Biblia/Nove Testamento/Mattheo/Mattheo 26

←Mattheo 25

Le Biblia in Interlingua Mattheo

Mattheo 27→

Mattheo

26

Le conspiration pro occider Jesus

¹Quando Jesus terminava dicer tote iste cosas, ille diceva a su discipulos: ²“Vos sape que post duo dies comenciara le Pascha e le Filio del Homine va esser consignate ut sia crucifigite”. ³Tunc se congregava le principal sacerdotes e le ancianos in le residentia del summe sacerdote, que se appellava Caiapha. ⁴Illes habeva convenite pro consultar se e decider como sasir Jesus furtivemente e occider le. ⁵Ma illes diceva: “Vamos non facer lo, tamen, in le dies del festa, ut non provocar un tumulto inter le populo”.

Le unction de Jesus

⁶Ora, durante que Jesus esseva in Bethania in le domo de Simon, un homine que previemente habeva habite le lepra^[1], ⁷un femina accedeva a ille con un olla de alabastro continente un unguento perfumate dispendiose e illa lo effundeva super su capite dum illes esseva al tabula. ⁸Quando le discipulos videva isto, illes se indignava e diceva: “Quare facer un tal dissipation? ⁹Ille unguento haberea potite esser vendite a car precio e le moneta date al pauperes!”. ¹⁰Jesus, tamen, audite iste remarca^[2], les diceva: “Quare molesta vos iste femina? Illa faceva pro me un cosa bon. ¹¹Vos semper habera pauperes inter vos, ma non semper vos habera me! ¹²Quando illa effundeva iste unguento super me, illa lo faceva pro preparar mi corpore pro le inhumation. ¹³Io dice vos le veritate: ubicunque iste evangelio essera proclamate in le mundo integre, quid illa ha facite essera alsi contate in memoria de illa”.

Le plano de trair Jesus

¹⁴Tunc, un del dece-duo, qui se appellava Judas Iscariot, vadeva ad le principal sacerdotes, ¹⁵e diceva: “Si io consigna Jesus in vostre manos, quanto volerea vos pagar me?”. Assi illes establiva pro ille le precio de trenta monetas de argento.¹⁶Desde ille tempore, Judas quereva le melior opportunitate pro trair le.

Le Pascha

¹⁷Ora, in le prime die del festa del Azymos^[3] le discipulos accedeva a Jesus e le diceva: “Ubi vole tu que nos prepara le repasto paschal?”. ¹⁸Ille diceva: “Vade a in le citate ad un certe homine e dice le: ‘Le Magistro dice: ‘Mi tempore se approximava. Io va observar le Pascha con mi discipulos in tu domo^[4]’”. ¹⁹Assi le discipulos faceva sicut Jesus les habeva instruite facer, e illes preparava le repasto paschal.^{[5] 20}Quando veniva le vespere, ille se assideva con le dece-duo al tabula. ²¹Durante que illes mangiava, ille diceva: “Io dice vos le veritate: il ha uno inter vos qui me traira”. ²²In audir isto, illes se contristava valde, e incipeva cata uno de illes a dicer le: “Certo io non es tal persona, Senior, nonne?”. ²³Ille respondeva: “Me traira qui ha justo immergite con me le pan in le mesme scutella^[6]. ²⁴Le Filio del homine vadera sicut il es scribite de ille in le Scripturas Sancte, ma guai a ille homine per le qual le Filio del Homines es traite! Il haberea essite melio si ille homine nunquam habeva nascite!”. ²⁵Alora Juda, ille qui le habera traite, diceva: “Esque io es ille?”. E Jesus le diceva: “Tu ipse lo diceva”.

Le ultime Cena

²⁶Durante que illes cenava, Jesus prendeva un pan e lo benediceva. Pois ille lo frangeva in pecias e los dava a su discipulos, dicente: “Prende e mangia lo, quia isto es mi corpore”. ²⁷Deinde ille prendeva le calice del vino e rendeva gratias pro illo. Ille lo dava a su discipulos e diceva: “BVos omnes bibe ex iste calice, ²⁸quia isto es mi sanguine, le sanguine del pacto que pro multes es effundite in remission del peccatos. ²⁹Io dice vos que desde nunc io non bibera plus de iste fructo del vinia usque al die in le qual io lo bibera de novo con vos in le regno de mi Patre”. ³⁰De post haber cantate le psalmos^[7], illes sortiva verso le Monte del Oliveto.

