Abou Ben Adhem

Abou Ben Adhem (bid omik mödikomös egelo !)
Ädagalom se dlim dibik püda neit vöno
Älogom inü munalit slipacema okik,
Litöl nidiko oti äsliko liäf flolik,
Laneli sembal, in tanäd golüdik penöl.
Ben Adhem dubü püd levemik pelanimöl,
Al lutikäl ino slipacem okik äsäkom:
"Kisi penol?" Sülal kapi okik ägeilom,
E ko loged keinik äsepetom gesagi:
"Penob nemis utas kels löfoms Sölali."
"Li-binom nem oba bevü oms?" Abou äsäkom.
"Leno," sülal ägesagom. Abou täno al om
Äpükom lovikumo, ye yofo nog: "Begob so,
Penolös das ob löfob menadi valemo."
Lanel äpenom e äfegolom. Neit suköl
Ko lit nidik levemüno sülal denu kömöl
Äjonom nemis utas kels löf Goda iläbom,
Eko, nem Ben Adhema balido pälisedom.

LEIGH HUNT.

(Pelovepolöl fa John J. Davies, in Chicago, Pebaltats.)

Se Kosmopolan 1892, Nüm: 6, Pad: 84.