Biblia/Nove Testamento/Luca/Luca 1

Luca

1

Prefacio

¹Multes es illes qui sumeva le carga de scriber un relation ordinate del factos que se compliva inter nos. ²Illes se serviva de lo que esseva trasmittite nos de qui, desde le initio, esseva de iste factos testes ocular e que plus tarde deveniva servitores^[1] del Parola. ³Assi, il semblava bon etiam a me, proque del principio io sequeva toto diligentemente, de scriber pro te, optime Teophilo, un exposition ordinate de iste factos, ⁴a fin que tu, in le cosas que te esseva inseniate^[2], cognosce le certitude.

Annuncio del nascentia de Johannes le baptisator

⁵In le dies de Herode, rege de Judea, il habeva un sacerdote del gruppamento^[3] de Abia, que se nominava Zacharia. Su uxor se nominava Elizabeth; illa alsi esseva un descendente^[4] de Aaron. ⁶Ambes esseva juste ante a Deo e observava in modo irreprehensibile tote le commandamentos e le ordinantias del Senior. ⁷Illes, tamen, non habeva infantes, quia Elizabeth esseva sterile e tote le duo esseva jam de etate avantiate.

⁸Un die, durante que Zacharia fungeva de sacerdote ante Deo, secundo su torno, ⁹ille esseva seligite del sorte, secundo le consuetude del sacerdotio, de entrar in le templo del Senior a offerer le incenso. ¹⁰Al hora del offerta, tote le assemblea del populo stava foras in precaria. ¹¹Tunc a Zacharia le appareva un angelo del Senior stante al dextera del altar del incenso, ¹²e Zacharia, vidente le, se turbava e le espavento le sasiva. ¹³Ma le angelo le diceva: “Non time, Zacharia, proque tu precaria esseva exaudite: tu uxor Elizabeth te parera un filio. Tu debera appellar le Johannes. ¹⁴Ille te dara grande gaudio e allegressa, e multes se allegrara de su nascentia, ¹⁵proque ille essera grande coram le Senior. Ille non debera unquam biber ni vino ni altere bibitas intoxicante, e ille essera plenate de Spirito Sancte jam desde le utero de su matre. ¹⁶Ille facera retornar^[5] multes del populo de Israel al Senior lor Deo. ¹⁷Ille ipse vadera ante le Senior como su precursor in le spirito e in le potentia de Elia; ille facera que le patres se riconcilia de corde con le filios e reportara le rebelles^[6] al sagessa del justos. Assi ille preparara pro le Senior un populo ben disponite.

¹⁸Zacharia demandava al angelo: “Como pote io saper que il essera assi? Io es jam vetule e mi uxor alsi es de etate avantiate”. ¹⁹Le angelo le respondeva: “Io es Gabriel e sta ante Deo. Io esseva mandate a parlar te e annunciar te iste bon novas. ²⁰Ma ecce, proque tu non credeva a mi parolas, que essera complite a su tempore, tu remanera mute, incapace de parlar, usque le die del complimento de iste cosas”.

²¹Ora, le populo expectava Zacharia, e illes comenciava meraviliar se proque ille tardava exir del templo. ²²Quando finalmente ille sortiva, ille non poteva parlar les. Le populo comprendeva que durante que ille esseva in le sanctuario, ille habeva vidite un vision. Ille se adressava les solmente con signos, proque ille remaneva incapace de parlar. ²³Quando le dies de su servicio esseva terminate, Zacharia tornava a su domo.

²⁴Alicun tempore postea, su uxor Elizabeth deveniva gravide, e per cinque menses illa remaneva retirate. Illa diceva: ²⁵“Isto es lo que le Senior me faceva in le tempore que ille me reguardava favorabilemente e removeva le vergonia^[7] que io habeva inter le homines.

