* მუჟას მუზაში ჯა ჩანსჷნ
მუჟას მუზაში ჯა ჩანსჷნ,
არქა, მითინქ ვამკვათას,
ქუვოჸოთანქ ღორღონჯიშ
ქექე ფსუაშ ლაკვატას.
აკოქარგუნს ბაია
ოხაჩქუეშ ლაკადას,
ინგჷრიშ ღალ ქაგურუ
ფიროსმანიშ ნახანტას,
სიორ განშა გუკუნანს
პირკალჯგუა, ჩე ფარდას, -
სქანო ამდღათ დობღურუქ,
ოღონს ჟინიშ ნება რდას,
მა თაქ ბძირინ, არიკო
ეგებ ვაქშერაგადას,
ბჟაშ ეულას მენჭაფილს
ოჭაკეშ ჟი, ანარას,
მესეფ ჯოგის იწოჸუნდ
აუარება -აგვართას,
ვადინტირედ მუთუნით
მუთუნიშნერ აგვარას,
ენას მა მუს ბგორუნქ დო
მუშ საქმე მუქ მაგვარას.
ცაქ მიხირიტ რკიაფით
ოკალმახეშ მამანგას,
შარა ვარდუ, ვორწყედინ,
ქანაქ ვაკირაბადას.
ოჩოკოჩის ჸვა გუსოფი
ართი ტკოუშ მაფართას,
ქაკოდვალუ, სანგარო,
ჩქიმ ჸოროფილ ტყაშმაფას.
მუჟას მუზაში ჯა ჩანსჷნ,
არქა, მითინქ ვამკვათას,
თქვანო ამდღა დობღურუქ,
ოღონს ჟინიშ ნება რდას!