉⲧⲉⲙⲙⲁⲩ ⲉϥⲉⲣⲕⲁⲑⲏⲕⲓⲛ ⲙ̀ⲙⲱⲟⲩ ⲧⲏⲣⲟⲩⲉ ⲫⲣⲁⲛ ⲙ̀ⲫⲓⲱⲧ ⲛⲉⲙ ⲡϣⲏⲣⲓ ⲛⲉⲙ ⲡⲓⲡ̅ⲛ̅ⲁ̅ ⲉ̅ⲑ̅ⲩ̅ ⲉⲩⲓⲣⲓ ⲛ̀ϩⲁⲛⲑⲃⲁ ⲙ̀ⲯⲩⲭⲏ.

   Ⲉⲧⲓ ⲇⲉ ⲉⲛⲭⲏ ϧⲉⲛ ⲡⲓⲙⲁ ⲉⲧⲉⲙⲙⲁⲩ ⲁⲡⲥⲁⲧⲁⲛⲁⲥ ⲧⲟⲩⲛⲟⲥ ⲕⲉⲕⲟⲩϫⲓ ⲛ̀ϣⲑⲟⲣⲧⲉⲣ ⲉϫⲉⲛ ϯⲉⲕⲕⲗⲏⲥⲓⲁ ⲟⲩⲁⲓ ⲅⲁⲣ ϫⲉ ⲙⲉⲗⲓⲥⲧⲟⲥ ⲟⲩⲉⲡⲓⲥⲕⲟⲡⲟⲥ ⲛ̀ⲧⲉ Ⲥⲓⲱⲟⲩⲧ ⲁϥⲉⲣⲡⲓⲑⲩⲙⲓⲛ ⲉϭⲓ ⲛ̀ϯⲙⲉⲧⲁⲣⲭⲏⲉⲡⲓⲥⲕⲟⲡⲟⲥ ⲉⲧⲁϥϫⲉⲙ ϯⲉⲩⲕⲉⲣⲓⲁ ⲇⲉ ⲉⲣⲉ ⲁⲃⲃⲁ Ⲡⲉⲧⲣⲟⲥ ⲫⲏⲧ ⲁϥϣⲉⲛⲁϥ ⲉϧⲟⲩⲛ ⲉⲢⲁⲕⲟϯ ⲁϥϩⲉⲙⲥⲓ ϩⲓϫⲉⲛ ⲡⲓⲑⲣⲟⲛⲟⲥ ⲉⲁϥⲉⲣⲧⲟⲗⲙⲁⲛ ⲁϥⲓⲣⲓ ⲙ̀ⲡⲁⲓⲙⲉⲣⲟⲥ ⲛ̀ⲡⲁⲣⲁⲛⲟⲙⲟⲛ ϧⲉⲛ ⲟⲩⲙⲉⲧⲁⲧϣⲓⲛⲓ ⲁⲗⲗⲁ ⲁⲪϯ ϫⲟⲥ ⲛⲁϥ ϫⲉ ⲛ̀ⲛⲉ ⲧⲟⲓ ϣⲱⲡⲓ ⲛⲁⲕ ⲟⲩⲇⲉ ⲕⲗⲏⲣⲟⲥ ϧⲉⲛ ⲡⲁⲓϩⲱⲃ ⲟⲩⲟϩ ⲟⲛ ϫⲉ ϯⲛⲁϩⲓⲟⲩⲓ ⲛ̀ⲟⲩⲭⲁⲗⲏⲛⲟⲩⲥ ⲉⲣⲱⲕ ⲛ̀ⲧⲁⲥⲱϫⲡ ⲙ̀ⲡⲉⲕϣⲁⲓ ϧⲉⲛ ⲟⲩⲁⲗⲁⲕ ⲛ̀ⲧⲁⲧⲁⲥⲑⲟⲕ ⲉⲃⲟⲗ ϩⲁ ⲡⲁⲓⲙⲱⲓⲧ ⲉⲧⲁⲕⲉⲣⲡⲓⲑⲩⲙⲓⲛ ⲉⲣⲟϥ ⲙⲁⲗⲗⲟⲛ ⲇⲉ ⲡⲓⲕⲉⲟⲩⲁⲓ ⲉⲧⲉⲛⲧⲟⲧⲕ ⲛ̀ⲧⲁⲗⲟϥ ⲛ̀ⲧⲟⲧⲕ ⲟⲩⲟϩ ⲫⲁⲓ ⲁϥϣⲱⲡⲓ. ϧⲉⲛ ⲡϫⲓⲛⲑⲣⲉ ⲟⲩⲕⲟⲩϫⲓ ⲅⲁⲣ ⲛ̀ϩⲓⲣⲏⲛⲏ ϣⲱⲡⲓ ⲁⲡⲓⲁⲅⲓⲟⲥ Ⲡⲉⲧⲣⲟⲥ ⲕⲟⲧϥ ⲉⲢⲁⲕⲟϯ ⲁϥϣⲟⲣϣⲉⲣ ⲙ̀Ⲙⲉⲗⲓⲧⲓⲟⲥ ⲉⲧⲁϥⲫⲱⲧ ⲇⲉ ⲛ̀ϫⲉ ⲡⲓⲃⲓⲏⲛ ⲉⲧⲉⲙⲙⲁⲩ ⲁϥⲓⲣⲓ ⲛ̀ϩⲁⲛϩⲃⲏⲟⲩⲓ ⲡⲁⲣⲁ ⲡⲓⲕⲁⲛⲱⲛ ⲁⲗⲗⲁ ⲥⲁⲧⲟⲧϥ ⲁϥϭⲓ ⲛ̀ⲟⲩⲥⲟϩⲓ ⲛ̀ⲧⲉ ⲧⲉϥⲙⲉⲧⲡⲁⲣⲁⲛⲟⲙⲟⲥ ⲕⲁⲧⲁ ⲫⲣⲏϯ ⲉⲧⲉⲧⲉⲛⲙⲉⲓ.

   Ⲡⲁⲓⲕⲉⲟⲩⲁⲓ ⲇⲉ ⲟⲛ ϫⲉ Ⲁⲣⲓⲟⲥ ⲟⲩⲡⲣⲉⲥⲃⲩⲧⲉⲣⲟⲥ ⲡⲉ ⲉⲃⲟⲗϧⲉⲛ ⲡⲕⲗⲏⲣⲟⲥ ⲛ̀ⲧⲁⲓⲡⲟⲗⲓⲥ. ⲡⲁⲓϣⲟⲩⲙⲉⲥⲧⲱϥ ⲉⲧϯϧⲓⲥⲓ ⲛⲁⲛ ϯⲛⲟⲩ ⲧⲉⲧⲉⲛⲙⲉⲓ ⲉⲡⲓⲣⲏϯ ⲉⲧⲁϥϯ ⲟⲩⲃⲉ Ⲫϯ ϧⲉⲛ ⲟⲩⲟⲩⲱⲛϩ ⲉⲃⲟⲗ ⲉⲁϥⲥⲱⲣⲉⲙ ϧⲉⲛ ⲧⲡⲗⲁⲛⲏ ⲛ̀ⲱⲣⲓⲅⲉⲛⲏⲥ ⲉϥϫⲱ ⲙ̀ⲙⲟⲥ ϧⲉⲛ ⲡⲉϥⲣⲱϥ ⲛ̀ϣⲟⲩⲑⲟⲙϥ ϫⲉ ⲡϣⲏⲣⲓ ⲙ̀Ⲫϯ ⲟⲩⲥⲱⲛⲧ ⲡⲉ ⲕⲁⲛ ⲟⲩⲛ ⲁⲓϣⲧⲉⲙⲕⲏⲛ ⲉϫⲟⲥ ⲡⲉⲧⲉⲛϩⲟⲩⲟ ⲥⲱⲟⲩⲛ ⲙ̀ⲡⲓⲣⲏϯ ⲉⲧⲁ ⲡⲉⲛⲓⲱⲧ Ⲡⲉⲧⲣⲟⲥ ϣⲁⲧϥ ⲉⲃⲟⲗ ⲙⲁⲗⲗⲟⲛ ⲇⲉ ⲡϣⲏⲣⲓ ⲙ̀Ⲫϯ ⲉⲧⲟⲛϧ ⲉⲁϥⲟⲩⲟⲛϩϥ ⲉⲣⲟϥ ⲁϥϫⲟⲥ ⲛⲁϥ ϫⲉ ϩⲟⲛϩⲉⲛ ⲉⲧⲟⲧⲟⲩ ⲛ̀ⲛⲉⲕϣⲏⲣⲓ ⲉⲑⲛⲏⲟⲩ ⲙⲉⲛⲉⲛⲥⲱⲕ ⲉⲧⲉ Ⲁⲭⲓⲗⲗⲁⲥ ⲡⲉ ⲛⲉⲙ ⲁⲛⲟⲕ ϧⲁ ⲡⲓⲁⲧⲉⲙⲡϣⲁ ϫⲉ ϩⲓⲛⲁ ⲡⲉϫⲁϥ ⲛ̀ϫⲉ ⲡⲟ̅ⲥ̅ Ⲓⲏ̅ⲥ̅ Ⲡⲭ̅ⲥ̅ ⲛ̀ⲧⲟⲩϣⲧⲉⲙϣⲟⲡϥ ⲉϧⲟⲩⲛ ϫⲉ ϥ̀ⲟⲓ ⲙ̀ϣⲉⲙⲙⲓ ⲉⲣⲟⲓ ϧⲉⲛ ⲡⲁⲓⲉⲱⲛ ⲛⲉⲙ ⲡⲉⲑⲛⲏⲟⲩ.

