* ოქუმს, ოლაკაციეს,
ოქუმს, ოლაკაციეს,
თხირიშ ჯალეფიშ იშო
მაფშალია იბირდუნ,
ნეტე, ასე ქიბირსო!
შორს რე მუდანიაშე
ჩქიმ სქვამ სამურზაყანო,
გინძე სერეფი აპრილიშ
ძნელჲ მაფ ოთანაფალო.
ძნელ რე ყვინგის გერდგუნ-და
ურჩქინჯობაში მონკა უღუ, -
არძოშ უმოს სიტიბა
სქან ყებურიშ ტუტას უღუ.
თელ ქიანა იკიბლინ,
მუშოთ მოკოდ წვალება!
გიბჭყოლიდენ, ვაშინერს,
თანაფა დო ხარება!
ითამ ბგორუნდი თილისმას,
მუ იბწვალინ, ღორონს უჩქუ,
საზის, ზურნას, ქემანჩას
მაფშალიაშ ხუმა უჯგუ!
არძოშ უმოს ჸოროფა
მოკოდჷ, გებგკონ, სო რენი,
ქანა მიბლინ, ქიმეფხვადი,
დიდაში თოლეფს ჸოფენი!
სანდო კოჩის ბგორუნქ მაქ, -
ბრელ გინობნჩურ მდინარე,
თეჯგუაქ მითინქ ვამაგორჷ
ეტყვებუ, ართე, ჯიმარე.
დუდ ვამზოგებ, მოწამე რე
თუდო - დიხა, ჟი - თუთა,
ვავოხივილე მითინს შური
მუმაჩქიმიშ მასუფთა.
მის უღჷ ართგურობა ჩქიმ
მარდუალიშ მადიდა!
გამჭირდჷ რინა, ხოლოჟამს
თიშ ჩე თუმა ვაბძირ-და!
ოქუმს, ოლაკაციეს,
თხირიშ ჯალეფიში იშო
მაფშალია იბირდუნ,
ნეტე, ასე ქიბირსო!