Amor (Cresp)
Gaitan Cresp Legorin (1852-1913)
Amor (1887)
L'è nò l'invidia che me fa parlà
discori inscì per rid, per giavanà.
Manzott per avè faa l'Amor, l'ha faa
parlà tucc i giornai che gh'è a sto mond,
e minga assee de quest, s'hin ocupaa
de lu, l'è on fatt che se pò minga scond,
sindich, perfett, minister, senator,
e fors'anca princip, re e imperator.
S'è movuu i bœu, i cavaj e on elefant,
e certament de cavalier che l'è,
el fann commendator per intretant.
Inveci mì, soo propri nò 'l perchè
quand hoo tentaa de podè fà l'amor
con la Lisetta, on angiolin, on fior
che se pò nò trovà 'l compagn, hoo faa
on malarbetto fiasch, perchè el papà
de 'sta tôsa, ona sira el m'ha cattaa,
e 'l me n'ha daa fin che se ne pò dà,
e tant che se el va inanz, alter che Amor,
el me manda in d'on bott al Crëator.