*სი ჩეგემცალო მიზინდუა
სი ჩეგემცალო მიზინდუა ტომბა ქვინჯიშა,
გარამეფიშე მოფთხოზჷნა უჩა დღალეფი,
წირფე, კირიბიშ ზისხირცალო, დაჩხირ-ალეფი
დო ჩქით მაფჷნა გჷნარზეფი ანდა ღვინჯიშა.
უკულჲ დორია ვამუჩი დო რინა დონწერი,
იბორბონჩჷდჷ დიხაუჩა, არძა აკანი,
მუ რე, თე შური ირიათონც ქიმკაღვანკანი,
ვარა კუნთხუსჷ ქიმკათანი, მუჭოთ ნოწკერი.
გეწკვაწკვალანა ლაწკარეფი, ლერსჲშე რტებული,
ნოფა თართალანც, მორო, ირო მუჭოთ უალე,
უსქანობათჷ ვავორექო აბორჯებული?
მუზმა დღა რე დო მუზმა წანა ომორგუალე.
ციზაფო მორთი, ქიმგმოჭვემე სქანი თოლეფი,
ტანც აფუნცალო ქიგენდღული, ფსუა ვაფაჩა,
თე ჩილამური სოთინ ვარე მჷკნახოლეფი,
ვართ ეკოთანა მიძიცანა, მუჭოთ ფაფაჩა
დო ორუმეშე ისერჷნა კონდიდ-გოლეფი.
ბჟაშ კანთი, იშენთ, გაბჟინუანც გურიშ ნაფულეს,
ჸათე ბორჯის დო უჩქიმობას ტყურათ მენდური,
არძა ნახანდი ქიმთვოქოსი უჩა საფულეს
დო ცაშ გონწყჷმას მივაჯინექ, სქანი მენდული.