Biblia/Nove Testamento/Hebreos/Hebreos 10

Epistola al Hebreos

Capitulo 10

Le sacrificio del Christo offerite un vice pro semper

¹Le vetere systema sub le lege de Moses esseva solmente un umbra, un obscur vista preliminar, del cosas bon que haberea venite in le futuro, non ille cosas bon ipse. Le sacrificios sub ille systema esseva repetite continuemente omne singule anno, ma pro illes qui accedeva al culto illos non poteva provider un purification perfecte. ²Si ille sacrificios habeva providite un purification perfecte, illos haberea tosto cessate, quia le fideles haberea essite purificate semel pro semper, e lor sentimentos de culpa haberea disparite. ³Al contrario, ille sacrificios les rememorava lor peccatos omne singule anno, ⁴quia il es impossibile que le sanguine de tauros e de capras elimina le peccatos. ⁵Ecce proque, quando le Christo entrava in iste mundo, ille diceva: “Tu non desirava sacrificios de animales o oblationes. Tu me dava tamen, un corpore a offerer. ⁶Tu non te complaceva de holocaustos o de altere offertas pro le peccato. ⁷Tunc io diceva: ‘Ecce, io veniva complir tu voluntate, oh Deo, sicut il es scripte de me in le Scripturas^[1]’”.

⁸In prime loco le Christo diceva: “Tu desirava ni sacrificios de animales, ni oblationes. Tu non te complaceva de illos”, quanquam illos esseva requirite per le lege de Moses. ⁹Deinde ille diceva: “Ecce, io veni a complir tu voluntate”. Assi ille revoca^[2] le prime pacto ut poner a effecto le secunde. ¹⁰Quia il esseva le voluntate de Deo pro nos esser sanctificate semel per le sacrificio del corpore del Christo.

¹¹Sub le vetere pacto le sacerdote sta e ministra die post die ante le altar, offerente semper de novo le mesme sacrificios que nunquam pote eliminar le peccatos. ¹²Ma nostre Summe Sacerdote ha offerite se ipse como un singule sacrificio pro le peccato, un sacrificio que ha eterne validitate. Deinde ille se assideva in le placia de honor, al dextera de Deo. ¹³Ibi ille expecta que su inimicos sia humiliate e rendite un scabello pro su pedes. ¹⁴Quia per ille unic sacrificio ille rendeva perfecte illes qui es sanctificate.

¹⁵Le Spirito Sancte alsi testifica que il es assi, quia ille dice: ¹⁶“Isto es le nove pacto que io establira con mi populo post ille dies, dice le Senior: Io ponera mi leges in lor cordes, e sur lor mentes io los superscribera^[3]”. ¹⁷Inde ille dice: “Io non plus me recordara de lor peccatos e iniquitates^[4]”. ¹⁸E quando le peccatos ha essite remittite, il non ha plus un necessitate de offerer altere oblationes pro le peccato.

Appello a perseverar

¹⁹Assi, mi car fratres e sorores, nunc nos pote hardir entrar in le Loco Sanctissime propter le sanguine de Jesus. ²⁰Per le medio de su morte Jesus aperiva pro nos un via nove e vivente trans le cortina, illo es su corpore, a in le Loco Sanctissime. ²¹Nam nunc nos ha un tal magne Summe Sacerdote super le Domo del Senior, ²²vamos acceder al presentia de Deo con cordes sincer, confidente plenmente in ille! Quia, pro purificar nos, nostre culpabile conscientias ha essite aspergite del sanguine del Christo e nostre corpores esseva lavate con aqua munde. ²³Vamos tener nos strictemente, sin vacillar, al sperantia que nos confessa, quia nos pote haber fiducia que ille remane fidel a su promissas! ²⁴Vamos considerar manieras de motivar le unes le alteres a actos de amor e bon obras! ²⁵Vamos non negliger nostre congregationes, sicut il es le consuetude de alicunos, specialmente nunc que le die de su retorno es proxime!

²⁶Car amicos, si nos deliberatemente continuava peccar post haber recipite le cognoscentia del veritate, il non plus haberea un sacrificio que pote coperir iste peccato. ²⁷Il haberea solmente le terribile expectation del judicio de Deo e del rabide foco que consume su adversarios. ²⁸Quia tote illes qui refusava obedir al lege de Moses esseva ponite a morte sin misericordia secundo le testimonio de duo o tres testes. ²⁹Pensa solmente quanto pejor esserea le punition pro tote illes qui fullava sub lor pedes le Filio de Deo, e tractava le sanguine del Christo, que rendeva nos sancte, como si illo haberea essite un sanguine commun e profan, e insultava e dispreciava le Spirito Sancte qui adduce nos le misericordia de Deo. ³⁰Quia nos cognosce ille qui diceva: “A me pertine le vindicantia, io va repagar^[5]”. Ille diceva alsi: “Le Senior va judicar su populo^[6]”. ³¹Il es horrende cader in le manos del Deo vivente.

³²Rememora ille dies passate quando vos audiva le prime vice in re le Christo. Rememora quanto vos remaneva fidel, mesmo si illo implicava terribile suffrentias. ³³Aliquando vos esseva exponite al ridiculo public e esseva percutite; aliquando vos adjutava alteres qui pativa le mesme cosas. ³⁴Vos habeva compassion de illes qui habeva essite jectate in prision, e quando tote lo que vos possedeva esseva vos subtrahite, vos acceptava isto con gaudio. Vos sapeva que il ha cosas melior que expecta vos e que durara pro semper.

³⁵Ergo, non jecta via iste vostre confidentia in le Senior. Rememora que un grande premio expecta vos! ³⁶Nunc vos necessita patiente resistentia, ut vos continua complir le voluntate de Deo. Tunc vos recipera tote lo que esseva vos promittite. ³⁷“Quia solmente ancora remane poc tempore e qui debe venir non retardara. ³⁸E mi justos vivera per le fide. Io tamen ha nulle placer in quicunque se subtrahe a tote isto^[7]”. ³⁹Nos, tamen, non es inter illes qui se subtrahe de Deo a lor perdition. Nos es le fideles cuje animas essera salvate.

Notas

1. Un citation de Psalmo 40:6-8 (LXX).
2. O “cancella”.
3. Un citation de Jeremia 31:33.
4. Un citation de Jeremia 31:34.
5. Un citation de Deuteronomio 32:35.
6. Un citation de Deuteronomio 32:26
7. Un citation de Habacuc 2:4