424.დღა რდუ, მივში შულჲადირი, ვძირი ზღვაპის წვანეთ ბალი;
შორ-შორიშჷ ქალჲაქის გუდ, წიმილი მივჩი მა, ლი.
ვთქვილი: „ღორონთ მოთ მოჸოთა, გური მუშენ დომიდაღი,
გვალჲო მუშენ ეკომირღვი ასეშახი აზრი საღი.
425.ართ ჯაშ ჯინს ქედივრულე, მონენქ ჭკომეს ოჭკომალი;
ქედივრულე დო გედივრთი გურს მისერუნდ ტანჯვაშ ალი,
რადგან მუთუნ ვაგამგებუ ვართ ტყურა დო ვართ მართალი’
ჩილჲამური დიხას შოლჲუნდ თოლეფიშე ნახარხვალი.
426.გევგი ძახინი, გედივრთი, ვიშო-აშო გივჯინი,
ვძირი კოჩი უჩინებუ, ვორწყედჷ იტანჯებუდ მინი.
ყამა უღუდ ზისხირელი, თქუანდ: ღორონთჷ მიკმოჯინი
წორეთ ნტერო დუვოჸოთი, გური ჩქიმი გავარკინი.
427.ჟი გეხედუ უჩა რაშის, ორდე დიდო განანჯარი,
ეკილ-დიკილჷ გიერვილედ წორეთ ეთეშ, მუჭოთ ქარი.
მა ურცხოშა მონა ვოჩქვი, მონა ვოჩქვი გავანქარი
დო ვოჩინი: „მინჷ გატანჯენს, მინირე თეშ მოსაქვარი?!
428.მონაქ მუშე მუთა გეგუ თეთ დოსქიდუ ხან დიდი
ტანს გენიაქ ქეგუმარზუ გედოვხოდი ცხენს დო ვიდი,
ურცხოს ვთხილი გაჩემება, გლაჲ ზიტყვათ ვადავრიდი.
მიკმოჯინუნ მევეწონი, გაჩენდუ დო უღუდ რიდი.
429.გაჩენდუ დო ღორონს ძღვენი მეუჯღონე დო თქუ ქება
ბოლჲოს მიწუ: „ქოგიწილჲუნქ, სქანდე გევგი მუთი დება.
ლჲომს თხალენქჷ გემენდუ დასურო დო ვარ ეგება
ხვალე ვძირე, მიღალჲატეს, გაჭკორებულს მოკო რსხება.“
430.ვუწი: «დუდი დეწყინარი,» მევუჯღონით ღორონს ძღვენი
ჩქი მივშვანდით ჯაშჷ ოროს, მიკირუდეს ხოლჲოს ცხენი,
გამუნჯებულქ, ორაგადეთ აწ მა ნინა გავარსხენი;
ვთქვილი, ნგარა მუს მომიღანს ჩილამურით დიხა ვრჩხენი.
431.მონა ვჸუნდუ მა დალჲაქი ურცხოს დუშუსუ ნაჭკირა,
ასეშახი დატანჯულსი გურქჷ მიწყუ მა წართ ბირა.
ვუწი: «მინ რექ, სოლჲე მოურქ, მუშენ რწუმუ ზისხირ შხირა
თქუ: «გიგაგე ირი ამბეს, ჭირი რჩქიმი მუშა ვზირა.»
432.მიწუს: «ამბე ჩქიმი გეგი დო მარჩქილეთ მიხაზირი,
ათე ქალჲაქი დო ბაღის, - თქუ ჯოხო მულღაზანზარი.
უჩქუნა დიდი ცხოვრება, რე ვარჭუა დო ბაზარი,
ხალხით რე სახლიერი, ხალხი რიგიან ნაზა, რი.
433.მა სახელი ვჯოხო ფრიდონ მულღაზანზარიშჷ მაფა.
ათე ქივანა ჩქიმირე, ხალხით უღუ ჩქიმი ცქვაფა.
ხიოლჲუენს უშუჭყვადუ დაური დო ზურნა-დაფა
მარა ღორონთქ ცუდას მუჩუ ჩქიმი დუდის გოჯოგაფა.