Le prediction del renegamento de Petro

³¹Pois Jesus les diceva: “Iste nocte mesme vos omnes essera scandalisate propter me e me desertara. Quia le Scripturas dice: ‘Deo percutara le pastor, e le oves del grege essera dispergite^[8]’, ³²ma postquam mi resurrection, io precedera vos in Galilea”. ³³Petro le respondeva: “Mesmo si omnes se essera scandalisate de te, io nunquam te desertara”. ³⁴Ma Jesus le diceva: “Io te dice le veritate: iste nocte mesme, ante que le gallo va cantar, tu me denegara tres vices”. ³⁵Petro le diceva: “Mesmo si io debe morir con te, io nunquam te denegara!”. E tote le discipulos diceva le mesmo.

Le oration de Jesus in le Gethsemani

³⁶Tunc Jesus vadeva con illes al oliveto appellate Gethsemani, e ille diceva al discipulos: “Sede hic, donec io vade illac a precar”. ³⁷Ille prendeva con se Petro e le duo filios de Zebedeo, e incipeva esser multo contristate e perturbate. ³⁸Tunc ille les diceva: “Mi anima es in un pena mortal^[9]. Remane hic e vigila con me”. ³⁹E vadente un poco plus in ultra, ille se prosterneva con su facie super le terreno e precava: “Patre mie, si il es possibile, que iste calice de suffrentia sia portate via ab me. Tamen, non sicut io vole, ma sicut tu vole”. ⁴⁰Assi ille retornava ad su discipulos e les trovava dormiente. Ille diceva a Petro: “Assi tu non poteva vigilar con me mesmo un hora? ⁴¹Vigila e preca ut vos non entra in tentation. Le spirito es prompte, ma le carne es debile^[10]”. ⁴²Deinde Jesus les quitava un secunde vice, e precava: “Patre mie, si iste calice non pote esser portate via nisi io lo bibe, sia facite tu voluntate”. ⁴³llle retornava e les trovava itero dormiente: illes non poteva tener lor oculos aperte. ⁴⁴Assi, relinquite les, ille retornava a precar pro le tertie vice, dicente le mesme parolas. ⁴⁵Tunc ille veniva al discipulos e diceva: “Nunc continua dormir e reposar; ecce le hora se approxima: le Filio del homine va esser livrate in le manos de peccatores. ⁴⁶Leva vos. Vamos, ille qui me trai se approxima”.

Traition e Arresto

⁴⁷Durante que ancora ille parlava, Judas, uno del dece-duo, arrivava con un grande turba de homines armate de gladios e fustes. Illes habeva essite mandate del sacerdotes principal e del ancianos del populo. ⁴⁸(Ora le traitor le habeva date un signo, dicente: “Vos sapera qui vos debe arrestar quando vos me vide salutar le con un basio”. ⁴⁹Subito ille accedeva a Jesus e exclamava: “Ave, Rabbi!”, e le dava un basio. ⁵⁰Alora Jesus le diceva: “Amico, face lo que tu es hic a facer”. Assi illes accedeva, sasiva Jesus e le arrestava. ⁵¹Ma uno de illes qui esseva con Jesus, extendente le mano, extraheva su gladio e percuteva le servo del summe sacerdote, amputante un de su aures. ⁵²Alora Jesus le diceva: “Repone tu gladio in su loco, quia omnes qui prende le gladio, perira per le gladio. ⁵³Suppone tu que io non poterea rogar a mi Patre que ille me manda plus que dece-duo legiones de angelos a custodiar nos, e que ille los mandara subito? ⁵⁴Como, ergo, se complirea le Scriptura super lo que debe evenir? ⁵⁵In ille momento Jesus diceva al turba: “Esque vos sortiva con gladios e fustes a arrestar me como si io esseva un criminal? Die post die io sedeva in le cortes del templo, ma vos non me arrestava. ⁵⁶Isto, tamen, eveniva ut le Scripturas del prophetas se complirea”. Assi, omne su discipulos, derelinquente le, fugiva.

