*ჭიი-ჭიეთ ილიებუქ
ჭიი-ჭიეთ ილიებუქ, მიკმოდინუქ,
კალეფცალო ელმაიცენს რსხულშე წანეფ…
ცას ხირიტუ, ხიბას ონჯა, მინი მინმურქ,
ვამიჩქ აკა, თექ მის აფუქ ეშნაჭანეფ.
აქ დორინიშ მოიჭკომუ ფარან, შვანი,
სანდრაკიაშორო მუთა ძივთი გერძუ.
ართ შურ გიხე, ჩოლერ გური გეიფშანი,
სქან ნარკვანიშ ჭირნაფაშა მუთა მეძუ.
ელე მეურქ, იქექებუ დიხაუჩა,
ნაბოტკინა თუთას თოლეფ დოშინაფუ,
თუდონეფიშ ეკოკიჟინს გურს ვა უჩა,
ითამ ორდე უშურგურე, უგინაფუ.
სარკო, კოჩის ქუგოკონდა, სქან მოულა!
მოჭვა ქოთომს ათნახუნეფ ჭყორი ჸოფექ.
სქან მუკნაღელს ვაჭარაფუ თაქ მოულა,
წირდე შური აკოიწიკ ბრელშა ქოფექ!
ჭიი-ჭიეთ მიკმივალუქ, მიკმოდინუქ,
კალეფცალო ეშმაიცენს ტანშე წანეფ…
ცას ხირიტუ, მუკმანჯა დო მინი მინმურქ -
თექ აფუდე ითამ მითინს მინნაჭანეფ!