Biblia/Nove Testamento/Mattheo/Mattheo 10

←Mattheo 9

Le Biblia in Interlingua Mattheo

Mattheo 11→

Mattheo

10

Jesus invia le dece-duo apostolos

¹Jesus convocava su dece-duo discipulos e les dava potestate super le spiritos immunde ut expeller los e sanar omne sorta de maladias e infirmitates. ²Istos es le nomines del dece-duo apostolos: le prime, Simon, appellate alsi Petro, e Andrea su fratre, e Jacobo, le filio de Zebedeo, e Johannes, su fratre; ³Philippo e Bartholomeo, Thomas e Mattheo, le collector de impostos, Jacobo, filio de Alpheo, Thaddeo, ⁴Simon, le zelote, Judas Iscariot, qui plus tarde le haberea traite.

⁵Jesus inviava le dece-duo apostolos e les dava iste instructiones: “Non vade per un via que conduce al regiones del paganos, e non entra in le citates del Samaritanos. ⁶sed plus tosto vade al populo de Israel, le oves perdite de Deo. ⁷Vade e annuncia a illes que le Regno del Celos se approximava. ⁸Sana le infirmos, resuscita le mortos, munda le leprosos, expelle demones; gratis vos recipeva, gratis va dar. ⁹Non prende monetas de auro, argento o cupro in vostre cinctura, ¹⁰nulle bursa de viage o un tunica supplementari, e non mesmo sandalias o un virga, quia le laborator es digne de reciper le nutrimento que ille necessa. ¹¹Quandocunque vos entra in un citate o in un village, cerca ibi un persona digne de fiducia e remane hospite de su casa usque vos parti de ille citate. ¹²Quando vos entra in ille domo, benedice^[1] su residentes. ¹³E si illes^[2] es digne, que vostre benediction^[3] remane super illes, ma si non, retrahe ille benediction. ¹⁴E si alicuno non da vos le benvenita o refusa audir vostre message, quando vos parti de ibi succute vostre pedes de su pulvere. ¹⁵In veritate io dice vos que il essera plus tolerabile le castigation que cadeva super le region de Sodoma e Gomorra in le die del giudicio que lo que evenira a ille citate!

Le persecution del discipulos

¹⁶Ecce, io manda vos sicut oves in le medio de lupos; sia prudente sicut serpentes e simplice sicut columbas. ¹⁷Guarda vos del homines, quia illes livrara vos a tribunales e verberara vos in lor synagogas. ¹⁸Vos essera portate coram governatores e reges propter me^[4]. Isto essera pro vos un opportunitate de testimonio verso illes e le gentes. ¹⁹Quandocunque vos essera arrestate e portate coram judices, non preoccupa^[5] vos quomodo parlar o quid dicer, quia Deo dara vos le parolas juste a dicer al tempore opportun. ²⁰Quia non essera vos a parlar - il essera le Spirito de vostre Patre a parlar per vostre medio.

²¹Un fratre traira su fratre pro facer le morir, e un patre traira su proprie filio. Filios insurgera contra lor parentes e facera que illes sia occidite. ²²Vos essera odiate de omnes propter mi nomine. Qui, tamen, perseverara usque al fin essera salvate. ²³Quandocunque illes persecuta vos in un citate, fugi a in un altere. In veritate io dice vos que vos non terminara de visitar tote le citates der Israel donec le retorno^[6] del Filio del homine.

²⁴Un discipulo non es plus eminente que su magistro, ni un servo plus eminente de su domino. ²⁵Pro le discipulo il suffice esser sicut su magistro, e le servo sicut su domino. Si illes vocava le patre del famila Beelzebul, quanto magis le membros de su familia!

Time Deo, non homines!

²⁶Ergo, non time illes, quia il ha nihil occulte que non essera revelate e nihil secrete que non essera rendite cognoscite. ²⁷Quid io dice vos in le tenebras, proclama lo in le lumine, e quid es susurrate in vostre aures, proclama lo sur le terassas de vostre domo a que omnes lo audi! ²⁸Non time illes qui occide le corpore ma non pote occider le anima. Time Deo solmente, le qual pote destruer tanto le anima quanto le corpore in le inferno.

²⁹Qual es le precio de duo passeres - un moneta de cupro! Nonobstante, non mesmo un de illos cade in terra sin le voluntate de vostre Patre. ³⁰Mesmo tote le capillos de vostre capite es numerate. ³¹Ergo, non time: vos es multo plus preciose quam multe passeres.

³²Omnes, ergo, qui me confessara coram le homines, io alsi les confessara coram mi Patre, qui es in Celo; ³³Tamen, quicunque me denegara coram homines, io alsi les denegara coram mi Patre, qui es in Celo.

³⁴Non suppone que io veniva portar pace in terra! Io non veniva portar pace, ma un gladio! ³⁵Io veniva poner un homine adverso su patre, e un filia adverso su matre e un filia affin adverso su matre affin, ³⁶e le inimicos de un homine essera le membros ipse de su familia^[7].

³⁷Quicunque ama patre o matre plus quam me, non es digne de me, e quicunque ama filio o filia plus quam me, non es digne de me. ³⁸E quicunque non prende su proprie cruce e me seque non es digne de me. ³⁹Quicunque se attacca^[8] a su vita^[9] la perdera; e qui perde su vita propter me, la retrovara.

⁴⁰Qui recipe vos, recipe me; e qui me recipe, recipe ille qui me mandava. ⁴¹Qui recipe un propheta in le nomine de un propheta^[10], recipera le mesme recompensa de un propheta. Qui recipe un justo in le nomine de un justo recipera le mesme recompensa de un justo^[11]. ⁴²E quicunque da solmente un cuppa de aqua frigide a biber mesmo al minime de illes qui me seque^[12], ille certo non perdera su recompensa.

Notas

1. Litt. “saluta”.
2. Litt. “ille domo”, metonymia.
3. O “pace”.
4. “Proque vos es mi discipulos”.
5. O “non cogita in vos mesme”.
6. O “advento”.
7. Allusion a Michea 7:6.
8. Litt. “trova”.
9. Litt. “anima”.
10. O “como uno qui parla in le nomine de Deo”.
11. O “propter su justitia”.
12. O “iste minimes”, le adherentes al movimento christian.