*მუჟამც ჩქიმ ოთხირე
მუჟამც ჩქიმ ოთხირე წვანე კაბას ქიგნიქუნანს დო
ჸუმურიშ ჯა ჩეთ გოფირფიშელი,
შქას მოჭყუდშორო ქაშაფიორუნ,
მუჟამც შურქანქალა, ჭიი-ჭიე წიწილეფი
მოჭვას ქათატყობუნა ჟიგინოფურინელ ქირიშ შქურინითინ,
მუჟამც წყურგილეშ შქაგურშე ერღვაფილ ქვიშას
ორქოშფერ ჩხორიეფ რწკინუას ქუდაჭყაფუანსინ,
ბგინაფულე აფუნიშ სიხანგეს, ჩქიმ გურს ინმოდირთუნ დო
ხიოლიშ კონკას ამუორექ ჩედღალაფირი...
გოლენფერელ ცას ექი-აქო მიკოსქილადირ მუნაფეფს
თოლეფს ვოჸუნუანქ,
ითამ ჩქიმ ულირ წანეფ მიკომირღვაფუდას
გურუგუჯარჯუო სოდგარენ დო იმნაკვერუანდე ასენ.
მუჟამც ფსკა ატამაშ პეულეფშე ეშაღალირ ტვერით
დიხარგუ დო ხასლას გომორძგუაშ რაგადით ალამილუანსინ,
სი გუმაშინექ ხათე, სტუდენტობას ჸოროფათ ეფშაფილ
შურიშ სარძღო გილაიღუდ ჩქიმდან დო
მუჭოთ პირელს ესხერეფი,
ართიანს ვავოთხუდით უკულინ...
მუ ჰამო რე აფუნი, გიშაკერზაფილო ასე,
ეჩდომაბრუოშა აკოხვალამირი...