A Moussu de Sainte-Beuve
A Moussu de Sainte-Beuve
En li dedian amistouzomen moun prumè Libre
(Agen, le 24 Avril 1838)
Anén, mous bèrs, sabès qu'un ange bous protèjo;
Aro que bous èy alindats
Sur un papè blan coumo nèjo,
Partès ! ana-bous-én, luzéns, afiscaillats,
Chel gran pintre amistous des grans cansounejayres.
Per tan que jou
Siosqui pitchou,
Bous trobo poulits, muzicayres;
A ma Muzo baillèt uno plaço d'aounou;
Apèy, perque lassus fusquèsse may coumprezo,
Esclayrèt soun parla... poumpounejèt sa mezo;
Sans li fa pèrdre res en damo l'habillèt,
Et debat la raoubo francezo,
Dins lous Dus Moundes la lancèt...
Partès doun ! dins Paris, qu'el lou prumè bous besque;
Et qu'à bostre ayre recounesque
Qu'anèy, al païs des Gascous,
Lous cos nou soun plus oublidous...
Anas ! partès ! boulas ! pourta-li mas pensados;
Cependen, en passan pes cazals, pel las prados,
Emprountas à las flous l'encen lou may fresquet,
Car lli'emboyi moun libre en formo de bouquet !!