An El Filibusterismo – ni Jose Rizal, 1961/1
Usa kaaga hin bulan ha Disyembre, an bapor TABO naghihimakuri pagsuba han nagbabarubaliko nga salog han Pasig, may sakay nga damo nga tawo tikadto ha lalawigan han Laguna. An dagway him nga bapor magakmal, haros lipurok sugad hin kabo sanglit tabo an ngaran, igo la nga kamahugaw bisan kun napakamabusag, makatarag-ob ngan himuot tungod han kamananong maglakat. Kundi bisan pa hiya and, ikinasusuko hiya didto hadto nga mga nayon tingali tungod han iya ngaran nga tinag-alog o tingali tungod han iya pamahungpahong nga kinaiya didto, nga daw pasulabi han kauswagan, kay asya in usa nga bapor nga diri tibway nga bapor, usa nga pinaginlawas nga diri hiro, waray kasisugad, kundi diri sadang mariwa, ngan kun nagpapakatakos mapahid ha iya lawas hin usa kapaagi hin pintura.
Ngan ini nga bapor pilipinhon gud nga inungod! Bisan unuban la madalikyat hin maupay nga kaburut’on mahihimo pakasidnga nga sakayan han Estado, nga ginhimo ha sakob han mga paglaladngan hin mga Reverendos ug mga Uustrisimos.
Ginmumuasan han sirak han adlaw ha aga, nga nakakapaidlap han mga balod han salog ngan nakakapahuni han hangin dida an maglubay nga kakawayanan nga nanunubo ha magkalyo nga pangpang, aadto ginkikita an iya magbusag nga mga Urik nga nagwawasiwis hin maitom nga aso: may ada nasiring nga an sakayan han Estado maaso man liwat... Ha ikinagirugihot nahuni an iya silbato nga garhob, mapiriton baga an manlulupig nga nagpapasugot ha guliat salit didto ha sakob diri nagkakasarabot. Gin-iipurudol an bisan and nga ighitara, usahay, danay mag-irarapak han mga sulambaw, mangawalkawal nga mga kalap, daw naninindog nga katul’anan hin mga higante nga nasaludo ha usa nga dako nga hangag; usahay danay tumadong ngadto ha