Abenturo amourouso
Abenturo amourouso
Le Diu Nenet, que dan sa Méro,
Colen en Paphos é Cythéro,
Doun le matras de ploum ô d'or,
Roustis ô torro nostre cor:
L'autre jour d'uno grand'attento
Me gourdilhéc l'armo doulento,
É despéy ses degun regard
Me fa bouca com'un mounard,
Ni nou resto per mous serbicis
De me fa milo desaguicis
Més afi que ma coundiciu
Maugo qualqu'un à compaciu,
Yeu boli counta de passado,
Quin cop aquesto bourmoulado,
Qu'encaro porto le bequi,
Me dessarrec sul cazaqui.
Un cop yeu prenio la frescuro
A soulel coulc sur la berduro,
É contro le Roussignoulet,
Fazio tinda mon flajoulet,
Tant que sur l'herbeto pradiéro
Mous éls se dounaon carriéro,
Quand Amour, qu'éro plus en-là
Qu'augic l'un é l'autre fiula,
Ben doussomen coumo qui pano,
O qui camino sur de lano,
É tout d'assietous costo jou
Bol jutja qui sara milhou:
Més yeu laissi sur sa bengudo
Nostro querélo remetudo,
Tapauc yeu n'éri pas ta fol
De pensa que le Roussignol,
Nou randesso mous fredous mudis:
Car béromen el ba ays estudis,
En fét de canta brabomen;
É qualque mes a soulomen
Que mon fiulél per las escolos
Apario dins las bessarolos.
A l'Amour li ba sabe mal
Quand yeu m'éri calat atal,
É d'un trét de Maynatge penço
Que per despiéit de sa presenço,
Yeu nou boullio souna bouci,
É jamay nou boutge d'aci
Se jou quitégui la besouigno
De despiéit, sounque de bergouigno.
A la fi, ça, me dissèc el,
Daban que la Sor del Soulel
Darre la niboul amagado,
Tire ta courneto argentado,
Tourno tarrida se te play
L'auzél, é fay le canta may;
Car per l'Estix b'a bouno pauso
Qu'yeu n'abio'augit ta bélo causo,
Prép de ton sou ta coutinaut
Yeu teni Pan per un quinaut,
Quand permo de quelque Pastouro
Fredouno de sa crestadouro,
Car el se foun com'un lardou
Blassat d'aqueste passadou,
É péy m'en rizi de le beze
Quand à las Nymphos bol fa creze
Que dan son pel é dan sa pél
El nou résto pas d'estre bél;
É le pis es que quand s'afisco
Toutos li cridon: Abalisco,
Que bous sentéts al faganas;
Més tout asso na poun de nas,
Ni nou bal uno rafanélo
Al prép de ço que Philomélo
Cantao contro tu metis
Sur la mort del petit Iris:
É perque nou canto pus aro,
Tourno le metre en joc encaro,
Car tu podes, s'yeu n'é bist cap,
Fa li desplega ço que sap.
En dito d'aquesto berduro
Que ta doucetomen murmuro,
Brandido del Bent amourous,
Baylet de la Damo de flous,
Que tantos nou brallao brico
Per escouta bostro musico:
En dito d'aquel luneyssat
Qu'es aqui naut tout emprieissat
A fa del béc milo merbeillos,
Que tantôs éro tout aureillos.
Bref, en dito d'aquesto foun,
Foun bélo coumo le bél joun,
Que ten tout l'an fresco l'herbeto
Per fa de bélo ramadeto,
É doun l'argen ero charmat
Tant que tu tenios animat
L'auzelet que ta pla fredouno;
Dau donc, é se bos souna souno,
Soun tres cops que ten é pregat.
Que bous me baillats pla le gat:
A d'autres, ça li bau jou dire.
