Biblia/Nove Testamento/Romanos/Romanos 1

Romanos

1

Salutation

¹Paulo, servo^[1] de Jesus Christo, appellate a esser apostolo, appartate pro le Evangelio de Deo, ²que ille habeva promittite^[2] per su prophetas in le Sancte Scripturas, ³concernente su Filio, qui nasceva del descendentia de David secundo le carne, ⁴ qui esseva declarate Filio de Deo con potentia secundo le Spirito Sancte^[3] per su^[4] resurrection del mortos, Jesus Christo, nostre Senior. ⁵Per le medio de ille nos recipeva le gratia e le apostolato pro promover le obedientia del fide in tote le nationes^[5] pro amor de su nomine. ⁶Vos alsi es inter illes, appellate a pertiner a Jesus Christo^[6]. ⁷A tote le amates de Deo qui es in Roma, appellate a esser sancte: Gratia e pace a vos de Deo nostre Patre e le Senior Jesus Christo!

Le desiderio de Paulo de visitar Roma

⁸In prime loco, io regratia mi Deo per Jesus Christo pro vos omnes, proque ubicunque^[7] se parla^[8] de vostre fide. ⁹Proque Deo, le qual io servi in mi spirito per predicar le Evangelio de su Filio, es mi teste, que io incessantemente face mention^[9] de vos ¹⁰e io semper pete in mi preces si forsan nunc finalmente io succedera, si Deo lo vole, a visitar vos. ¹¹Pois que io desidera ardentemente vider vos pro impartir vos alicun donos spiritual pro reinfortiar vos, ¹² a dicer, quando io essera inter vos, nos pote esser reciprocamente consolate per le fide commun, vostre e mie. ¹³Io non vole que vos ignora, fratres e sorores, que io sovente intendeva venir a visitar vos - ma usque a nunc io esseva impedite - a fin de obtener alicun fructo anque inter vos, como jam il eveni inter le altere gentes^[10]. ¹⁴De facto, io ha un obligation tanto verso le grecos como verso le barbaros^[11], tanto verso illes qui se reputa intelligente como verso le ignorante. ¹⁵Assi io es anxiose de proclamar le Evangelio anque a vos qui vive in Roma.

Le potentia del Evangelio

¹⁶Io non me avergonia del Evangelio, pois que illo es le potentia de Deo pro le salvation de tote illes que crede, primo del Judeos e pois alsi del grecos^[12]. ¹⁷Pois que le justitia de Deo es revelate in le Evangelio de fide in fide, sicut il es scribite: Le justo per fide vivera^[13].

Le condemnation del injuste

¹⁸Le ira de Deo se revela de facto ex le celo contra omne impietate e injustitia del homines qui supprime le veritate per lor injustitia. ¹⁹Pois que lo que on pote cognoscer concernente Deo es evidente^[14] a illes, nam Deo lo rendeva evidente. ²⁰De facto, desde le creation del mundo su attributos invisibile - su eterne potentia e natura divin^[15] - se pote clarmente vider, pois que on pote comprehender los per le medio del creato^[16]. Assi illes es inexcusabile. ²¹Ben que illes cognosceva Deo, illes non le honorava^[17] como Deo, ni le regratiava, ma illes deveniva futile^[18] in lor rationamentos^[19] e lor corde insensate esseva obscurate^[20]. ²²Ben que illes assereva esser intelligente, illes deveniva insensate, ²³e excambiava le gloria del Deo immortal con un imagine in le forma de esseres human mortal, de aves, de quadrupedes^[21], o de reptiles.

²⁴Per consequentia, Deo les abandonava^[22], in le desiderios de lor cordes, al impuritate, a dishonorar lor proprie corpores inter se. ²⁵Illes excambiava le veritate de Deo con le mentita e illes adorava e serviva le creatura in loco del Creator, le qual es benedicite semper! Amen.

²⁶Pro iste ration Deo les abandonava a dishonorabile^[23] passiones. De facto lor feminas excambiava le relationes sexual natural^[24] con le innatural^[25]. ²⁷In le mesme maniera le homines alsi abandonava le relationes natural con feminas e se inflammava de passion le uno pro le altere. Homines committeva actos vergoniose con homines e recipeva in se mesme le castigamento correspondente^[26] a lor error.

²⁸In ultra, durante que illes non reputava digne de consideration recognoscer Deo, Deo les abandonava a un mente depravate^[27] a facer lo que non debe esser facite^[28]. ²⁹Illes es plen de omne sorta de injustitia, perversitate, avaritia, e malitia. Illes es plen de invidia, homicidio, contention, deception, hostilitate. Illes es commatres, ³⁰calumniatores, inimicos^[29] de Deo, insolente, superbe, arrogante, inventores de omne sortas de mal, disobediente al genitores, ³¹insensate, indigne de fiducia^[30], sin affection natural^[31], sin misericordia. ³²Ben que illes cognosce plenmente le juste decreto de Deo que illes qui practica tal cosas merita le morte, illes non solmente face los, ma approba^[32] alsi illes qui los face.

Notas

1. O “sclavo”, “servitor”.
2. On pote inserer hic “previemente”.
3. O “Spirito de sanctitate”.
4. O “le”.
5. O “ inter tote le Gentiles”
6. O “appellate de Jesus Christo”.
7. O “in tote le mundo”.
8. O “se face cognoscer”, “es proclamate”.
9. O “rememora”.
10. O “Gentiles”.
11. Illo es, illes qui non es grec ni pro nascentia ni pro cultura.
12. Illo es, illes qui non es judee.
13. Citation de Habakkuk 2:4.
14. O “manifeste”, “clar”.
15. O “divinitate”.
16. O “de lo que esseva facite”.
17. O “glorificava”.
18. O “van”.
19. O “pensamentos”.
20. O “se obnubilava”.
21. Possibile allusion a Psalmo 106:19-20.
22. Possibile allusion a Psalmo 81:12.
23. O “degradante”, “vergoniose”.
24. O “uso natural”.
25. O “contra-natura”.
26. O “pena debite”.
27. O “perverse”, “reprobate”.
28. O “facer cosas improprie”.
29. O “odiator”.
30. O “infractores de promissas”.
31. O “sin amor”.
32. O “consenti”.