Condemnate per le Sanhedrin

⁵⁷Ora, illes que habeva arrestate Jesus le conduceva a Caiapha, le summe sacerdote, in cuje domo le expertos del lege^[11] e le ancianos habeva convenite. ⁵⁸Ma Petro le sequeva de longe usque al corte del summe sacerdote. Post haber entrate, ille se poneva a seder insimul al guardas, ut vider lo que haberea evenite. ⁵⁹Le principal sacerdotes e le integre concilio essayava trovar false testimonios contra Jesus, ut condemnar le a morte. ⁶⁰Ma illes non los trovava, nonobstante que multe false testes accedeva. Finalmente duo se proponeva, ⁶¹e declarava: “Iste homine diceva: “Io pote destruer le templo de Deo e reconstruer lo in tres dies”. ⁶²Assi se levava le summe sacerdote e le diceva: “Responde tu nihil? Quid es lo que iste testes dice contra te?”. ⁶³ Ma Jesus taceva. Le summe sacerdote le diceva: “Io te adjura per le Deo vivente, ut tu dice nos si tu es le Christo, le Filio de Deo”. ⁶⁴Jesus replicava: “Tu lo ha dicite. Ma io dice vos que desde nunc vos va vider le Filio del homine sedente in le placia de poter al dextera de Deo^[12] e veniente sur le nebulas del celo^[13]”. ⁶⁵Tunc le principal sacerdotes rescindeva lor vestimentos dicente: “Ille ha blasphemate! Quare nos ancora necessitarea de testes? Ecce nunc vos ipse audiva le blasphemia. ⁶⁶Qual es vostre verdicto?”. Illes respondeva: “Ille es culpabile e merita le morte”. ⁶⁷Tunc illes exspueva in su facie e le colpava con lor pugnos. E alcunes le colpava con le palmas de lor manos, ⁶⁸dicente: “Prophetisa a nos, tu le Christo! Qui te percuteva?”.

Petro denega Jesus

⁶⁹Intertanto Petro sedeva foras in le corte. Un juvene servitrice le accedeva dicente: “Etiam tu esseva con Jesus le Galileo!”. ⁷⁰Ma ille lo denegava coram omnes, dicente: “Io non sape quid tu dice!”. ⁷¹Quando ille, sortiente, attingeva le porta, un altere servitrice le videva e diceva al gente que stava ibi: “Iste homine esseva con Jesus le Nazareno”. ⁷²E itero ille lo denegava iste vice con un juramento: “Io non cognosce ille homine!”. ⁷³De post un poco, illes qui stava ibi accedeva e diceva a Petro: “Vero tu es un de illes, nam tu accento galilean lo revela!”. ⁷⁴Tunc ille incipeva maledicer e jurar: “Io non cognosce ille homine!”. E subito le gallo incipeva cantar. ⁷⁵Alora Petro se recordava del parola de Jesus que le habeva dicite: “Io te dice le veritate: iste nocte mesme, ante que le gallo va cantar, tu me denegara tres vices”. E ille, sortiente, plorava amarmente.

Notas

1. Litt. “le leproso”.
2. O “consciente de isto”.
3. O “panes preparate sin levatura”.
4. O “apud te”.
5. Litt. “le Pascha”.
6. Litt. “immergite con me le mano etc.”.
7. Illo es, le Hallel. Psalmos 113-118 esseva cantate durante le repasto. Psalmo 113 e 114 esseva cantate justo ante le secunde cuppa, e psalmos 115-118 esseva cantate al termino del repasto, post le quarte, o cuppa hallel.
8. Un citation de Zacharia 13:7.
9. O “Triste usque ad morte”.
10. O “infirme”.
11. O “le Scribas”.
12. Litt. “A dextera del Potentia”.
13. Un allusion a Daniel 7:13.