Coussi bous pessugats ses rire:
Cadde qu'aco n'es pas d'un joun
Qu'yeu sabi las trufos que soun;
Més se bouléts qu'el sou me placio,
Toucats m'en un'autro de gracio
Que se danse sense fredous;
É m'entretan que toutis dous
Éron en ta bélo disputo
Bela moun roussignol à futo,
É adissiats, fouissat de poou,
Sen ba debés diahuruhoou,
Dinquio que le perdén de bisto.
Alaro d'uno mino tristo
Amour m'alupo de trabés,
É dan le bounet al rebés,
Regaignadomen me prepauso
Qu'aco's yeu qu'éri cap é causo,
Per abe trop naut respondut,
Qu'aquel auzél s'éro perdut,
É péy d'amb'un mout brounzinayre
Dits que nou trigara pas gayre
Que soun bras me fara sabe
Qu'el éro Gigan de poude,
É que s'en fasio ta pla creyre
Coumo le Méstre del trouneyre,
É qu'yeu plaigniré nou re plus
De le contenta d'un refus;
Encependan que barboutino,
Un passadou sur l'arc engino,
É tant que dediu pousquec, tac,
Le me secout per l'estoumac,
De talo reddou que jou paure
Toumbi sense me poude maure,
Quel bouillo segui bitomen
Per le carga d'apuntomen,
É li bailla metisso pago;
Car la scouzentou de la plago
M'aurio fayt fa qualque tentat,
É renegui ma pauretat,
Qu'el aurio bist, tout Diu que s'éro,
Qui soun yeu quand soun en couléro,
Més cértos aco fourec miu.
O beci qu'encaro le Diu
Pren le temps à son abantatge,
Car quand me bic sense couratge,
Estendut com'uno jazen,
Per m'au bailla pus escouzen,
Me dits d'uno modo subtilo
É be Drolle, qu'es, croux ô pilo,
É be hoou, tu qu'éros ta fiér,
É te toucat sul pot esquér ?
Apren, apren à toun doumatge,
Que cal serbi de boun couratge
Un Diu que pot paga truquet
Aquel que dan trop de caquet
Contro sa boulountat countésto,
É qu'a d'autro mounedo présto
Per paga le que libromen
Se rengo à soun coumandomen;
Més aco sio prou dit per aro,
Que le Cél soun mantou preparo,
Countropuntat, tant ple que béyt,
De las estelos de la néyt.
É mentretan ajan la biro
Que t'a couzut ses prene miro,
Per castiga del tros metis
Les que coumo tu soun mutis.
Asso dits, é me ben decosto
Rebisita costo per costo
Le descarat cop que son trayt
Dins mon paure cos abio fayt.
É bist que l'a, de malo forço
Le retiro d'amb'un'estorço,
Afi que le cap barbelat,
Que s'éro lazins clabelat,
Tirés per la metisso trasso,
Le Cor darrigat de sa plasso.
Ço qu'arribéc coumo boulguec,
Talomen que quand le tenguec
El fourec fiér coumo berreto,
É sul cap de la biro dreto
L'anéc ufri per tout jamay
A la qu'yeu aymy tant é may.
D'endespéy re nou me pot playre,
É soun gran coumo Payre é Mayre,
Que per aco nou sabi pas
Abe le Cor à mous afas.
Oyda le cor, de quino sorto
Quand ma Mestresso le s'emporto,
Qu'a resoulut sense rasou
Del fa mouri de languisou,
Afi que quand le Cor patisco
Le chuc de mon cos s'estourrisco,
É que l'esprit cassat de mals
Se trobe foro des cayssals.
Ço que m'abendrio, se ma bélo
M'éro toutjoun duro é cruélo;
Més nou sera pas se li play,
Car yeu seré tant soun laquay,
En serbin sa beutat auribo,
Qu'à la fi sera touto mibo.
Labets yeu lebaré le nas
Com'un pourquet de sépt toulsas:
Labets aymat de mon Estelo,
Yeu seré toutjoun al prép d'elo,
Nou gauzi pas dire dessus,
Coco de fus, noun sabi plus.