***სქან ძირაფა
სქან ძირაფა ვარე ეფი,
გურსუ მონტუ დარანა,
ქაბერზანი ერემეფი
ხვალე გილაღვარანა.
ჩქიმ გურიში კარეფ განჯი,
ითამ დინწყუ ქიანაქ,
"ვაგიღუნო შურიშ სვანჯი"?
მენწარეფი რკიანა.
მიჩქუ, მიჩქუ ვარექ ეფი,
წამეფ შურსუ ღაფუნა,
კიაპელი თორუჯეფი
წყარშე ეშმასხაპუნა.
ფირქიქ უმუსვანჯებუქ,
ღურუს ოკო აკათას,
ჭველას ლანდი ონძალუ დო
თუთა გიოთაკარანს.
უკვირდე რე არძა ჭუა,
წანეფქ იშენთ მორჯგინეს,
ლიარიშა მიზინდუანს
მაჟამარალ ორინჯე.
ცოდა ართო იკათუ დო
ტყა ულუანს ნაკარუს,
რინაქ ხოლო მიკმართუ დო
დიხას ქიმთმოჭაბარუ.