Annuncio del nascentia de Jesus, le Messia

²⁶In le sexte mense del graviditate de Elizabeth, le angelo Gabriel esseva mandate per Deo a in un urbe del Galilea cuje nomine es Nazareth, ²⁷a un juvenetta^[8] fidantiate a un viro appellate Joseph, descendente de David. Le nomine del juvenetta esseva Maria. ²⁸Le angelo entrava in le domo e la diceva: “Io te saluta, oh favorite del gratia, le Senior es con te!”. ²⁹Ma illa ipse esseva turbate per tal parolas e illa incipeva cogitar super le significato de un tal salutation. ³⁰Assi, le angelo la diceva: “Non time, Maria, quia tu trovava gratia apud Deo! ³¹Ecce, tu devenira gravide e parturira un filio, e tu debera appellar le Jesus. ³²Ille essera grande e cognoscite como le Filio del Altissimo. Le Senior Deo le dara le throno de su ancestre^[9] David. ³³Ille regnara super le populo de Jacobo^[10] pro semper e su regno essera eterne^[11]”. ³⁴Maria diceva al angelo: “Quomodo potera isto evenir, nam io nunquam jaceva^[12] con un viro^[13]?”. ³⁵Le angelo replicava: “Le Spirito Sancte supervenira in te, e le poter del Altissimo te adumbrara. Pro ille ration, le infante que nascera essera sancte; ille essera appellate le Filio de Deo.

³⁶“E ecce, Elisabeth, tu cognata^[14], concipeva alsi un filio in su senectute - benque illa esseva considerate sterile, nunc illa es in su sexte mense de graviditate, ³⁷quia nihil es impossibile a Deo. ³⁸Assi Maria diceva: “Ecce me, le serviente del Senior! Que isto me occurre secundo tu parola”. Alora le angelo se retirava.

Maria e Elisabeth

³⁹In ille dies Maria se levava e vadeva in haste a in le region collinose, a un citate de Judea. ⁴⁰Illa entrava in le domo de Zacharia e salutava Elisabeth. ⁴¹Quando Elisabeth audiva le salutation de Maria, le infante in su utero faceva un salto, e Elisabeth esseva replenate per le Spirito Sancte. ⁴²Illa exclamava in alte voce: “Benedicte tu es inter le feminas, e benedicte es le fructo de tu ventre! ⁴³Qui es io proque le matre de mi Senior veni a visitar me? ⁴⁴Proque si tosto que le sono de tu salutation perveniva a mi aures, le infante in mi utero faceva un salto de gaudio. ⁴⁵E beate es tu que credeva: tote lo que le Senior te annunciava, se complira”.

Cantico de Maria

⁴⁶E Maria diceva: “Mi anima magnifica le Senior, ⁴⁷e mi spirito se allegra in Deo, mi Salvator, ⁴⁸quia ille respiceva le humilitate de su serviente. Ecce, de ci in avante, omne generationes dicera que io es beate, ⁴⁹quia le Omnipotente^[15] faceva grande cosas pro me, e sancte es su nomine. ⁵⁰Su misericordia se extende de progenie a progenie pro illes qui lo time. ⁵¹Le obras de su brachio demonstrava su poter; ille dispergeva illes cuje superbia surge ab le arrogantia de lor cordes^[16]. ⁵²Ille deponeva le potentes de lor thronos e exaltava le humiles. ⁵³Ille plenava de benes le povres e dimitteva le riccos con nihil. ⁵⁴Ille adjutava su serviente Israel, recordante se de su misericordia; ⁵⁵le mesme que ille promitteva a nostre ancestres, a Abraham e a su descendentes pro sempre”.

⁵⁶Assi Maria remaneva con Elizabeth circa tres menses e postea illa retornava a su domo.