   Ⲛⲁⲓ ⲁϥϫⲟⲧⲟⲩ ⲛ̀ϫⲉ ⲡⲉⲛⲁⲅⲓⲱⲧⲁⲧⲟⲥ ⲛ̀ⲓⲱⲧ ⲉϥⲭⲏ ϧⲉⲛ ⲡⲓϣⲧⲉⲕⲟ ⲉⲑⲃⲉ ϯⲙⲉⲧ⳥ ⲉ̅ⲑ̅ⲩ̅ ⲉⲧⲁϥϫⲱⲕ ⲅⲁⲣ ⲙ̀ⲡⲉϥⲇⲣⲟⲙⲟⲥ ⲉⲃⲟⲗ ⲟⲩⲟϩ ⲁϥⲁⲣⲉϩ ⲉⲡⲓⲛⲁϩϯ ⲛ̀ⲟⲣⲑⲟⲇⲟⲝⲟⲥ ⲗⲟⲓⲡⲟⲛ ⲁⲪϯ ⲡⲓⲁⲅⲁⲑⲟⲥ ⲟⲩⲱϣ ⲉϯ ⲉϫⲱϥ ⲛ̀ⲕⲉⲭⲗⲟⲙ ⲙ̀ⲙⲁϩⲅ̅ ⲉϫⲉⲛ ⲫⲁ ⲧⲉϥⲡⲟⲗⲏⲧⲓⲁ ⲛ̀ⲁⲅⲅⲉⲗⲓⲕⲟⲛ ⲛⲉⲙ ⲫⲁ ϯⲙⲉⲧⲁⲣⲭⲓⲉⲣⲉⲩⲥ ⲉⲧⲉ ⲫⲁ ϯⲙⲉⲧ⳥ ⲡⲉ ⲟⲩⲟϩ ⲫⲁⲓ ⲁϥⲙ̀ⲡϣⲁ ⲙ̀ⲙⲟϥ ⲕⲁⲧⲁⲫⲣⲏϯ ⲉⲧⲉⲧⲉⲛⲥⲱⲟⲩⲛ ⲉⲑⲃⲉ ϯⲉⲧⲓⲁ ⲇⲉ ⲉⲧⲁϥⲉⲣ⳥ ⲉⲑⲃⲏⲧⲥ ⲛⲉⲙ ⲡⲓⲣⲏϯ ⲉⲧⲁϥϩⲟⲛϩⲉⲛ ⲉⲧⲟⲧⲉⲛ ⲉⲑⲃⲉ Ⲁⲣⲓⲟⲥ ⲫⲁⲓ ⲉⲑⲗⲟⲃⲓ ⲛⲉⲙ ⲡⲓⲣⲏϯ ⲉⲧⲁ ⲫⲏⲉ̅ⲑ̅ⲩ̅ Ⲡⲉⲧⲣⲟⲥ ⲧⲏⲓϥ ⲉϥⲙⲟⲩ ϧⲉⲛ ⲡⲉϥⲟⲩⲱϣ ⲙ̀ⲙⲓⲛ ⲙ̀ⲙⲟϥ ϧⲁ Ⲡⲭ̅ⲥ̅ ⲧⲉⲧⲉⲛⲥⲱⲟⲩⲛ ⲙ̀ⲙⲱⲟⲩ ⲧⲏⲣⲟⲩ ⲉⲩⲥϧⲏⲟⲩⲧ ϧⲉⲛ ⲡⲉϥⲙⲁⲣⲧⲩⲣⲟⲗⲟⲅⲓⲟⲛ.