Biblia/Nove Testamento/Petro/Introduction

Introduction a 1 Petro

Le prime littera de Petro exhorta reflecter sur le natura del vita christian initiate con le Baptismo, e illo vole adjutar a superar le proba del persecution. Illo face referentia al morte e al resurrection de Christo, Agno innocente e Servo suffrente. Su exemplo revela al christianos le senso del martyrio e indica, in le patimentos acceptate con amor, le via secur pro abandonar definitivemente le peccato e consequer le gaudio promittite al persecutates pro le justitia. Inter su themas il ha le sacerdotio regal de omne cristianos (2:9), le condition del christiano in le mundo (2:11-17), le vita in familia (3:1-2), le exhortation al capites del communitate christian (5:1-4).

Iste littera es scribite con un bon lingua grec e illo observa le costumes del stylo epistolari antique, con adresse, introduction e salutes; ma ab 1:3 a 5:11 iste scripto se developpa como un grande exhortation, ubi le thema del Baptismo es central. Plure eruditos recognosceva in illo fragmentos de un liturgia baptismal. In ultra a formulas liturgic, illo contine listas de vicios e de virtutes. Reaffirmate es le thema del sperantia christian fundate super le resurrection de Jesus. Iste virtute sustene le cristianos durante le probas e les rende secur del hereditage que les expecta.

Le autor se presenta como “Petro, un apostolo de Jesus Christo” (1:1), “teste del patimentos de Christo” (5:1). Le authenticitate de iste epistola es confirmate per le traditiones antique. Iste scripto, de facto, face nos vider alicun characteristicas del ambiente in le qual Petro viveva, reminiscentias evangelic que in iste epistola es plus numerose de illos que recurre in tote le scriptos de Paulo; un certe typo de predication (cfr. le discursos de Petro in Actos 2:14-36; 3:12-26; 10:34-43); familiaritate con le lingua grec; adjuta de collaboratores-secretarios como Sylvano (5:12). Forsan il es justo a Sylvano, le discepulo al qual Petro confideva le redaction del epistola, probabilemente in le prime annos 60. Iste epistola es adressate al christianos del cinque provincias roman del Asia Minor. Se tracta de communitates formate de christianos de origine pagan. De facto illo se refere a lor passate stylo de vita pagan: “Il suffice le tempore que vos passava antea in facer lo que gente impie gaude facer - luxurias, concupiscentias, vinolentias, orgias, partitas disfrenate e abominabile cultos idolatric” (4:3). Le persecution alludite in iste epistola non es a identificar con illo promovite per le autoritate del stato, ma plus tosto con le hostilitate e le constante repulsa que ille christianos subiva in lor ambiente.

Introduction a 2 Petro

Le secunde littera de Petro affronta un situation dramatic. Maestros de false ideas christian se habeva introducite in le communitates christian del Asia Minor e doceva que le universo es immutabile, deridente illes que expectava le retorno del Senior. Illes justificava, pois, lor conducta immoral torquente le significato del Scripturas a lor favor. Le autor de iste epistola les reprocha fortemente e exhorta le fideles a perseverar in le fide. Ille declara que on non pote parlar de “retardo” del retorno del Senior, proque pro Deo “mille annos es sicut un die” (Salmo 90:4). Ille sublinea que le benes de iste mundo es provisori, proque “le celos e le terra de hodie esseva reservate al foco. Illos es servate pro le Die del Judicamento, quando se complira le perdition del personas impie” (3:7). In vice, il necessa coler le sperantia in le promissa de: “nos expecta nove celos e un nove terra, in le quales habita le justitia” (3:13).

Le secunde littera de Petro non se presenta in le forma typic de un littera. Illo es troppo generic, incipe con un hymno de laude e ha nulle salutes final. De facto, iste scripto es un exhortation in le forma de littera e pote esser comprendite inter le “discursos de adeo” (cfr. Johannes 13-17; Actos 20:18-35; 2 Timotheo 4:1-5), in le quales le ultime tempores es presentate generalmente como tempores de grande calamitates.

Il es opinion del plus parte del eruditos que le author de iste littera non haberea potite esser le apostolo Petro ipse. Verso le fin del prime seculo o le comenciamento del secunde, un persona autoritari del Ecclesia colligeva, probabilemente in Roma, pensamentos e messages que se refereva al apostolo Petro. In omne caso, anque 2 Petro es Parola de Deo canonic, si como il es recognoscite unanimemente de omne le ecclesias. Le destinatarios es christianos del Asia Minor, convertite del paganismo.