Biblia/Nove Testamento/Marco/Marco 5

Marco

5

Jesus sana un homine possedite de un demonio

¹Assi illes perveniva al altere latere del laco in le region del gerasenes. ²Quando Jesus descendeva del barca, un homine possedite de un spirito immunde sortiva del sepulcros pro incontrar le. ³Iste homine viveva in le cavas funerari e non poteva plus esser retenite, non mesmo con un catena. ⁴Quandocunque ille esseva incatenate, ille succedeva rumper le catenas ab su carpos e fracassava le manilias. Nemo esseva bastante forte pro domar le. ⁵Jorno e nocte ille errava inter le cavas funerari e sur le colles, clamante e incidente su proprie corpore con lapides acute. ⁶Quando Jesus esseva ancora a un certe distantia, celle homine le videva, curreva pro incontrar le, e se prosternava ante ille. ⁷Con un grande crito ille diceva: “Lassa me in pace, Jesus, Filio del Deo Altissime! Io te implora per Deo: non tormenta me!”. ⁸Quia Jesus le habeva jam dicite: “Sorti, spirito immunde, ab iste homine!”.

⁹Alora Jesus le demandava: “Qual es tu nomine?”, e ille replicava: “Mi nomine es Legion, quia nos es multes”. ¹⁰Le spiritos immunde le deprecava repetitemente non expeller les extra celle region. ¹¹Ibi, sur le flanco del colle, il habeva un grande grege de porcos que pasceva. ¹²E le spiritos demonic le deprecava dicente: “Manda nos in celle porcos. Permitte que nos entra in illos!”. ¹³Alora Jesus les lo permitteva. Assi le spiritos immunde sortiva de celle homine e entrava in le porcos. Igitur celle integre grege de circa duo milles porcos se jectava con grande impeto per le precipitio in le laco e necava.

¹⁴Le pastores qui los pasceva fugiva a in le citate vicin e in le agros e diffundeva le nova. Alora le gente de celle citate sortiva e veniva vider lo que habeva occurrite. ¹⁵Illes veniva a Jesus e videva le homine qui habeva essite possedite per le legion de demones. Ille sedeva ibi, vestite e con un mente perfectemente san, e omne illes se espaventava. ¹⁶Qui habeva vidite lo que habeva occurrite reportava al alteres del homine possedite per un demonio, e del porcos. ¹⁷Alora illes incipeva rogar Jesus quitar celle region e lassar les in pace.

¹⁸Quando Jesus montava in le barca, le homine qui habeva essite possedite per demonios le demandava remaner con ille. ¹⁹Ma Jesus non le lo permitteva, ma le diceva: “Vade a domo a tu familia e reporta a illes quanto le Senior ha facite pro te e como ille ha habite compassion de te”. ²⁰Assi celle homine partiva e incipeva proclamar trans le Decapolis^[1] quanto Jesus habeva facite pro ille, e de isto omnes esseva stupefacite.

Restauration e curation

²¹Alora Jesus retornava in le barca e transiva al altere latere del laco, ubi un grande turba habeva convenite pro incontrar le sur le litore. ²²ibi, le presidente del synagoga local, cuje nomine esseva Iairo, quando videva Jesus se prosternava ante le. ²³Ille multo le deprecava dicente: “Mi filietta es sur le punto de morir. Veni, impone tu manos sur illa ut sia sanate e vive”. ²⁴Jesus, ergo, vadeva con ille, e un grande turba le sequeva e premeva contra ille.

²⁵Un femina in le turba pativa desde dece-duo annos de constante hemorrhagias. ²⁶Per longe tempore illa jam habeva multo suffrite per inutile interventiones de medicos, e expendite toto lo que illa habeva pro pagar les. Su condition, in vice de meliorar, habeva de facto pejorate.

²⁷Quando illa audiva de Jesus, illa se immisceva al turba, succedeva pervenir retro Jesus e tangeva su vestimento. ²⁸Quia illa pensava: “Si solmente io pote tanger su vestimento, io essera sanate”. ²⁹Assi subito su hemorrhagia cessava e illa poteva sentir in su corpore que illa habeva essite sanate de su terribile condition. ³⁰Jesus subito comprendeva que un fortia de curation habeva sortite de ille. Ille assi se verteva in le turba e diceva: “Qui tangeva mi vestimento?”. ³¹Su discipulos, surprendite, le diceva: “Tu vide que le turba preme circa te. Como pote tu dicer: “Qui me tangeva?”. ³²Ille, tamen, continuava circumspicer pro vider qui lo habeva facite. ³³Alora le femina, espaventate, qui tremeva proque comprendeva lo que la habeva evenite, veniva e se prosternava ante ille e le diceva le veritate super lo que illa habeva facite. ³⁴E Jesus la diceva: “Filia, tu fide te ha sanate. Vade in pace: tu suffrentia ha terminate^[2].

³⁵Durante que Jesus ancora parlava, veniva gente ab le domo de Iairo, le presidente del synagoga. Illes le diceva: “Tu filia ha morite. Il non plus necessa importunar in ultra le Magistro”. ³⁶Jesus, tamen, audiva celle conversation e diceva a Iairo: “Non time: crede solmente!”. ³⁷Deinde Jesus stoppava le turba e non permitteva plus a alicuno de sequer le, excepte Petro, Jacobo e Johannes (le fratre de Jacobo). ³⁸Quando illes perveniva al domo del presidente del sinagoga, Jesus videva un tumulto: il habeva gente qui plorava e multo se lamentava. ³⁹Assi ille entrava in le domo e demandava: “Proque vos es tanto turbate e plora? Le juvenetta non ha morite, ma illa solmente dormi”. ⁴⁰In audir iste parolas le gente le irrideva, ma ille faceva sortir omnes e conduceva le patre e le matre del juvenetta con su tres discipulos a in le camera ubi jaceva le juvenetta. ⁴¹Pois, prendente delicatemente le mano de illa, la diceva: “Talitha koum,” que significa: “Juvenetta, leva te^[3]!”. ⁴²E le juvenetta, qui habeva dece-duo annos, se levava e incipeva ambular. In vider isto, illes esseva del toto surprendite e stupefacite. ⁴³Jesus les ordinava strictemente que nemo haberea debite saper lo que habeva evenite e les diceva de dar al juvenetta alco a mangiar.

Notas

1. Le region del Dece Citates.
2. O “Sia sanate de tu maladia”.
3. O “surge”.