April
April
Se desseda tusscoss in la natura,
torna anmò i fior al praa, torna el bell sô
e i uselitt in voI
se spanteghen in gir per l'aria pura:
centmilla bestiolitt
canten, sconduu in de l'erba; el sò frin-frin,
e torna, - l'è on destin,
torna a spontà sul nas i sbroffolitt...
Semper a sta manera - quand ven la primavera!
I avi scappen foeura di bisoeu,
volen sui fior per scisciagh foeura el mel;
i ragn fann i sò tel,
e ai bej parpaj ghe corr adree i fioeu,
sgorattand anca lor,
col fà in l'aria giughitt e perovett. ...
e mi sont chì, in d' on lett.
intanta che masàri on raffreddor,
tolt sù, par nanca vera, - perchè l'è primavera!
Tusscoss el se desseda: i fonsg ai bosch,
la magiostrinna ai proeus, i piant al broeu
e, insemm, quj car bestioeu,
ch'hinn la nostra passion, ... pures e mosch...
Tucc i gaijn fann l'oeuv
sbraggiand di coccodè che mett legria,
la nev l'è andada via,
ma, in compens, - consolév -
el va adree a pioeuv...
Ma, già... derven la Fera - e gh' emm
la primavera...