Biblia/Nove Testamento/Romanos/Romanos 6

Romanos

6

Le libertate del christiano ex le domination del peccato

¹Que dicera nos, alora? Esque nos debe remaner in le peccato a que le gratia va abundar? ²Absolutemente no! Como poterea nos qui moriva al peccato, viver ancora in illo? ³Esque vos non sape que tote illes qui esseva baptisate in Christo Jesus, esseva baptisate in su morte? ⁴Ergo, nos esseva sepelite con ille per medio del baptismo in le morte, a fin que sicut Christo esseva resuscitate del mortos per medio del gloria del Patre, assi nos va viver un nove vita^[1].

⁵Pois que si nos esseva unite a ille in maniera simile a su morte, nos certemente essera alsi unite in maniera simile a su resurrection. ⁶Nos sape que nostre vetule homine^[2] esseva crucifigite con ille a que le corpore del peccato non domina plus super nos^[3] de sorta que nos non sia plus sclavos del peccato. ⁷(Proque alicuno qui moriva esseva liberate del peccato).

⁸Ora, si nos moriva con Christo, nos crede que nos alsi vivera con ille. ⁹Nos sape que Christo resuscitava del mortos e ille non morira plus. Le morte non pote plus dominar le. ¹⁰A causa del morte que ille moriva, ille moriva al peccato un vice pro semper, ma le vita que ille vive, ille lo vive pro Deo. ¹¹Assi considera vos mesme morte al peccato, ma vivente pro Deo in Christo Jesus.

¹²Ergo, non permitte al peccato de regnar in vostre corpore mortal usque a obedir a su desiros^[4], ¹³e non offere vostre membros al peccato como instrumentos a usar al servicio del injustitia, ma offere vos mesme a Deo como sacrificio vivente depost haber morite, e vostre membros a Deo como instrumentos al servicio del justitia. ¹⁴De facto, le peccato non habera plus dominio super vos, proque vos non es plus subjecte al Lege, ma subjecte al gratia.

Le credente al servicio del gratia

¹⁵Que dicera nos, alora? Esque nos va peccar proque nos non es plus subjecte al Lege ma al gratia? Absolutemente no. ¹⁶Esque vos non sape que si vos presenta vos mesme como servos obediente, vos es servos de ille al qual vos obedi, o del peccato con le resultato de morir, o del obedientia, con le resultato del justitia? ¹⁷Sia regratiate Deo, tamen, que ben que vos esseva servitores del peccato, vos obediva de tote corde a ille forma^[5] de doctrina^[6] que esseva vos confidite, ¹⁸e depost haber essite liberate del peccato, vos deveniva servitores del justitia. ¹⁹(Io parla in terminos human a causa del debilitate de vostre carne^[7]). Proque in le mesme maniera con le qual vos presentava vostre membros como servitores del impuritate e del iniquitate^[8], (e isto conduceva vos a major iniquitate), assi nunc vos presenta vostre membros como servitores del justitia in vista del sanctification.²⁰Pois que quando vos esseva servitores del peccato, vos esseva libere in relation al justitia.

²¹Qual fructo, alora, vos recoltava ab ille cosas del quales vos nunc ha vergonia? Pois que le fin de ille cosas es le morte. ²²Nunc, tamen, habente essite liberate del peccato e rendite servitores de Deo, vos obtene como fructo le sanctification e como fin le vita eterne. ²³Pois que le paga^[9] del peccato es le morte, ma le dono de Deo es le vita eterne in Christo Jesus nostre Senior.

Notas

1. O “va camminar in novitate de vita”.
2. Nostre vetule natura human characterisate per le peccato.
3. O “sia rendite inefficace”, “sia destruite”.
4. O “concupiscentia”.
5. O “typo”, “modelo”.
6. O “inseniamento”.
7. O “a causa de vostre limitationes natural”.
8. O “anomia”.
9. O “salario”.