434.მუაჩქიმჷ დო ბიძ ჩქიმი ბაბაუშე მუჟანსთ ირთუდეს,
ზღვაში დიხაშ ქივანა რე, ჩქიმი თილჲათ თის იტყუდეს,
მამუმაქჷ დომირურუ, ბიძენს ჩქიმი ჯინჷ უღუდეს,
მიში ხეშეთ აწ დივჭკირი, მინჯურენა ჩქიმ ჸუდეს.
435.ართ დღასჷ ნოტყელიშა ვიდი ზღვაზღვა ვნადირენდი.
მონა-ჯარსჷ ვუწი ზიტყვა ვურაგადუდჷ, ათეს ვდენდი,
«მითა მოჭირ მოსახვარი» - თეთ მა დუდი გავაბენდი.
გურიშ არექ გემეკაჟუ, სქვერს ვენგერი, ლჲომენს ვენდი.
436.»ვთქვილი დო ზღვაშა მიშევღი, ვნადირენდი, მივში ნიშით.
კვარიაშჷ დუდიშ მაშხვა შორჷშე ვძირი მარძგვანიშით;
მახოლეს დო რინი ვიჭყე, ტანსჷ გამაცილჲუ შიშით.
ნგარათ თქუ დო გოდებათჷ, გეგი მოჭე საქმე მიშით.
437.ჯარი ორდუ დო ქეგევგი ხონარი დო ყამაშ მამახვა.
ვიჭყე ჩქიმი გორჩქინა დო თეთ დივძახი მა ართშახ ვა.
ვძირი მისუ ჩქიმი ნტერი, ხარგელი რდუ ნისი ბახვა;
თქვათჷ გეგით ოშიწკუმა მუჭო გავრძუდჷ ხვალემა, ხვა.
438.მახოლეს დო იჸუ ლიმაქ, ქეგომცუეს არჷძაქ ხართე
ვთქვილი: ნიშის ქენოვსქიდე ჩქიმით ვეჸი გასახარ თე
მატარებელჲო მიივნწყილი, ტანსამოსი ქეკნივკართე
დო კინივლი ჩურუათი; ნტერენს ლხინი გუუართე.
439.თენა ორე სქანი ჭირი სით ქარწყექი გემხენი
ირი დღახუქ გემეპიჩვუ, ცუდი ორე ჩქიმოთ რსხენი,
მარა იტყუ ჭკვერი კოჩი, უჩქუნია ძღვენსჷ ძღვენი,
მანგიორსჷ მათ გინუგა, გეგი, მა მაფ მოსათმენი.
440.ფრიდონიშჷ ათე დებაქ გურს გომირზუ ჯინიშ ღვენა.
შემებრალჲუ მუში ყოფაქ - მანგიორო ვუწი თენა:
«საქმეშ აჩქარება ვერგუ, გაგება დო ოკო რჩქვენა.
მოლჲა, მათი გაჸუნუქი, მართალს, ღორონთჷ ქომორწყენა.»
441.თენათ ვუწი: «ჩქიმი ამბე ეგებ ვაგაგიგობებუ,
მუჟანსთ დრო ქომაღვენუ დო მუჟანსჷთი სით გერსხებუ-
დუსჷ გოჩინებაფუა,» ფრიდონქთ მიწუ: «მეხერხებუ;
ღურა დღაშახ ვეშმოჭყორდუქ, მიდებინუ დო მიდებუ.»
442.მევრთით მუში ქალჲაქიშა ვონჯით დო მინივლით კარი;
ჩქი ვხვადუდეს თელი ხალხი, მონეფი დო ლაშქარ -ჯარი.
ირჷ-კოჩი უჸორდესი გოჯოგაფა ორდუ ვარი.
ქალჲაქიში ვთქვილი ქება, მუთა მიძირჷ მა ეჯგვარი.
443.ქალჲაქის უღუდ ფანტალი, რიათ მეუღუდ ხინდა, რი.
ჩქიმსჷ თქუანდეს ცქვაფასი: «თუთა, სი ჩქინოთ იდარი.»
.ქალჲაქი ორდუ ლჲამაზი, უტუთ საქები, დინდარი.
ვაბძირი შხვადო რინელი, ხანგა, ბორო დო შინდარი.
