Auguri de capp d'ann a on amis baloss

Carlo Fontana (1808-1882)‎

Auguri de capp d'ann a on amis baloss (1842)

Anca st'ann l'è passaa senza vedèss!
Mi, donch, dovaroo stà on altr'ann anmò,
seguitand, come hoo faa giust finna adess,
a dì: "El ven!" e a speccià, come on quajò,
che, insemma al dindirlin del campanin,
abbia a sentì el "Se pò?" del mè Pedrin?

Perchè l'è propi inscì, per Bacch, bacchissim!
Tutti i ann mi te spècci; e ti, birbon...
(ma già, l'è come datt de l'illustrissim!)
te me menet a bev!... E, in conclusion,
te troeuvet, poeu, on quei rogn, ona quaj scusa,
de famm dì: "Anch sta volta, nà, l'è busa!"

Ma l'ann che ven, che l'è el quarantatrii,
de lòffi en voeuri pu!... Te sét visaa!
E te specci ancamò, ma (t'ee capii?),
se te voeuret de bon vèss perdonnaa
t'ee de vegnimm a dì: "Sont chì, Carlin,
pien de salut e pien de marenghin!"