Biblia/Nove Testamento/Romanos/Romanos 15

Romanos

15

Exhortation al forte de adjutar le debile

¹Nos, qui es forte, deberea supportar le defectos del debile, e non solmente complacer nos mesme. ²Cata uno de nos debe agradar a su proximo in lo que es bon pro su edification. ³De facto, mesmo Christo non complaceva a se mesme, ma como il es scribite: “Le insultos de qui me insulta cadeva sur me^[1]” ⁴Pois que tote lo que esseva scribite in le tempores passate esseva scribite pro nostre instruction, a que per le patientia^[2] e per le incoragiamento^[3] del Scripturas nos velle haber sperantia. ⁵Ora, que le Deo del patientia e del consolation concede vos un mesme sentimento^[4] conforme a Christo Jesus, ⁶a que unanime, con un sol voce, vos glorifica Deo, le Patre de nostre Senior Jesus Christo.

Exhortation al acceptation mutual

⁷Ergo, accepta^[5] le unes le alteres, justo como Christo recipeva vos^[6], pro le gloria de Deo. ⁸Pois que io dice vos que Christo deveniva un servitor del circumcisos^[7], in nomine del veritate^[8] de Deo, pro confirmar le promissas date al patriarchas^[9], ⁹a que le gentes va glorificar Deo pro Su misericordia. Como il esseva scribite: “Assi io confessara^[10] ante tote le nationes e io cantara laudes a Tu nomine^[11]”. ¹⁰E ancora: “Allegra vos, gentes^[12], con Su populo^[13]”. ¹¹E de novo: “Lauda le Senior, tote vos le gentes, e que tote le populos le lauda^[14]”. ¹²E ancora Isaia dice: “Le radice de Jesse venira, venira qui se elevara a governar le nationes^[15]: in ille tote le nationes sperara^[16]”. ¹³Ora, que le Deo del sperantia plena vos, credente in Ille, de omne gaudio e pace, a que vos velle abundar in le sperantia per le potentia del Spirito Sancte.

Le motivation de Paulo in scriber iste epistola

¹⁴Quanto a vos, fratres e sorores mie, io es plenmente convincite que vos es plen de bontate, plen de omne cognoscentia, capabile alsi de admonestar le unes le alteres. ¹⁵Io, tamen, ha scribite vos plus audacemente super alcun cosas pro rememorar vos de illos, a causa del gratia que me esseva date per Deo ¹⁶de esser un ministro de Deo inter le gentes. Io servi le Evangelio de Deo como un sacerdote, a que le offerta que io face del gentes sia agradabile e sanctificate per le Spirito Sancte.

¹⁷Ergo, in Christo Jesus, io ha trovate un ration pro vantar me in le cosas que se refere a Deo. ¹⁸Proque io non hardirea de parlar si non super lo que Christo compliva per mi medio pro le obedientia del gentes, con le parola e con le obra, ¹⁹in le poter de signos e prodigios in le poter del Spirito de Deo, tanto que ab Jerusalem e circum illo usque al Illyrico, io predicava le Evangelio de Christo in tote su plenitude. ²⁰Per iste maniera io aspirava predicar le Evangelio non ubi Christo esseva jam cognoscite pro non edificar super le fundamentos ponite per alteres ²¹ma, como il es scribite: “Qui nunquam audiva in re Ille videra, e qui non habeva unquam audite comprendera^[17]”.

Le intention de Paulo de visitar le romanos

²²Pro iste ration io esseva multe vices impedite de venir a vos, ²³ma nunc, durante que il non ha plus placia pro me in iste regiones e durante que io habeva per multe annos le grande desiderio de venir a vos, ²⁴quandocunque io vadera in Espania, io spera passar a visitar vos e que vos me adjuva a continuar mi cammino, de post haber gaudite un poco vostre compania. ²⁵Ora, tamen, io vade a Jerusalem pro le servicio del sanctos, ²⁶pois que Macedonia e Achaia se complaceva de facer un collecta pro le povres inter le sanctos qui es a Jerusalem. ²⁷Si, illes se complaceva de facer lo. De facto illes es in debito con illes pois que si le gentes traheva grande profito de lor benes spiritual, illes es alsi obligate a servir le sanctos con lor benes material. ²⁸Ergo, quando io consignava isto e poneva mi sigillo super iste lor fructo, ante a ir a Espania, io passara a visitar vos. ²⁹Io sape que quando io venira a vos, io venira in le plenitude del benediction de Christo. ³⁰Ora io exhorta vos, fratres e sorores, per le Senior nostre Jesus Christo e per le amor del Spirito, de accompaniar^[18] me con preces fervide a Deo in mi favor, ³¹a que io sia liberate de illes qui es disobediente in Judea, e a que mi servicio^[19] a Jerusalem sia acceptabile al sanctos, ³²a que io, per le voluntate de Deo, pote venir a vos con gaudio e trovar apud vos un reconfortante reposo. ³³Ora, que le Deo del pace sia con vos. Amen.

Notas

1. Citation de Psalmo 69:9.
2. O “perseverantia”.
3. O “consolation”.
4. O “unitate le unes con le alteres”.
5. O”recipe”
6. O “nos”.
7. Litt. “del circumcision”.
8. O “pro confirmar le”.
9. O “patres”.
10. O “te regratiara”.
11. Citation de Psalmo 18:49.
12. O “Lauda le Senior, vos, tote le nationes! Applaude Le, tote vos estranieros!”
13. Citation de Deuteronomio 32:43.
14. Citation del Psalmo 117:1.
15. O “le gentes”.
16. Citation de Isaia 11:10.
17. Citation de Isaia 52:15.
18. Litt. “a luctar insimul a me”.
19. O “ministerio”.