Le nascentia de Johannes

⁵⁷Quando se compliva le tempore, Elizabeth parturiva un filio. ⁵⁸Su vicinos e parentes apprendeva que le Senior habeva magnificate con illa su misericordia e la congratulava. ⁵⁹Le octave die illes se reuniva pro circumcider le infante, e voleva que ille recipeva le mesme nomine de su patre, Zacharia. ⁶⁰Ma su matre replicava: “No! Ille debe esser appellate Johannes”. ⁶¹Illes replicava: “Ma necuno de su parentes porta ille nomine!”. ⁶²Assi illes faceva signos al patre e le peteva como ille volerea appellar le infante. ⁶³Ille quereva un tabletta pro scriber e scribeva: “Su nomine essera Johannes”. E totes esseva meraviliate de su responsa. ⁶⁴In le mesme instante su bucca se aperiva e su lingua se disligava, e ille comenciava parlar benedicente Deo. ⁶⁵Tote su vicinos esseva sasite de un grande timor. Le gente parlava de iste cosas per tote le region collinose de Judea. ⁶⁶Omnes qui lo sentiva lo guardava in lor cordes e diceva: “Que essera de iste infante?”. Realmente le mano^[17] del Senior esseva con ille.

Cantico e prediction de Zacharia

⁶⁷Deinde le patre de Johannes esseva implite de Spirito Sancte e prophetisava con iste parolas: ⁶⁸“Benedicite sia le Senior, Deo de Israel, proque ille veniva pro adjutar e compliva le redemption de su populo! ⁶⁹Proque ille erigeva^[18] un potente salvator^[19] in le domo de su servitor David^[20], ⁷⁰como ille habeva annunciate desde tempore antique^[21] per le medio de su sancte prophetas; ⁷¹ille salva nos de nostre inimicos e del manos de qui nos odia. ⁷²Ille monstrava assi su misericordia a nostre ancestres^[22]; ille se rememorava de su sancte Pacto, ⁷³le juramento que ille faceva a nostre ancestre Abraham. Iste juramento concede ⁷⁴que nos, essente delivrate del mano de nostre inimicos, pote servir le sin timor, ⁷⁵in sanctitate e justitia coram ille tote le dies de nostre vita. ⁷⁶E tu, infante, essera appellate le propheta del Altissimo, proque tu vadera ante le Senior pro preparar su vias, ⁷⁷pro dar a su populo cognoscentia del salvation, que lor peccatos es pardonate. ⁷⁸ Gratias al tenere misericordia^[23] de Deo, visitara nos le sol nascente que veni del celo, ⁷⁹pro illuminar les qui vive in le tenebras e sede in le umbra del morte; pro diriger nostre passos sur vias de pace”.

⁸⁰Assi le infante cresceva e se fortificava in le spirito, e remaneva in le deserto usque le die de su manifestation a Israel.

Notas

1. O “ministros”.
2. O “catechisate”.
3. Secundo 1 Chronicas 24:10, il habeva vinti quatro subdivisiones de sacerdotes que serviva a torno in le templo de Jerusalem. Le gruppamento de Abia esseva le octave.
4. O “un filia”.
5. O “convertira”.
6. O “disobedientes”.
7. O “disgratia”. Non haber filios esseva tunc considerate un disgratia, un vergonia.
8. O "virgine".
9. O "patre".
10. O “Israel”.
11. O "non habera plus fin".
12. I. e. habeva relationes sexual.
13. Let. “io non cognosce un viro”.
14. O “parente”.
15. O “ille qui es potente”.
16. O “imaginationes de lor corde”.
17. Le presentia, direction e favor de Deo; cfr. Actos 7:9.
18. “Erigeva” significa pro Deo apportar qualcosa de significative, pregnante super le scena del historia.
19. Litt. un “corno de salvation” es un figura que se refere al potentia del Messia e su habilitate de protection, assi como un corno refere se a lo que un animal emplea pro attaccar e defender se (cfr. Psalmos 75:4-5,10; 148:14; 2 Samuel 22:3). Ergo, le significato de isto es: “un potente salvator”.
20. Isto es un referentia al descendentia davidic del Messia.
21. O “desde le eternitate”
22. O “patres”.
23. Let. “entranias de misericordia”.