Al calvari di povar
J'ho vist quand enn andat a cent a cent
col sò sachet in spala e 'l badì in ari,
unich arm'ad bataglia pr'asta gent
ca moeva a la conquista d'ón salari,
e intónavan partend da la stassion:
"Sem la lingera ca passa 'l Sempion".
Ho vist in Magg di fil longh ad carett;
gh'er sót ón broch, insima gh'er n'ombrèla,
eran pien tut ad donn, fioel e fiólett
ch'indavan a mondà ris: e par la bela
silensiósa campagna ca nasseva
ona canson da spasim la piangeva.
Ho vist tuta 'na gent instupidì
ind i sólch che la vita e 'l pan negavan,
imbarcass malinconica e partì
pr'óna tèra lontana; e saludavan
la tomba di sò veg ch'han combatù
danda a l'Italia i sogn, la gioventù.
O gent ca portarì sempr'in la ment
la memoria e 'l ricord dla vossa tèra,
perdónegh a chi 'v caccia in mes ai stent
in Merica, ai minier ed in risèra.
Oh!, gnarà 'l dì che i bon 's daran la man
e i noss fradei tra nun g'avran dal pân.