Biblia/Nove Testamento/Johannes Epistolas/1Johannes 5

Prime epistola de Johannes

Capitulo 5

Le fide in le Filio de Deo

¹Omnes qui crede que Jesus es le Messia^[1], ha essite generate de Deo, e omnes qui ama le Patre, ama alsi le filios que Ille generava. ²Per isto nos cognosce que nos ama le filios de Deo: quandocunque nos ama Deo e obedi a su commandamentos^[2], ³nam le amor pro Deo se manifesta in le obedientia a su commandamentos. Obedir a su commandamentos non es onerose^[3], ⁴proque tote illes qui ha essite generate de Deo surmonta^[4] le mundo. Isto es le potentia del victoria que surmonta le mundo: nostre fide. ⁵Ora, qui es le persona qui surmonta le mundo nisi qui crede que Jesus es le Filio de Deo? ⁶Jesus Christo es le qui veniva serviente se del aqua e del sanguine; non del aqua solmente, ma del aqua e del sanguine. Il es le Spirito qui rende nos iste testimonio, nam le Spirito es le veritate. ⁷Assi, tres es los que rende testimonio de isto^[5]: ⁸Spirito, aqua e sanguine, e le testimonio de iste tres concorda in toto^[6].

⁹Si nos accepta le testimonio de homines, le testimonio de Deo es major, proque Deo ipse ha testificate in favor de su Filio. ¹⁰Illes qui crede in le Filio de Deo porta iste testimonio in se ipse. Illes qui non crede a Deo, de facto le considera un mentitor, nam illes non crede que Deo ha testificate in favor de su Filio. ¹¹Le testimonio es isto: Deo ha nos donate le vita eterne, e iste vita es in su Filio. ¹²Qui ha^[7] le Filio possede vita eterne; qui non ha le Filio de Deo, non possede vita eterne.

Epilogo

¹³Io scribeva tote isto a vos que crede in le nomine del Filio de Deo, ut vos sape que vos ha vita eterne. ¹⁴E isto es le fiducia que nos ha ante Deo: que quandocunque nos pete alique secundo su voluntate, ille audi nos. ¹⁵Sapiente, dunque, que ille nos audi in toto lo que nos le pete, nos sape alsi que jam nos possede lo que nos le peteva.

¹⁶Si alicuno vide que su confratre committe un peccato que non porta al morte, que ille intercede in precaria a su favor^[8], e Deo dara vita a qui ha peccate. Io parla de illes qui committe un peccato que non porta al morte. Il ha, de facto, peccatos que porta al morte: il non es de tal peccatos que io dice vos de interceder. ¹⁷Omne injustitia es peccato, ma non omne peccato porta al morte.

¹⁸Nos sape que tote illes que esseva generate de Deo non pecca, ma Deo protege illes que ille ha generate, e le Maligno non les pote tanger. ¹⁹Nos sape que nos es de Deo e que le mundo integre jace sub le potestate del Maligno. ²⁰Ma nos sape alsi que le Filio de Deo ha venite e dava nos le introspection que permitte nos de cognoscer le Deo verace, nam nos es in su Filio Jesus Christo. Ille es le Deo verace e le vita eterne.

²¹Filios mie, guarda vos del idolos.

(fin)

Notas

1. O “le Christo”.
2. Le proba de isto reside in le obedientia al commandamentos de Deo.
3. Obedir al commandamentos de Deo non es onerose pro illes que ama Deo.
4. O “vince”.
5. Le Textus Receptus (TR) hic presenta “ἐν τῷ οὐρανῷ, ὁ πατήρ, ὁ λόγος, καὶ τὸ ἅγιον πνεῦμα, καὶ οὗτοι οἱ τρεῖς ἕν εἰσι. (5:8) καὶ τρεῖς εἰσιν οἱ μαρτυροῦντες ἐν τῇ γῇ (“in celo, le Patre, le Verbo, e le Spirito Sancte, e iste tres es uno (5:8). E il ha tres que rende lor testimonio sur le terra etc.”). Iste parolas non se trova in le major parte del manuscriptos le plus antique.
6. O “es uno”.
7. O “possede”, in le senso que Ille es presente in le vita del individuo generate de Deo (cfr. 1 Johannes 2:23 pro le uso del verbo “haber” pro indicar le possession de un realitate divin).
8. O “que ille preca”.