444.ფრიდონუ ორდუ დონჯირელი წორეთ თითქმის წანმოწანა,
მარა ბოლჲოს გეგმიკეთუ, გაჟირწილჲუ ღონე, ჭყანა,
დოვკაზით დო ვხარგეთ ნიში, ლასქარეფით დუს იზანა;
-ბჟა ჩქინოთჷ ელჲუმურსჷ, ნტერიშ დილჲუმურსჷ ჩხანა.
445.ვიდით, ნტერენქ ქამიხვადეს დო დუჭყითჷ ჩქითჷ ლიმა,
მარა ნტერის დამარცხება, გეგი,, თაქით ქოვძირი მა
ირჷ კოჩი დუს იფულჲუნდ ვარ შველენდუ ჯიმას ჯიმა
ნტერიშ ზისხირ მეხარჩალჲანდ მუჭოთ დიხას მუნაჭვიმა.
446.დამარცხება ვეკორინეს, ნტერს აძინუდ შხავ ახალი;
გავაოში სიმარჯვალჲა დო ენეფით დოვხვარხვალი.
ართოს ცხორცხალს ვაძირუნდით , მითა რდუ მემაზახალი-
ვორწყედით, ნტერიშ ბჟაქ დიელჲუ, ჩქი დომიჭყეს ბჟაქ ბარცახალი.
447.თვით ფრიდონქჷ მუში ხეთჷ ჭოფუ მუსი მაჭკირალი-
მუსი ნაზირ-ვეზირენსჷ მუჩუ უჩა იღჷბალი
უწუ: «მოთჷ მიღალჲატით? მოთ მომირზით დაჩხირალი?
მოთ ქიმინით საწიწკარი, ვაგგაგინენ ფერი ვალი.»
448.ენაჭოფა ქივანასი, გეგი, დიდი ღვენა ვძირით,
ნტერენს მევჩით უცა რინი, ჩაგრულეფი გავაჯგირით.
ირ კოცი მა დო ფრიდონს მოცქვანდესჷ ქება შხირით.
გავაჩქინითით ჩქინი დუდი, ვორდით ლხენით, ლჲაჸაფი ბირით.
449.ხალხი ფრიდონს ამფენდუ, დიდი მეჩეს თი დო ბინ, დი
ართი ხონარო ოცქვანდეს: « ა ლჲომი დო დუდი ინდი.»
ვორდი დიდი მოყენილი ართი მაფუდ დღა დო ბინდი,
ამბე ჩქიმი ვაუჩქუდეს, მა ათეთი ვ ხომი, ვჟინდი.
