Biblia/Nove Testamento/Revelation/Revelation 7

Revelation

7

Le populo de Deo essera preservate

¹Deinde io videva quatro angelos qui stava al quatro angulos del terra e qui reteneva le quatro ventos del terra a que illos non flava ni super le terra, ni super le mar, ni super ulle arbore. ²E io videva un altere angelo qui ascendeva ab oriente e qui habeva le sigillo del Deo vivente. Ille clamava in alte voce a ille quatro angelos, al quales esseva date le poter de nocer al terra e al mar. ³Ille les diceva: “Non noce ni al terra, ni al mar, ni al arbores, donec nos pone le sigillo de Deo sur le fronte del servitores de nostre Deo”.

⁴E io audiva le numero del personas que esseva marcate con le sigillo de Deo - 144.000 esseva marcate ex omne le tribus del populo de Israel^[1]. ⁵Del tribu de Juda, 12,000 esseva sigillate, del tribu de Reuben, 12,000, del tribu de Gad, 12,000, ⁶del tribu de Asher, 12,000, del tribu de Naphtali, 12,000, del tribu de Manasseh, 12,000, ⁷del tribu de Simeon, 12,000, del tribu de Levi, 12,000, del tribu de Issachar, 12,000, ⁸del tribu de Zebulun, 12,000, del tribu de Joseph, 12,000, del tribu de Benjamin, 12,000 esseva sigillate.

Laude ab le grande turba

⁹Deinde io videva un grande turba, que nemo poteva numerar, ex omne gente e tribu e populos e linguas, que stava ante le throno e coram le Agno. Illes esseva vestite de robas albe e in lor manos illes habeva brancas de palma. ¹⁰Illes clamava in alte voce dicente: “Le salvation pertine a nostre Deo, qui sede super le throno, e al Agno!”. ¹¹E omne angelos stava circa le throno, circa le ancianos e le quatro creaturas vivente. Illes se prosterneva coram le throno con lor fronte a terra e adorava Deo. ¹²Illes cantava^[2]: “Amen! Benediction, gloria, sapientia, actiones de gratia, honor, potentia, e fortitude pertine a nostre Deo, per le seculos del seculos! Amen”.

¹³Alora un del vinti-quatro ancianos me demandava: “Qui es istes qui es vestite in albe? Unde ille veniva?”. ¹⁴E io le diceva: “Mi senior, tu cognosce le responsa!”. E ille me diceva: “Istes es illes qui moriva^[3] durante le grande tribulation. Illes lavava lor robas in le sanguine del Agno e los rendeva albe. ¹⁵Isto es le ration quia illes sta coram le throno de Deo e le serve jorno e nocte in su Templo. Ille qui sede sur le throno les dara protection in su habitation ipse^[4]. ¹⁶Illes nunquam plus habera fame o sete; illes nunquam plus essera adurite per le calor del sol, ¹⁷quia le Agno, qui es sur le throno, essera lor Pastor. Ille les conducera ad fontes de aqua de vita. E Deo abstergera omne lacrima ab lor oculos”.

Notas

1. In greco: “le filios de Israel”, normalmente es un idiotismo que se refere al Israelitas como entitate ethnic. Tamen, multe eruditos comprende iste expression in iste contexto como referente se al christianos, e non al Israel ethnic.
2. O “diceva”.
3. Litt. “qui veniva”.
4. Litt. “extendera su tenta super illes” es normalmente un idiotismo pro habitar con alicuno, ma hic, combinate con le preposition ἐπί (epi, “super”) le idea es extender su protection, custodiar in le domo o templo.