Biblia/Nove Testamento/Mattheo/Mattheo 8

Mattheo

8

Jesus sana un homine leprose

¹Un multitude de personas sequeva Jesus dum ille descendeva del monte. ²Subito, un homine qui esseva leprose se approximava a Jesus e, prosternente se ante ille, le diceva: “Senior, si tu vole, tu poterea mundar me”. ³Alora Jesus extendeva su mano, le tangeva e diceva: “Io lo vole. Sia mundate!”. E instantaneemente le lepra dispareva^[1]. ⁴Igitur, Jesus le diceva: “Non conta re isto a alicuno sed vade, ostende te al sacerdotes e porta le offerta que Moses prescribeva pro illes que esseva sanate del lepra^[2]. Illo essera un testimonio public que tu esseva de facto mundate”.

Le fide de un officiero roman

⁵Quando Jesus retornava a Capernaum, un officiero roman^[3] le accedeva e le rogava: ⁶“Senior, mi juvene servitor^[4] jace a lecto, paralysate e in terribile dolores”. ⁷Jesus le diceva: “Io venira e le sanara”. ⁸Le officiero, tamen, le diceva: “Senior, io non es digne que tu entra sub mi tecto, ma dice solmente de hic le parola necessari, e mi servitor essera sanate. ⁹Io lo sape proque io mesme es sub le autoritate de mi officieros superior e io ha autoritate super mi milites. Io debe solmente dicer: ‘Vade!’ e illes vade. E si io dice a mi servo: ‘Face isto!’, ille lo face”. ¹⁰Quando Jesus audiva isto, ille esseva admirate e diceva a illes que le sequeva: “Io dice vos le veritate: io nunquam trovava in tote Israel tante fide! ¹¹Io vos dice isto, que multes paganos^[5] venira ab le mundo integre - ab est e west - e, in le Regno del Celo, se sedera con Abraham, Isaac e Jacobo al mesme banchetto. ¹²Multe israelitas, tamen - illes pro le quales le Regno esseva preparate^[6] - essera jectate foras de illo in le tenebras: ibi il habera plorar e stridor de dentes”. ¹³Alora Jesus diceva al officiero roman^[7]: “Vade e te sia facite secundo tu fide!”. E le servitor esseva sanate in celle hora mesme.

Un sanamento in le domo de Petro

¹⁴Quando Jesus arrivava al domo de Petro, le matre affin de Petro jaceva a lecto febricitante. ¹⁵Jesus tangeva su mano, le febre la quitava, deinde illa se levava e incipeva preparar le un repasto^[8].

¹⁶Celle vespere, multe personas possedite per demones esseva portate a Jesus. Ille ejectava le spiritos maligne con un simple commando^[9] e sanava omnes qui esseva malade. ¹⁷Isto compliva le parola del Senior per le propheta Isaia, qui diceva: “Ille prendeva nostre infirmitates e removeva^[10] nostre maladias^[11]”.

Jesus defia illes qui le volerea sequer

¹⁸Quando Jesus videva le multe turbas circa se, ille instrueva su discipulos transir a in le altere latere del laco. ¹⁹Deinde, un experto del lege^[12] le accedeva e le diceva: “Magistro, io te sequera ubicunque tu vade”. ²⁰Ma Jesus le diceva: “Le vulpes ha cavas ubi illos se retira, e le aves del celo ha nidos, ma le Filio del Homine non ha mesmo un placia pro deponer su capite”. ²¹Un altere de su discipulos diceva: “Senior, permitte me primo retornar a domo e interrar mi patre”. ²²Ma Jesus le diceva: “Seque me nunc, e lassa que le mortos interra lor proprie mortos^[13]”.

Jesus appacia un tempesta

²³Deinde Jesus montava in le barca e incipeva transversar le laco con su discipulos^[14]. ²⁴Subito adveniva un furiose tempesta, tanto que le undas incipeva plenar le barca de aqua. Ma Jesus se habeva addormite. ²⁵Alora su discipulos vadeva eveliar le, critante: “Senior, salva nos! Nos es sur le puncto de perir!”. ²⁶Ma ille les diceva: “Quare es vos tanto espaventate? Vos ha si poc fide!”. Alora ille se levava e reprobava le vento e le undas, e subito se faceva un grande tranquillitate. ²⁷Le discipulos esseva stupefacite e exclamava: “Qual sorta de homine es iste? Mesmo le vento e le mar le obedi!”.

Jesus sana le demoniacos gadarene

²⁸Quando Jesus arrivava al altere latere del laco, in le region del gadarenos, duo homines qui esseva possedite per demones veniva contra ille. Illes sortiva de sepulcros e esseva assi violente que nemo poteva transir per celle via. ²⁹Illes incipeva critar e diceva: “Filio de Deo! Lassa nos in pace! Esque tu veniva hic pro tormentar nos ante le tempore appunctate de Deo?”. ³⁰Il accideva que longe ab illes il habeva un grande grege de porcos que pasceva. ³¹Alora le demones le rogava dicente: “Si tu ha intention de ejectar nos, manda nos in celle grege de porcos!”. ³²Jesus alora les commandava: “Vade!”. Assi le demones sortiva de celle homines e entrava in le porcos, e le grege integre se precipitava ab le scarpa abrupte del colle a in le laco e se necava in le aqua. ³³Le pastores alora fugiva e veniente in le citate vicin, contava a omnes lo que habeva evenite al homines possedite per demones. ³⁴Deinde, le integre citate exiva pro incontrar Jesus. Quando illes le videva, illes le rogava quitar celle region.

Notas

1. O “esseva mundate”.O “esseva mundate”.
2. Vide Levitico 14:2-32.
3. O “un centurion”.
4. O “puero”. Alsi in 8:13; 8:17 e Isaia 53:4.
5. “Paganos” o “Gentiles” es implicate hic.
6. Litt. “Le filios del Regno”.
7. O “centurion”.
8. O “servir le”.
9. O “con un parola”.
10. O “portava”.
11. Cfr. Isaia 53:4.
12. O “scriba”.
13. Illes qui es spiritualmente morte.
14. Litt. “e su discipulos le sequeva”.