Autro. D'un Amourous pauromen aimat
Autro.
D'un Amourous pauromen aimat
Sur l'Ayre Frances, Quoi faut-il donc qu'Amour vainqueur.
Tant que le nas me fumara
En debrembié nou toumbara
La courtezio de ma Mestresso,
Que toutjoun es en pensomen
Coussi per moun countentomen
M'hounoure de qualque caresso.
Un jour que dins soun courredou
Yeu l'y countabi moun ardou,
Bigui pausats à la demoro
Un gous que rufao le nas,
É un Baylet amb'un leignas,
Que me féguen biarda deforo.
Bélo, sourtéts, ça disio jou,
É beyrets bostre Serbitou
Que de caytibié se palusso.
En l'attenden tout escalfat,
Sentigui que m'abion coufat
Un grazal d'aygo de merlusso.
Encaros oüéy, en la preguan,
Pes pots li passabi le gan,
An disant: Mutus é bibotis.
Elo, sampa de gayetat,
O per un gatge d'amistat,
M'a secoutut un grand repotis.
Degus dounc nou me doune tort
S'yeu bibi dinquios à la mort,
É s'aymi en chifro ma Mignardo.
Yeu l'aymaré tant que biuré,
Senten atal à l'endarré
Coumo qui porto l'alabardo.