Biblia/Nove Testamento/Mattheo/Mattheo 12

Mattheo

12

Un discussion re le Sabbato

¹In ille tempore, in un die del Sabbato, Jesus transiva per agros de grano. Su discipulos habeva fame, assi illes incipeva eveller spicas e mangiar los. ²Alcun phariseos tamen, vidente lo, diceva: “Reguarda! Tu discipulos face quid non es licite facer in un die de Sabbato!”. ³Alora Jesus les diceva: “Esque vos non legeva in le Scripturas quod David faceva quando ille e su companiones habeva fame? ⁴Illes entrava in le domo de Deo e, infringente le lege, illes mangiava le panes sacrate^[1] que solmente al sacerdotes esseva permittite mangiar. ⁵Esque vos non legeva in le Lege que le sacerdotes in servicio al Templo pote de facto laborar in le dies de Sabbato sin violar lo^[2]? ⁶Io vos dice que hic il ha alcuno^[3] mesmo major que le Templo! ⁷Ma vos non haberea condemnate mi innocente discipulos si vos cognosceva le significato de iste texto del Scriptura: “Io vole misericordia e non sacrificio^[4]”. ⁸Quia le Filio del Homine es Senior, mesmo super le Sabbato!”.

Jesus sana in un die de Sabbato

⁹Jesus, inde, quitava celle placia e entrava in lor synagoga. ¹⁰Il habeva ibi un homine con un mano contrahite e paralysate^[5]. Le phariseos demandava a Jesus: “Esque le Lege permitte a un persona de facer un labor de sanamento in un die de Sabbato?”. Illes sperava que Jesus respondeva si, assi illes haberea potite accusar le. ¹¹Ma ille respondeva: “Si vos habeva un ove que cadeva in un puteo in un die del Sabbato, esque vos non laborarea trahente lo foras? Certemente. ¹²Un homine ha plus valor que un ove, nonne? Si, le Lege permitte a un persona de facer le ben in un die de Sabbato”. ¹³Tunc ille diceva al homine: “Extende tu mano!”. Ille lo extendeva e esseva restablite, san sicut le altere! ¹⁴Alora le phariseos exiva e convocava un reunion pro conspirar quomodo facer perir Jesus.

Jesus, le Servitor que Deo eligeva

¹⁵Quando Jesus tamen, esseva informate re isto, ille quitava celle loco. Multitudines le sequeva e ille sanava omne infirmos que il habeva inter illes. ¹⁶Ille tamen, les preveniva non revelar qui ille es. ¹⁷sto compliva quod le propheta Isaia habeva dicite concernente ille: ¹⁸Ecce mi Servitor, quem io eligeva. mi dilecte, del qual io me complace. Io ponera mi Spirito sur ille, e ille proclamara le justitia al nationes. ¹⁹Ille non contendera ni clamara, ni alicuno audira su voce in le vias. ²⁰Ille non frangera un canna tundite o extinguera un micca fumante, donec ille causara le victoria del justitia. ²¹E su nomine essera le sperantia del mundo integre^[6]”.

Jesus e le prince del demones

²²Tunc il esseva portate a Jesus un demoniaco que esseva cec e non poteva parlar. Ille sanava celle homine tanto que nunc ille poteva sia parlar, sia vider. ²³Omnes in le turba esseva stupefacite de isto e diceva: “Poterea iste Jesus esser le Filio de David?”. ²⁴Quando le phariseos audiva re iste miraculo, illes diceva: “Non sia stupefacite que ille pote expeller demones: ille recipe su potestate ab Satan, le prince del demones!”. ²⁵Jesus sapeva lo que illes cogitava e replicava: “Omne regno dividite in se mesme per un guerra civil^[7] non pote subsister, e un citate o familia fragmentate per querelas risca esser destruite. ²⁶Si Satan expelle Satan, ille es dividite e lucta contra se mesme. Como ergo un tal regno poterea subsister? ²⁷E si io traheva mi potestate ab Satan, que poterea on dicer super vostre proprie exorcistas? Etiam illes expelle demones, nonne? Assi illes certo condemnarea vos pro lo que vos ha dicite. ²⁸Si io tamen expelle demones per le Spirito de Deo, alora le Regno de Deo de facto perveniva inter vos. ²⁹Como poterea alicuno entrar in le domo de un homine forte e rapinar su benes? Solmente si ille es ancora plus forte - alicuno qui pote ligar tal homine forte: solmente tunc ille poterea rapinar su domo.

