A Reveder
A Reveder.
Parënc, amisc, a reveder sëgn!
Os düc, mi conescënc, mituns,
Compagns de mi plü bi dis, stedʼ bëgn!
Plü tert, sce Dî ó, indô nes odunsʼ.
Os, bosć, compagns de mi pinsiers,
Dilan dl alberch godü da me
Chi dis felizi y tan lisiers
Por corp y spirit amaré!
Fontanes tleres, ʼci os stedʼ bëgn!
Osc lominus, osc mormoré
Che sá tan dî chʼ i ne lʼ aldi plü sëgn!
De mi socrëc ciaredʼ dʼ ciaré.
Os, crëps superbi, cun üsc gragn spic,
Os, dlaces, lizies da spavënt,
Ligrëza mia chi dis da vic,
Aldide mi adio te chësc momënt!
Planöres, pra, bi ciamps, stedʼ bëgn!
Les flus, i ciüfs, döt chël bel vërt,
Döt é desflorí, dʼ altonn bur sëgn;
Döt á na fin, fosc él bëgn dërt!
Bel paisc y püre y rich, ciamó
N su iade pormët chʼ i te ciares cun edl
De leghermes plëgn jö da chiló,
Y spo stá bëgn y resta le vedl!
O pere dl monn, o pere dl cil,
Creatur de döt, dl pice dl gran,
Te tüa bunté plü duc co mil,
Bun re cun le bëgn y le bun tla man:
Conserva y ciara de tü mituns!
Desgrazia y mai tratëgn da dʼ ëi!
Richëza y bëgns te sües majuns
Y ciases lasci tres odëi!