Biblia/Nove Testamento/Timotheo/2Timotheo 2

Secunde epistola a Timotheo

Capitulo 2

Servir fidelmente nonobstante le difficultates

¹Tu, dunque, filio mie, sia forte in le gratia que es in Christo Jesus. ²Lo que tu audiva ab me in presentia de multe testes, confide lo a personas fidel qui sia competente alsi a inseniar lo a alteres. ³Prende tu portion de suffrentias^[1] como un bon soldato de Jesus Christo. ⁴Nemo in le servicio militar se imbrolia in questiones del vita quotidian, alteremente ille non placerea a qui le recrutava. ⁵In ultra, si alicuno compete como un athleta, ille non esserea coronate como vincitor si ille non compete secundo le regulas. ⁶Le agricultor qui labora durmente deberea esser le prime a reciper su parte del recolta. ⁷Considera lo que io dice e le Senior te dara le intelligentia necessari a comprender toto.

⁸Rememora Jesus Christo, resuscitate ab le mortos, descendente de David; tal es mi evangelio, ⁹pro le qual io suffre afflictiones usque al puncto de esser imprisionate^[2] como un criminal, ma le parola de Deo non es imprisionate. ¹⁰Assi io supporta toto pro amor de illes que Deo seligeva^[3], de sorta que illes alsi obtene salvation in Christo Jesus e su gloria eterne. ¹¹Certe es iste parola: Si nos mori con ille, nos alsi vivera con ille. ¹²Si nos ha constantia, con ille alsi nos regnara. Si nos le renega, ille alsi renegara nos. ¹³Si nos es infidel, ille remane fidel, pois que ille non pote renegar se mesme.

Le false maestros

¹⁴Rememora a illes iste cosas e adjura les coram Deo non facer disputas de parolas. Isto non da alicun beneficio, ma solmente causa le ruina de illes qui los audi. ¹⁵Face omne effortio de presentar te mesme coram Deo como un obrero de confirmate valor qui non debe avergoniar se, le qual insenia^[4] rectemente le parola del veritate. ¹⁶Ma evita le profan commatrage, proque illes qui se ingagia in isto progrede semper plus in le impietate, ¹⁷e lor parola diffunde su infection como gangrena. Hymeneo e Phileto se trova in iste condition. ¹⁸Illes se disviava del veritate in dicer que le resurrection jam eveniva, e illes sappa assi le fide de alicunes. ¹⁹Le solide fundamento de Deo, tamen, remane firme e illo porta sur se iste sigillo: “Le Senior cognosce illes qui le pertine^[5]”, e “Quicunque confessa^[6] le nomine del Senior debe averter se del mal”.

²⁰Ora, in un domo sumptuose^[7] il non ha solmente pottos^[8] de auro e de argento, ma alsi pottos de ligno e de argilla. Alcunes es destinate a un uso nobile, alteres a un uso ignobile^[9]. ²¹Assi, si un persona se conserva pur de ille cosas, ille essera un vaso nobile, sanctificate, utile a su domino, preparate pro omne obra bon. ²²Ma tu, averte te ab le passiones juvenil e perseque le justitia, le fidelitate, le amor, e le pace in compania de tote illes qui con corde pur invoca le Senior. ²³Ma rejecta le controversias^[10] stulte e insensate, proque tu sape quanto illos genera conflictos interne^[11]. ²⁴Ora, le servitor del Senior non debe ingagiar se in disputas inflammate^[12], ma debe esser gentil^[13] verso omnes, apte a inseniar, patiente, ²⁵e apte a corriger le oppositores con mansuetude^[14], in le sperantia que Deo concede les de repentir se pro recognoscer le veritate, ²⁶e que illes se libera ex le trappas del diabolo in le quales ille les tene in captivitate pro facer su voluntate.

Notas

1. O “Supporta tu alsi le suffrentias”.
2. O “incatenate”.
3. O “del electos” (a salvation).
4. O “del electos” (a salvation).
5. O “illes qui es sue”, citation de Numeros 16:5.
6. O “nomina le nomine del Senior”.
7. O “grande”.
8. O “vasos”.
9. O “dishonorabile”.
10. O “questiones”.
11. Illo es, in le ecclesia.
12. O “non debe contender”.
13. O “moderate”.
14. O “amabilitate”.