*სისმარი რდჷ
სისმარი რდჷ დო ვარ ცხადინ,
საფარსაკო ბძირი ღუმა,
წყარმალს მეურულუაფუდ
ტყაშმაფაში ბეჭილ თუმა.
მიშაბორკილ თეშ ვორდ თონწყუს,
მუქ მოხვადჷნ, ვაგუბჩ გური,
თუთაშ ქართაქ თოლეფ გონწყუ,
წყარს მეჸუნდჷ ჩილამური.
სო რდჷ მაქჷ აკა შარა,
ამდღათ ვა მიჩქ ათეშ ზეკი,
შარას გჷმე გებპუნდ, მარა
მივოჩაჩანდ იშენთ ეკი.
ანთხებულქჷ გებსორ მალას
(მაცალარი ნარღიშ მი რე?)
რინა ართშახ მჷკნათვალა,
მაჟირაშა ვამმათირე.
დო ვა მიჩქჷ, ანწი მუჭო,
მუ მოხვადჷ ამდღა-ჭუმე,
თე ჸოროფაშ სალამუსო
ჩქიმდა მითინც ვა მაჯუმე.
...ათაშ გილებშ, უჸვაიჭარეს
უმენდობა ბთხოზჷდ კონი,
თანდჷდ, ჩქიმი სერდაშ კარეს
მიკმარზანდჷ იალონი.
2014წ. გჷმათუთა