ქ. არსება დაუბადებელისა ღ(მრ)თისა [მამისა, ღ(მრ)თისა ძისა და ღ(მრ)თისა] სულისა წმიდისა; მეოხებითა ყოვლად წმიდისა, [უხრწნელისა, უფრო]სად კურთხეულისა დედოფლისა ჩუენისა ღ(მრ)თისმშობელისა, მარადის ქალწულისა მარიამისითა; წმიდათა ზეცისა ძალთა, ანგელოზთა და მთავარანგელოზთა მიქელ და გაბრიელისათა; ოხითა და მეოხებითა და თავსმდებობითა და მინდობითა წ(მიდ)ისა წინამორბედისა, ნათლისმცემელისა, წინსაწარმეტყველისა ი{ო}ანესითა; ოხითა და მეოხებითა და თავსმდებობითა და მინდობითა პატიოსნისა და ცხოველსმყოფელისა ჯვარისათა და ღ(მრ)თივ ზე-აღმართებულისა სუეტისცხოელ{ი}ს{ა}, კვართისა საუფლოსა მირონწმიდისათა; ოხითა და მეოხებითა წმიდისა დიდისა მთავარმოწამისა გი(ორ)გი, დიმიტრი, თევდორე, სტეფანესითა; ზეცისა თავთა წმიდათა მოციქულთა პეტრესითა და პავლესითა; [ყოველთა წმიდათა] ზეცისა და ქუეყინასათა, ჴორციელთა და უჴორცოთა, და რაოდენნიცა წმიდანი სათნო ეყვნეს უფალსა ჩუენსა იესოს ქრისტესა და აწცა სათნო ყოფად არიან.
ამათითა მოწმობითა და ყოველთა წმიდათა ღ(მრ)თისათა, ესე უკუნისამდე ჟამად გასათავებელი და ყოვლითა საქმითა მიზეზ-შემოუღებელი, უთუო და უთუმცაო ნასყიდობისა პირი, წიგნი და ნიშანი მოგახსენეთ ჩუენ, ჯავახისშვილმან ბეჟან, თქუენ, პატრონსა ქეიხოსროს და თქუენთა შვილთა, ასრე და ამა პირსა ზედა, რომე: მოგყიდე თხლიური მიწა ქუეშეთ თელათამდი და ზედათ ხატის მიწამდი. ამისთუის მოგეცით მას ჟამსა, როდეს ჩუენსა და თქუენ შუა საქმე იყო და ფასითა და საქონლითა ვერ აგვიდიოდით. და შემოგეხვეწენით და მისთვის მოგეცით შემოუცილებლად.
და ამას ვერა გუარი კაცი, არა ჩუენ და არცა სხუა, არა დიდი და არცა მცირე, ვინცა ესე შეგიცვალოს, ანუ შეგიშალოს, რისხავმცა მამა, ძე და სული წმიდა, და ამა ზემო წერილთ მადლი; მასმცა ედების კეთრი გეზისი, შიშთვილი იუდასი, ძრწოლა კაენისი და მეხდატეხილობა დეოსკოროსი, გლოვა ნინოელთა დედათა და ნაწილი მათი ერმოგონეს თანამცა არის. და გამათავებელნი და დამამტკიცებელნი ღ(მერ)თ(მა)ნ აკურთხნეს.
არიან ამისნი მოწამენი და შუადამხდომნი კაცნი: კოკოზაშვილი ქრისტესია და მღდელი ათანასე.
და მე ჯუარის ქრისტესის დეკანოზსა ი(ოა)ნეს დამიწერია და მოწამეცა ვარ.
დაიწერა წიგნი ესე მეფობასა პატრონისა გიორგისასა, ქ(ორონი)კ(ონ)სა სჟდ, ინდიკტიონსა ხაჳ (?).
ბოლოში უზის ერთი ჯვარი