³⁰Qui non es con me, es contra me; e qui non collige con me, disperge. ³¹Propter isto io vos dice: omne peccatos e blasphemias pote esser remittite, ma le blasphemia contra le Spirito Sancte non essera remittite. ³²Quicunque parla contra le Filio del Homine, a ille pote esser pardonate, ma quicunque parla contra le Spirito Sancte, a ille nunquam essera pardonate, nec in iste tempore,^[8] nec in futuro^[9].

Le arbores e lor fructos

³³Le natura de un arbore se determina per su fructos. Si le arbore es bon, su fructos essera bon alsi. Si un arbore es mal, su fructos essera mal alsi. ³⁴Vos es un nidata de viperas! Quomodo poterea vos determinar lo que es bon, vos, qui es mal? Quia quecunque es in vostre cordes, determina lo que vos dice^[10]. ³⁵Un persona bon trahe bon cosas ex le coffro de un corde bon, e un persona mal trahe cosas mal ex le coffro^[11] de un corde mal. ³⁶E io vos dice isto: in le die del judicio vos debera dar conto de omne parola otiose que vos dice. ³⁷Sur le base de lo que vos dice, vos essera o absolvite^[12] o condemnate.

Le signo de Jonas

³⁸Tunc alicun expertos del lege^[13] e phariseos accedeva a Jesus e le diceva: “Magistro, nos volerea vider te facer pro nos un miraculo^[14] demonstrative. ³⁹Ma ille les respondeva: “Solmente un generation mal e adultere require vider miraculos, ma le sol signo que io es preste a dar les es le signo del propheta Jonas. ⁴⁰Quia sicut Jonas remaneva in le ventre del grande pisce tres dies e tres noctes, assi le Filio del Homine remanera in le corde del terra tres dies e tres noctes.

⁴¹In le die del judicio le gente de Ninive surgera contra iste generation e lo condemnara, quia propter le predication de Jonas illes se repentiva de lor peccatos. Ora, alicuno plus eminente que Jonas es hic - ma vos refusa repentir vos! ⁴²In le die del judicio le regina de Sheba^[15] alsi surgera contra iste generation e lo condemnara, quia illa habeva venite ab un terra lontan solmente pro audir le sapientia de Salomon. Ora, alicuno plus eminente de Salomon es hic - ma vos refusa ascoltar le!

Le retorno del spirito immunde

⁴³Quando un spirito immunde sorti ex un persona, illo ambula trans locos aride querente reposo, ma illo non lo trova. ⁴⁴Alora illo dice: “Io retornara a in le domo ex le qual io sortiva. Assi illo retorna e lo trova vacante, scopate, munde e in ordine. ⁴⁵Deinde le spirito va trovar septe altere spiritos, plus mal que ille ipse, e entrante, illos lo selige qua lor habitation, tanto que le condition de celle persona deveni pejor que antea. Assi essera pro iste mal generation”.

Le ver familia de Jesus

⁴⁶Durante que Jesus ancora parlava al turbas, su matre e fratres veniva e stava foras, querente parlar con ille. ⁴⁷Qualcuno le diceva: “Ecce, tu matre e tu fratres veniva e sta foras querente parlar con te”. ⁴⁸A ille qui habeva dicite isto, Jesus replicava: “Qui es mi matre, e qui es mi fratres?”. ⁴⁹E extendente su mano verso su discipulos, Jesus diceva: “Ecce mi matre e mi fratres! ⁵⁰Proque quicunque face le voluntate de mi Patre qui es in Celo es mi fratre, soror e matre!”.

Notas

1. Vide Exodo 25:30; 35:13; 39:36; Levitico 24:5-9.
2. Vide 1 Samuel 21:1-6.
3. O “qualcosa”.
4. Un citation ab Hosea 6:6 (vide alsi Mattheo 9:13).
5. Litt. “aride”.
6. O “in su nomine le gentes sperara”.
7. itt. “dividite contra se ipse”.
8. O “seculo”, “mundo”.
9. O “le etate futur”.
10. Litt. “le bucca parla ex le abundantia de vostre cordes”.
11. “thesauro”.
12. O “justificate”.
13. O “scribas”.
14. “signo”.
15. Litt. “del Sud”.