Biblia/Nove Testamento/Johannes/Johannes 20

Johannes

20

Le Resurrection

¹Mane, le prime die del septimana, dum ancora il esseva obscur, Maria Magdalena veniva al sepulcro e videva que le lapide habeva essite removite de su entrata. ²Ergo illa vadeva currente ad Simon Petro e ad le altere discipulo que Jesus amava, e les diceva: “Illes sumeva le Senior del tumba e nos non sape ubi illes le poneva!”. ³Ergo Petro e le altere discipulo sortiva e veniva al sepulcro. ⁴Ambes curreva insimul, ma le altere discipulo curreva plus cito e attingeva le primo al tumba. ⁵Ille se inclinava e videva le bandas de lino que jaceva ibi, ma ille non entrava in le sepulcro. ⁶Deinde Simon Petro, que le sequeva, arrivava e entrava tosto in le tumba. Ille videva le bandas de lino que jaceva ibi ⁷e le sudario que habeva coperite le facie de Jesus, le qual non jaceva con le bandas de lino, ma jaceva inrolate in un loco a parte. ⁸Tunc ergo le discipulo qui le primo habeva arrivate al tumba entrava ibi alsi. Ille videva e credeva. ⁹(Quia illes non habeva ancora comprendite le Scripturas^[1] que dice que le Christo haberea resurgite del mortos). ¹⁰Ergo, le discipulos retornava a domo.

Jesus appare a Maria Magdalena

¹¹Maria, tamen, plorante, stava foras del sepulcro. Dum illa lacrimava, illa se inclinava e reguardava in le sepulcro. ¹²Illa videva ibi duo angelos vestite con robas albe que sedeva un al capite e le altere al pedes del loco ubi le corpore de Jesus habeva essite deponite. ¹³Illes la diceva: “Seniora^[2], quare plora tu?”. Maria replicava: “Illes sumeva mi Senior del tumba e io non sape ubi illes le poneva.”. ¹⁴Dicite isto, illa se verteva e videva Jesus que stava ibi, ma illa non le recognosceva.

¹⁵Jesus la diceva: “Seniora, quare plora tu? Qui quere tu?”. Quia illa pensava que ille homine esseva le jardinero, illa le diceva: “Senior, si tu es ille qui le removeva, dice me ubi tu le poneva, e io vadera a prender le!”. ¹⁶Jesus la diceva: “Maria!”. E illa, adressante se a ille, le diceva: “Rabboni!” (que es le parola hebraic pro magistro). ¹⁷Jesus replicava: “Non tange me, quia io non ancora ascendeva al Patre! Ma vade ad mi fratres e dice les: ‘Io ascende al Patre mie e vostre, al Deo mie e vostre’!”. ¹⁸Maria Magdalena vadeva al discipulos e les annunciava: “Io ha vidite le Senior.”. Ergo illa les dava su message.

Jesus appare a su discipulos

¹⁹In le vespere de ille die, le prime die del septimana, le discipulos se congregava e serrava le porta del loco ubi illes se trovava, propter illes timeva le autoritates judee. Subito Jesus veniva e stava ibi inter illes! Ille les diceva: “Que le pace sia con vos!”. ²⁰De post haber dicite isto, ille les ostendeva le vulneres de su manos e de su costas. Alora le discipulos se allegrava quando illes recognosceva le Senior. ²¹Itero ille les diceva: “Que le pace sia con vos! Sicut le Patre me mandava, io alsi manda vos”. ²²Dicite isto, ille sufflava super illes e diceva: “Recipe le Spirito Sancte! ²³Quando vos remittera le peccatos de alicuno, illos essera remittite; quando vos retenera le peccatos de alicuno, illos essera retenite”.

Le responsa de Thomas

²⁴Ora Thomas (supernominate Didymo), un del dece-duo, non esseva con illes quando Jesus veniva. ²⁵Le altere discipulos le diceva: “Nos ha vidite le Senior.”. Ille, tamen, replicava: “Nisi io va vider in su manos le vulneres^[3] del clavos e va mitter mi digito in le vulneres del clavos, e va poner mi mano a su costas, io nunquam lo credera!”.

²⁶Post octo dies, le discipulos esseva itero insimul in le domo, e Thomas esseva con illes. Quamquam le portas esseva serrate, Jesus veniva e stava inter illes. Ille diceva: “Que le pace sia con vos!”. ²⁷Deinde ille diceva a Thomas: “Pone tu digito hic e examina mi manos! Extende tu mano e pone lo in mi costas! Non sia incredule, ma credente!”. ²⁸Thomas le respondeva: “Mi Senior e mi Deo!”. ²⁹Jesus le diceva: “Tu credeva proque tu me videva. Beate es illes qui non videva e nonobstante crede.”.

Le proposito de iste libro

³⁰Ora Jesus faceva multe altere signos miraculose in presentia de su discipulos, le quales non es contate^[4] in iste libro. ³¹Istos, tamen, es registrate ut vos crede que Jesus es le Christo, le Filio de Deo, e ut credente, vos habe vita per le potentia de su nomine.

Notas

1. Probabilemente Isaia 53:10-12 e Psalmos 16:10; cfr. Jona 1:17 e Hosea 6:2.
2. Litt. “Femina”, ma illo esseva tunc un appellativo de reguardo.
3. O “signos”.
4. O “scribite”.