Aifiedü masal!
If milit smalik sembal tuvomok in komip ko tael stenüdikum, kanom te vikodön if paicifom e paidugom lebeno fa genal okik ed if in milit ät aisibinoms pud e leodäl. Jens nenumik volajena blöfoms velati at, kel päsevom ya fa mödiks pops e nets timagas vönik. Sikodo no kanos sibinön dot, das obs volapükans obevikodobs neletübis valik e das orivobs zeili subimik obas, it[1] aifölobs velati at.
* *
Tefü dukam dina vpik dubü söl datuval kanobs lesagön, e men snatik alik mutom siön osi, das datuval edukom jünu lebeno dini vpik.
Ven Schleyer ämekom datuvi gletobidik oka, äbinom pädan vemo pöfik e te pesevik pösodes nemödik. Al okanön pakon[2], ädefoms ome mon, mäkab e meds valik. - Kisi dunön?
Äbeginom spälöni. - No plu ädlinom vini, no plu äsumom kafi ed äfidom so nemödikosi, äs äbinos mögik. - Dubü stön spartanik at äspälom fino moni zesüdik al kanön pakön datuvi oka - ed al säveadön velati nulik un menade lölik.
Äbeginom voboti gianik - ed adelo pos yels balsebal ya sibinoms balions kil volapükanas. - Kim en no stunom? kim no milagon mani lelik at? - Lesi! Schleyer idukom beno dini vpik, e melitom, das sevokobs: Lifö genal obas!
Nu säkob: vpans tala elefuloms stipi telid al dalöpön vikodi? eiplesefoms etis püdi e leodäli, kels panedoms, dat i milit smalik binom-la stenüdik e dat kanom-la bevikodön taeli stenüdikum? Begino vpans äbinoms baladik e sikodo stenüdik; ab poso äkömoms aniks, keles vp. gletobidik no äjinom gletobidik säto, kels äviloms binön kapälikum e genialikum ka datuval it, - e so ävedoms palets tel, kel bekomipoms okis rezipiko. Äjedoms dikodi e feiti e nekoteni bevü vpans, e näm, kel vöno pägebom al pakön vpi, nu pagebom al bekomipön balimta votim.[3]
Vilob klödön, das mans at binoms mens snatik e das edunoms so ko desän gudikün e snatikün, ab säkob, edunoms pötiko e visediko? - E ko dunön at omas efödoms dini vpik? - No klödob osi, no kanob klödön osi, sek lügik omas, dikod e feit bevü vpans, blöfom, das edunoms lebadiko e das vemo edämoms dini obas.
E kis äbinos kod, das mans et ádunoms so? kis binos kod slita nuik? - Sagoms, das ädunoms so, bi datuval no ävilom zepön menodamis (?) anik vpa, kelis imoboms. - Atos binos kod lesmalik neflenüga legletik!!! Kim en no smilom?
Dem kod so smalik e lucilik deflekoms de man nobik e stümadigik, keli volajen nen dot opliedom füdo as benodeli menada, as bali menas gletikün tala, kel no elepöfüdom pugis gletik äs Hanibal e Napoleon, ab kel emekom püdavoboti e kulivavoboti gletikün timagas valik.
Golomsös i füdo vegis okas mens et! sovomsös i füdo feiti e dikodi! no oklopoms votikosi ka lukebi, ko kel okanoms flökön lorafestuni zi flom hitik okas - obs, leno! osukobs omis, devied obas i füdo oblibom:... Aifiedü masal!
Valädobs ko lan takedik Krüti pos'lifelas; volajen osepükom cödäti cödik.
NOETS. (Vükifonät)
Se Nunal nulik 1891, Nüm: 12, Pad: 58.