Bektaşi İlmihali
محترم قارئلرمه
editکچنلرده محترم رفیقلرمدن بریسی امانت بر کتاب ویره‌رك دقتله مطالعه‌سنی توصیه ایتمیش ایدی؛ بونی اوقومقده ایکن اقربادن بریسی‌ده بر کتاب کتیردی، بکا هدیه ایتدی. بو ایکی نوسخه‌ده عین تاریخ‌ده یازیلمش بر آدمك اثری اولدیغنی مقابله ایده‌رك آکلارم. هر ایکیسی‌ده اورته قطعه‌ده ۱۲۷ یاپراقلیدر. صحیفه‌لری یکرمی بر سطردن و هر سطرده آلتی یدی کلمه‌دن مرکبدر. کتاب اساساً سیاه مرکب ایله یازلمش ایسه‌ده شایان اهمیت اولان یرلرنده لعل مرکبی قوللانلمشدر. بو کتاب اساساً ایکی قسمدن عبارتدر: باشدن ۷۸ ورقه‌سی اوراد و اذکار و بونك مابعدی عادتا بر علم‌حالدن عبارت اولدیغیندن رساله‌یه سرلوحه اتخاذ ایتدم. کتابك آدی یوقسه‌ده ۸۴نجی ورقه‌نك آرقه صحیفه‌سنده محررینك «محمد سیف‌الدین ابن‌ذولفقاری درویش علی» اولدیغی و بو ذاتك‌ده ۸۳نجی ورقه‌نك آرقه صحیفه‌سینده
امدی عزیزم، نوروم؛ جنت مکان فردوس آشیان، رحمة الله علیه المستعان، شریعتلو، حقیقتلو، معرفتلو، طریقتلو، رشادتلو، فتوتلو عالئ همتلو، سرافسرم، دده‌مز مرشدکاملم، سبب نجاتم، مغفرت‌پناهم، حضور محمد علیده پشت پناهم، بوتون دمنده دستکاهم، عزیزم، افندم، قطب العارفین، غوث الواصلین، قدس سره‌العالی واصل الی الله الوالی یعنی وکیل حضرت پیر خنکار حاجی بکتاش ولیّ الخراسانی افندیمز حضرتلرینك وکیللری اعنی به ابراهیم انوری بابا افندی رحمة الله علیه الصمدانی افندمز حضرتلرینك قاعده اسلوب فریضهٔ جناب‌باری و سنت سنیهٔ جناب محمد و قول جناب حضرت امیرالمؤمنین امام المتقین اسدالله علی و رسوم قواعد حضرت مذهب پاك امام جعفر الصادق متقی، و رسم قواعد حضرت خنکار حاجی بکتاش ولی الخراسانی و ارکان راه محب خاندن اولاد مصطفوی قاعدهٔ عالیلری اوزره بر متأهل جان قرینداشك اقرارینی آلدقلری آوانده اولجانك تام‌ارکان اهلی اوله‌رق کوره‌جکی عین جمی (آیین جم) و رهبرلك ایده‌جك ذات عالیقدرك نه کونا ایده‌جکی ارکانی من غیر حدٍ علی قدرالطاقه منظور حقیر کمترانم دکلو دریارن قطره و کونشدن ذره اوله‌رق اشعار ایلدم.
یوقاری‌یه عیناً نقل اولنان سطرلردن آکلاشیله‌جغی وجه ایله کتاب اساساُ ایکی قسمدن عبارتدر. برنجی قسم اوراد و اذکاردن ایکینجیسی ایسه آیین طریقتدن باحثدر.
برنجی قسمه دائر ویره‌جکمز معلومات آز اوله‌جق ایکنجیسی اوزونده خیلی توقف اولنه‌جقدر.
رساله‌نك، یوقاریده اقتباس ایتدیکمز سطرلردن‌ده آکلاشیله‌جغی اوزره، پك قصورلی اولان املاسنی محافظه ایتدم. رساله‌یه «بکتاشی علم‌حالی» عنواننی بن ویردم. شو صورتله «بکتاشی سری» دنیلن مشهور سرك بر قسمی آرتق میدانه چیقدی، دها قالان وارسه اوده بر کون ظاهر اولور. ذاتا بوندن بویله سر صاقلامق امکان قالدیمی؟
اثرك مستنسخی
نجیب عاصم
بکتاشی علم‌حالی
edit۱
editکتابك برنجی ورقنك ایکنجی صحیفه‌سندن یعنی تام باشنده باشلایان و یدی ورقی اشغال ایدن صلوة شریفه شویله‌جه: «هذا دوازده امام افندیلرمزك اوزرلرینه قرائت اولنه‌جق صلوة شریفلردن صلوة کبیر» دینلیور. بونده اوفاق بر مقدمه‌دن صوکره «باسم شاه» دیه صلوة باشلیور. بو صلواتده حضرت پیغمبردن «استشفعنا عندالله بحق حقك و بحق جدك و بحق امك و بحق اخیك و بحق آبائك و انبیائک و لالائک الطیبین الطاهرین المعصومین»[1] دیه استسشفاع اولنیور. حضرت علیدن‌ده بو صورتله شفاعت دیله‌نیلیور. حضرت پیغمبره صلوة کتیرلدیکی کبی حضرت علی و حضرت فاطمه و ائمهٔ اثتی عشره‌دن تصلیه کتیریلیور. حضرت فاطمه‌یه ویریلن القاب میاننده:«ذات الاحزان الطویلة فی المدة القلیلة المغصوبة جهراً، المجهولة قدراً و قبراً» عبارسی بولنیور. سکزنجی ورقه‌دن اون اوچنجی‌یه قدر ینه اون ایکی امام نامنه بر صلوة شریفه یازلمشدر. بونده بسمله‌دن صوکره: «باسم شاه» دیه باشلانیور. بو بویله‌جه اوتوز سکز ورقه اون ایکی امام نامنه اون صلواتی احتوا ایدییور. بورادن اللی یدینجی ورقه‌یه قدر برطاقم دعالر یازیلیدر. اللی آلتنجی ورقك آرقه صحیفه‌سنده حضرت علی حقنده عربجه اوچ صحیفه‌لك بر مناجات و کنارنده ترجمه‌سی اولمق اوزره بر منظومه مندرجدر. برنجی بیتی شودر:
سکا مخصوص‌در حمد ای اولو عالی کرم اسی[2]
مرادك اوزره اولورسه سون کیمه معطی کیمه مانع
بو منظومه‌نك اوچنجی بیتی‌ده شودر:
الهی کر مرادی نفسمی ویردم اسیر الآن
چراکاه ندامنده اولورم لطفکه طامع