მახა, მა სქანოთ კირიბი ვორდა

by ლადი გაგუა

მახა, მა სქანოთ კირიბი ვორდა,
ირ გაჭირებას გალუაფარი,
მახა, მა სქანოთ სანთელი ვორდა,
ხატიშ წოხოლე ონდღულაფარი!
სი ორდი ვარდი უგუუფაჩუ,
ვორდი მობირე მა მაფშალია,
გუგაღურჭული, გუგოპუაპე,
შურით ქოგინთხე მა, მახარია!
ენა მუჭოთი თაში ორდუნი,
ვფიქრენქ, ვა თქუე სითი ვარია;
მაფშალიაშოთ გოფაჩირიში
ვარდიში მინჯე რდასო კვარია?!
ენა სი მუშენ ვა გიჩქუ
აკაბუცხა, აკა წილი,
კოჩიშ გური ჭირქა ორე,
დუდშა წყარით ეფშაფილი.
ექ შხვა მუთუნ ვენინტირე,
უკული ინოჸოთამილი,
თეშ კოჩიშ გურს ვე დჷლენტირე,
მახა, ბრელი ჸოროფილი.
ნიტე ლები ქოპუასი,
სქან ლოგინს ქეგლმოფინასი,
ეგებ ქუგომფუჩონუე
დოჯირა დო ედგინასი!
ჸუჯიშ-ბალიშ ქოპუასი,
ვარდიშ პირეფითი ეფშა,
ირი სქანი დოჯირასი
სერით ქედჷშვუოლუქ ხეშა.