A M. Duprount, aboucat
A M. Duprount, aboucat
Noble disciple del barrèou,
Jouyne apôtro que l'Élouquenço,
Et la Justiço, et la Scienço,
Esclayron d'un triple flambèou;
Tandis que ta bouès escoutado
Mato lou jutge sur l'estrado;
Tandis que dins ta noblo ardou
Del sort fas cambia la sentenço,
Et fas trioumpha l'innoucenço,
Et saoubes may d'un peccadou;
Helas ! poëto imaginary,
Esclabo d'un démoun fatal,
Jou, per forço, à moun ordinary,
Fugi lou trin de moun oustal;
Tantos à l'oumbro d'un bièl bïoule,
Tantos setut pret del marcioule,
Sul canapè des agnelous,
Boli cerca de flous noubèlos,
Et nou trobi que d'aouçanèlos
Et de roumèts et de cardous.
Que ta carrièro és noblo et bèlo !
Que moun destin és differen !
A-tengut la glorio t'appèlo;
A-tengut lou chagrin m'atten:
Tu, del mièy d'uno caouzo obscuro,
Sortes la beritat tant puro,
Que sa clartat fay cluca l'èl;
Et jou, per dire de mentidos,
Traci de lignos insipidos
Et mé martèli lou cerbèl.
Oh ! sabioy pezat la justesso
De tous counsels plés de razou;
De jours candes et sans tristesso
Sayon belèou filats per jou.
Entourat des objets qu'adori,
Jetan papé, plumo, escritori,
Moun bounhur tournayo luzi;
Et, gràço al règne salutary
D'un goubernomen populary,
Biouyoy sans crento et sans souci.
Mais lou demoun fier et terrible,
Que m'entrayno pel las roumèts,
M'enlèbo lou bounhur pezible
Que nous fay gousta Charles Dèts;
Et quand del Rhin jusqu'à Garono,
Soun puple libre, de soun trôno
Canto la legitimitat;
Jou, malhurous, cruchit de pénos,
Me bezi cargat de cadénos
Dins lou brès de la libertat.
Cependen, dins moun ignourenço,
Pruden et sage quaouque cot,
Las, rebutat, d'impatienço
Me tirabi daquel estot;
Mais helas ! feble, sans couratge,
Parèl al parpaillol boulatge
Que sur la luts bèn se jeta,
Al tour del gouffre biroulàbi,
Fugioy lentomen, et tournàbi
A grand pas m'y precipita.
Cèdi doun; plus de resistenço;
Touto ma bito rimarèy;
Et sur un terren sans semenço
Un jour belèou recoultarèy:
Un jour, fourmado à toun escolo,
Ma Muzo, bibo, faribolo,
Dibertira lous Agénés,
Et d'aquel règne que nous saoubo,
Sé lou métjour respoun à l'aoubo,
Cantara lou Rèy des Francés.
En attenden, parfèt rimayre
Pouyoy me creyre, s'Oduber
Abio lou bounhur de te playre
Et te fa rire aquèste hiber,
La fabou que toumbo d'un trôno,
Lou laourè que la Glorio dono,
Et mêmo lou titre d'autur,
Nou badron pas, te zou proumèti,
Lou pris, l'impourtenço que mèti,
A toun sourire approubatur !