An Kaduntan Han Bungto – ni Jose Rizal, 1962/6
waray gud ha iya pakadakop ha pulong; an mga distingos ni Fr. Sibyla nakapasugad ha iya han usa nga magkaralap nga nagyaos la pagpinamarang han mga kasili. An dominiko talagsa la mamulong ngan baga sugad bin gintitirutimbang niya an iya mga pulong.
An ikaduha nga padi, pransiskano,(12) mayakan hin duro ngan labi na an kamakiwa han lawas duyog han pagyakan. Bisan baga nagtitikang na pag-ubana an iya ulo, an iya lawas waray kalalagas. An iya tuhay nga panagway, an iya dapit makaharadlok nga paniplat, an iya haglapad nga apapangig ngan han iya kanan makusog nga kalawas, daw sugad hiya hin usa hadton mga dagko nga pagkatawo han una nga Roma nga nagsul-ot la hin dipagpakilala, ngan tingali la kamo hanumdom pagtan-aw hin usa hadton tutulo nga mga monghe nga iginsusumat ni Heine didto han iya “Dioses en el Destierro” nga didto ha Tyrol, usa nga magkatutnga han bulan ha Septyembre, nananabok han danaw dida hin usa nga sakayan ngan danay manmutang dida ha palad han natabok ha ira hin tig-usa kabug-os nga tuod nga salapi nga mahagkot pa han yelo ngan nakakapangurugkurog hin kahadlok han tag-ada han sakayan. Kundi hi Fr. Damaso diri makarurugda sugad hadto nga tutulo; hiya malipayon ngan bisan kun an iya pamulong dapit sulasuka, sugad hiton tawo nga waray nahahadlukan ngan nakakaisip nga an iya la mga pulong an banal ngan maupay, an iya huyayag ug makalilipay nga tawa nakakapara hini ngatanan nga nakakaraot ha iya ug danay ngani na la mapirit in usa pagpasaylo ha iya hiton iya batasan pagbukas ha kadam’an hiton iya tiil nga waray midyas ngan hiton iya bitiis nga barahibuon nga tingali makapamanggaran bin usa nga Mendieta(13) kun asay igpaguwa dida ha mga feria ha Quiapo.
Usa han mga paysano, gutiay nga lalaki, itom an barangas, waray sadang ha iya paghimangrawon kundi an iya la irong nga tungod han kadako baga diri iya kalugaringon; an usa man, asya in usa nga batan’on nga mabulaw ngan baga kanan diri pa maiha nga naabot tikang ha Espanya, asya an iginkakabalingkutay hin makusog han pransiskano.
—Kikitaon mo yana, — nasiring ini; — kahagusan ka ngani dinhi hin mga pira kabulan, makakasiring ka nga matuod iton akon sumat ha imo; lain an pagpasugot tikang didto ha Madrid, lain man la an pag-ukoy dinhi ha Pilipinas.