Biblia/Nove Testamento/Johannes/Johannes 10

Johannes

10

Le bon pastor e su oves

¹“In veritate, in veritate^[1] io dice vos: Qui non entra in le oviario per le ostio, ma de alterubi, superpassante^[2] su muro, un tal persona es un fur e un robator. ²Qui, tamen, entra per le ostio, es le pastor del oves. ³Le ostiario aperi pro ille le accesso al oviario, le oves recognosce su voce e veni ad ille. Ille voca su proprie oves per nomine e los conduce foras. ⁴Quando ille ha facite sortir su proprie oves, ille los precede, e le oves le seque, quia illos cognosce su voce. ⁵Illos nunquam sequerea un estraniero, ma fugirea de ille, quia illos non recognosce le voce de estranieros”. ⁶Jesus les contava iste parabola^[3], ma illes non comprendeva de quo ille parlava.

⁷Ergo Jesus les diceva itero: “In veritate, in veritate io dice vos: Io es le ostio del oves. ⁸Omnes qui veniva ante me esseva fures e robatores, ma le oves non le prestava attention. ⁹Io es le ostio: illes qui entra per me essera salvate, entrara e sortira e trovara bon pasturas. ¹⁰Le fur non veni, nisi ut furar, macellar e facer perir; io veniva, ut illos ha vita, un vita de qualitate superior^[4]”.

¹¹“Io es le bon pastor. Le bon pastor es preste a sacrificar^[5] su vita ipse pro su oves. ¹²Le mercenario^[6], qui non es pastor e cuje oves non es le proprie, quando ille vide le lupo que veni, ille derelinque le oves e fugi - e le lupo los rape e los disperge. ¹³Isto eveni quia ille es un mercenario e non le pastor - ille oves non le concerne^[7].

¹⁴Io es le bon pastor: io cognosce mi proprie oves e illos me cognosce - ¹⁵justo sicut le Patre me cognosce e io cognosce le Patre - assi io sacrifica mi vita^[8] pro le oves. ¹⁶Io ha altere oves, que non es ex iste oviario, e il es necesse que etiam illos io adduce. Illos va audir mi voce, e assi il habera un sol grege con un pastor. ¹⁷Il es propter isto que le Patre me ama - quia io sacrifica mi vita ut itero lo sume. ¹⁸Nemo pote privar me de mi vita, ma io lo sacrifica voluntarimente. Io ha le potestate de deponer lo quando io vole e etiam de sumer lo itero. Isto es lo que mi Patre ha commandate”.

¹⁹Quando Jesus diceva iste cosas, un forte dissentimento surgeva inter le gente^[9] que lo audiva. ²⁰Multe de illes diceva: “Ille es possedite per un demonio e insane de mente. Quare vos le presta attention?”. ²¹Alteres diceva: “Istos non es parolas de un persona possedite per un demonio. Poterea un demonio aperir le oculos del cecos?”.

Jesus assere esser le Filio de Deo

²²Jesus esseva in Jerusalem durante le festa de Hanukkah^[10]. ²³Il esseva hiberno, e Jesus ambulava per le area del Templo in le Portico de Salomon. ²⁴Le capites del Judeos^[11] le circumfereva e le peteva: “Quanto longemente ancora tu lassera nos in suspension? Si tu es le Christo^[12], dice lo nos clarmente. ²⁵Jesus les replicava: “Jam io lo diceva e vos non lo credeva. Le obras que io face in nomine de mi Patre testifica in re me. ²⁶Ma vos refusa creder quia vos nos es ex mi oves. ²⁷Mi oves presta attention a mi voce; io los cognosce, e illos me seque. ²⁸Io les da vita eterne, e illos nunquam perira; nemo los rapera de mi mano. ²⁹Mi Patre, qui me los dava, es superior a omnes, e nemo pote raper los del mano de mi Patre. ³⁰Io e le Patre es uno”.

³¹Itero, le capites del Judeos, assi, sasiva lapides ut lapidar le. ³²Jesus les respondeva: “Io ostendeva a vos multe bon obras ex le Patre. Propter quo de ille obras vos vole lapidar me?”. ³³Le capites del Judeos replicava: “Nos non intende lapidar te propter le bon obras que tu faceva, ma propter blasphemia, quia tu, un homine, pretende esser Deo”.

³⁴Jesus les respondeva: “Nonne il es scripte in vostre lege: ‘Io diceva: vos es deos^[13]’? ³⁵Si illes al quales le Parola de Deo perveniva esseva appellate ‘deos’ (e le Scripturas non pote esser alterate), ³⁶quare vos lo appella blasphemia quando io dice: ‘Io es le Filio de Deo’? ³⁷Si io non compli le obras de mi Patre, non crede in me; ³⁸crede al minus al evidentia del obras que io face, ut vos va cognoscer e comprender que vermente io es in le Patre e le Patre es in me”. ³⁹Illes, tamen, essayava itero de apprehender le, ma ille escappava de lor manos.

⁴⁰Assi Jesus recedeva itero trans le fluvio Jordan a in le loco ubi Johannes un vice baptisava, e ille remaneva ibi. ⁴¹Multes veniva ad ille e incipeva dicer: “Johannes non faceva signos miraculose, ma quecunque ille diceva in re Jesus esseva ver!”. ⁴²E multes ibi perveniva al fide in ille.

Notas

1. In re iste expression, vide le nota correspondente in: https://wikisource.org/wiki/Biblia/Glossario/a
2. O “ascende”.
3. Un parabola es un breve narration con un significato symbolic. Le termino grec παροιμίαν (paroimian) es empleate de novo in 16:25, 29. Iste termino non recurre in le evangelios synoptic, ubi παραβολή (parabolē) es empleate. Nonobstante, illo es simile, e denota un breve narration con significato symbolic o figurative.
4. Gr. “περισσὸν”, litt. “abundante”, que vade ultra le vita commun.
5. O: “dar”.
6. Gr. “μισθωτός” (misthotos). Isto es un laborator qui es simplemente pagate pro facer un empleo; ille non ha nulle altere interesse in le oves e certemente ille non es preste a riscar pro illos su proprie vita. Quando illos es menaciate, ille simplemente fugi.
7. O: “pertine”. Alicun manuscriptos adde hic: “e assi ille fugi”.
8. O: “io mori voluntarimente”
9. Litt. “inter le Judeos”.
10. O “Festa del lumines”, o “del renovamento”, o “dedication”. The termino grec “τὰ ἐγκαίνια” (ta enkainia) con su verbos, esseva le termino standard empleate in le LXX pro le consecration del altar del Tabernaculo (Numeros 7:10-11), le altar del templo de Salomon (1 Reges 8:63; 2 Chronicas 7:5), e le altar del Secunde Templo (Ezra 6:16). Iste parola es ergo connectite con le consecration de tote le domos de Deo in le historia del nation de Israel.
11. Litt. “le Judeos”. Isto pote alsi esser traducite como “le populo”.
12. Le Messia.
13. Un citation de Psalmo 82:6.